#حب_بنكهة_المشاكل😂⁦❤️⁩

#المقدمه✨

#حب_بنكهة_المشاكل😂⁦❤️⁩

#المقدمه

قصة بدت في عام 2011 بدايت معرفتنا  النت بشكل اوسع و اوضح  وبداية كل شي صار قصة واقعيه بإضافة القليل من الكوميديه❤️⁩

انا اسمي ميمونه  بنت عاديه وكسلانه ماعنديش جهد ندير مشاكل مع حد اهم شي نقعد راقده ونت قوي وبالي متريح انا عمري24 سنه عيشة مع امي "امباركه" وبويا"فرج" مشاكلهم اطول من ليله بلا عشاء😂🙁
البنت الوحيده بس عندي اخ يقهر بكل وجها وجه نكد ومشاكل ليل نهار جيب اصحابه في المربوعه ...وعمتك انا ماعنديش شغله في الحياة غير قاعده في الكوجينه نستنى في القهوه اطيب عشان نعطيها له برغم اني كسلانه لكن نحتاج فيه في ليالي الشتاء القارصه يجيبلي شورما اندفي بيها معدتي ⁦☹️⁩🔥...المهم بنبدا نحكي مغامراتي في كوكب حوش عيت الحاج فروجه😂 ...ومعلومه اخرا انا نحب الشتاوي  اي موقف يصير بلاشعور هكي نقعد نقول عليه في شتاوه🙂💔

في يوم من ايام البرد وقرة العنز كان جو سقعه وتبي تمطر ...وريحة الحساء بالقديد  مسيطره ع الحوش ⁦☹️⁩⁦❤️⁩...فجأه من حيث لا ادري خش علينا عمك فيصل

فيصل"خوي": يا ليمونه ديرو احسب معاذ امعي في المربوعه
انا: خطاني انت ومعاذ اقريب ايدحي عندنا الراجل ماعنداش عش مثلاً قصدي حوش؟
فيصل"فنص": ليمونه حطي لسانك في فمك لان ماخطريش نكسر اسنونك اللي يلمعن🙂
انا: بس بجد يا فيصل اصحابك ماعندهمش حواشين😔
فيصل: خشمك خليه في حياتك وصبي حطي صفره ليا وللراجل
انا: ماعنديش جهد نلبس شخشير يدفي رجليا فـ هسقعه يابال نحطلك صفره تبصر صح😂
فيصل: قولي نبي شورما باهي !!...خلك عليها منوره
انا:تعال هنا يارا نبصر هي احلا صفره تجيكم نزينلك الحساء بالنوتيلا كان تبي لعيونكككك تؤبرني 😍
فيصل"ضحك وطلع الصاحبه"

بينما انا صبيت  ونشوف للسراميك ونحاول ماندوسش ع الخطوط اللي فيه 😂...ع جيت امي "امباركه"

امباركه"رافعه حاجبها": يابت انكلبتي ولاشنو ؟
انا: يامي بنتك جتها حاله نفسيه
امباركه"بجديه": اللهم احفظنا يارب ...شنو حاله نفسيه مانفسيه هذي مرض طالع جديد شكله ؟؟
انا"ضحكت": نجكك ليا يا خيتي بريئه😍😂
امباركة: حي عليك نبيعك ونشريك انا😒
انا: باه سلم امي حطي الفيصل  عشاء امعه معاذ وكلميني عشان نكلمه يخذها
امباركه: توا نوتيها ونكلمه انا يخذها
انا: اصحك اديرها تحرميني من الشورما بعدها ...انا دخيلتك 😂💔
امباركه: لعند امتى اكسلك هذا امدادك فتحات حواشين بصغارهن؟؟
انا:لين يفرج الله ويجيني العريس المنتظر
امباركه: انتظري لين تشيبي هنا عندك ...اللي يجيك اقبلي بيه وخلاص راك كبيرة
انا"تنحنحت": يامي راه نقول الفروجه وليتك تبي تلزني من الحوش بالغصب
امباركه: طيح والله سعدي اللي جيبة هبله كيفك ...مشت امي وخلتني نفكر في كلامها" انتظري لين تشيبي هنا عندك" خطرتلي شتاوه عليها
(كان اعباكي ع المرهون..تشيبي ويطيحن لسنون)🤷😂..تحسبني تأثرت والله يا جبل ماتهزك هزه ارضيه مش ريح😂

المهم بعد شوي نادتلي امي  خذيت الصفره ومشيت الباب المربوعه
طلعت تلفوني نبي نرن  ع فيصل قبل مانرن عليه سمعت صوت واحد جيني  قلت  هذا اكيد فيصل خليني نوفر الرنه ..نرن بيها بعدين ع فوزيه الجقابه😂 ولكن للاسف فجأة صار اللي ماعمري توقعته ...المهم نحكيلك بكره ياحناتي هي مع سلامه 😂⁦❤️⁩

..... يتبع🔥🔥

وصلنها 1000 لايك و1000 كومنت انزل الثانيه ع طول هي ⁦❤️⁩...نبي انزل بلحقتين في اليوم كان عجبني التفاعل لان التفاعل يخلي فيا نتحمس ونكتب ⁦❤️⁩

#للكاتبة:لينة المنفي