خلونا نرجع للأحداث ورا شوية لما سامي جاب أم جيلا المستشفي والوقت داك هي لسه ما وصلت ،،
دكتور أمجد جا جاري علي الحالة المستعجلة القالو ليه عليها لما لقي سامي واقف اتخلع وكان قايلها امو ،، بس لما دخل لقي المريضة حد تاني اول مرة يشوفو استغرب طبعا ،، بعدها جا طالع بره وقف اتكلم مع سامي دي منو؟ قال ليه ما بخصك انت كل العليك تعالج مرضاك وانت ساكت ،، العلاقة بين سامي وامجد من زمااان متدهورة ما بطيقو بعض والسبب في طلاق امجد كان سامي لانو قال مستحيل العيب يكون من اختو وطلع امجد رجولتو ما مكتملة وانو ما بخلي اختو تضيع عمرها مع راجل عقيم بعد زواج ليه اربعة سنوات بحجة اختو لسه صغيرة وامجد اكبر منها بي كتير،، سامي قدر يميل راس اختو وفعلا اتطلقت وسفرها بره السودان عشان ما تتواصل مع امجد تاني ،، بس دا ما براه سبب كراهية امجد ل سامي كان..
الكلام بينهم انتهي لحدي هنا ومع دخول دكتور امجد لي حاجة طيبة ،، جيلا وصلت ،،
في اللحظات دي طيبة كانت بتطلع في الروح وبقت تهلوس بي الكلام الحصل بين جيلا وسامي وامجد سمع كل الحصل وقتها بس لسه ما كان شاف جيلا ولا بعرفها ،،
كانت بتجيب في سيرة جيلا كتير وطلبت من امجد يجيب ليها بتها وقالت ليه حلفتك بالخلقك بتي مسكينة وطايشة صغيرة لسه الله يرضي عليك ياولدي انا لا بعرفك لا انت بتعرفني وانت شكلك ود نااااس والدنيا دي بقي ما فيها خير ،، الا اعمل فيني خير وجيب لي بتي جيلا شوفا وين قبلي اموت ،، بعدها دكتور امجد طلع بره ولقي بت قاعدة تبكي اتوقع تكون دي هي واول مرة يشوفا اتخلع بيها بتشبه اختو لي درجة كبيرة زي كأنهم تؤم بقي في شي شاديه ليها من اول مرة [ دكتور أمجد عندو أخت تقريبا في عمر جيلا اسمها ملاك بس مشلولة ما بتقدر تتحرك،، السبب في شللها انها عملت حادث لانها كانت بتحب واحد وقدر يتلاعب بيها وبعد وصل للعايزو قال ليها انتي واحدة رخيصة ما ممكن اعرسك احتمال سلمتي نفسك لي غيري برضو ،، بي الصدمة دي ساقت عربيتها وهي ما واعية لانها خلاص انتهت بعد فقدت اعز حاجة ليها وحصل الحادث تاني ،،
دخلت في غيبوبة وقربت تموت بس ربنا ستر ولطف واتحسنت لكن حصل ليها شلل وكمان حالتها النفسية بقت ما تمام حتي طريقة كلامها بقت فيه تمتمة ،، والدكاترة طلبو من اخوها ما تتعرض لي اي شي مخيف او ممكن يسبب ليها الهلع ،، بعد عدة جلسات مع الطبيبة النفسية اتضح السبب ،، والطبيبة اخطرت دكتور أمجد بالحاصل ومنها حلف انو مستحيل يخلي الاسمو سامي دا الا ياخد حق اختو ،، وفعلا قدر يتزوج اختو بدون حد من اهل سامي يعرف حاجة عن اختو المشلولة دي ،، الشي التاني انو هو ما عقيم ولا حاجة هو كان قاصد ما يجيب اولاد وبدا يشكك في انو اخت سامي السبب في عدم الولادة لما مشو عملو فحوصات قدر يطلع تقرير انها عقيم ،، المصيبة انو سامي ما عوير وساق اختو لي طبيب تاني وعملو فحوصات نفت التقارير بتاعت دكتور امجد وتاني حصل الحصل واتطلقو].
،، دكتور امجد ربط الاحداث سريع وعرف انو البت دي زوجة سامي واتصدم زيادة بتين سامي عرس تاني؟
الحظ وقتها وقف في صف سامي لما جيلا محفظتها وقعت من يدها ساعة وفاة امها هو شالا ،، بقي بخطط لي هدف في نفسو وبسأل وبستفسر وبحوم حوالين جيلا وسامي بدون حد يحس بيه ،، لكن كل شي فشل ليه لما عرف انو جيلا اتطلقت من سامي ،،
الممول الرئيسي لكل خبر ليه كانت جنات البدت تحاول تقرب عليه عشان تتزوجو ،، كانت عاملة روحها صاحبة اخت سامي ما عشان بتحبها ،، لا عشان تعرف منها كل كبيرة وصغيرة عن دكتور امجد وعن سامي وبقت منتظرة اقرب فرصة عشان تحقق هدفها هي كمان ...
كدا الامور وضحت ليكم...
نرجع نواصل الاحداث..
تاني يوم الصباح جيلا صحت بدري نشيطة ومبسوووطة ومعنوياتها مرتفعة ،، اتصل بيها دكتور أمجد من الصباح قال ليها تجيه في المستشفي اول ،، لبست سريع وركبت عربيتها وجات ،، سلمت عليه بس للاسف هو اعتزر ليها قال انو اليوم جدولو طلع ضاغط شديد عندو عمليات كتيرة لكن صاحبو دكتور تاني حا يمشي معاها وهو كمان يدو واصلة مع والد سامي وبعرفو شديد ،، اول جيلا خافت بس قدر يطمنها انو كل شي حا يتم والوظيفة دي من نصيبها ،، المهم طلعو وجات الشركة لقت ليك الجووطة دي كمية شباب جو للمعاينات 💔💔 خلاص بدت تهلوس وقالت مستحيل مع الكمية دي كلها يشيلوني وانا لا عندي شهادة لسه ولا خبرة ولا شي نافع ،، اي زول كان شايل ملف في يدو الا هي 😅😂 ،، الدكتور المعاها طلع تلفونو وعمل اتصال بعدها جات واحدة وقالت ليهم اهلا وسهلا دكتور اتفضل باشمهندس مختار منتظرك ،، انا زي الهبلة مشيت وراه ولا كلمة ما نطقتها كنت بتلفت يمين وشمال في مباني الشركة الحلوة والنضيفة دي ،، جينا لقينا سكرتارية قالت لينا اتفضلو دقيقة بس ،، قعدنا شوية دخلت وجات فتحت لينا الباب ندخل ،، دخلنا وسلمنا وقعدنا ،، عاينت للاسم المكتوب باشمهندس مختار الاسم دا خلاني ارجف وجاني احساس غريب اني بعرفو ،، بس تاني من جواي لالا لالا مستحيل هو براه اسم ابوه كدا انسي انسي يا جيلا وخليك مركزة في الانتي جاية ليه ،،
باشمهندس مختار كان راجل كبير في السن يعني يكون ستين سنة او بداية الستينات بس البشوفو بقول شباب هو طويل وانيق جدا عندو لحية😅 من طريقة كلامو شخصيتو قوية وصوتو بخليك تخاف منو والله ،، فا انا كنت برجف وقتها ،، الوقت الكنت سرحانة فيه هم كانو بتكلمو وانا ما انتبهت خالص معاهم ما كنت فاضية ،، الخلاني انتبه لما نطقو اسم سامي ،، وانا الهبلة لسه بقنع في روحي انو الاسماء دي مجرد تشابه اسماء وبكذب في روحي،،
باشمهندس مختار قال لي الدكتور اعتبر الموضوع منتهي خلاص انت عارف معزتك عندنا ما بنقدر نرفض ليك طلب ،، وقعد يضحك وتاني قال ليه بس انت شد حيلك كدا واستعجل لينا في الموضوع الاتفقنا عليه..
انا كنت بعاين ليهم طبعا ما فاهمة حاجة
فجاة اتلفت علي وعاين لي كويس زي التقول نموزج قدامو وهو بدرس فيه،،
صنيت سااااي
ضغط التلفون وقال لي السكرتارية تعالي،،
طلب منها تسوقني وتعمل لي سي في وملف وتدخلو في الكمبيوتر وتحدد عليه مقبول.
طلعت منهم تاني وجينا مكتب كبير كدا دخلنا قالت لي اقعدي هنا شوية و باشمهندس رماح بجي ..
في سري قلت هو شنو كلهم باشمهندس باشمهندس لينا الله نحن،، غلبني اقعد مكاني قمته اهبش بي جاي وبي جاي وجيت قدام المكتب لقيت صورة شكلو دا باشمهندس رماح اسمو مالو عامل كدا هسي اهلو ديل ما لقو ليه غير الاسم دا وشلت الصورة وااااي قربت افتح خشمي لسه عادتي القديمة ما بطلتها اني ضعيفة قدام الاولاد السمحين😂😅 درستو دراسة حتي يدو عاينت ليها لو فيها دبلة ولا لا ..
بدون انتبه علي اساس المكتب فاضي اتكلمت بي صوت والله طلعته حليووني يا رماح ما زي اسمك...
جاني صوت من وراي ،، وان شاءالله انتي تطلعي حلوة ما زي اسمك،، ساعتها الدم اتجمد في عيوني من شلاقتي واتلفته لقيتو ليك ال في صورة زاتوو😅...
يتبع
