رسالة ثانية : شبيج متردين لو اكلج شي اصلا تعودت على تجاهلج اليه
خيال : هم اجة اللزكة يربي والله يلح حذفت الرسايل كالعادة واتصلت بزينب
زينب : الو هلو خيال خو ماكو شي
خيال : لج هذا رامي هم رجع دز رسايل
زينب : جاوبتي
خيال : لا طبعا واني اصلا حجيت ويا مرتين وفهمتة انو ما اريدة وميصير يدزلي خاصة هو يعرف اخواني وولد عمامي وعماتي
زينب : يحبج بابا وقافل عليج ههههههه
خيال : لتحجين هيج تدرين بية اضوج والله مليت منة حتى الحضر ميفيد يجيني من غير رقم 🤦🏻♀️
زينب : هم حضري من هذا الرقم لعد شنسوي لان اذا كلتي للولد تصير مشاكل
خيال : اي والله كلامج صحيح
ثاني يوم تغدينا وكاعدين كلنا دنشرب جاي ودخل قيس
قيس : السلام عليكم
ردينا السلام وكعد
قيس : خيال جايبلج خبر
ام قيس : خير ان شاءالله
قيس : طلع قبولها بجامعة بأنقرة والسفر بعد شهر
خيال : صدك قيس ؟
قيس : شنو مفرحتي
خيال : ما ادري
دعاء : يابة مرتبكة ولان فاجئتها ف بعدها متشتتة
ام قيس : ياحبيبتي شلون افاركج
كرار : ههههههه امي من هسة حتكلبها مناحة
خيال : خو انت كيفت
ام قيس : يشاقيج ماما اصلا اكثر واحد مقهور بس ممبين عليه
كرار : عوفيها يوم هاي صخر متفهم بالاحاسيس المتفجرة بداخلي
دعاء : الله ياملكة الاحساس يا اليسا
خيال : ههههههههههههه عزه متتت
كرار : مشكور ام علاوي الغالية متقصرين
دعاء : اي خدمة كروري 😂
كرار : دكومي لابنج فلشنا
خيال : اني اكوملة فدوة حبيبي حشتاقلة
كرار : خلي اصعد للغرفة راح يكضوها علية افلام
قيس : لولو باجر نطلع اني وانتي نبدل الجواز لازم جديد لان المدة مالتة باقيلها ٤ شهور وتنتهي
خيال : اوكي .. شكرا قيس مقصرت
قيس : شمسويلج ولج غير بنيتي واختي انتي
خيال : رحت كعدت بصفة وخليت راسي على كتفة وبجيت وهو يمسح بدموعي ويضحك
قيس : لج بابا شجاج شكو هذا البجي
اندك الباب و اجتي سرى وسلمت
سرى : خير شبيها تبجي
ام قيس : قيس طلعلها القبول وتدرين باختج ام دميعة حاضنتة وتبجي
سرى : الف مبروك حياتي والله يخليك النا ابو علاوي
قيس : يابة ترا صح اني لازم معرض السيارات والمحلات (اسواق) بس انتو الكم حق بيها حالي حالكم وصدكوني مو بمنية لان هاي وصية ابوية
سرى : ادري النا الحق بيها بس احنا كاعدين وحايرين بشغلنا ويوصللنا كل شهر مبلغ وانت فوك دوامك بالمركز تفتر وحاير بفلوسنا
ام قيس : اي هو علمود هيج اني اصريت ياخذ اكثر منكم لان حقة بس هو اليفتر
سرى : اي يستاهل قيوسي احلى نقيب بالدنيا
دعاء : طبعا سراوي وين اكو هيج نقيب حلو انوب كل ميكبر يحلى واني ينشلع گلبي
سرى : ههههههه الله يخليكم لبعض ويخليه النا
.
.
سرى تروي الاحداث :
قيس يعتبر اهم شخص بحياتي من بعد وفاة بابا وهو حاير بينا وحتى من جنا صغار جنت اي شي يصير وياية بالمدرسة او بالجامعة اروح اكلة اول واحد بالرغم الفرق بيناتنا بس اربع سنوات بس بعقلة الواعي جان يحل الية اي مشكلة هذا غير شخصيتة الرجولية وشكلة الوسيم شكد حاولو صديقاتي وياه بس هو ما اهتم الى ان شاف دعاء صديقتي المقربة انعجب بيها كلش لان محترمة وخلوقة وشكلها يخبل بس تعبتة شوية بشخصيتها بس عيني اخوية مينرفض وحبتة سنتين وجانت علاقتهم كلش نضيفة كلشي بيناتهم من خلالي لان راد يحافظ عليها وهو هم بحكم منصبة ميصير يبقى يتردد عليها بالكلية بس جان يجينا مرات بحجة يوصلني حتى يشوفها واذا دزو هدايه لبعض اني اوصلها للثاني واذا اشتاق لصوتها يخابرها من تلفوني وميطول وانخطبو سنة وتزوجو
اما خيال اختي رغم هي اصغر مني بس احسها واعية اكثر من اللازم حتى محتاجت نصيحة من احد ولا راهقت احسها مفرمتة رباني يعني وهي طفلة تعرف الصح من الغلط من غير طيبة گلبها الزايدة وعاطفتها نسميها بالبيت ام دميعة لان دمعتها كلش قريبة
وكرار هذا حدث ولاحرج فكاهي بشكل ودائما يداهر بينا وخاصة ويا خيال بس كلش حنين وهو وخيال عانو من بعد وفاة بابا الله يرحمة لان جانو متعلقين بي كلش وهمة جهال واحس دائما ورا ضحكتهم اكو غصة لحد هسة مهضومين بس قيس ابد ممقصر وياهم جان الهم اخ واب الله يحفظهم الية .
.
