امي النوع الشخصيتها ضعيفة معليش ما مفروض اقول عليها كدا بس هي طيبانة اكتر مما تتخيلو ،، ما حصل وقفت قدام ابوي وطالبت بي حقها ،، كل همها تغسل وتكوي وتشد بس ما حصل شفتها قاعدة مع ابوي تتناقش في مصاريف او وضعنا او اي شي ان شاءالله قضية راي عام ،، ما حصل وقفت قدام اخوي لما يهيج فينا او يسمعنا كلام او يضربنا ،، حتي هي زاتا ما بتسلم من كلامو وبتقول لينا اسكتو ما تناقشو اخوكم،، اخوي النوع الصعب داك عندو تاكسي شغال بيه في السوق ،، هو ما كان كدا في الاول معانا بس بعد خطب ليه واحدة صيدلانية والخطوبة بتاعتو اتفركشت منها لي سبب نحن لي هسي ما عارفينو،، منها وبقي لا يطاق بشك في ابسط حاجة ،، لو طالعة الصيدلية دي ساي بعمل لي مشكلة ،، حتي بقي لا بياكل لا بتكلم معانا ،، متجهم علي طول زي ما تقول نحن اخواتو ،، كل شي بطلبو بكون بي صيغة الامر وكسر رقبة تعمليه ليه وكدي الله يقدرك تقولي ما بقدر ...
المهم دي حياتنا كدا كل زول في حالو زي تقول نحن ما اسرة واحدة ،، كنت بشوف البنات بره وهم كيف بتحاكو بي اخوانهم وانهم بطلعوهم يفسحوهم و ياكلو ايسكريم وانهم اصحاب ،، كنت متمنية اخوي معاي يبقي كدا بس للاسف ولا يوم كان سند لي ..
مع جوطة الحياة دي يوم خالي جا من السعودية وجاب لي موبايل ومن وقتها بقي التلفون اقرب صاحب لي نايمة وصاحية بيه عرفت الفيس وبديت اشترك في قروبات كتيرة هي الفتحت عيني علي حاجات ما كنت بعرفها ،، صاحبت اولاد وبقيت اليوم كلو في الدردشة وكتار لاقيتهم في الحقيقة ،، شوية شوية بقي عادي اتكلم بالتلفون مع ولد وعادي يرسل لي رصيد او قروش وعادي اطلب لو عايزة حاجة ،، صاح واحدين كويسين بس غيرهم الفاظهم كعبة بديت اتعلمها منهم وحتي بقولا ليهم عادي كدا ،،
وانا قاعدة بفكر في كل الحصل وسرحانة حسيت بمغص افتكرتو مغص البريود بس حسيت بي طمام برضو وبطني قالبة وما عارفة مالي ،، غريبة يعني هي ما بتجيني بالطريقة دي ،، مشي اسبوع وحاجة وماجات خفته لانو مواعيدها فاتت وبقيت استفرغ مرات وكل ما اشم لي ريحة كنت بحبها بطني تقلب ،، دخلت النت وبديت افتش وشكيت اكون حامل ما عرفت اعمل شنو بس قلقانة ومتوترة وما قادرة اطلع من البيت ،، اتصلت بي سامي ببكي
الووو سامي
هلا جيلا مالو صوتك بتبكي مالك؟
سامي الحقني انا حامل
سكت مسااااافة زي تقول صبت فيه مطرة
قلتي شنو انتي جنيتي انتي متاكدة عرفتي كيف،،
حكيت ليه الحصل واني دخلت النت واتاكدته،،
قال لي لالا امكن ارهاق ساي وتوتر نفسي بعمل برضو كدا وبوقف البريود عادي ،، قال لي امشي الصيدلية ،، قاطعتو في الكلام قلت ليك اخوي مانعني اطلع من البيت ،، قال لي خلاص انا في جهاز كدا بجيبو ليك بالليل البيت ،،
قلت ليه سامي الله يرضي عليك ما تقول لي افتحي الندخل انا الفيني منتهية والله ولا حمل صدمات ولا غيرو بعد كدا ،، لزو لي بي تحت الباب بشيلو ،،
قال لي بدون اشوفك،،
قلت ليه سامي انت عارف الوضع ما تضغط علي،،
وقفلت منو بعدها بقيت في قلق طول اليوم لما بعد نص الليل جا اتصل بي وقال لي زي ما طلبتي ،، كالعادة مشيت بتلبد زي الحرامية ويدي في قلبي لقيتو فعلا مختوت شلتو ومع ختت كراعي طلع لي حازم زي الشيطان وبالخلعة رميتو جوه البجامة من جوه وياالله ما يقع بي تحت ،،
بي نهرة المطلعك زي الوقت دا بره شنو؟
ا ا انا طلعت اشم هوا نفسي كاتم بس،،
طيري جوه وما اشوفك بره تاني بالليل ومعاها تحميرة عين قلبي وقف،،
مسكت فنيلة البجامة ما يقع الجهاز وجري دخلته ولا اتلفته ،، حمدته الله اني قفلت من سامي وختيت التلفون في الاوضة ،، الله دا بطلعني من حاجات كتيرة بس انا ما عايزة اتعدل ...
رقدته مسافة في السرير وسامي بتصل بس خفته يكون حازم متلبد لي ،، قمت براااحة وراخية اضاني ومشيت مشيت مديت راسي بره الاوضة وتاوقت بره لقيت البرنده فاضية حتي اطمنت وجيت مسكلت لي سامي تاني رجع لي وفهمني طريقة استخدامو كيف ونمت بعدها ،، الصباح بدري دخلت الحمام وشغالة ياالله ياالله ما اكون حامل يارب ما اكون حامل ،، وعملت الخطوات وبقيت منتظرة خمسة دقايق ظهر لي خطين في الجهاز قرب يغمي علي يعني انا طلعت حامل ،، اعمل شنو دي مصيبة وجات كيف اتصرف وبقيت ببكي جيت دخلت جوه واتصلت بي اسامة،،
رد علي حبيبي صباحك ورد
قلت ليه اسامة الاختبار طلع ايجابي انا حامل وقفلت الخط علي طول لاني كنت منهارة ودي مشكلة ما عارفة ليها حل نهائي،،
رجع اتصل بي تاني وقال لي انتي بعد كدا لازم تضغطي اهلك وتقولي ليهم سامي اتقدم لي وانا موافقة ،،
قلت ليه حاضر لانو ماف حل تاني قدامي وماف اي خيار تاني كويس انو هو لسه ما نطه ،، دا الخلاني احب سامي اكتر واثق فيه واعتبرو كل شي في دنيتي ،، ولو قال لي ارمي نفسك في النار برميها عشان خاطرو ،،
انتظرت الساعة 8 تجي وجيت لي امي،،
امي انا سامي اتقدم لي وانا موافقة عليه..
قالت لي سجمي اسكتي اخوك ما يسمعك والله يقتلك،،
قلت ليها لشنو اسكت ما عملت شي غلط دا كلو عشان انا بحبو وهو بحبني وعايزين نتلما مع بعض ،، وياريتني لو ما رفعت صوتي وقتها اشوف ليك علا رفعت لي حواجبها واشرت لي بي عيونا وراي والليلة وووب عرفتو حازم ،، ما عارفة جاتني الشجاعة من وين وقتها وعملت روحي ما حاسة بي حازم ورفعت صوتي ،، وبعدين يا امي سامي دا مغترب ومرتاح وعندو قروش دا قال لي بجيب ليك عربية هدية عديل ،، افتكرت كلامي دا بلين حازم شوية بس كنت غلطانة ،، والله وقت اتكلم دا حسيتها رعدة ووقعت في راسي وبقيت عارفة اني حا اتدقي حا اتدقي هسي دي وفعلا ولا اتفاهم معاي سمعني ما سمعني وانضربت ضرب وقلع تلفوني .. حسيت الدنيا دي فعلا سودا قدامي وكل شي كئيب ،، بقي ما عندي حل غير ابوي هو الوحيد الممكن يقيف معاي ،، شلت تلفون امي واتصلت بيه وانا عارفة ابوي مسبقا وضعو المادي يعني ما كويس شديد ،، عرفت ادخل ليه بي مدخل انو مرطب وعندو وعندو وشحنتو ضد حازم اخوي ،، قدرت اكسب ابوي في صفي ،، قفلت التلفون لقيت امي واقفة سمعت كل كلامي وكالعادة وقفت مع حازم وسمعتني ستين كلمة وانو دا راجل متزوج وراجل جنات وعندو بت وهي بت جيرانا وانو الفريق كلو ماسك سيرتنا بي سبب العملتو وواقفين في صف جنات ،، وقالت لي حتي اهلنا ما قصرو وما خلو لينا كلمة وطلعوني ما عرفت اربيك كويس وما عارفة ما صاح وكلام زي دا ما اقتنعت بيه ،، ما رضيت اسمع كلاما طلعت منها وقلت ليها ابوي جايني وانا ماشة معاه ،،
ابوي جا المسا وساقني معاه البيت كنت مبسوووطة طبعا لميت هدومي وجري جيت بيت مرة ابوي ،، اتصلت طوالي بي سامي وكلمتو وقلت ليه ابوي منتظرك بكرا تجي البيت ووصفتو ليه ،، ابوي قال لي اهم شي يجيب ليك عربية تريحيني من المواصلات وانا كبرته وبقيت ما حمل جهجة ،، قلت ليه اشيلك في كفوف الراحة يا ابوي ما تشيل هم ،، مرتو جات وجرتني من يدي دخلتني جوه وقعدت تقول لي خليك مفتحة ما تبقي زي امك وقت ابوك كان عندو الحق ما استفادت منو ،، اسمعيني هنا انتي اول بي اول اي قرش تشتريه دهب طوالي ،، وطلباتك تكتريها طوالي الرجال ديل اساليني عينهم زايقة القروش الجارية في يدهم ما حبابا وبنات الحرام بقن كتار ،، وخليك لاصقة فيه زي ضلو محل ماشي وراه ،، وامليه عيال ما تديه فرقة يحك راسو ،، المهم ما خلت لي شي ما قالتو لي ،،
تاني يوم حازم جانا من الصباح هايج وجايط يرجعني البيت ،، مرة ابوي جاتني قالت لي اقفلي الباب واوعي تطلعي من الاوضة نحن بنتصرف مع اخوك المجنون دا ،، انا ما عارفة الحصل شنو بره لاني ما سمعت شي ،، بس بعد قريب ساعة كدا جات وقالت لي مشي خلاص ،،
سامي جا العصر براه واتفق معاي انا وابوي علي التفاصيل والعرس وكل شي بس قال انو حا يجي مع اصحابو لانو اهلو قالو ما بجو وواقفين في صف جنات ،، المهم وافقنا نحن وقلنا ليه ما ضروري ،،
اسبوع بس جهزت روحي سريع ،، اتصلت بي تلفون ابوي ب امي ابت ترد علي ،، اتصلت بي علا تديني امي ،، قالت لي امي قالت ما عايزة تتكلم معاك وانو حازم قال لينا ماف زول يتكلم معاك ويعتبروك متي ،، انصدمته وقلت ليها بس بكرا عرسي ما حا تجو يعني وقبل اسمع ردها ،، زي في زول شال التلفون لانو تاني قفل ....
من جواي معليش يا امي بس انا مجبورة سامحيني ،، تاني يوم تم العرس وسامي ما قصر معاي وداني كوفير ولبست زفاف وعملنا حفلة رقصنا واتبسطنا وعملنا الجرتق كنت اسعد واحدة مع انو من جواي كنت مكسورة امي واختي ماف ،، احلا حاجة مفاجاة سامي لما غمض لي عيوني وبقي سايقني طلعني بره لما لقيتها العربية زي ما وعدني بقيت بصرخ وانطط ما كنت مصدقة خلاني انسي كل شي من الفرح كنت طاااايرة ،،،
اتصورنا كتير لما زهجت من الصور زاتي ،،
الما كنت عارفاه انو رسل الصور دي طوالي لي جنات وقال ليها حوا ولادة ....
الصراحة عشت احلا ايام في بداية عرسي ونسيت كل المشاكل الحصلت لي بقي سامي امي وابوي واهلي ...
طبعا كنا بنستفز جنات وبننزل صورنا في الفيس مع بعض ،، قال لي انتي حا تجيبي لي الولد ما تبقي زي جنات ولادتها بنات ،، العارفاه انها كان ولدت بتها الاولي ديك وقعدت تسعة ساعات واتوفت ،،
قال لي عارفة يا ام اويس انا حا اسجل ليه كل حاجة بي اسمو ،، وقتها كنت فرحانة وكنت واثقة اني حا اجيب ولد اكيد وحا اتسدي حقي كلو من جنات واوريها يوم اسود ،، بعد العرس اتغيرت كليا بقيت مفترية وشايفة روحي لبس ماركات ومكياج ماركة والكلام كيف جيم وفلهمة والنظارات يا دنيا ما فيك الا انا ،، قطعت ليك علاقتي اول شي مع صاخباتي وبنات الجيران ،، لما اجي ليك بيتنا لي امي بعملها قصد اكاويهم بشوف الحسادة والحقد في عيونهم وبنزل من عربيتي ولا بسلم عليهم ،،
بس دا كلو اتقلب ضدي مع اول ولادة لي ....
يتبع
