قفلت من رماح وبقيت بتصفح في النت ،، جاتني ريم قالت لي جيلا تعالي شوفي علا دي مالا ،، اتخلعته قلت ليها علا مالا ،، قالت لي والله من جات من المدرسة ملاحظة ليها ما ياها من قبيل دخلت ما طلعت من الاوضة ،، و ما الليلة ليها فترة ،،
قمته جيت سرعة لقيت باب الاوضة مقفول ،، استغربته علا ما من عوايدا تقفل الباب فتحتو علي طول ودخلته ،، هي من شافتني اتخلعت وفي حاجة حشرتها تحت المخدة سريع ،، اتعصبته في وقتها وقلت ليها علا دخلتي شنو تحت المخدة ،،
قالت لي ولا شي
قلت ليها اوعك تكذبي علي انا شفتك وجيت عليها جدعت المخدة لقيت ورق رفعتو وبقيت بفتح فيه😮😮 هجته فيها من دون احس دا شنو يا علا دا شنو وشغالة اقلب في الورق..
قعدت تبكي وما ردت علي،،
ما قدرت اتحكم في روحي قلبي قال لي لمي فيها دق ،، قلت ليها ياتو يوم كنتي بتسقطي في المواد ولا مادة جايبة فيها درجة نافعة وضربتها بالورق ،، حتي القران جايبة عشرة ،، درجاتك زي الزفت ،، لميت فيها نهزير وهي قعدت تبكي زيادة ،، وجعت لي قلبي لانها ما حصل كانت درجاتها كعبة كدا ،، مشيت شلت شنطتها وكبيتا كلها في السرير ،، نص الكراسات ماف ،، فتحتهم بالواحد لقيتها لا كاتبة لا مصححة ولا فيهم جلادات،، وفي كراسات الاساتذة كاتبين ليها فيه استدعاء ولي الامر ،،
سجمي عاينت ليها قلت ليها من بتين الاستدعاء دا ولشنو ما جيتي قلتي لينا ،، ابت ترد علي وحلفت ما تتكلم معاي ،، ريم جاتني وقالت لي يا جيلا براحة عليها ،، قلت ليها براحة شنو ياريم تعالي شوفي الاهمال الحاصل دا من بتين علا بتهمل قرايتا لما تصل للمرحلة دي ،، ريم ساقتني وجينا بره قالت لي معليش يا جيلا كدي بي كوراكك دا بتزيدي عنادا اكتر امشي بكرا المدرسة وشوفي الموضوع ،،
جيت اوضتي وبقيت بستغفر بس تاني قلت الله يلعن الشيطان انا لشنو بحاسب في علا دا كلو مني بقيت مهملاها ولا شغالة بيها ،، دي وصية امك ليك يا جيلا💔😢
بس انا اسوي شنو ولا شنو بناتي براهم بقن مجنناتني والجامعة والشغل ،،احيي انا ،، لكن دا برضو ما سبب انا اهملت علا نهائي بقيت ما شغالة بيها ،،
نمته زعلانة وتاني يوم صحيت بدري الحق امشي مع علا المدرسة ،،
جينا سوا وجيت مكتب المديرة ،، قلت ليها انا جيلا ولي امر الطالبة علا بتقرا في سنة سادسة ،، قعدته وبقينا نتكلم قالت لي ملاحظة في الايام الاخيرة انو علا الشكاوي بقت عليها كتير
ما قاعدة تجي كانت علي الطالبة دي شكوي ،،
قلت ليها شكاوي من اي نوع؟
قالت لي من الاساتذة سوي في الزي المدرسي البتجي بيه ما نضيف ، او مشرط ، ما بتنتبه في الحصص ما قاعدة تشارك ،، مابتكتب ولا بتصحح ،، درجاتها متدنية بقت ،،واحيانا ما بتجي المدرسة ،،
الصراحة نحن عملنا مجلس وناقشنا فيه الحتة دي واديناها ورقة استدعي توديها لي ولي امرها عشان نشوف الاشكال وين ..
عرفنا انو والدتها اتوفت قريب البركة فيكم..
قلت ليها البركة في الجميع،،
قالت لي نحن في المدرسة عندنا ارشاد نفسي بعد مرات بتواجهنا الحاجات دي،، لو استدعي الامر ممكن نساعدك في الحتة دي،،
قلت ليها لالا ما محتاج انا بحل الموضوع ان شاءالله تسلمي يا استاذة علي التفهم،،
طلعت من المدرسة وراسي بقي كبيييير من الكلام السمعتو مصدومة مصدومة ما متخيلة دا كلو حصل من علا ،، علا بقت تدس مني وهي زمان كانت اي كبيرة وصغيرة بتجي جارية تكلمني بيهم حتي اسرار صاحباتها ،، هسي لا جابت لي ورقة استدعي لا غيرو،،
وكمان مرات ما بتجي المدرسة قلبي شححح سوي كدا اتوترته شديد واتزكرته روحي زمان ايام الثانوي نفس الفكرة ،، لالا يا جيلا زحي الشك دا من راسك علا لسه صغيرة زاتا ما بتعرف الحاجات دي ،،
طيب هي صغيرة اي بس اولاد الحرام ما صغار😢💔
بقيت بتكلم براي جيلا شنو اطردي الافكار دي من راسك مافي حاجة من دي .. اسوي شنو هسي لو كلمت حازم ما بضمن تصرفو عارفاه صعب وانا ما عايزة ادخل في علا ضغط نفسي لاني مجربة الحاجة دي ،، لقيت نفسي بتصل بي رماح عمل فيني مشغول،، بعمل فيني مشغول من الصباح مالو وفجأة اتزكرت ليك موضوعنا واااااي الليلة وووب رماح جا لي حازم ولا لسه ،، جري ركبت العربية وجيت علي البيت كان اشوف ليك عربية رماح واقفة ،، قلبي من جوه بقي دق دق ددق دقق طوالي في حالة التوتر دي ،، مع وقفتي هم جو طالعين💔💔😢 خلقتهم الاتنين لما تعايني ليها ما مطمنة نهائي ،،
رماح قال لي السلام عليكم ،، وودع حازم واشر ليه بي يدو كدا زي علامة التلفون وعمل ليه بي يدو سلام وركب عربيتو وبوووو مشي،،
اجي ياالكدا انا بقيت زي الاطرش في الزفة ،، في عملية رماح السلم علي كدا وعمل روحو ما بعرفني نهائي ،،
حازم قال لي مشيتي وين من الصباح،، قلت ليه مشيت مدرسة علا ،، قال لي مالهم في شنو؟
قلت ليه ابدا في اجتماع ل اولي الامر عندهم ورسلو لي استدعي مشيت اشوفهم ،،
طبعا حارقني الموضوع عايزة اعرفو لكن وحاتكم حازم غتاته السنين عليه ولا هبب لي ودخل جوه،،
جيت مسافة جهزت اكلت بناتي وحممتهم وغيرت ليهم حتي فضيت اتصلت بي رماح ما رده ،، قلت خلاص معناها مية مية حازم ما وافق وقال لي رماح كلام ما ياهو والله قلبي وجعني وجع ساعتها واي شي مسخ لي ،، بقيت منتظرة علي نار رماح يتصل بي ،،
تاني يوم جا برضو لا برد علي لا بتصل ،، تالت يوم ،، رابع يوم ،، القلق والتوتر عايزات يكتلوني كانو ،، في الاخر قلت في نفسي باين يا جيلا انو رماح صرف نظر عنك ما هو ما ممكن اهلو زاتهم يوافقو ليه يعرس واحدة متزوجة وبي اولادا مستحيل دا ،، نصيبك كدا يا زولة ،، كنت عايزة اسال حازم لكن وقت شفتو ما جاب لي سيرة ،، قلت افهميها براك الموضوع واضح فركش و حازم رفض رماح معناها ،،
حاولت انسي الفكرة والايام دي قبلت علي علا بقيت اهتم بيها شوية براجع معاها واتقرب منها وبسألا بجيب ليها الونسة من فوق ،، مرة قلت ليها لاقتني اليوم داك ابلتكم بتاعت العربي واشتكت من هيام المعاكم دي قالت ما بتجي المدرسة ،، بتغيب مالا البت دي عندهم شي في البيت ولا حاجة هي صاحبتك مش زمان كنتي بتجيبي سيرتا قلتي بتجيب معاها في الشنطة روج بتعملو وبتشيل حواجبا لما تمشي مع امها الكوفير وبتكوي شعرها ،،
زمان علا كانت بتحكي لي كدا حتي مرة اتشبكت فيني الا اوديها الكوفير اعمل ليها الحاجات دي بس وقتها نهرتها وقلت ليها لما تبقي للحاجات دي ابقي سويهم ،،
قامت علا ردت لي قالت لالا يا جيلا هيام بتكذب علي ناس بيتهم وبتطلع الصباح بس ما بتجي المدرسة،،
قلت ليها سجمي بتمشي وين ؟
قالت لي بمشو يلفو ساي السوق شارع النيل اي مكان ،، قلت ليها وانتي عرفتي من وين؟
تممم سكتت ،، عرفت انها غيابا داك معناها البت الاسمها هيام دي ساقتها ،،
قلت ليها انتي مشيتي معاها صح ،،
ما ردت علي برضو،،
قلت ليها اسمعيني يا علا الكلام دا ما صاح منك انتي هسي مفروض تنتبهي لي قرايتك وترجعي زي زمان تجي في العشرة الاوائل وتجتهدي عشان تجي الاولي ونجيب ليك هدايا والناس يقولو بت طيبة شاااطرة ،، ولا انتي عايزة تزعلي امي منك في قبرها،،
قعدت تبكي ووقعت في حضني قالت لي لالا ما عايزة ازعلا انا اشتقت ليها يا جيلا ،، امي كانت بتغسل لي هدومي وبتكويهم لي وبتقريني وبتسرح لي واي شي ،، لما قالت لي كدا اتاكدته فعلا اني اهملت علا نهائي لاني ما كنت شغالة بي حاجاتها ديل ،، قلت ليها معليش يا علا انا من الليلة بعمل ليك اي حاجة حاضر بس اوعديني اي شي يحصل ليك كلميني والاسمها هيام دي اوعك تطلعي معاها بره المدرسة انتي فاهمة ،، قالت لي حاضر ،،
جيت داخلة غرفتي واتصلت بي بتاع الترحيل اول شي لغيتو وقررت اني تاني حا اوصلها واجيبا براي،،
عدي اسبوع ورماح مختفي ،، اتصلت بي ايمان وادتني خبر حلووو قالت لي ما شفتي الفساتين بعد انتهو رهيبات رهيباااات حا تتصدمي لما تشوفيهم شكلنا حا نعمل المعرض ان شاءالله 😍😍😍 ما صدقته وكنت عايزة اصرخ بطول حسي قلت ليها الحمدلله الحمدلله ،، كنت عايزة اسالا من رماح بس شفتها شينة ونسيت الفكرة ،، والحمدلله ما سالتها لانها قالت لي هي بالكتير جاية الاسبوع الجاي واني ورماح لازم نشوف لينا مكان نأجرو ونبدا نظبطو للمعرض ،، وانتهت مكالمتنا علي كدا...
حسيت بي روحي منفسنة وما لاقية لي موضوع عملت لي كباية شاي وجيت فتحت التلفزيون ختيت كراع في كراع زي الدايرة اعمل يوغا😂 احضر لي مسلسل بدل الجفاف العاطفي الفيه دا ،، قبل اتحكر كويس جا حازم قال لي عايزك في موضوع اعملي لي كباية شاي وتعالي ،، حازم دا مثال للارهاب للرعب وحات الله لو طفشته من البيت بكون بسببو ،، صاح اتغير تصرفو معاي بعد وفاة امي بقي حنيين لكن برضو مرات عندو التعنت داك😂😅 سويت ليه الشاي وجيت داخلة الصالون اديتو الكباية ،، طبعا كان صاري وحضرتي بقيت مشحوطة زي عمود الكهربا ما فيني اعصاب بقت والله ،، قال لي بكرا في ناس جايين تعارف وبنحدد مواعيد العرس وكلو ان شاءالله ،،
قلت ليه شنو انت بتوافق علي زول انا لا بعرفو لا شفتو رجعت لي قلة ادبي ديك ،، اصلا من شب علي شي شاب عليه 😂 ،، قال لي يابت اتلمي مالك ،، اتخلعته صاح لكن بديت اعمل ليه دور الدراما موته حيلي ورقرقت عيوني ونقطة دموعي ،، فجاة اسمع ليك ريم جات وشغالة تضحك تضحك دايرة تقع من شدة الضحك وقالت لي حازم ياخ حرام عليك والله جيلا حننتني ،، كلمها كفاية البت بتصدم ،، ياخ دا رماح الجايين اهلو بكرا ،،
واااي وااااي اتهبشته واتربشته والفرحة بقت ما لاماني وقتها ،، حازم زاتو اتفقع بالضحك ،، قلت ليهم يا عواليق يا ما فيكم فايدة تسوو فيني انا كدا كويس والله اتسداها فيكم ،، حازم رد علي قال لي عشان دي الاصول يا جيلا ،، سكته بعدها وفهمتو هو قصد شنو ،، قلت ليه يعني انت رضيان هسي ،، قال لي رضيان وربنا يسعدكم يارب ،، والزول ودالناس هو البجي بالباب وانا اتكيفت من رماح للاخر لانو كدا قدرك واحترمك وعمل ليك قيمة ،،
كلامو وجعني وفرحني في وقت واحد وحسسني بي راحة ،، قلت ليه طيب لشنو عملت رايح الاسبوع الفات وما قلت لي شي ،، قال لي هي الحكاية سايبة كدا انا اخوك ومسؤول منك ،، اول لما مشيت سألت عنو واستفسرته واطمنت انو كويس ومن اسرة كويسة ،، حتي اديتو الاوكي ،، طبعا اتبسطه بطريقة جاتني عزة كدا ،، من جواي اصبر لي يا رماح حرقت دمي كان ما حرقت دمك ما اخليك ،، جيت داخلة لقيت سبعة مكالمات منو حلفت ما ارد ،، مش عامل روحو تقيل ،،
اها بقيت منتظرة بكرا يجي بي فارغ الصبر ،، والحمدلله اليوم عدي ومن الصباح قمته نفيض ونضافة وتمير ولميع ،، ريم بقت حامل زحيتا بعيد كان حصلت ليها حاجة حازم بقتلني بحبها اكتر مني انا اختو 😂😅 مسكتها البنات بس ،، الله ريحني من الكوافير لاني من الناحية دي اصلا بموووت في المكياجات وبعرف اظبط نفسي ،،
المغرب جا ورماح واهلو شرفونا ،، طلعت ليهم وكنت لابسة فستان كحلي بي دهبي فاري كدا حلات الدنيا علي زي ما بقولو شكار نفسو ابليس😂😅 رماح دا حسيتو مسكو شلل رعاش ظاهر كان مرعوب حنني ،، وكل مرة يعاين لي ،، حسيت بي امو وابوه يعني زي الفي حاجة او زي الجو مجبورين ،، بالذات امو وواحدة من اخواتو انتبهته ليهم ما مرتاحين من شكل وشهم ،، زعلته الصراحة لكن قلت لو ما موافقين ما كانو جو في النهاية انا ما احكم عليهم ساي من بره،، الموضوع عملناه بسيط ما كلمنا زول بس جات امو وابوه واخواتو ونحن كنا برانا بالاضافة لي ابوي وزوجتو وعلا اختي ،،، الخطوبة تمت وحددو العرس بعد اسبوع يعني بعد معرضنا 😍😍 بعد طلعو طوالي جريت صورت الدبلة في يدي ونزلتها في صفحتي وكتبت مبروووك يا انا😍😜 عارفة ما بخلي حركاتي ،، في الوقت دا ربنا وفقنا ولقينا لينا محل اجرناه واشتغلنا نقلتيه برانا بهيناه وصلحناه انا ورماح وايمان ونزلنا منشورات اعلانات في قروبات الفيس ووزعنا منشورات في الشارع وواحدات شلتهم معاي الجامعة ،، اشتغلنا علي روحنا بالجد وتعبنا وغلفنا هدايا تشجيعية للناس البجو وبشترو ،، الليلة كان سادس يوم ياهو الافتتاح وبكرا عرسي💔 بدل اتحبس شغالة ،، كنا متوترين وخايفين انو ما ينجح لكن الحمدلله الناس جاتنا واتفاعلت معانا صاح ما زي كنا خاتين لكن يوم بعد يوم متاكدين اننا حا نتعرف اكتر وعندنا فكرة نشتغل بره السودان ونشارك في مسابقة معمولة للتصاميم لو فزنا فيها حا نطير نروح ...
جيت البيت خليت رماح وايمان في المعرض عشان بناتي ،، دخلته شغلت جهاز الساونا وعملت حمام مغربي وماسكات ،، بعد انتهيت اتجدعته نمته نومة واحدة انا وبناتي ما صحينا الا تاني يوم😍😍
الليلة الجمعة والعقد تم مع الصلاة.. طبعا قليلين الجو من ناس الفريق مع اني رسلت علا كلمت النسوان ،،
اتفقت مع رماح اني حا اجهز من البيت ،، وكان قبلها جاب لي فستان الزفاف هدية قال من ايمان جابتو ليي معاها☺ اول انا كنت معترضة علي الحفلة وقلت عقد بس لكن حسيت اني ظلمت رماح لما قال انو عايز يفرح ويرقص ويعمل حفلة عرسو ،،
اليوم مشي والمساء جا ... تيت تيت تيت سمعت صوت البوري
جاتني ريم الحقي الحقي رماح جا ،، قلت ليها واااي انتي بتقولي في شنو كدي عايني لي انا كدا حلوة الفستان فيني حلوو😭😭 شعري كيف مظبوط ،، خلاص اقرصيني امكن انا بحلم لسه..
ريم قرصتني قرصة صرخته معاها احييي ياخ براحة..
قالت لي قلت ليك مزززة الليلة رماح ما بقدر يثبت بعد يشوفك وقعدنا نضحك ،، حازم جا داخل قال لي ماشاءالله يا عروسة يلا منتظرين بره ،،
جا مطلعني وماسكني من يدي سلمني لي رماح ،،
انا الكان حا يغمي علي طلع احلا وانضف مني😒😒
جينا الاستديو القليل ادب خجلني قدام اخوي صور كلها ما محترمة😅 وانا حالتي اشيل والكز فيه ما خليته ليه عفصة،، لكن عرفتو قصدها لي،،
ركبنا العربية قال لي حلوة كدا مالك ،، قلت ليه عشان بحبك😍
تاني اتزكرته حاجة في بالي قلت ليه انت وقت عارف انو حازم وافق بيك من اول ما جيتو هو ما قال ليك لا لشنو تقالة الدم بتاعتك دي تخليني علي اعصابي ،، قال لي يا مرا اتلمي في واحدة يوم عرسها واحلا يوم زي دا بتشاكل راجلا ،، قلت ليها بعد افهم اوصل،، قال لي ياخ والله انا حازم اشترط علي اني ما اتكلم معاك الا بعد يشاور ابوك والموضوع يتم علي حسب كلامو قال ما عندهم بنات يتكلمو بالتلفون ،، وانا احترمت طلبو لاني لو كنت في محلو والله اعرفي اختي بتتكلم مع ولد كان اكسر راسها،، اتغظت منو شديد قلت ليه يعني شنو ما انا كنت بتكلم معاك يعني ما محترمة مثلا ،، قال لي يوووه يا جيلا ما تفهمي المواضيع غلط .. بقيت صارة ليه😂😂
لما صلنا الصالة ووقفنا في بداية المدخل ومع دخلتنا الاضاءة اتوجهت علينا وصوت اغنية رومانسية اشتغلت حتي بقيت بضحك وبتبسم،، حسيت اني ملكة ماشة علي البساط الاحمر،، لالا حسيت اني سندريلا والله ،، و اني ورماح برانا البنحب بعض ،،
ما كنت شاعرة بي حاجة غير ضغطة يدو القوية الماسكني بيها،، وصوت الاغنية الكانت لي😍😍🎼 بقيت برقص معاها يمين وشمال بتحرك وبرفع في يدي اليمين ....
ﺍﻟﻒ ﻣﺒﺮﻭﻙ ﺯﻓﻴﻨﺎ ﺍﻟﺠﻤﻴﻠﻪ
ﺍﻟﻠﻴﻠﻪ ﺍﻟﻔﺮﺡ ﻟﻴﻠﻪ ﻣﻦ ﺍﻟﻒ ﻟﻴﻠﻪ
ﻗﻤﺮ ﻭﻳﺎ ﺍﻟﺸﻤﺲ ﺟﺎﻟﺲ
ﺭﺑﻨﺎ ﻣﻦ ﺍﻟﺤﺴﺪ ﺣﺎﺭﺱ
ﺍﻟﻠﻪ ﻳﺘﻤﻢ ﻟﻜﻢ ﻓﺮﺣﻪ ﺍﻟﻠﻴﻠﻪ
ﺍﻟﺤﺴﻦ ﻳﺎﻧﺎﺱ ﻇﻞ ﻣﺤﺘﺎﺭ ﺑﻴﻬﺎ
ﺍﻟﺠﻮﺍﻫﺮ ﻭﺍﻟﺬﻫﺐ ﺗﺘﻤﻨﻰ ﻳﺪﻳﻬﺎ
ﺣﻠﻮ ﺛﻮﺏ ﺍﻟﻌﺮﺱ ﻻﻳﻖ ﻋﻠﻴﻬﺎ
ﺍﻟﻌﺮﻭﺳﻪ ﻭﺍﻟﻌﺮيس ﺍﻻﺛﻨﻴﻦ ﺣﻠﻮﻳﻦ
ﺍﻟﺤﻤﺪ ﻟﻪ ﺟﻤﻊ ﻫﺎﻟﺰﻳﻨﻪ ﺑﺎﻟﺰﻳﻦ
ﻭﻣﻨﻚ ﻣﺎﻝ ﻭﻣﻨﻬﺎ ﻋﻴﺎﻝ ﻃﻴﺒﻴﻦ
يتبع
