غايتو دخلته في اضافر اصابعي عديل ما نطقته ولا حرف ،، قال لي اتفضلي انسة جيلا ،، من جواي قلته لي مطلقة بس خليك مسطح كدا ان شاءالله يارب ما تعرف ،، شال مني بياناتي وشكلو مفتري لا طلب لي عصير لا شاي لا عاين لي زاتو ،، اتغظت منو قلت ليه خلاص اقدر امشي ،، ما رفع لي راسو قال لي ممكن،،
قلت ليه يعني بس كدا خلاص ولا اعمل شنو تاني،،
برضو ولا عبرني وعامل روحو مشغول قال لي السكرتارية بره بتفهمك ،، قلت احفظ موية وشي تاني ما بسألو دا شنو الثقيل دا ،، جيت طالعة لقيت الدكتور منتظرني ،، السكرتارية ادتني ملف كدا قالت لي تقريه لي تمام وانا المسؤلة من تدريبك اول شهر وبتنزلي طوالي معانا ،، تجي زي ما موضحة ليك المواعيد خمسة ،، قلت ليها اوك ان شاءالله وطلعنا ،، جيت البيت علي طول لقيت بناتي معزبات ريم عذاب السواد 💔😢 قلت ليها اعفي لي ياريم والله الحاجات جرت اتاخرت عليك شديد ،، مسافة دخلت حممتهم ولبستهم ورضعته رنا ،، جات داخلة لي لاحظت ليها ما براها من شكلها ،، قلت ليها مالك ياريم تعالي ،، قالت لي رنا نامت عشان ما تصحي ساي ،، قلت ليها مستوية خلاص ما بتصحي تعالي في شنو من جيت ما عجبتيني ،، قالت لي عمي ،، قلت ليها مالو ،، قالت لي الليلة جاني بي هنا ولما لقاني ماسكة ليك بناتك قال لي دا الوافقتي بيه وابيتي ولدي ،، جابك خدامة تمسكي ليه اولاد اختو ،، الكلام وجعني من جوه ،، قمته من مكاني وقلت ليها معليش ياريم انا الغلطانة والله زودتها عليك زاتي ما مسؤليتك دي انا ممكن امشي واتكلم معاه ،، قالت لي لالا يا جيلا انا ما قلت ليك كدا عشان تتحسسي بس فضفضت ليك وما تقولي لي حازم انتي عارفاه اهوج شوية ،،، ضحكتني بي كلمتها دي قلت ليها الله يجازي محن كلماتك يا شيخة ،، قلت ليها عايزة اسالك ياريم؟
قالت لي يب اتفضلي،،
انتي اللماك علي نادين شنو وسامي شنو؟
قالت لي رامي هو العرفني بيهم..
اها ورامي عرفتيه من وين؟
صاحب بت عمي،،
قلت ليها عارفة انا اول ما شفتك اليوم داك من طريقة كلامك ولبسك افتكرتك بت هاي جد جد وراحات ،، ماكنت قايلاك يتيمة والمربيك عمك عايشة معاه،،
قالت لي مرات المظاهر خداعة بس وانا ما كان اسلوبي كدا امي وابوي وضعهم كان عادي انا طبعا بت واحدة عندهم ،، بتزكر وصلت سادس وحصلت ليهم وفاة في الشمالية جابوني ناس عمي ومشو هم وفي الشارع حصل ليهم حادث وربنا يرحمهم اتوفو الاتنين ،، منها رباني عمي وحتي اول بناتو ما كانو معاي كدا شايفات روحهم من صغار ،، بعد كبرنا ودخلنا الثانوي بديت اقلدهم واظهر بي مظهر تاني وعجبتني الحكاية ،، لما دخلت الجامعة بقيت اقول انا بت صلاح ،، عمي تاجر معروف عندو محلات اثاثات وغيرو ،،
مرة بالصدفة كنت مع بت عمي اتصلت بي رامي دا وكنا في عفراء جانا هناك وتاني عرفتو بقينا اصحاب من وقتها الصراحة هو ود حباب ،،
قلت ليها ما حصل اتقدم ليك؟
قالت لي شوفي في اولاد الواحد ممكن يطلع ويضحك ويتونس معاك لكن ما بتاع عرس ما جادي في حياتو ..
قلت ليها يازولة معظمهم كدا ،،
بعد سكتنا شوية ،، قلت ليها المستغربة ليه انو عمك وافق بالبساطة دي،،
قالت لي يا جيلا وحيات الله انتي ما عارفة ساي البحصل معاي شنو اول حاجة مرة عمي دي كريهة ما تشوفيها كدا وبناتها زاتهم حقارات ،، انا ما صدقته زاتي اتعرفت علي حازم ولقيتو جادي ،، اصلا ودعمي كان دايرني اول وكنت موافقة بيه لكن امو ابت وقالت اني يتيمة زي مقطوعة من شجرة دا من ورا عمي طبعا ،، لزت بنات عمي وبقو يضايقوني حتي بقيت علي طول طاشة من البيت مع رامي من مكان لي مكان ،، بس تاني لما اخوك جا فاتحني بالموضوع مشيت اتكلمت مع عمي واصريت عليه والساعدني علي كدا زوجة عمي لانها ما بتحبني هي الاقنعت عمي عشان تقفل باب ولدها الدايرني دا،،
قلت ليها ما خسرتي شي وربنا عوضك بكرا الله يفتحها عليكم وربنا يرزقكم بالزرية الصالحة ما تشيلي هم انتي بس ،،
قالت لي اميين يارب،،
قعدنا نتونس تاني وحكيت ليها بالحصل لي في اول يوم الليلة في الشركة ،،
اليوم مشي ونومته بناتي بدري عودتهم علي كدا عشان اقدر اقرا انا زاتي ،، بالغصب قريت ونمته عشان اصحي الجامعة بدري ،،
تاني يوم صحيت جهزته لي ريم كل حاجاتهم وساعدتها في المطبخ ،، بنصحي مع الاذان😅 وجهزته لي لبسة تاني حشرتها في شنطتي وطيران علي الجامعة ،، خلصت محاضراتي والساعة كانت اتنين يادوب قلت خلاص بمشي البيت ،، في الشارع اتصل بي دكتور امجد قال لي وينك لو فاضية عايز الاقيك ،، قلت ليه ماشة البيت لقيت نفسي اني خلصت بدري ،، في حاجة؟
قال لي لا ابدا كنت عايز ازوركم في البيت اطمن عليك وكمان حابي اشوف بناتك ..
قلت ليه والله تشرف لكن انت عارف انو حازم بطلع الشغل هسي وماف راجل معانا عشان كدا يعني انت فهمتني مش،،
قال لي لالا ولايهمك عارف الموضوع مستحيل طبعا اعمل كدا واخلي الناس تتكلم عليك،،
قال لي خلاص رايك شنو تجيبي رهف انا بحب الاطفال كتير لكن ربنا ما رزقني من زوجتي السابقة ،، وكمان اشتريت ليهم العاب لكن ما لقيت طريقة اوصلهم ليك لاني مشغول ،،
ما حبيت احرجو فقلت ليه خلاص بمشي البيت وبجيبا ليك تشوفها ،،
قفلت منو وجيت بيتنا ومسافة استحميت وجيت لبستها وكلمت ريم بالموضوع بس قلت ليها ما تكلم حازم لانو ممكن تحصل مشكلة لو عرف اني متواصلة مع دكتور امجد ،، طلعت رهف جمبي في العربية وجينا المستشفي دخلنا مكتبو ،، ما لقيتو اتصلت بيه وجانا شالا فوووق وبقي بلعب فيها ،، القليلة ادب تصبر لي مع انها متوحشة وبتبكي من الناس بس دكتور امجد قعدت تضاحك ليه واصلو ما خافت منو ،، ما انتبهت لي الزمن واااااي نطيت من محلي الساعة خمسة الا ربع قلت لي امجد الشغل وتدريب اول يوم انا لازم امشي وارجع رهف لكن كدا حا اتاخر ،، قال لي عادي سوقيها معاك بس ،، تقريبا هم عاملين قسم خاص زي حضانة ،، قلت ليه انت جادي قايل روحك وين نحن في السودان؟
قال لي دي شركة خليجية وبعدين استراتيجية الشركة والخطة تبعهم مستوحاة من افكار اجنبية يابتي انتي العايشة وين وقعد يضحك ،، قلت ليه يمكن ومشيت منو ما مقتنعة بالقالو ،،
وصلت الشركة خمسة بالضبط وشلت بتي لبتين انتظرها تمشي وتتاتي لي في ساعة ،، ما انتبهته لاني كنت ملخومة ولقيت نفسي بدخل سريع قبل الراجل وي قلبي عمل شح وقت شميت الريحة بتاعت امس ريحة باشمهندس مختار ياها زاتا عطر مميز ما بنساه اصلو ،، رفعت راسي لقيتو بعاين لي ،،
الليلة الليلة ووووب وووب خلاص اخر يوم لي دا قبل انزل ،،
بس لما ابتسم ومدا يدو لي رهف وقال ليها ازييك انتي اسمك منو العسولة دي..
قالت ليه ههف ،،😅😅 لسه ما بتعرف تتكلم كويس طالعة بليدة ما عارفة لمنو ،،
قال لي منو?
قلت ليه اسمها رهف
قال لي بتك؟
قلت ليه اي
قال لي ماشاءالله ربنا يحفظها ليك ،، ومشي
حتي انا اتنفست يادوب وشلتها تاني جيت للسكرتارية جوه لقيتها منتظراني ،، اعتزرت ليها ووضحت ليها اني اتضايقت في المواعيد عشان كدا اضطريت جبت بتي ،، حسيتها اتضايقت كدا من جواي كنت عايزة اديها كف لانها ثقيلة البايرة ،،
قالت لي كدا ما بنفع لكن ما بتخلينا نشتغل والموضوع عايز تركيز ،،
في اللحظة دي جا باشمهندس رماح طالع ،، انا مش قلت ليكم بتي دي شكلها من هسي طالعة لي عينا طايرة من شافتو قامت جارية ليه وبقت تقول ليه بابا بابا ،،، واااي انا الليلة بقتلك اصبري لي فضحتني ،، جريت وراها وعايزه اشيلا بس هو سبقني ورفعها قال لي خليها ،، جات السكرتيرة الثقيلة دي قالت ليه خلاص يا رماح مدام شلتها امسكها لينا شوية لما نخلص وتاني ممكن تشيليها ،، انا اترددته صراحة لاني ما حصل خليت بتي تزح مني ،، قلت ليها لالا بتسكت ما بتزعجنا ،، لكن السكرتيرة طلعت فقر واصرت علي رايها ،، قام قال لي ياخ ما بحصل ليها حاجة انا بمسكها ليك لما تخلصي تعالي شيليها ،، ما كنت مطمنة لكن في النهاية رضيت ،، قعدنا نشتغل و كل شوية بعاين جهة المكتب بفكر في رهف ،، عدينا قريب ساعة كدا قلت ليها بس دقايق امشي اشوفها امكن جاعت ولا محتاجة حاجة ،، جيت دخلت المكتب بدون استئذن فتحت الباب براحة ،، لقيتو مرقدها في حضنو وبتبتب وبمسح ليها في ضهرها وبغني ليها ماما زمنها جاية جاية بعد شوية معاها لعب وحاجات ،، من شافني اشر لي بي يدو اسكت هس وقال لي بي يدو امشي ،، رجعت براحة وطلعته عيوني رقرقت اتمنيت لو كان دا ابوها يعمل ليها كدا ،، كانت زي الملاك وهي نايمة في حضنو ،، بعد كرهت رماح امس الليلة اتعاطفت معاه واحترمتو كتير ،، رجعت وواصلت شغل بس خيالي ما كان داير يفارق صورة رماح وكنت سرحانة فيه،،
انتهينا الساعة سبعة اخدنا بريك ،، جيتو راجعة تاني لقيتها صحت ،، قال لي نامت نتشه بس وضحك ،، قلت ليه شكلك اب فاشل ما بتعرف تنوم الاطفال ،، قال لي وانا اعرف من وين ان شاءالله كدي لما اعرس اول لكن اتدرب في بتك مش بتك؟
قلت ليه اي
قال لي ماشاءالله شكلك اتزوجتي صغيرة
قلت ليه يعني ما صغيرة
قال لي ابوها وين ولا اتعلقت فيك؟
ما انتبهت لي روحي لما قلت ليها نحن منفصلين وسكته طوالي ،، هو كمان ما اتكلم تاني ،، شلت رهف وطلعنا ،،
مشيت البوفي اشتريت ليها زبادي وقعدت أأكل فيها ،، جاتني السكرتيرة وقالت لي باشمهندس مختار عايزك في مكتبو،،
خلاص قلبي برد انا من يجيبو سيرتو ساي بخاف ياخ ملامحو حادة كدا الصراحة وشكلو حازم وصارم ،، بكون عايز ينبهني ما اجيب طفل تاني انا متاكدة دا اول انزار وانا لسه ما اشتغلت كويس😢😢 بتكون دي سكرتيرة رماح القبيحة دي اشتكت علي ،،
اكلت رهف وسقتها جيت داخلة بيها شوية ودخلوني ليه ،،
انتي يا الما تتسمي رهف من شافتو جرت ليه بابا بابا البت دي عايزة تجلطني اي راجل تشوفو بتناديه بابا بتجيب محبتا بي يدها ،، اتخيلو قام شالا هو كمان واداها مفتاح عربيتو ،، وااااي انا امك ما قدرت اضحكو ،، عاين لي قال لي اسمها رهف منو ؟
قلت ليه رهف سامي
اتلفت عاين لي تاني قلبي دق دق دق من جوه بقي شغال مالو عاين لي كدا،،
قال لي سامي منو؟
قلت ليه سامي مختار
انا وهو بقينا نعاين لي بعض قلت مستحيل من جواي و قلت ليه انت انت والد سامي مختار يعني
يتبع
