عيوني رقرقو خلاص قلت ليه منو نادين دي يعني اول مرة تجيب سيرتها قدامي؟
قال لي قلت ليك دي الماسكة الفرع بتاع المشروع هنا وقومي يلا جهزي لي هدومي انا حا اقعد كم يوم في مدني ،، قلت ليه ما شايفني برضع في بتك وعايزة اسألو من نادين دي تاني بس تلفونو ضرب ما انتظرني وطلع طوالي .. جاني احساس انها القاشر الاسمها نادين يعني يبقو علي جنات وهي ،، حسيت اني في خطر طوالي شلت تلفوني واتصلت علي البت بتاعت البوست واتفقت معاها حالا ووصفت ليها بيتي ووريتها تجيني بتين ،، كنت عايزة اسافر براي لكن بتي بقت مشكلة لانها لسه صغيرة ما حمل اغيب عنها ،، المهم تاني يوم سامي سافر مدني ،، وزي بالنهار كدا البت جاتني الصراحة اول قلبي كش منها وخفته بالذات لما قالت لي انها برضو بتشوف وبترمي ودع وبتاعت حاجات زي دي ،، خوفتني لكن لما قالت لي دي منو اللافة حوالين راجلك الايام دي،، انا مسكتني ام هلا هلا طوالي في بالي جات نادين الظهرت لي فجاة ،، قلت ليها اقيفي النقدم ليك الضيافة والنظبط قهوتنا لاني بحب الكيف ،، قالت لي عندك مبخر ،، قلت ليها اي ودخلت معاي جوه وريتا البيت وقعدنا في المطبخ شربنا جبنتنا وكفت لي الفنجان قالت لي شوية واقراه ليك ،، في المسافة دي طلعت الودع وقالت لي ارمي بياضك ،، بعدها طلعت من شنطتها كيس فيه رملة وفرشت قطعة وكبتها فرشتها فيها وطب طب بي يدها واستها وطلعت بخور قالت لي دا جاولي وعدني لازم ،، والله انا قلبي كان بدق دق دق بس الفضول الجواي خلاني اواصل في الموضوع دا ،، دخلته جبت ليها خمسين جنيه ختيتا ليها وكش كش كش كشكشتو ورب رمتو انا قلبي طار زاتي معاهم بس تاني اتصلحته في الارض وكتفت رجولي واستمخيت معاها عجبني الموضوع لما ختت البخور بالذات 😂،، قالت لي اجييي اجي اجي دي منو ام البنية ما خالة ليك جهة شغالة تحفر ليك حفر وما مخلياك في حالك ،، قلت ليها دي طليقة راجلي ما بتريدني ،، قالت لي اعملي حسابك منها ناوية ليك ما بتخليك ،، تاني كش كش ورمتو قالت لي اجي يختي انتي محسودة برياااا الناس ما مخلياك في حالك عديل ماسكين سيرتك ليل ونهار ،، قلت ليها اسكتي بس يا نعمة الحمدلله لكن مكرهني حياتي ،، وكش رمتو تاني قالت لي الراجل داير الوليد الا الولدة الجاية هدا ولد ظااااهر ،، قعدت اضحك قلت ليها النبي ظاهر كدي النشوفو ،، قالت لي اي وحاتك ياهو يضحك بس المشاكل بتحصل ما بتريحك ،، تف تف علي قميصي اللابساه قلت ليها ابرا واستبرا ،، قلت ليها كدي شوفي لي البت اللافة حوالين راجلي ،، كش كش هزتو شديد وكشحتو وعاينت مسافة قالت لي الليلة ووووب ووووب عليك عين وصابتك دي ضرة جاياك ،، جسمي برد الساعة ديك ونفسي اتكتم غلبتني القعدة وقمت طوالي قلت ليها اعمل شنو طيب يا نعمة شوري علي ،، قالت لي ما عندك حل الا تربطيه من اي مرا غيرك يعافا ،، جيبي القروش وانا بسافر ليك سنار ولا يهمك ولا ارح بوديك ،، قلت ليها دايرة المشية بس بتي يادوب صغيرة كم شهر عمرها ،، اتفقت معاها وفعلا سلمتها اتنين مليون عشان تربطو لي ما يشوف غيري قلت ليها تتم لي الموضوع سريع لانو مسافر بره السودان ،، الهلاويس بقت تمشي وتجي في راسي اتصلت بيه لقيت تلفونو مشغول جنيتي قامت زيادة وانا نوع لما ما يرد علي التلفون ما بنسي الفكرة لالا بقعد اتصل واتصل لما يرد ،، رجع لي وياريتني ما فتحت الخط دخل شمال فيني طوالي جايط ،، انتي عايزة تجننيني مالك يا ...... ما قلت ليك شغال انا عايزة شنو مني قروش وخليت ليك البكفو وزيادة ،، العربية عندك ،، الاكل مليت ليك التلاجة ،، انا ما فاضي ليك يا جيلا اختيني ياخ زهجت منك عديل ما بتفهمي انتي ،، ستين مرة كلمتك وانا شغال ما تتصلي بي ،، دموعي جرو بس وهو شغال فيني نهير ونبز وقفل الخط في وشي تاني ،، بقيت زهجانة اتصلت بي واحدة من صاحباتي الجداد اسمها ريل ،، هاي هاي وازيووو واهلييين ،، قلت ليها ما تجيني في البيت انا زهجانة والله ما عندي موضوع ،، قالت لي كلمت سامي يسوقك معانا بس قال لينا انك يادوب الولادة والبيبي صغيرة ما بقدر يسوقكم ،، قلت ليها يسوقني معاكم وين؟
قعدت تضحك وقالت لي للدرجة دي من هسي البيبي بقي ينسيك ،، يسوقك معانا بورتسودان نتفسح ،، شفتو اللحظة القالت لي فيها الكلام دا زي الدفروني من الطابق السابع وانا طايرة من فوق بتشهد علي روحي ،،، لحقت نفسي وقلت ليها اي والله كان نفسي بس المرة الجاية وسالتها المشي منو معاكم تاني ،، قالت لي اول اسم نادين وباقي شلتي العرفني بيهم سامي ،، قلت ليها نادين دي منو اول مرة اسمع بيها من سامي ،، قالت لي ياخ دي قصة طويلة نادين دي البيست فرند بتاعت سامي شديد وكلنا كنا متوقعين يعرسها بس عرس جنات كان ،، قلت ليها هي مخطوبة؟
ضحكت وقالت لي منو نادين مستحيل دي ترطبط لانها مفترية وشايفة روحا للاخر يابت دي اكتر واحدة مرطبة فينا القروش دي عندها زي اللعب لعب ،، طبعا ما اوريك زمان سامي كان مكسر فيها بس هي ما كانت شغالة بيه ،، حرقتني الحتة دي قلت ليها والله ،، قالت لي يا بت ها كمان ولا كانت معبراه بس ما عارفة الايام دي شايفاهم بدت صحبتهم ترجع تاني زي اول يلا باي نتكلم بعدين طالعين ناكل وقفلت مني ،،
ايوااا ايوااا كدا يا سامي بتكذب علي وصاحبي عندو وفاة ما مشكلة شفته حبل الكذب قصير كيف ،، عدت اربعة ايام ونعمة رجعت وجابت لي الحاجات قالت لي هاك ديل 16 بخرة تعمليهم صباح ومساء والراجل يكون ماف تتبخري بشوية والباقي تبخري بيه غرفة النوم والبيت ،، ودا بخور سبعة انواع دا لي مدة اسبوع تبخري بيه البيت ولو قدرتي تبخري ليه هدومو بيه تكوني ما قصرتي ،، ودي محاية حاولي كبيها ليه في عصير موية المهم اتصرفي لانها اهم من ديلك دي البتخليه يجيك جاري جري وزي الخاتم في اصبعك وما يشوف مرا تانية ودي ورقة ختيها لي تحت اللحاف جهة برقد ،، اتبسطه منها للاخر واطمنت بعد كدا ،، واديتا باقي قروشها ،، قالت لي لكن دا حل مؤقت حا يفك والزول قال لي الا المدام تجي براها لانو في حاجات انتي لازم تعمليها براك بس انا حكيت ليه ظرفك هسي ،، قلت ليها ما مشكلة بمشي ليه بس بتي تكبر شوية ،، عملت زي ما قالت لي ،، وما طالبني حليفة النصيحة شيخها طلع قوي بس مشو يومين اول مرة بعد ولادتي سامي يرجع يتصل بي براه كدا ويرجع يقول لي حبيبتي واحشاني وانا ما قادر ابعد منك وراجع الليلة لاني ما قادر اعيش بدونك ،، جا راجع المساء وسطه ليه المحاية في العصير وشربا كلها ،، وكانت احلا ليلة زي كاني عروس يادوب ،، ارتحته كدا وحياتي بدت ترجع زي اول قدرت اجيب سامي في حضني تاني وحتي لما سافر كنت مرتاحة لي اخر شي وما شايلة هم ،، بقي ما عندي موضوع فكرت ارجع اقرا وامتحن تاني بس كنت شايفة الموضوع صعب ياخ لاني ما بحب القراية لكن اعمل شنو ،، مشيت جبرت روحي وسجلت تالته من منازلهم ،، وبقيت اقرا ان شاءالله اجيب ستين بدخل خاص القروش وبقت متوفرة عندي تاني ،، الايام والشهور مشت سريع ورهف ماشاءالله بقت مالية لي حياتي كلها وغيرتني كتير شوية بطلت العوارة ديك والمسؤلية بدت تظهر فيني ،، طبعا من سامي سافر امي وعلا جو قعدو معاي ما خلوني براي بعد العملتو في امي بس جد ماف احن من الام يادوب دا وقع لي بعد ولادتي دي ،، لما رهف تبكي ساي قلبي بوجعني ،، عرفت اني عذبت امي عذاب😂 امتحنت السنة والحمدلله جبت 62😂😂 برضو ما بطالة وانا اطول زاتو بالنسبة لي دي كانت زي الجبت 90 ما مصدقة زاتي ،، زغردته زييين ووزعت الحلاوة والبارد عزيت نفسي ،،
في الوقت الانا عايشة في العسل فيه تراهو ما كنت جايبة خبر خطوبة سامي ونادين تمت بره السودان لا من دري لا من شاف وانا بي جاي مطممنة ،، سامي يتصل بي يغشني بي كلمة كلمتين وبي هدايا وقروش ويرسل هدوم والعاب لي بتو وانا مصدقاه ،، رهف بدت تمشي وكانت مالية لي حياتي ،، حتي ما حسيت بالزمن قدمت للجامعة شالوني ادارة اعمال خاص ونزلت جامعة كنت مبسووطة بالعربية واللبس ولما اجي داخلة اي زول يعلق علي بحب الفشخرة طبعا ،، برستيج وشايفة حالي ،، سامي رجع زي ما حاصل شي وكل يوم كنا بنطلع نتفسح ومبسوطين عايشين حياتنا وانا ما جايبة خبر البحصل من وراي تحت تحت ،، ما طمني لما قال مسافر تاني حتي عملت معاه شكلة لي رب السما وقت قال ما سايقنا معاه وقال لي لازم اتم جامعتي اول لانو عايز يشغلني معاه انا طوالي من قال لي كدا اتلهيت ،، سافر من هنا وبديت احس بي احساس الحمل تاني ،، مشيت فحصت وطلعت حامل 😍 اتصلت بيه سامي سامي انا حامل فرحنا شديد وقلت ليه المرة دي اكيد ولد انا متاكدة من كدا قطع شك علي حسب كلام نعمة واني صدقتها لما قالت لي الولد جااييك ،، استمرت الايام نفس المنوال ماف جديد لما جات مواعيد ولادتي وصدمتي التانية في وقت واحد انو المولود طلعت بت تاني،،
لا عرفت افرح لا عرفت ابكي ولا اقول لي سامي شنو ،، لما اتصل لقيت نفسي بدون احس كذبت عليه وقلت ليه اني جبت ولد يا بابا اويس...
نسيت انو ممكن يطلب صورة ما حسبت حسابها بس اتصرفت ،، عارفين مرات عشان تحمي بيتك من الخراب ممكن تعملي اي شي وانا في المستشفي صورته بيبي واحدة تانية ورسلت ليه الصورة علي اساس دا ولدو ،، قدر ما اقول عقلت وبقيت واعية بلقي نفسي بغلط بغلط ،، ضميري ما بكون مرتاح بس بصلح الغلط بي غلط اوحش منو،،
وزي ما بقولو تجري الرياح بما لا تشتهي السفن ،، اصلها البلاوي لا تاتي فرادا ،، قلت مسافة سامي يفكر يجي السودان اتصرف انا امشي للشيخ داك واعمل ليه داهية اسكتو بيها ،،
جرس الباب ضرب قايلاها علا جات من المدرسة ،، فتحت الباب اتمنيت الارض تنشق وتبلعني ،، مش الواحدة بتفرح لما راجلا يطول ويرجع من الاغتراب ،، انا قعدت ابكي ما اتوقعت سامي نهائي يعمل لي مفاجاة زي دي وما يكلمني ويجي بالطريقة دي ،، كان مبسوط باين في وشي ،، اول ما شافني جراني علي حضنو شديييد وباسني في راسي وسلم علي كتير وما اداني فرصة جري جري دخل جوه وبكورك كان اويس حبيبي انا جيتك بابا جا يا اويس ،،
وكانت الصدمة هنا ...
كدا عرفتو كل الحصل لي من اول وبعد كدا ح تبدا الاحداث لما سامي قرر يعرس فيني ،، تتزكرو اول حلقة لما خلاني ببكي عشان ماشي اعقد....
انا كمان قررت ارد ليه الصاع صاعين ...
يتبع
