مهما يبدر منك والناس دي كلها تتخلي وتبعد عنك ،، دايما في زول واحد بتلقيه زي ضلك مستحيل يخليك ،، هي أمك
نواصل
سامي طلع وقاشر اخر قشرة وما اشتغل بي ولا قلبو حنه علي وانا وبناتي نبكي ،، وجعني كلامو القالو لي اكتر من عرسو ،، اول مرة احس فعلا اني انزليت بالطريقة دي واني لازم احفظ موية وشي الفضلت كفاية لحدي هنا وبس سكته ليه كتير دا كلو عشان القروش ،، ياخ الله يلعن القرش البخلي الزول ينسي اصلو وفصلو ويبيع كرامتو عشانو ،، بس انا كمان كنت مجبورة غصبا عني وافقته اضاري الفضيحة الحصلت لي واللي هسي ماف زول عارفها غيري انا وسامي انو بتنا رهف حملت بيها قبل الزواج ،، عارفين اكتر شي مؤلم تأنيب الضمير ،، طيلت فترتي مع سامي انا في شي جواي كان مكسور ،، صاح حاولت انساه بي حاجات كتيرة كنت بعملا بس برضو في شي كان مؤلمني ،، قمت علي حيلي وشلت التلفون اتصلت بي امي قلت ليها تجيني وجيبي علا معاك هسي دي البيت تمسكي لي بناتي انا مسافرة ضروري ،، امي اصلها قاعدة تهرج اول لكن ما بشتغل بيها ،، جاتني البيت وسمعتني الاسطوانة اكتر واني انا السبب خربت بيتي بي يدي ومن الاول عرسي غلط كان واني سمعت كلام مرة ابوي وعرست سامي ،، قلت ليها يا امي ما وقتو انا مسافرة سنار ،، من قلت ليها كدا اتخلعت وقالت لي لالا انتي شكلك جنيتي رسمي الموديك سنار شنو يابتي ،، قلت ليها سامي عقدو الليلة ،، قالت لي سجمي سجم خشمي انا ما قلت ليك من اول لكن كلامنا جدعتيه وراك يا جيلا ،، هسي الناس تقول علينا شنو خلاص فضحتيني يابتي فضحتيني اودي وشي وين من ناس الفريق واهلك براهم كدا بقو ما خالين لي جمبة ،، قلت ليها امي عايني كلام الناس دا لا بودي ولا بجيب خليهم يقولو الدايرين يقولوه انا هسي طالعة مستعجلة ولو سافرته برجع بكرا وما انتظرته اتناقش كتير معاها ،،
نعمة بقت صاحبتي للاخر ،، يلا هي نوع البنات الملتوي داك حتي يدها وااااصلة وبتعرف ناس كتار ،، عرفت منها انها شغالة في الجامعة بتمشي الداخليات بترمي ودع والبنات العايزات حجبات وعمل بدوها بتجيب ليهم العايزنو وبتاخد عمولتها ،، وممكن تعمل اي شي ما بتخاف ،، بقينا شبه يومي متواصلين ثقة يعني معاي،، اتصلت بيها وطلعت لي بره سقتها ومشينا حكيت ليها بالحصل كلو وقلت ليها انا ضروري ارجع للشيخ القلتي عليه في سنار دا ،، اول ما عارفاها ارتبكت بس تاني قالت لي هيي انا ما قلت ليك انو جو ناس طلبو بالاسم وسافر معاهم بره ما ظنيتو يرجع هسي لكن عندي ليك واحد ظااابط من طرفو برضو بظبط ليك امورك كلها بس اديني القروش امشي احجز ليك لانو ناسو كتار وانتي ما شبه بهدلة وما تنسي حقي وضحكت لي ،، قلت ليها من ناحية القروش ما تشيلي هم هاك دا جزو من حقي ودا مليون عربون للراجل ،، نزلتها ومشيت منها جيت راجعة البيت تاني وكان غالبني اقعد وعايزة اعرف الحاصل مع سامي شنو مع اني كرهاناه كنت لكن موجوعة وقلبي مكسور شديد ونفسي امشي افركش العقد بي اي طريقة بس خفت من سامي يرمي علي الطلاق وانا عارفاه ممكن يعملا ،، من دخلته امي قالت لي الحمدلله العدلتي من كلامك الفاضي دا يابتي اقعدي صلي صلاتك واقري قرانك ،، انتي ما شغالة بيهم الاتنين الله يهديك يا جيلا ،، قلت ليها بصلي يا امي بس ما هسي بعدين خلاص ودخلته جوه اتصلت بي ريم واحدة من صاحبات سامي العرفني بيهم عشان اسالا من عقد نادين وسامي ،، وتررن اتصلت ردت علي الووو جيلا والله ما رضيتا ليك زعلانة عليك جد جد بس نادين اصلها كدا لكن انتي لو خليتي ليها سامي تبقي ضعيفة ،،
قلت ليها كيف؟
قالت لي قعادك كدا ساكته ساي بطلعك ضعيفة الشخصية وسامي بحب البت القوية اساليني انا بإمارة انو مبروش ل نادين وجاري وراها جري وهي ما معبراه كتير كانت ودا ما في مصلحتك بكرا سامي يطلع ليك في راسك وما تشوفيه زاتو تاني ،، خوفتني قلت ليها بس انا اعمل شنو؟
قالت لي بتعرفي رامي مش؟
قلت ليها رامي منو؟
قالت لي ياخ تتزكري الولد الجا معاي داك يوم طلعنا نتعشي اول ايام زواجك وقت سامي جابك وعرفك علينا،،
قلت ليها اهاااا ايواااا متزكرة كنت قايلاه حبيبك،،
قالت لي لالا يلا رامي دا كان مكسر في نادين برضو بس هو عشان وضعو كان اقل من سامي نادين ما اشتغلت بيه ،،
قلت ليها لكن هو شكلو مرطب ،،
قالت لي اي هو مرتاح لكن ما زي ما حابة نادين ،،
قلت ليها اها اختصري عايزة تصلي لي شنو ،، قالت لي الصراحة انا كنت عايزة فرصة انتقم بيها من نادين لاني عارفاها من ناحية الحب هي مايلة لي رامي لكن عشان وضعو جلتو طوالي ،، وانا زمان عندي كيس معاها لانها مرة عملت فيني موقف بايخ ونهزرتني قدام الدفعة كلها خلتني مضحكة عشان ضحكت بي صوت عالي طردتني من شلتها وقالت لي حركات الشوارعية دي ما بتنفع معاي علي اساس انها بت هاي عاملة ،،
قلت ليها اها والفهم؟
قالت لي الاتنين هدفنا واحد بس انتي نفسك تردي الصاع ل سامي وانا نفسي انتقم من نادين ،،
قلت ليها يا بت الداهية انتي انا بديت افهمك ،،
قالت لي بس انتي واثقة ولا حاتحصل ليك مشكلة ما خايفة من سامي ممكن يطلقك فيها؟
قلت ليها يادوب انا بقيت ما خايفة منو ونفسي اشوفو موجوع زي ما وجعني ولا حلال عليه وحرام علي ،،
قالت لي ظابط يا عسل اتفقنا بجيك ونمشي الكوفير وانا بظبط ليك زولي اصلا هو معجب بيك من شافك ،،
قفلت منها وبقيت بضرب بالتلفون علي يدي ومن جواي معليش يا سامي استحمل ما انت براك الراجل ،،
[جيلا طوالي ما بتحسب حساب اي خطوة تعملا ،، ما عارفة دا طيش منها لسه ولا فهما شنو..تفتكرو تخبطها دا سببو شنو؟]
قررت امشي عرس سامي بس مع زولي الجديد مكاوة لي سامي وافتكرت الموضوع هين ،، انتظرت ريم جاتني وامي قنعت مني بقت بتعاين لي بي عيونا ساي وكلمتها لي الله يهديك ويكمل عقلك يارب ،،
طلعنا وجينا الكوفير ياخ قشرته قشرة لما خفت علي روحي زاتي ،، فكيت الشعر وبتاعت الكوفير من شدة ما عجبتها عملت لي مكياج عروس لما قلت ليها الليلة عرس راجلي عزتني للاخر قالت لي اتبسطي ووريه انك قوية واضربي الهم بالفرح اصلو الرجال ديل .... قلت بس دي زولتي شلت رقمها طوالي ،، المهم زي عشرة كدا بعد اتاكدنا انو العرسان وصلو الصالة ،، انا وريم طلعنا طوالي وصلنا صالة....
ريم قالت لي داك رامي منتظرنا اهم شي ما تخجلي وخلي راسك مرفوع ودخلي يدك في يدو فوق زي راجلك كدا تعجبيني للاخر ،، نزلت من العربية ما عارفة قلبي كان مقبوض وما مطمنة لكن قلت امكن عشان عارفة الحا اعملو دا حا تكون عواقبو صعبة بس من جواي الوجع الحاساه بي زلة سامي لي واهانتو وعدم رضاه بي ولادتي للبنات دا المؤلمني اكتر زي التقول انا سبب ولادة البنات ،، سلمت علي رامي وقلت ليه رامي بس ما عايزة تتخطي الحدود واظن ريم كلمتك انها مجرد لعبة نستفز بيها سامي ونادين ،، قال لي ما تخافي ومدي لي يدو رفعها دخلت يدي في يدو ،، وانتظرنا ريم لما اتاكدت لينا انهم قعدو عشان نصدمهم بي دخلتنا مع بعض ،، جاتنا طايرة مبسوطة وقالت لينا يلا خشو يا قمامير ،، مع دخلتنا تراها المجرمة اتفقت مع بتاع الحفلة من نجي داخلين يشغل اغنية رومانسية ،،
ختت رجولنا الاضاءة اتركزت علينا واشتغلت اغنية جنات عارف حبيبي
مع كل خطوة كنت بحس بدقات قلبي دق دق دق واني حا يغمي علي ،، حسيت انو الصالة دي كلها بتعاين لينا لما رفعت راسي عيوني جات في عيون سامي كانو شرار ،، بركان نار اي شي تتوقعوه ،، رامي ميل علي وقال لي اثبتي ما تبيني ليه انك خايفة منو ما حا يقدر يعمل شي ويصغر نفسو قدام نادين واهلا وهم ما عارفينك انك زوجتو اصلا ،، قال لي اضحكي وارفعي راسك واعملي نفسك ما شغالة بيه اوعي يأثر عليك ،، كلام رامي طمني شوية وجينا مع بعض باركنا عليهم لحظتها درست نادين في ثانية بس من فوق لي تحت وعملت مقارنة بينها وبيني ،، ومن جواي لشنو سامي يعرسها العاجبو فيها شنو المعصعة دي لا حلوة ولا شي ،، الخلاه يفضلها علي شنو كنت اموت واعرف هو عرسها عشان شنو ،، مركبة كلها ماف شي فيها طبيعي ظاهرة ،، هي صاح باين عليها اثر الراحة بس ما بتجي في ضفري شينة ،، وقت مديت يدي علي سامة اتحاشيت نظرة عيونو لانها كانت بتخوف بس ضغط يدي قلت حا يكسرها في يدو كان ما رامي انقزني وجراني وقفنا بالجمبة وانت يا سامي ما قدر يفتح خشمو طول الحفلة حسيت انو حا يقتلني الليلة حا يقتلني ،،، انتبهت برضو انو نادين كانت بتعاين لي ولي رامي وهو ما قصر طلع ما مؤدب خالص مع اني حزرتو يعمل شي ما ياهو معاي ،، كنت قدر ما ازح منو هو بصر يقرب ويخت يدو علي كتفي ويهمس ويضحك في اضاني ،، لما انتهت الحفلة عايزة اطلع سريع قبل سامي يصلني بس ما لحقته مع طلعتي بره الصالة لحقني ما عارفة كيف و حاجة جرتني وطق جاني كف دموعي نزلت معاه ،، سامي اتقلب وحش حسيتو كدا كان هايج شديد جريت والله جريت منو وركبت سريع في عربيتي وقغلت التامين وضغطت بنزين وباخر سرعة اتحركته كنت برجف خوفني ،، بدون احس اظن وصلت في اقل من نص ساعة البيت ،، قلت ارتحته لكن وين قبل ادخل كويس سامي جا وراي والشكلة قامت ونسيت ليك موضوع امي نهائي وقت هو ضربني وكفتني قعدت اصرخ وابكي وسمعني ما خلا لي نبز ،، قلت ليه يا ... .......
قال لي انا الغلطان من اول لانك واحدة جاية من الشارع ما مربية لو متربية ما بتعملي كدا يا مدام ،، بس استاهل انا غلطه غلطة عمري لما رضيت اعرس واحدة هاملة زيك ما مسؤلة ومستحيل في يوم تتعدل اديتك الحرية صاح بس ما اتوقعتك تتخطي الخط الاحمر مع راجل تاني ياست الهانم يابت الاصول ،،
قلت ليه انت تسكت نهائي انت نسيت عملت فيني شنو انت اخر راجل تحكي عن الاصل والفصل نسيت المنوم انت اغتصبتني لو جينا للجد ايوه اغتصبتني من دون رضاي واجبرتني وابتزيتني ،، انت نسيت ولا ازكرك رهف الحملت بيها قبل ما نعرس انت واحد .....
مع رجعتي لي ورا ورفعة سامي يدو يضربني شفنا امي واقفة يعني سمعت كل الكلام من الصدمة ما اتحملت ووقعت حالا ،، انا قعدت اكورك وجريت عليها امي امي ما تموتي انا عندي منو غيرك سامي اتصل الاسعاف شيلا العربية ،، بقينا مخلوعين وبنبكي ،، علا جات طالعة وبتكورك بقت قلت ليها خليك مع البنات وامي كويسة ،، سامي شالا ورفعها العربية وما انتظرني زاتو ،،جرا بيها وخلاني جوه لاني كنت بهدي في علا و بناتي الصحو بالجوطة ببكو ،،جريت ركبت عربيتي وبتصل بي سامي يرد علي ماشي ياتو مستشفي ودموعي بقيت ما شايفة الا طشاش طشاش قدامي وبكورك انا السبب وبضرب في الدركسون اااخ انا السببب الله ياخدني بتين اتعلم واحكم عقلي ،، امي اخر مرة والله بوعدك بسمع كلامك يارب ياالله انا تاني ما بعمل غلط بس امي ما تموت ومع مسكتي التلفون وانشغالي بالاتصال بي سامي الما عايز يرد فجأة تييييت جا صوت بوري و يدي فلتت ونططه عيوني وحسيت التحكم في العربية فلت مني والتلفون وقع وقرصت فرااامل ما حسيت الا كروووو روووو وجررررر صرخته وختيت يدي علي عيوني ....
يتبع
