الصراحة انا ما كنت بجي البيت حبا فيه وعارفة اني ما مرحب بي بقي ،، بس بجي كيتن لي جنات وبنات الفريق وناسو ،، عشان قبل العرس ما خلو لي جهة الفيني والما فيني قالوه شي طلعوني صايعة وشي بتاعت اولاد وواحدين وصل بيهم جو لي امي البيت وقالو ليها لمي بتك عليك بتشاغل اولادنا ،، اجي اجي يا الكدي ،، قدامنا واحدة اسمها بدرية اصلي ما بريدا من زمان عندها تلاتة بنات والتلاتة بايرات كانت ملصقاهم فينا عشان اخوي طبعا عشمانة يعرس فيهم واحدة ،، دي اول واحدة ظهرت علي حقيقتا لما مشكلتي حصلت ما خلت سب وقذف فيني ،، وبي سببها نسوان الفريق قاطعو امي وقالو ليها بتك قليلة ادب وزايعة ،، والله ما ناسية دمعة امي الفي عينا بالكلام القالو ليها ،، حتي رجالهم حرضو اخوي علينا اكتر ،، اختي مرة جات تبكي خايفة قالت لي زي في زول بتابعني لما اطلع المدرسة ولما ارجع بجي جارية خايفة ،، وقتها مشيت لي امي وحكيت ليها القالتو علا وهي مشت كلمت حازم ،، تراهو طلع مكلم ود جيرانا يراقب البيت ويراقبنا ،، عشان كدا قررت افرسهم ،، كنت بجي يومي بي عربيتي اول بدق كم بوري كدا طبعا بشوف ليك واحدين بفتحو الباب يتاوقو يشوفو في شنو ،، حتي انزل تاني اتجدع وما بمشي عديل بعمل حركات يعني المشي بي كعوجة ولولوة كدا والراس رافعاه وفاكة الشعر وريحتي تجيب ال في اخر الشارع ،، بعد ادخل البيت دا موضوع تاني ،، اشتريت لي استريو مخصوص ومعاه سماعات من اجي بشغلو بره في الحوش😂 والاغاني كلها هااابطة هبوط جد بتاعت مكاوة ،،
النصيحة من عرست ثقتي زادت في نفسي وبقي قراري في يدي وسامي اصلا نوع الرجال المتحررين ما قاعد يسالني بعمل في شنو قصدي في حتة اللبس والطلعة وعادي بنزل صوري في الفيس وبختها في الواتس وبعمل فيدوهات وكدا ما بقول لي لا وكان الوضع عاجبني ومرتاحة للاخر ،، لما اجي بيتنا حازم بقي ما قاعد يسالني ،، ماف بينا سلام ولا كلام ،، كتير لكن كنت بجي وهو ماف عشان ما اصطدم بيه ،، بعد اتاكد انو طلع بجي ،،
يلا الليلة من جيت امي جاتني قالت لي الله يرضي عليك يا جيلا ناس الفريق اشتكو منك وقالو بعد كدا ببلغو عننا بسبب الازعاج الكل مرة دا ،، قلت ليها يا امي هم شافو حاجة عشان يعرفو وجعة النفس دي حارة كيف ،، يلا يتحملو العملوه فينا ،، قالت لي انتي السويتي براك في نفسك ما تحملي زول مسؤليتك ،، اول مرة امي تقول لي كلام حار ما حصل قالت لي كدا ،، قلت ليها امي انتي بتقولي في شنو عايزة تقيفي مع الناس ضدي ،، قالت لي اسكتي اسكت حسك صحي انا ما عرفت اربيك يا جيلا ،، بس انا ما عارفة لشنو بحس كلام امي لي عوارة عوارة ما قاعدة اخاف منها نهائي بسمع كلامها بي جاي وبطلعو بي جاي كانك يااب ذيد ما غزيت ،،
قلت ليها اه يا امي عليك الله خليني تعالي تعالي الليلة جايبة ليك اغنية من امها حلوة حلا وقبل تتكلم مشيت شغلت الاستريو ورفعت الصوت ،، وطبعا باكل في لبانتي كالعادة بحب اللبان مووووت وبحب اطقطقو واكلو بي مزاج ،، طلعت الروج وعدلتو وطلعت الخصل وشغلت ليك فيديو مباشر في الفيس مع الاغنية ،، وبقيت اقول اها اها الليلة وووب وبجبجب بي كتفي اهم شي
ﻣﺎﻳﻘﻮﻟﻮ ﻣﺠﻨﻮﻧﻪ ﻣﺠﻨﻮﻧﻪ ﻣﺠﻨﻮﻧﻪ اااااي مجنووونة
ﺍﻟﺒﺘﺸﻠﺐ ﺣﺒﻴﺒﻲ ﺍﻧﺎ ﺑﻘﻠﻌﻮ ﻣﻦ ﻋﻴﻮﻧﻪ ( معاها رفعة حاجب) وشغالة اغني مع الغنية
يا ﺍﺧﻮﺍﻧﻪ ﺍﻟﺪﻧﻴﺎ ﻋﺠﻴﺒﻪ ﻭﻓﻴﻬﺎ ﺣﺎﺟﺎﺕ ﻏﺮﻳﺒﻪ
ﺍﻗﻮﻝ ﻟﻴﻜﻢ ﺑﻲ ﺍﻣﺎﻧﻪ ﺍﻟﺒﺘﺠﻴﺐ ﺳﻴﺮﺗﻲ ﻣﺎﺑﺴﻴﺒﻪ
( ورافعة يدي راسمة ولابسة فيها غوايش دهب نظام شوفو )
ﺩﺍ ﻃﻮﻟﻮ ﻃﻮﻝ ﺍﻟﺒﺎﻧﻪ ﺍﻟﻘﻄﻊ ﺍﻟﺰﻟﻂ ﻭﺟﺎﻧﺎ ،، اها اها
ﺩﺍ ﻓﻴﻬﻮ ﻗﺎﻣﻪ ﻋﺎﺟﺒﺎﻧﺎ سامي ﻗﺎﻣﺘﻮ ﻋﺎﺟﺒﺎﻧﺎ ،، وايوووي زغردته وغمزته بي عيني معاها ،،
ﺍﻗﻮﻝ ﻟﻴﻜﻢ ﺑﻲ ﺍﻣﺎﻧﻪ ﻟﻮ ﺳﺒﺘﻮ ﺑﻜﻮﻥ ﺟﺒﺎﻧﻪ
ﺩﺍ ﺍﻟﻄﻮﻳﻞ ﺍﻻسمراني ﺍﻟﻔﻴﻬﻮ ﻗﺎﻣﻪ ﻋﺎﺟﺒﺎﻧﻲ
وطق قفلت المسجل وقعدت اتكلم بعدها وطبق طبق بطق في اللبانة ،، وكلامي بقي بي حنكشة بعطش الجيم وبفتح الكلمات وعاملة روحي دلوعة حتي الضحكة غيرتها اهي اهي ،،
عارفة طبعا صاحباتي وبنات جيراني في الفيس
قعدت اتكلم ازيييكم انا الليلة مبسوووته بابا اويس جاب(الجيم معطشة اهم شي) لي الدهب دا عشان عيد ميلادي ح يكون في السلام روتانا ومعاها تسبيلة رموش ولولوة خشم ونطيط عيون وكل شوية بخت يدي علي وشي عشان اضافري ومناكيري ويدي تظهر عاجباني ،، يلا انا عازماكم كوووولكم ،، واللهي لوما جيتو بزعل ومخاسماكم [ الحتة دي اتخيلو نفسكم حنكوشات واتكلمو كدا عشان تظبط] وبقول للحاسدين قووود لاك ،، باي باي بيبي اموووواح...
بعد انتهيت امي ما عجبها الكلام وجات قالت لي هسي لزومو شنو يا جيلا الحركات دي يابتي انتي هسي بقيتي مرا متزوجة بعد كدا حركات الشفع والمراهقين دي خليها واقعدي في بيتك لي راجلك والفي بطنك دا بطلي حركات جهولة ام سكاسك دي ،،
وااااي فكيت الضحكة عجبتني الجملة دي حا اخدها برستيج تاني قلت ليها يا مامي انا عايزة اعيش حياتي كفاية الاتحرمت منو السنين الفاتت دي كلها خلوني استمتع ياخ شوية ،، قالت لي الله يهديك يا جيلا ،، ما عجبني الكلام كالعادة ما بشتغل بيه كتير ،،
