عندما تنتهي المصالح يصبح الحلو مالح
نواصل
بعد سامي رمي علي الطلاق ما وقف لحدي هنا وبس قصد يطعني بالكلام اني اطلع ليه من البيت سريع لانو مستعجل يجيب مرتو فيه وعايز يعمل ليه فض بكارة جديد واني تجربة كانت فاشلة وانتهت من حياتو...
[بتمني من هنا تكونو بديتو تفهمو انا رامية لشنو وتشاركو بي ارائكم والفهمتوه]
ما ناقشتو كتير وقلت ليك اصلا انت تاني ما عندك حق فيني وكل زول في حالو من الليلة خلاص ،، لملمت هدومي وهدوم بناتي وحاجاتنا واتصلت بي حازم حكيت ليه الحصل ،، قال لي خلاص انا وريم بنجي عليك عشان نساعدك ما بتقدري تسوقي بي بناتك ديل ،، الحسنة الوحيدة العملتها في روحي اني قدرت اوفر قروش في البنك لانو سامي كان بصرف علي ببزخ دا غير العربية المسجلة بي اسمي والدهب الاشتراه لي يعني يصرفنا وقت لما اشوف لي شغل ،، الحمدلله كلو ختيتو في البنك ولا الله عالم كان ح يعمل شنو يقلعو مني لاني بقيت ما بثق فيه ،، سامي طلع بي جاي وانا قعدت ابكي بي هنا مهما كان الطلاق حار مع اني عملت روحي قوية لكن من جواي احيي انا بركان عايزة شي يطفيه لي ،، المصبرني بناتي وضحكتهم بقت عندي بالدنيا ،، حازم وريم جو وشالو الحاجات ،، ما سالوني ولا قالو حاجة لاني عارفة انو حازم من اول ما كان موافق علي عرسي ،، جيت راجعة بيتنا تاني ،، زي ما بقولو النسي قديمو تاه ،، الصراحة من دخلته جاني احساس الراحة والامان وريحة امي في اي مكان صاح قعدنا نبكي اول ما دخلته بس اطمنته لما رجعته ،، قلت لي حازم انا لازم اجمد السنة ما بقدر اواصل مع بناتي ديل البمسكهم لي منو ،، قال لي يا زولة انتي جنيتي لالا ما تجمدي ولا حاجة خلاص انا وريم اسبوع ونعرس وهي بتساعدك ،، ريم قالت لي اي انا مشيت وين ،، خجلوني والله لكن ابيت قلت ليهم معقول يا حازم ابقي ليكم في نفسكم وشهر العسل تقعدوه هنا عشان خاطري لالا انت بتقول في شنو ،، قال لي علي الطلاق تواصلي قرايتك ،، قلت ليه سجمي عايز تطلق البت قبل تعرسها مالكم انتو السودانيين ديل الطلاق دا في طرف لسانكم الليلة ووووب عليك يا ريم واتفقعنا كلنا بالضحك ،، ريم طلعت مننا تتم حاجاتها واعتزرت ليها اني في الظروف دي ما قدرت اساعدها ،، دخلته وبقيت اراجع لي علا في دروسها ،، جاني حازم وقال لي في نسوان جوك بره ،، استنكرته طبعا كلامو لاني يادوب جيت بتين لحقو الشمار حرقهم ،، اكيد جو يشوفو الحاصل غايتو ناس الدنيا ديل اصلو ما يخلوك في حالك ،، جيت طالعة لقيت ليك جنات وامها وواحدة تانية من نسوان جيرانا سلمت عليهم ومشيت عملت ليهم شاي وجيت قعدت ،، ام جنات قالت لي والله ولدي قال لي جيلا جات وشكلها حا تقعد هنا لانو جات بي عفشها ان شاءالله خير قلنا نجي نطمن عليك ،، قلت ليها ابدا يا خالتي محتاجة لي اجازة قلت اجي اقعد مع اخوي شوية ،، قالت لي اجييي ،، سكتنا شوية كدا جنات اتكلمت وانا عارفاها من شكلها عايزة تقول كلام ،، قالت لي مبروووك زولك قالو عرس التالته ،، قلت ليها مالو الراجل محللات ليه اربعة ومصيرا قريب يجيب فيها الرابعة برضو ،، عجبتني روحي وحسيت اني بقيت بعرف اتصرف ،، المرا الجات معاهم قالت لي خلاص مدام جيتي بعد كدا حازم دا شوفي ليه عروس ساي بدل المسكين لافي تعبان ،، قاطعتها طوالي وقلت ليها اقيفي اقيفي كيف يعني لافي ساي ما فهمتك ،، بقت تتحجج لي وقالت لي لالا القصد ما كدا الا قلنا نكلمك والفريق ما شاءالله مليان بنات مؤدبات ومحترمات ،، قلت ليها والله يا خالتي حازم خطب وعرسو قريب ان شاءالله ،، حرقو روحي بي رمي الكلام ،، في النهاية وقت شافو الونسة ما جايبة حقها قامو قالو ماشيين وانهم بجوني مرة تانية ،، جنات ما مرقت قدامهم ووقفت قدامي ،، قالت لي بالمناسبة البباري الجداد بوديه الكوشة ،، وعايزة تمشي مسكتها من يدها قلت ليها تقصدي شنو يا جنات؟
ضحكت وقالت لي قصدي عارفاه كويس يا جيلا ونحن اتلسعنا من نفس الجحر ولا شنو ،، استعجلنا وما فكرنا كويس بارينا القروش واتغشينا بالكلام الحلو المعسول ونهايتا كانت طلاق وكلام الناس البطاعنوك بيه ما بخلص تاني واي تصرف حا يبقي محسوب عليك ،، قلت ليها انتي عرفتي من وين اني اتطلقت ،، قالت لي ودي حاجة تتدس اخت سامي قالت لي ،، قلت ليها هو سامي عندو اخت ما حصل جاب لي سيرتها ،، قالت لي عندو بس كمان مطلقة كانت متزوجة ليها دكتور وما ولدت منو وانفصلو ،، قلت ليها اهااا ،، المهم بعدها ودعتني لكن حسيت الشماته في عيونا برضو .. ياهو تاني كالعادة الايام بتمشي وماف شي بقعد علي حالو وكل يوم حاجة جديدة ومرات بنبقي زي ما نحن ماف جديد،، حازم اتزوج ريم وطلعت طيبانة ما زي ما افتكرتها اول ،،
بالعشرة عرفتها كويس واهم شي انها خلت حازم مبسوط ومرتاح وكان باين عليه ودا الاهم،،
تلاتة شهور مرت وعدتي انتهت وتميت السمستر الاول في الجامعة بي تقدير جيد ،، كنت مبسوطة يا سبحان الله زماااان وقت فاضية داك لا زيد لا عبيد كنت بالقوة والدفر حتي انجح ،، هسي مع بناتي والتعب والتربية والازعاج نجحته وكمان بي جيد ،، صحي العترة بتصلح المشية مهما كان المصائب بتقويك غصبا عنك ،، يوم كنت في الجامعة تلفوني ضرب ما عرفت الرقم ابيت ارد رجع اتصل تاني قلت امكن زول بعرفني فتحت الخط ،، الووو وعليكم السلام
جاني صوت راجل انتي جيلا بت المرحومة طيبة؟
قلبي عمل شح واتزكرت امي تنشنته
قلت ليه اي نعم؟
قال لي لو تتزكري الدكتور الكان معاك لما امك كانت بتوصي فيك ،، ربنا يرحمها ويغفر ليها،،
قلت ليه اميين يعني ما متزكراه كويس ،،
قال لي انا هو دكتور أمجد وحتي جيت معاكم البيت لما اغمي عليك ،،
قلت ليه انت جبت رقمي من وين؟
قال لي من وقتها وانا كنت متردد اتصل بيك ،، انا لقيت المحفظة بتاعتك ساعتها وقعت منك وفيها جواز سفرك ونوته صغيرة مكتوب عليها اسمك وعناوين اتصالك ،،
طبعا فتشت للمحفظة بتاعتي روحي طلعت لانو فيها الجواز وكنت ماشة اعمل بلاغ لكن ما كنت مستحضرة وين رميتها ،،
قال لي الووو مدام جيلة وين سرحتي؟
قلت ليها تقدر تقول لي جيلا،،
قال لي الكان جاب امك دا منو وتاني ما شفتو؟
سكته ما رديت ،، قام قال لي انا اسف شكلي اتدخلت في خصوصياتك ،، قلت ليه لالا ما مشكلة دا طليقي،،
قال لي طيب اجيك وين اسلمك المحفظة ،، قلت ليه انا حاليا في الجامعة لو بتقدر ممكن تجيني او انا بغشاك في المستشفي وبشيلا منك ،، قال لي لالا خلاص بصلك اصلا جاي بي عند الجامعة وقفل بعدها ،، ما عارفة مالي لما قفل لقيت يدي برجفو وبقو باردات زي اول مرة اكلم راجل حسيت بي شي كدا ما ياهو خوف ولا شنو ما عرفت ليه تفسير ،، اوووف ياخ مالك هسي يا جيلا دا انتي حتي دكتور أمجد دا ما متزكرة شكلو زاتو عشان تتوتري كدا ،، بقيت منتظراه فجاة تلفوني ضرب لقيتو رقمو لاني سجلتو علي طول 😂😂 وصفت ليه محل قاعدة بقيت بعاين في الاشكال لكن ما كنت متزكراه نهائي ،، اي واحد يجي ياهو دا لالا ما دا مستحيل دكتور يكون مسلوع كدا ،، الدكاترة ديل بتعرفيهم من وشهم ،، تاني يجي واحد ياربي يكون دا ولا لالا دا قصير وشين ما شفت لي دكتور عندو كرش 😂😂😅 وشغالة اتكلم براي وما حاسة بي روحي مطلعة صوت الا لما لكزني زول في كتفي وقال لي ياهو دا انا دكتور أمجد ،،، وااااي انا اريت الارض تتشق وتبلعني اصلك يا جيلا ما بتعقلي علي قول امي الله يرحما ،، هههه ضحكته ضحكة نص كم كانت لقيتو مادي لي يدو ،، قلت ليه اهلييين ولساني تقول اتبلع ما عرفت انطق حرف بعد القبضة دي ،، مدا لي محفظتي ،، قلت ليه والله شكرا كتير ليك انت عارف انا دخته عليها لانو جوازي فيها وما عرفت وين جدعتها ،، قال لي الحمدلله ما ضاعت وقروشك مكتملة قاعدة ممكن تعديهم ،، حسيت بي احراج شديد وقلت ليه العفو معقولة بس يعني زعلتني والله ،، ضحك كدا وقال لي خلاص اعزميني قهوة عشان ما تزعلي ،، عايزة اقوم اطلب اتنين قهوة بس مسكتني يد من معصمي قوي وقال لي لالا كدا انا البزعل بي جد انا الراجل اكيد ما بخليك انتي تقومي وجراني قعدني ،، بقيت متفاجئة من ردت فعلو من جواي قلت دا مالو مجنون ولا مخو ضارب فيوز لكن اكلتها في حناني وسكته ،، المهم شربنا قهوتنا واتونسنا وعرفت عنو حاجات يعني الشمار عنو حرقني ،، عرفت انو هو مطلق وما عندو اولاد ،، وانا وريتو انو عندي بتين ومطلقة ،، حسيتو انو يدو واصلة فا قلت ليه انا بفتش لي شغل لو بتعرف ليك شغل مسائي كدا يعني ممكن ،، قاطعني في الكلام قال لي انتي جادة يا زولة الكلام دا ببقي ليك صعب بتقعي في يومين وبجيبوك تاني لي المستشفي ،، قلت ليه مرات الظروف بتجبرك ،، قال لي بس البشوفك بقول انك ما محتاجة ظروف شنو البتجبرك ،، قلت ليه يعني عشان راكبة عربية،، سكت ما جاوبني ،، قلت ليه العربية دي حبل نجاة لي من شلهتة وشحططت المواصلات ما بملك غيرا جد ،، وانا عندي بنات واخت بتقرا غير قروش جامعتي وانا بقرا خاص ،، بس الحمدلله ،، قال لي علي حسب ما بتزكر عندك اخوك وابوك ،، وطليقك مجبور يصرف علي بناتو ،، من جاب لي سيرتو مزاجي اتعكر وقلت ليه ما عايزة منو جنيه ديل بناتي وبربيهم براي ،، قال لي بس دا الشرع بقول كدا ما جبتو من عندي ودا حقهم حا تحرميهم منو؟ سكته وقلت ليه انا اتاخرته لازم امشي البيت ،، حسه بي زعلته قال لي معليش شكلو كلامي ازعجك ،، قلت ليه لالا عادي ،، ودعتو وجيت راجعة البيت ،، طبعا بقيت الشغل الشاغل لي ناس الفريق من اجي بالعربية بشوفهم يتهامزو ويتلامزو وظاهر بتكلمو فيني والله عالم بقولو عني في شنو ،، جيت داخلة البيت واتكلمت مع حازم في حتة الشغل دي هو اعترض وقال لي لما اموت انا تاني اشتغلي ،، قلت ليه بعد الشر عليك ياحازم دا ما قصدي بس انا عارفة وضعك وانك شغال تكسي وهسي اتزوجته وبكرا ريم بتحمل وتجيب ليك اولاد والمسئولية بتكبر وانا زدتها عليك بي علا وبناتي ،، فيها شنو لو اتشاركنا وشلناها سوا ،، قدرت اقنعو وقلت ليه لو غلبني الشغل انا بخليه ،، جيت دخلت النت وبقيت بفتش في الجرايد واشتركت في موقع سوداني خاص بالوظايف عسي ولعل ربنا يفرجها علي ،، بالمسا انا وريم كنا قاعدين نحضرفي مسلسل هندي اصلو عادتي ما بخليها جني هنود 😂😂 دكتور أمجد اتصل شلت تلفوني ودخلت بيه جوه ،، الوو مساءالخير ،،
مساء النور
قال لي جايب ليك خبر حلو بس تديني الحلاوة عليه،،
قلت ليه طوالي بس اشوف الخبر والحلاوة علي حسب فرحتو ،،
قال لي لقيت ليك شغل اهااا قلتي شنو؟
عايزة انطط من الفرحة وقلت ليه عايز شنو بجيبو ليك ،، قال لي تاني انتي وذوقك ،،
قلت ليه شنو الشغل ووين؟
قال لي هو سكرتارية مع انو خاتين شروط تانية غير الجمال والاناقة وديل متوفرات عندك ،، قلت ليه الشروط التانية شنو؟
قال لي تكون بتعرف انجليزي وبرامج الحاسوب وتكون قارية سكرتارية ،،
تنشنته وقلت ليه لكن انا نص الحاجات دي ما عندي ،، قال لي لالا انا قدرت اوفر ليك الوظيفة خلاص مافي اشكال في الحتة دي ولو علي الانجليزي والحاسوب بشوف ليك معهد كويس تدخليه ،، اداني الامل بكلامو دا وقلت ليه بالمساء لكن؟
قال لي اي من الساعة خمسة لي عشرة مساء كيف معاك؟
قلت ليه ظااابط معاي شديد انا موافقة اها بتين امشي للمقابلة،،
قعد يضحك وقال لي شايفك مجتهدة شديد،،
قال لي هي في شركة شراكة خليجية بين والد طليقتي واخوها بس انا علاقتي بيهم كويسة شديد لاننا انفصلنا بي رضانا ،، والشركة دي يادوب جديدة شغالين معاينات الايام دي،، وانا قدرت اتوسط ليك فيها ،،
اتبسطه وحمدت الله انها يادوب جديدة كدا كويس زاتو معاي اقدر اثبت نفسي وابدا من اول وجديد ...
بس يا تري جيلا عارفة المنتظرها شنو؟
يتبع
