دخلنا في النص والناس زحت حوالينا في شكل دائرة كدا رماح مسكني من وسطي وقرب علي ،، خجلته وقتها خجل لما ما قدرت اعاين ليه في عيونو وهو بهمس لي فصاحتك ديك فاتت وين كلها ،،
وانا فعلا لساني اتبلع ،،
قال لي حسي معاي الاغنية دي كل كلمة منها جواي ليك ،، من جواي قلت الود دا داير يقتلني الليلة بالكلام البقول لي فيه دا لي زمن ما سمعت كلام حلو،، ضغطني ولي لحظة من اللحظات حسيت اننا غبنا عن الوعي وصوت الاغنية
ﻛﻞ ﻛﻠﻤﻪ .. ﻭﻛﻞ ﺣﺮﻑ .. ﻭﻛﻞ ﺍﺣﺴﺎﺱ
ﻗﺎﺻده ﺗﻮﺻﻒ ﺷﻌﻮﺭﻱ .. ﺍﻩ ﻳﺎ ﻛﻠﻲ ﻳﺎ ﺍﻏﻠﻰ ﺍﻟﻨﺎﺱ
ﻗﻮﻝ ﺍﺣﺒﻚ ﺣﺘﻰ أﺣﺲ ﺍﻧﻲ ﺍﻋﻴﺶ
ﻗﻮﻝ ﻭﺍﺻﺪﻕ ﻭﺍﻻ ﺍﻛﺬﺏ ﺑﺲ ﻻ ﺗﺴﺄﻟﻨﻲ ﻟﻴﺶ..
بعدها قلبنا اغاني سودانية النصيحة حتيناه انا وهو😂😂😂،،
الحفلة انتهت وكانت حلوووة شديدة اتبسطنا فيها للاخر ،، طلعنا العربية قال لي جيلا انتي بناتك وديتيهم وين من قبيل عايز اسالك السؤال دا وبنسي ،، قلت ليه يعني في رايك حا اجدعهم مثلا وديتهم لي ابوي عشان هو ما بحضر حفلات ويلا ارح نجيبهم ،، طبعا صدمتو😂😅 اول ليلة ليه مع شفع الله يعينو زواجة مختلفة...
وصفت ليه بيت ابوي ونزل معاي مسافة شلت البنات وطلعنا ،، هو شايل رهف وانا رنا حالتنا مضحكة بالجد ونحن عرسان ،، جينا بيتنا ريم ساعدتني لما غيرت فستان الزفاف ولبسته فستان بسيط تاني ،، ودعتهم بكينا زين تقول ما حا نتلاقي تاني وصيتها علي روحها وعلا ،، علا قعدت تبكي مسكت فيني وقالت الا تمشي معاي بس قلت ليها كلها ايام وبجيك بسوقك حتي اطمنت ،، اتحركنا ورماح كان اجر شقة جينا نزلنا فيها ،،
علي اساس اول ليلة ليه دخل وغير وكان مجهز شعورو للاخر وجاني يشيل البنات يوديهم الغرفة التانية لقانا نايمييييين في سابع نومة انا وبناتي😤😂😅..
والله ما حسيت بي روحي الا الصباح لما صحيت بي بكي رنا لقيتو يا حرام هو نايم ورهف نايمة جمبو ،، اتزكرت اول يوم شالا ونوما داك قلت سبحان الله اتمنيت وقتها شي وهسي رماح بقي من نصيبي ورهف نايمة جمبو زي تقول هو الابوها،،
مر اسبوع حسيت انو رماح كان متضايق والصراحة انا غلطانة كمان كان مفروض اول ليلة اخلي بناتي مع ريم كلها يوم ودا من حقو ،، المهم هو نزل الشغل علي طول لكن ما كان رضيان ومتضايق خصوصا انو لسه ما قدر يقرب مني وانا ما اديتو فرصة زاتي ،، قلت يا جيلا احسن حاجة اعمل ليه مفاجاة الليلة واتصرف اطفش بناتي لي ريم قبل تجي علا وتتم الناقصة،، خليتو طلع بي جاي وطيران وديتهم وكلمت ريم لمت فيني ضرب قالت لي اني ما عندي قلب ولا زرة رومانسية نهائي ،، هسي ولد زي دا بطانشوه ،، قلت ليها والله اكلم حازم اقول ليه لم مرتك بتتغزل في راجلي ،، جيت طالعة منها صادفتني جنات بره عصرت كراعها وحلفت ما تسلم علي ولا تقول لي مبروك اجي اجي يا الغيرة والروح الشريرة ،، عملتها ظاهرة لكن ،، ما اهتميت بيها كتير وركبت عربيتي جيت نضفت الشقة وبخرتها وفرشت المفرش وجهزته الهدوم في السرير بعد بخرتهم وجهزت حاجات الدلكة والعطور ،، وطلعته ركبت عربيتي جاية الشركة لي رماح ... من جيت داخلة حسيت الناس دي كلها بتعاين لي اتمنيت الارض تتشق وتبلعني لاني شفت كل زول بعاين لي وبتكلم مع الجمبو ،، ما باقي ليهم الا يقولوها لي في وشي ،، طلعت جاية مكتب رماح مع دخلتي الصالة اسمع ليك صوت عالي زي شكلة ساعتها قلبي انقبض الصراحة بالي جا في رماح علي طول ،، سريع جيت دخلته ا لسكرتيرة قالت لي ممنوع تدخلي ،، قلت ليها انتي جنيتي ولا حاجة دا راجلي الجوه دا واصلا انا البت المعصعصة دي من جيت ما بريدا ،، مشيت ما اشتغلت بيها وكرب فتحت الباب القاه ليك سامي تراهو جايط مع رماح ،، من شافني قعد يضحك وقال لي سبحان الله بتجي علي السيرة طوالي ،، ولا اقول ليك الف مبروووك يا عروس ،، رماح اتفعل وقال لي الجابك شنو هسي ،، سامي رد عليه ،، ما خلاص الشركة شركتها مش راجلا شغال هنا تجي وتمشي زي ما عايزة ،، ما رديت علي كلامو المستفز ،، رماح جا علي ومسكني من يدي طالعين بره ،، الحركة دي وجعتو لما غلط فجاة اتفعل وقال لي مش انتي عرستي يبقي تتحملي البحصل ليك لاني جاي اسوق بناتي غصبا عنك انا ما بخلي راجل غريب يربيهم لي ،، جريت يدي من رماح لاني اتخلعته كل شي الا بناتي انا كان اموت لو بعدو مني لحظة ،، اتلفته عليه وقلت ليه انت مجنون بناتك بي وين تعبت معاي فيهم ولا شفت طلباتهم ولا مرضت معاهم ولا اكلتهم ولا ساهرت بيهم مش قلت ولادتي كلها بنات وانت عايز ولد يشيل اسمك ولا نسيت،، اياك يا سامي تحاول تقرب منهم لاني فعلا ممكن اتقلب مجرمة وما تقول اني حا اسكت ليك او اخاف منك انت فاهم ،،
وطلعت بتنفس بي ضلوعي من شدة ما معصبة وزعلانة رماح لحقني بقي بهدي فيني ،، بقينا واقفين في الصالة ،، سامي جا ورانا وقال لي السكرتيرة اطبعي خطاب استقالة وخلي زوج الست المصون يوقع عليه عشان من اليوم هو مفصول خلي التمشي تفتح ليه شركة بي قروش ابوها ومشي ،،
انا استفزاني كلامو بالجد لكن ما في يدي اعمل حاجة قلت لي رماح دا واحد ما يستاهل يردو عليه خليه ،، جينا راجعين البيت ومن دخلت بقيت ببكي ،،
رماح جا وبقي بهدي فيني ضماني عليه وتاني ما حسيت بي روحي...
لما صحيت قمت مخلوعة ما لقيت رماح لبست وطلعت بره فتشت الشقة مافيش ،، دا مشي وين كمان ،،
قلت خلاص امكن مشي ناس امو ،، النمشي اجيب بناتي وعلا ساي ،، لبست لي عباية وطالعة بره تلفوني ضرب لقيتا ايمان ،، رديت عليها كان اسمعها ليك بتبكي وتصرخ جيلا الحقيني جيلا واااي انا الحقي رماح رماح مات يا جيلا ،، خلاص انا تاني ما فهمت حاجة لا عرفت اكورك لا اتصرف لا ارد ،، ما حسيت بي روحي الا وانا جارية في الشارع حفيانة منططه عيوني وبرجف وقفت لي امجاد ووصفت ليه بيت نسابتي ،، ما عارفة وصل كيف وبتين ،، نزلت وجيت جارية دقيت الجرس الخدامة فتحت لي تووش دخلته ما لقيت زول ،، تلفوني تلفوني وديتو وين ما عارفاه بالجد جدعتو وين كنت ،، قلت ليها وين ناس البيت الحصل شنو ،، قالت لي الاسمها رماح حصل مشكل وفات مستشفي ،، قلت ليها مستشفي شنو ،، قالت لي مستشفي ال....
جيت جارية تاني وركبت وجيت المستشفي ،، بالكوراك دخلته بعد منعوني ،، شفته ايمان جيت جارية عليهم ايمان وين رماح الحصل شنو وريني ،، مسكتني وقعدت تبكي قالت لي الحمدلله رماح كويس ربنا ستر ولطف يا جيلا ،، قلت ليها الحصل شنو انا خلاص الفيني كملت وقت اتصلتي داك ،، قالت لي رجعت لي بي تلفون تاني بس ما رديتي رماح مشي لي سامي و اتشاكلو وقالو وقعو في السلم دا القالوه ناس الشركة ،، قلت ليها شنو؟
قالت لي دا العرفتو رماح رجلو اتكسرت ورضوخ تاني في جسمو هسي طمنونا عليه بس هو نايم ،،
ارتحت شوية وقلت الحمدلله ،، قلت ليها وين راقد في ياتو غرفة وصفتها لي وقالت لي جاية دقيقة ،، وقت جيت سمعت اختو قالت لي امها مرتو العرسها دي شكلها كراعها ناشفة قبل يدخل عليها شوفي امورو اتعكست كيف طردوه من شغلو وكسر كراعو الله يستر ،، امو قالت ليها والله انا زاتي ما عارفة العاجبو في مرا معرسة كانت شنو ،، لكن انا حلفت ما بدخل في اختيار واحد من اخوانك ديل عشان لما تحصل معاهم مشكلة في يوم ما يجوني ويلوموني ويقولو لي دا اختيارك يا امي ... جيت عليهم تممم سكتو ،، قلت ليهم حمدالله علي السلامة ،، وبقينا ساكتين ومنتظرين بره ،، يومين وطلعو رماح في كرسي متحرك ،، امو قالت الا تجيبو البيت ،، ما حبيت اعمل مشكلة قلت ليها خلاص ،، وانا جيت بيتنا دخلته سقته بناتي وقلت لي حازم انا ماشة ناس نسابتي خلي علا معاكم كم يوم بس لما ارجع شقتي وخشمي عندي ما جبت سيرة ليهم بالحصل ،، رماح بدا يتحسن وانا كنت مستحملة عشانو ،، قال لي يا جيلا امشي الشركة وعندي استحقاقاتي ضربو لي انها طلعت استلميهم لي انا كلمت السكرتيرة ،، لبست وقلت لي نسيبتي معليش تمسكي لي الشفع لما اجي ،، جيت الشركة ولاقيت السكرتيرة قلت ليها سامي كيف ان شاءالله ما اتعوق هو كمان؟
عاينت لي كدا زي كأنها محملاني سبب الحصل وقالت لي والله قالو كسر حوضو وهسي مانعنو الحركة ،، ما فتحت خشمي تاني شلت الشيك وطلعته ،، قلت اغشاه في البيت اقول ليه حمدالله علي السلامة بس قلت هيي يا جيلا احسن تقفلي الباب دا ما تجيبي المشاكل لي روحك وشكلو رماح طلع احمق لو عرفني مشيت ليه ما عارفة ردت فعلو شنو ،، نسيت الموضوع وجينا لقيت حماتي نومت البنات ،، الايام القعدتها معاهم دي معاملتهم لي بدت تتصلح انا حسيت انو بناتي هم السبب بقو ما بقدرو يفارقوهم ثانية بمسكوهم اكتر مني حتي نسيبتي بدت تلين علي شوية وتتونس وتضحك معاي ،، ارتحت واطمنت انو لقيت حد يخلي بالو علي بناتي لما اطلع ،، مرت الشهور سريع و رجعنا شقتنا وجبت علا معاي ،، رماح بقي عصبي وكل يوم شكلة لانو قاعد عاطل في البيت وانا اضطريت اجمد السنة ،، مشيت البنك سحبت دهب امي الختتو لي انا وعلا للزمن وبعتو وجيت لي رماح ،، قلت ليه عايزة اقول ليك حاجة بس ما تفهم غلط ،، قال لي شنو ،، اديتو القروش وقلت ليه اشتري اقامة وامشي فتش ليك شغل بره ،، قام من محلو وقال لي مستحيل اشيل منك قروش ،، المهم بعد تحانيس وتعب قلت ليه اعتبرهم سلفة طيب ،،
بعدها قدر يتحصل علي اقامة وسافر قطر وانا رجعت بيتنا تاني ،، في الوقت دا الحمدلله ريم ولدت وجابت تؤم😍😍😍 اماميير بس حازم طشه من البيت قال مزعجين جنهم بكي ،، انا في وقت فراغي رجعت اصمم تاني وبرسل الصور لي ايمان وهي بتطبق علي الواقع كنا ماشين كويس لكن برضو بطريقة بطيئة ما لي درجة الطموح الكنا عايزنو ،، قدرت اعرف انو جنات عرست دكتور امجد الله عالم عملت ليه عمل ولا شنو كلو وارد😂😅 وعرفت انو نادين ولدت بس الجنين طلع مشوه عندو مرض نادر ورفضت تستلمو قالت مستحيل دا يكون طفلها ويطلع منها ،، سامي بقي كويس وتاني ما رجع سألني عن البنات بعد ما ريم كلمتني انو رامي قال ليها حصلت ليهم خسائر مالية بعد الشراكة انفضت وهو طلق نادين وحصلت مشاكل كتيرة ما حبيت اعرفها زاتو ولا عندي النية اعرف اخبار اختو وقت ريم قالت لي عندها علاقة مع رامي بس نصحتها تكلم رامي يبعد عنهم احسن ،،
الحمدلله رماح امورو ظبطتت وقدر يلقي وظيفة ورسل لينا نجيه زيارة لما يقدر يعمل لينا اقامة ،، سافرنا وودعت اخوي وعلا وريم وابوي بالدموع ،، ووعدت علا بس موضوع الاقامة يتم وبسوقها ما بقدر اخليها بقيت بحسها زي بناتي واحد ،، جيت قطر وانا وايمان بدينا شغلنا الخاص وبديت اطور من نفسي واحسنها ،، وشاركت في المسابقة بتاعت التصميم الكانت من ضمن خططنا ونسيت الموضوع ،،
يوم قاعدين نتونس قمت دخلت اعمل ليهم كيك نشرب بيه الشاي فجأة بطني قلبت وجريت استفرغته في الحمام ،، عرفت نفسي حامل من وقتها لكن ما استعجلت لما اتاكدته اول ،، انتظرته رماح لما جا المساء ،، كان عندنا لعبة بتاعت تركيب حروف كدا بنلعبها قلت اعملا مفاجأة ل رماح كان يعرفها بدينا نقترح في الكلمات ونلصق في الحروف لما خليتو يكون الجملة في اللعبة كلمة بيبي ،، بس طلع مخو تخين ما بفهم😂😂 وريت ايمان وقالت لي خلاص نلز ليه رهف فصيحة تقول ليه ،، حفظناها الكلام وجاتو بابا بابا ماما وخالتو قالوا لي اقول ليك ماما عندها بيبي ،، انا وايمان اتجلطنا لانو قلنا ليها قولي لي بابا ماما عندها بيبي ،، هي مشت قالت ليه قالوا لي اقول ليك💔💔😅
رماح بالفرحة جا شايل رهف وجاري قعد ينطط زي الشفع رهف انا حا ابقي بابا حا ابقي بابا ☺☺😍،،
يوم كان حلوو وظريف واتمنيت لحظات الفرح دي دايما تلازمنا في حياتنا يارب.. الفرحة الاحلا كانت والله فعلا ما بنسي عبادو اني فزته بالجايزة التالته في المسابقة نحن هنا جنينا انا وايمان جرينا بره الشارع وقعدنا نرقص ،، القروش الجاتنا اشترينا معظم الحاجات الكانت ناقصانا واجرنا شقة استديو وفتحنا فيها مشغلنا وحاليا انا شبه معروفة في وسط عالم الازياء،، واي مبلغ بتحصل عليه برسلو لي حازم بدينا بيه مشروع في السودان بتاع تجارة وكدا ،،
اما الفرحة الكانت اكبر هي لما عرفت اني حامل بي ولد من اغلا حد حبيتو اولا لانو كان متفهم ونادرا تلقي ليك زول بالمواصفات دي في الدنيا و قدر يعوضني عن كل الفات ويشيل معاي الحمل ويرجع لي ثقتي بي نفسي ،، لسه ما تميت قرايتي بس في الخاطر ووصيت امي اهم حاجة لما قالت لي تمي قرايتك هي البتنفعك،،
بي رغم المشاكل الكانت مرات بتحصل بينا ،، بس هي الحياة كدا ونحن علينا نواصل نعيشها بي حلوها ومرها...
