الحياة دي مرات يا صابت يا خابت معاك بس دا ما معناه انك تعتمد علي الحظ ،، احيانا الحظ دا ما بجيك وممكن حياتك تتقلب جحيم الي مماتك ...
لما صحيت لقيت روحي في المستشفي ومركبين لي فراشة في يدي ،، ما استوعبته الصدمات الحصلت دي وقتها ،، كل حتة في جسمي كانت واجعاني زي السكين البطعنوني بيها ،، امي واختي جو داخلين شفت دمعتها في عينها بس عاينت لي ،،
قلت ليها امي ،، ما ردت علي وطلعت طوالي ،، اختي كانت اصغر مني جات قعدت جمبي وقالت لي الليلة سجمك انتي عملتي شنو خليتي حازم حالف عليك كدا ،،و عملتي لي جنات شنو انتي ،، الفريق كلو بتكلم عنك يا جيلا في شنو؟
قلت ليها انتي بتقولي شنو كيف يعني بتكلم عني ،، تاني سكته قلت ليها يا علا انسي الكلام دا انتي لسه صغيرة ما تشغلي بالك بالحاجات دي ،،
لي روحي انا كنت محتاجة البوعيني ويقيف جمبي ،،
قالت لي سمعت اسم واحد اسمو سامي دا مالو معاك ضربك ولا عمل ليك شنو ،،، قلت ليها بي عصبية علا قلت ليك خلاص انسي الموضوع ،،
ختيت يدي علي راسي ولميت رجولي فوق وقعدت ابكي ،، بقيت ما طايقة سامي ولا عايزاه انا بكرهو بكرهو مووووت ياريتني لو مته وارتحت بدل الانا فيه .. انا جنيت وقتها لما عملت العملتو دا ولا كان عقلي وين ،،
اليوم عدي وطلعوني في اليوم التاني زي الضهر كدا كان غالبني المشي وحاسة اني فاقدة سوائل حيلي ما شايلني ،، والله لما دخلت البيت قلبي ما كان مطمن خصوصا اني كنت بفكر في حازم وانو حا يقتلني اكيد وبتخيل في منظري وانا طالعة من الحمام ولابسة بجامتي التلاتة ارباع ،، احيي انا جد بقيت بتشهد علي روحي ونظرة حازم وقت عاين لي داك مسكت في توب امي وقلت ليها يا امي حازم حا يقتلني مش بقيت زاتي ما قادرة ابكي من البكي عيوني كانو مورمات و دموعي كملت ،،
قالت لي ادخلي اوضتك بس وما تطلعي وما توريه وشك ،، ومن الليلة طلعة من البيت مافي وقراية ماف ،، بي زعلة قلت ليها انتي بتقولي في شنو يا امي كيف يعني ماف قراية ،، سكتت وما ردت علي وقالت لي اسمعي الكلام وادخلي اوضتك ،،
طنطنته ودخلت جوه وانا لسه ما مستوعبة البلوة الحصلت لي ومستهتره بالموضوع ،، بس المتاكدة منو انو ماف زول عارف بالحصل لي الا سامي ،، لانو لو عارفين كانو اكيد حا يضبحوني او يدفنوني حية ،، بس ما يكون سامي كلم جنات بالحصل،، لالا ما اظن يقول ليها حاجة زي ،، قعدته في السرير واتزكرت العملو سامي وشكل جنات والشماته في وشها ،، لما غلبني اتفقعته بالبكي واتمنيت لو ارجع زي ما كنت عايشة حياتي لا حب لا وجع قلب اتمنيت لو ابوي كان فاضي لي وانو ما مشي عرس واحدة تانية غير امي ،، شلت تلفوني وحزفت الفيس والواتس والمسنجر وجدعته التلفون هناك ،، ورقدته نمته ،، زي نص الليل سمعته تلفوني بضرب عاينت ليه لقيتو سامي ،، عايز مني شنو دا كمان تاني ،، ابيت ارد وقفلت وشي بالمخدة ما عايزة اطاوع قلبي ،، بس التلفون ابا يسكت فا رديت ،، صوتي من البكي كان تقيل ،، انا ما عارفة هل انو سامي فعلا بحبني؟ اول كلمة قالا لي جيلا كيفك انتي كويسة ،، ما رديت عليه ،،
قال لي جيلا انا اسف والله ما كان قصدي نصل للوصلنا ليه دا انا بحبك ،، عارف انك ما حا تصدقيني بس احلف ليك بي شنو انك اغلا حد عندي وانو حبي ليك كان بريئ بس انتي الاستفزيتيني ،، عارفة انتي الوحيدة البتقدري تخليني اتفعل بتخليني اعيش توترات الحب ومراحلو كلها ،، جيلا انا بعشقك بدمنك انتي نظر عيني ،، انتي الحاجة الحلوة في حياتي ،، انتي الضحكة البتتغلغل جوه اعماقي ،، ما عارفة حبك وصلني لي وين انا بدونك ولا شي ،، شفتي ليك راجل ببكي؟ وحياة الله انا هسي ببكي بسببك انا محتاج ليك وعايزك تكوني جمبي ،، انتي لما تتكسري انا بتكسر يا ام اويس ...
بي كلام سامي دا ما عرفت اتصرف لانو دموعي اتصرفو قبلي ونزلو بدون حساب وجعني شديد كلامو ودخل جووووه قلبي حسيتو كل كلمة قالا كان صادق فيها ..
قلت ليه طيب ح تعرسني انت عارف الحصل.. قال لي اكيد لازم نصلح غلطتنا دي بس هسي اصبري شوية انتي عارفة المشاكل الحصلت بسبب الحصل خلي العاصفة تهدا بس ،، لكن عارفة اخوك دا انتو مستحملنو كيف ياخ اداني بوكس انا قلت اتشليت خلاص وما بقدر اتكلم تاني ،،
قعدت اضحك وقلت ليه تستاهل عشان تاني تغشني وتعمل معاي كدا ..
الله يسامحك يا جيلا انا ما غشيتك بس الشيطان شاطر والصراحة انتي الجسمك بثيرني من اشوفك ما بقدر اتحكم في روحي ،،
قلت ليه بالمناسبة انا تاني ما بقدر اطلع حازم حرم علي المرقة ..
قال لي معليش ما تشيلي هم بنلقي حل ان شاءالله اجيك في بيتكم..
قلت ليه انت مجنون ياود عايز توديني المقابر مستغني عني للدرجة دي،،
قال لي بعادك حار بس حكم القوي نصبر ..
اتكلمنا فترة وقفل مني الخط ورجعت حليمة لعادتها القديمة زي ما حصل شي،،،
[والنفسو ما نضيفة مستحيل يتعدل وسامي غرضو ما كان شريف وعرف نقطة ضعف جيلا واستغلاها كويس ،، وبعد خسارتو لي جنات وانها مرمطتت بي الارض وخلت اليسوي والما يسوي يتفرج ويحكي عنو،، حب يرد ليها الصاع صاعين وفكر بينو وبين نفسو انو يتزوج جيلا كيتن ليها ]
الايام عدت زي اسبوعين كدا كانت كلها قلق وخوف بالذات لما سامي يصر ويجيني البيت بعد نص الليل زي الحرامية واضطر اتلبد افتح الباب ويدي في قلبي وادخلو غرفتي لا من درا لا من شاف ،، بقيت ما بقدر اعيش بعيد عنو لحظة خصوصا اني بقيت قاعدة في البيت ملل وزهج ومحبوسة في اوضتي ،، كنت محتاجة لي الامان والكلام الحلو كنت عايزة حد يطمني ويخليني مبسوطة ،، كنت محتاجة حد يديني كل حاجة ولقيت كل دا مع سامي ،،
لما في يوم قال لي اواجه اهلي واكلمهم في موضوع عرسنا[ انا وسامي] ،، اول خفته وابيت كلو كلو ،، بس هو شجعني ووقف معاي قال لي انتي بقيتي واعية وكبيرة يعني بالمحكمة ممكن نتزوج غصبا عن الكل ..
بس انا ما قدرت اقتنع بالكلام القالو دا لاني لسه ما قادرة اثق فيه كويس وكمان خوفي من حازم وخوفي علي امي وابوي وخوفي من ناس الفريق والاهل ،، حاجات كتيرة خلتني اتراجع واقول لي سامي ما بقدر اخاطر ،، بس حصلت حاجة خلتني اوافق واتحدي الكل غصبا عنهم و عني ....
