خيال : ليش ؟
زياد : سكت شوية وكال بعدين تعرفين وهسة ما اريد أأخرج وديري بالج بالجامعة
خيال : تصبح على خير
زياد : وانتي بالف خير
سدة زياد وحسيت عندة شي ما اعرف ما مرتاحة لمكالمتة واني اصلا ما احجي بالتلفون ويا احد عدا اخوتي
كعدت الصبح بدلت ورحت للكلية لكيت سهى سابقتني سلمت عليها بس شفتها ضايجة سالتها كالت ما اعرف شكلج بس اني ممرتاحة هنا
خيال : ليش حبيبي شنو مضوجج
سهى : خيال والله مليت من الوحدة اني هنا اجيت قبلج وصارلج عشر ايام وحدي وما اعرف احد ولا احجي ويا احد ماعندي واهس حتى اكل
خيال : سهى اذا تحبين نكعد سوية ماعندي مانع
سهى : لا خيال انتي تريدين تاخذين راحتج ما اريد ازعجج
خيال : ولج اي ازعاج اني اكيف تجي وياية بنية عبالج اني فرحانة لان كاعدة وحدي ! لا طبعا ف هسة اتصلي باهلج بلغيهم
راحت تتصل باهلها واني هم اتصلت ب ماما وكيفت لكيت بنية اعيش وياها احسن من الوحدة واني اصلا حبيتها لسهى حسيت بيها بنت اوادم
سهى : خيال اهلي قبلو وكيفو ممصدكة حنعيش سوية
خيال : لا عمري صدكي وهسة خلي نخلص محاضرات ونرجع بباصات الجامعة لحد الموقف وناخذ تكسي ختى انلم ملابسج ونروح لشقتنا
اتشكرت مني سهى وباستني ورحنا للمحاضرة كملنا ورجعنا للباص نزلنا بالموقف واخذنا تكسي لشقة سهى وصلنا وبدينا انلم بملابسها بالجنط
سهى : خيال تعبتج
خيال : اكلج باعي اني ما احب احد يلح علية كاافي
سهى : ههههههههه حاضر
خيال : عفية بنيتي يلا خلي ننزل ناخذ تكسي
سهى : لج خيال عزه بعيني نسينا شغلة
خيال : شنوو
سهى : لازم نبلغ صاحب الشقة
خيال : انتي عقدج سنوي لو شهري ؟
سهى : شهري
خيال : اي لعد ماكو مشكلة اتصلي بي وبلغي انو عفتي الشقة وخلي يصعدلنا الحارس حتى يشوفها ويجيكها
صعد الحارس وشاف الشقة مثل ماهي وانطينا المفتاح وطلعنا
خيال : فوتي حبي شوفي الشقة
سهى : الله حلوة ونفها اكلج بيها سرير ثاني
خيال : اي الغرفة بيها سريرين وكنتورين حتعجبج
دخلت سهى وبدت ترتب باغراضها وساعدتها شوية لانه مقبلت كالت انتي تعبتي لليل اتمددنا بالفراش
سهى : خيال مجعتي ؟
خيال : اي والله جوعانة نطلب ؟
سهى : اي ياريت بس شنو عاجبج
خيال : كيفج بيتزا برگر
سهى : نطلب بيتزا
خيال : تمام
طلبنا والدفع بالنص اتفقنا اني وسهى كلشي بالنص
نمنا وكعدنا نبدل حتى نروح للدوام وجان شي حلو انو اثنينا نطلع سوية ونرجع سوية احسن من الوحدة
——————
محمد : وصلت لانقرة ورجعت لشقتي ويا اصدقائي كالو باجر نداوم احنا ٤ بالشقة وشقتنا جبيرة بيها غرفتين رحت للدوام ويا مرتضى صديقي كلش واقرب واحد الية
مرتضى : شوكت تخلص ونرجع للعراق
محمد : تخلص لتخاف
مرتضى : الله كريم اليوم دك محاضرات لا مفر منها
محمد : ههههههه عادي ميهمناش
مرتضى : هجم بيتك لك محمد هذا الكورس نشد حيلنا وغصبا ماعليك
محمد : افتهمنا 😒
——————
خيال : لج سهى السادس اهون بمية مرة مدا الحك من الصعوبة
سهى : عزه حتى اني متوقعتها هيج الله يعينا
خيال : امين
تعرفنا على ٣ بنات عراقيات وحدة معجبتني حيل مايعة وتدلع اسمها نهاد ووحدة بس تلاكف بس حبابة اسمها مروة ووحدة اسمها زينة كاعدين كلنا دناكل وطبعا نهاد ميتلاحكلها بالاكل حتى المياعة تنساها 😂😂 اني وسهى گوة كاتمين ضحكتنا وماشاءلله عليها نهاد تمشي وتسلم على كل العرب مو بس العراقيين مدري شوكت عرفتهم
مر شهر ونص واحنا على هاي الحالة وامتحانات كلش صعبة وطبعا اهل الصيدلة يعرفون انو قسمنا عبارة عن كويزات ( امتحانات يومية ) كل يوم نمتحن 😥
جنت كاعدة دا اقرة بمكان مثل الحديقة بالكلية واجتني سهى ضايجة
خيال : شبيج سهى من شنو ضايجة
سهى : التقرير خرب
خيال : ياا ليش
سهى : بسبب واحد صايع ميعرف شلون يمشي انصدم بية ووكع الكوفي عالتقرير
خيال : شبي ميشوف بس ولا يهمج هسة نسوي واحد ثاني الج
سهى : شنسوي يا خيال مبقة بس ساعتين ولازم نقدمة
خيال : زين هو شكلج
سهى : بقة يعتذر عفتة ومشيت
كاعدين اني وسهى وهي كلش مقهورة والدمعة بعينها لحد ما اجتي بنية عراقية وبيدها اوراق سلمت علينا بس هي مبينة جبيرة وكالت الولد الي هسة انصدم بيج دز هذا ويعتذر تفاجئنا وتشكرنا منها وراحت
خيال : عفية عليه والله واني صارلي ساعة اغلط عليه هههههه
سهى : الحمدلله ممصدكة
خيال : ديلا صدكي وفضينا راح الوكت
بدت امتحانات كلش صعبة ومر شهرين ومباقي للفاينل غير شهر جنا كاعدين اني وسهى دنتغدة
سهى : خيال اريد اعترفلج بشي
خيال : كولي شضامة
سهى : اكو ولد اعترفلي بحبة
خيال : شنو ولج ليش متحجين مزاعلتج ولي
سهى : انجبي بس استحيت
خيال : اخوج لو ابوج حتى تستحين يلا احجي منو هذا
سهى : تذكرين هذا الي صدمني وخرب التقرير
خيال : هلاو هلاو صدك مامحبة الا بعد عداوة اي وشسمة الاخ
سهى : مرتضى مرحلة خامسة
خيال : حلو 😉
سهى : اي زين ومرتب بس شخصيتة تجنن تجنن
خيال : اي حبيبتي واضح مجننتج واكول شبيها صويحبتي هالفترة تتصفن زين تحبيه انتي لو لا
سهى : اممم اي صراحة حبيتة
خيال : باعي بس تشوفيه كليلي حتى اشوفة وهسة شوفيني صورتة
بقينا نضحك ونتشاقة واني انصب عليها وهي تضحك بس بعدين كلتلها
خيال : شوفي سهى لازم تتاكدين انه فعلا يحبج مو ضحك ومضيعة وقت
سهى : والله كلش خوش ولد وفقير كلش ابد مضوجني بحجابة او تجاوز ودائما يحثني عالقراية وميقبل يحجي وياية هواييكول ما اريد تهملين دراستج
خيال : ان شاء الله حبيبتي يبقة وياج هيج ويسعدج يارب
سهى : عمري انتي يوم الالج
خيال : لا الله يبعدني ماريييد
سهى : اي عود نشوف
——————
محمد : مرتضىىىىىى
مرتضى : وجعع لك شبيك تصيح
محمد : وجع بگلبك عرفنا تحب بس تعال اكوي قميصك حتى نطفي ضوة ونام فضنا يلا
مرتضى : اجيت جنك بيبيتي شكو لحضة حلوة تقطعها
محمد : اكلك صدك متشوفني الحب مالك
مرنضى : نعمم!!
محمد : مرت اخوي المستقبلية شكو بيها كبر
مرتضى : ماشي تدلل يالاخو
محمد : ديلا اكوي اريد انام
مرتضى : محمد بس اريدك تحب وشوف شكد اخبث عليك محمد : امشي بابا ياحب صدك تحجي المرة الوحيدة الي حبيت بيها وتوبت
مرتضى : لا ذاك ميتسمى حب جنت مراهق
محمد : لاجان عمري ١٩ ومن طبيت للجامعة تعرف الصار وامشي ولي خل انام 😡
——————
مرت الايام وبقة اسبوعين عالفاينل دنمشي اني وسهى بممر
سهى : خيال ذاك مرتضى
خيال : لج اعرفة كل منفوت وكلتي هذا مرتضى
جان واكف بصف ولد من مرينا منهم التفت علينا الولد بطريقة مباشرة وجان كلش قريب من يمنا وباوع علينا زين
خيال : اكلج سهى منو هذا الي واكف يمة
سهى : هذا محمد صديقة بس شبي هيج التفت علينا
خيال : اممم مادري عيونة تخوف 😂
سهى : هههههه والله عليج سوالف
دك تلفوني
خيال : الو
زياد : هلو خيال شلونج
خيال : الحمدلله انت شلونك
زياد : بخير اكلج خيال اليوم معزومة عالغدا يمنا وماكو اعتراض امي متقبل
خيال : لا والله زياد اعتذرلي منها الفاينل اقترب ودا اقرة
زياد : لا اعتذارج مرفوض هي كلها ساعتين وارجعج ومنتضرينج
خيال : اوكي تمام باي
زياد : باي
اهوو والله مالي خلك وتعبانة
سهى : هذا زياد
خيال : اي وعازميني عالغدا
سهى : ميخالف روحي وتعالي بسرعة
طلعنا من الدوام اني والبنات وحسيت زينة مرتبكة سالت سهى كالت
سهى : لج متدرين غير طلع ابن خالتها الي تحبة ويحبها ويانا هنا بس يدرس هندسة
خيال : ها زين شبيها مرتبكة
سهى : لج مو هو هذا الي كاعد كدامها
خيال : امداني والله بطرانة هاي ابن خالتها وترجف
سهى : ههههههه الحب ومايفعل
نزلنا وكل وحدة راحت لشقتها واني اجرت تكسي ورحت لبيت عمتي اول موصلت للمنطقة اتصلت بعمتي وكالت اوكفي بفلان مكان وحدزلج زياد
زياد : الو شفتج خيال ابقي واكفة
شوية واجة زياد بسيارتة صعدت وسلمت عليه
زياد : ها بعدج متتذكريني
خيال : اهوو زياد والله مالي خلك تعبانة
زياد : ههههه ماشي
وصلنا لبيتهم رحبو بية وفرحو وعمتي ممبقية شي ممسويتة وزوجها كلش فرح بية وكعد يسالني عالدراسة وعلى اهلي محسستي انو غريبة وبتهم فطومة تجنن كعدنا نلعب اني وياها ودخل زياد
فاطمة : زياد تلعب ويانا
زياد : لا حبيبتي اللعب للاطفال
خيال : منو كال للاطفال ترا عادي هواية ناس اكبر منك وتلعب ويا اطفالها
فاطمة : ديشاقة وياج اصلا زياد اكثر واحد يلعبني
خيال : باوعت لزياد مبتسم وصافن علية كتلة زياد ليش هيج دائما احسك ناصب علية او تحب تستغفلني
زياد : احب اشوفج متنرفزة تصيرين احلى
خيال : زياد تاخرت ولازم اروح
زياد : اني اوصلج
خيال : لا شكرا
اجتي عمتي
ام زياد : ها حياتي وين رايحة بعد وكت
ابو زياد : عمو ابقي شوية مشفناج زين
خيال : اشكرك عمو بس تاخرت
ابو زياد : بس زياد يوصلج ما اقبل ترحين ويا تكسي هيج وقت ومنطقتج بعيدة من هنا
خيال : ماشي عمو
سلمت عليهم وطلعت اني وزياد صعدنا بالسيارة ساكتين
زياد : خيال تحبين تشترين شي مادام طالعة
خيال : لا شكرا ممحتاجة شي
زياد : براحتج
وصلنا ونزلت هو اشرلي بايدة وغمزلي اني كلت شبي هذا خبل شكد مزعج
لليل طبعا سهى بدت تحجي ويا تلفون دخلت للغرفة ما ادري بيها دتحجي ويا
خيال : سهى قبل لتخابرين تعالي وياية نبدل الغاز لان مافاضية لسوالفكم لاساعة ولا ساعتين
سهى : هههههه مرتضى يكول شبيها سوالفنا
خيال : عزه بعينج هو عالخط ؟
سهى : اي 😂😂
غميتها بايدي وطلعت فشلانة
فد يوم داقرة بمكتبة الجامعة قبل يومين من الفاينل وجنت كاعدة وحدي وفات محمد صديق مرتضى بس تذكرتة لان شفتة كم مرة خلال هاي الفترة ما اعرف من اشوفة احب اسرق نضرات منة لا اراديا مع العلم ابد ممسوية هيج قبل بس ما اعرف من دخل رفعت راسي ونزلتة بسرعة بس شفت طولة كلش حلو ومن يمشي رافع راسة ومضيق عيونة ههههه تصرفاتة غريبة يمكن اني حسيت هيج لان ممباوعة على احد قبل هم ما اعرف بعدين كلت بيني وبين نفسي خيال احترمي نفسج وركزي بالقراية 😭
خلصت محاضرات وصعدنا بالباص شوية وصعد هو ميباوع على احد وعاقد حاجبة يدور على كرسي فارغ اكو ولد مبين يعرفة صاحة وكعد يمة بالاخير المشكلة اني ارتبكت مدري شبية وحيل ضجت من نفسي
سهى : خيال بعد الفاينل لازم نسوي طلعة قبل من نسافر بعطلة نص السنة
خيال : اي ليش لا نتفق ويا البنات ونشوف
سهى : اكلج خيال انتي ليش اكبر من عدنا بسنة
خيال : من توفى بابا تمرضت ومرحت لامتحانات نص السنة واجلت السنة كلها
سهى : يا حبيبتي الله يرحمة واسفة اذا ذكرتج
خيال : لا سهو عادي ويرحم امواتج يارب
وصلنا للشقة نمنا وكعدنا نقرة ل ١٢ بالليل سهى كالت خلي ناخذ استراحة
خيال : اي احسن لان تعبنا كللش
فجأة لكيت نفسي اسالها على صديق مرتضى
خيال : اكلج هو مرتضى كاعد ويا محمد نفس الشقة
سهى : اي وياهم ٢ ولد بعد شقتهم غرفتين
خيال : اها مبينين كلش اصدقاء
سهى : اي ولج مرتضى كلش يحب محمد ومتعلق بي
خيال : صار عندي فضول اعرف صفحتة عالفيس بقيت ادور بصفحة مرتضى شفتة ناشر صور ويا محمد ومعلقلة ومبين كلش شقاوجي دخلت على صفحتة وبقيت افتر وشفت شكلة زين ولون عيونة بقيت صافنة شوية بصورتة وحجيت بيني وبين نفسي خيال شدسوين راسا طلعت من الصفحة وتغطيت ونمت ما اريد افكر بي
كعدت الصبح كلش ضايجة وجان ثاني يوم عدنا فاينل ف انطونا عطلة يوم حتى نقرة مر كم يوم وامتحنت بقة عندي بس امتحان واحد منمت ولادقيقة بقيت اقرة بي ثاني يوم دخلت لقاعة الامتحان وبدو الطلاب يدخلون تقريبا كمل العدد اني كاعدة على اول ستيج بصف الباب ومنتضرة ورقة الاسئلة وجان يجي محمد وكف بصف الباب وجان عصبي ووجهة عرگان عيونة حمر يمكن هم منايم علمود الامتحان وكف وكال للدكتور الي جان عراقي
محمد : دكتور الناس بدت تمتحن واني ادور على قاعتي
الدكتور : اسال دكتور علي على مكانك
محمد : سالتة وكال هنا بهاي القاعة
الدكتور : فوت محمد اليوم شيخلصني منك
محمد : ممنون دكتور بس وين اكعد
الدكتور : هذا الكرسي الي بالمقدمة فارغ اكعد بي
خيال : كعد عالستيج الي بصفي ما اعرف الشعور فرح لو قلق واصلا ليش هالخربطة الي تصير بية !
كملت امتحان وبديت اراجع درت وجهي صدفة وشفتة فاتح الموبايل انتبه علية وابتسم كال غلسي درت وجهي راجعت وطلعت
سهى : شبيج لولو
خيال : ها لا مبية شلونج بالامتحان
سهى : زينة وانتي؟
خيال : هم زينة وممصدكة حرجع البغداد عگب باجر
سهى : اي والله اني هم فرحانة صدك اليوم نطلع
خيال : اي بس خلي انام فد ساعتين كلش تعبانة
صار العصر وطلعنا افترينا بالمول واشتريت هداية الاهلي اشتريت قميص لقيس بس كلش نازك وعطر وتلبيسة كاملة لعلوش ابن قيس وبوكس مكياج لدعاء مرتة وجنطة وحذاء وقميص لماما وفستان لسرى وبنتها نفس الموديل ولزوجها يوسف ساعة ودسكات اقلام لان كلش يحب هالسوالف اما كرار ف اشتريتلة ساعة ونضارة من الماركة الي يحبها وسهى هم اشترت لاهلها خلصنا وجانو ويانة زينة ونهاد ومروة بعدين كعدنا اكلنا حلويات بس نهاد لازم تغثنا احسها تافهة 😂 سوالفها اغلبها عالولد وهذا يحبني وهذا يكرهني ومروة تضحك عليها 😂😂
شاورتني سهى
سهى : خيال رحمة لاهلج خلي نكوم طلعت روحي من هاي المخلوقة
خيال : بس عيب شنكول
سهى : نكول عدنا شغل بالشقة ونريد نحضر ومن هالحجي
خيال : بنات من وخصتكم لازم نروح اني وسهى لان كلشي ممحضرين لحد الان ونريد ننطي الايجار من وقت
زينة : بس بعد وكت بنات
سهى : نعوضها غير مرة ان شاء الله
المهم طلعنا اني وسهى من المول
خيال : اي هسة وين نروح وهاي الاغراض بيدنا
سهى : نوصلهم للبيت بسرعة ونروح سينما نازل فلم يجنن
خيال : اوك بس بسرعة
رجعنا تالي الليل نمنا مندري بنفسنا كعدنا ثاني يوم بالوحدة الضهر
خيال : لج سهى تلفونج ديدك جاوبييي
سهى : الو هلو مرتضى
عرفتها تحجي ويا الحب
طلعت للصالة لكيت اهلي كومة متصلين اتصلت على قيس
قيس : الو خيال وينج شسالفة
خيال : هلو قيس والله نايمة مادري بنفسي
قيس : كل هذا نوم يمعودة امج خبصتنا من هسة تسوي بالاكل وتنضف بغرفتج
خيال : قيس صدك كرار اخذ غرفتي ؟
قيس : لامنو كلج
خيال : هو كل ميحجي وياية يكلي اخذتها
قيس : لاعيني معليج بي اصلا غرفتج مسدودة بس مرات دعاء او سرى يفتحوها ينضفوها ويسدوها
خيال : اي الحمدلله عبالي صدك
قيس : جهزتي جنطتج
خيال : لابعدني اصلا ماراح اجيب هواية ملابس كلها اسبوعين الباقيتهن
قيس : اي احسن يلا هسة تريكي او تغدي ما اريد ااخرج مع السلامة
خيال : الله وياك
عزلنا الشقة اني وسهى طبعا گوة سحلتها لان تحجي ويا مرتضى وهو من يمة يصيح يكللها هاي مو صدقتج هاي عمتي 😂😂 يسميني قاطعة اللحضات السعيدة 😅
لليل كملت الجنط وسديتها اجتني سهى تكمز وفرحانة
خيال : ها خير ولج شكو
سهى : لج ممصدكة طلعنا احنا ومرتضى بنفس الطيارة
خيال : مو كلتي هو بعد يومين الحجز مالتة
سهى : انلغت رحلة الاثنين من حسن حضي 😌 ولحك على حجز بنفس الطيارة ويانا
خيال : هههههه بيها الخير بس مو تعوفيني وتكعدين بصفة
سهى : عود نشوف
خيال : لا بلا دوخري من يمي خلي انام راح الوكت
___________
محمد : مرتضى يلا خلي نحضر جنطنا اذا باجر نسافر
مرتضى : اي يلا
حازم : اي يابة بالعافية عالراح يسافرون
محمد : انت بومة كتلك تعال احجز ويانة تعاجزت حتى منطيتنا جوازك نحجزلك
حازم : لك شمدريني نايم وماحسيت على نفسي
عمر : لك انتو والله بطرانين ترجعون على اسبوعين بس لو تنطوني فلوس السفر وناخذها ونروح لاسطنبول
حازم : لا ابقة دايح وحدك احنا ناس نشتاق لاهلنا
عمر : اني هم اشتاق لاهلي بس متسوة اسبوعين
محمد : اي اي عمر منعرف سوالفك احنا
عمر : ههههه انت بالذات فاكسني
محمد : ههههههههه مركز وياك كلش
___________
خيال : كعدنا الصبح تريكنا بسرعة لملمنا الغرفة وكعدنا نسولف صارت ساعة ١٢ سبحنا وبدلنا وبدينا نتحضر صارت ساعة ٢ الضهر اجرنا تكسي وطلعنا كعدت اني وسهى بالصالة الي بالمطار دنشرب كوفي ونسولف شوية وشفنا مرتضى بس هو مشافنا اتصل على سهى وكللها تعالي
سهى : خيال راح اروح هنا قريب عليج بس احجي ويا مرتضى وارجع
خيال : اوك روحي اني ابقى افرفر بالموبايل
ربع ساعة واجتي سهى بس ضايجة
خيال : ها شبيج
سهى : استاذ مرتضى معاجبة لبسي يكول ضيق
خيال : اهو بدينا بلعبان النفس بس تدرين لو ميحبج ميغار عليج وانتي جسمج تارس وطويلة يعني تجذبين النضر
سهى : ها اشوفج صرتي ويا
خيال : بس الحلو انو حتكعدين يمي مو
سهى : طبعا اصلا لو يموت ما اكعد يمة
صار الوقت وصعدنا بالطيارة وبدت الناس تصعد شوية شوية
سهى : اكلج شو مرتضى مصعد شنو بطل
خيال : ها هاي عود زعلانة ومترديه ههههههه
سهى : لا بس مجرد فضول
كمل العدد تقريبا شوية واجة محمد الي فاجئني بجيتة اصلا ماادري بي جاي ولا خطر على بالي اسال سهى اذا هو ويا مرتضى او لا
محمد : السلام عليكم
خيال ، سهى : وعليكم السلام
محمد : يابة اسف عالازعاج بس مرتضى موتني يريد سهى تجي تكعد يمة
سهى ندستني
سهى : لج عزه شلون يدز الولد والله فشلني
خيال بصوت عالي : يلا سهى كومي عيب من الولد
سهى : امري الالله
باوعلي محمد وكال عفوا انتي خيال مو
خيال كلتها واني متفاجئة : اي نعم اني خيال تفضل
محمد : طبعا لتتفاجئين اعرف اسمج بس مرتضى يسميني اني وياج قاطعين اللحضات السعيدة
ضحكت سهى واني ابتسمت
محمد : هسة تسمحيلي اكعد يمج لان الاخ طردني وماكو مكان فارغ بالطيارة
التفتت علية سهى بمعنى قبلي
خيال : اي عادي تفضل
راحت سهى بصف مرتضى ومحمد كعد يمي اني بصف الشباك
دنكت بالموبايل وخليت السماعة وبديت اسمع اغاني وعيني عالشباك اريد اتجاهل وجودة رغم تفكيري بي زاد
نص ساعة وبدت المضيفة توزع وجبة الاكل بس اني ما ادري بالدنيا اسمع اغاني وسرحانة فجأة شفت ايد محمد تتحرك كدام وجهي يريد ينبهني نزعت السماعة والتفتت علية
خيال : تفضل
محمد : تفضلي وجبتج
انطانياها
خيال : بس اني ما كل بالطيارة
محمد : ليش
خيال : معدتي تاذيني من اكل بالطيارة
هو ميدري انو مجرد وجودة بصفي سوالي قرحة بالمعدة 🤦🏻♀️
محمد : بس ميصير هيج زين شربي عصير اذا تحبين
خيال : اوك راح اخذ بس العصير
اخذت العصير فتحتة والتفتت عالشباك
محمد : هم تخافين من الطيارة ؟
خيال : لا بس بالهبوط ادوخ شوية
محمد : زين اذا بس بالهبوط
يا الله وجود هذا الانسان بالمكان الي موجودة بي يوترني ليش !!
مر هواية وقت وهو حط راسة عالكرسي وغفة شوية وكالو تحضرو حتهبط الطيارة حرت يا الله شلون اكعد هذا باوعتلة واني حايرة
محمد : لهالدرجة اني حلو ؟
خيال : عفوا ! شقصدك
محمد : اني شعلية انتي تباوعين علية
خيال : ترا فاهم غلط على شنو اباوع عليك بس معرفت شلون اكعدك لان تقريبا وصلنا
محمد : ترا اشاقة وياج لتزعلين
عفتة ودرت وجهي كلش ضجت سكت شوية وكال
محمد : بديتي تدوخين
هزيت راسي واني ادية لازمة الكرسي من الجانب لان راسي ورجلية يخدرن ف احاول الزم شي
محمد : تريدين مي
خيال : لا شكرا
محمد : براحتج
اعصابي نشدت حتى تجاهلت وجودة لان الطيارة من الغيوم عبالك تصير بيها طسات والطيار مدري شبي صار كلش سريع حتى كل الي بالطيارة كامو يحجون
ما احس على نفسي بوحدة من الطسات خليت ايدي على ايد محمد وغمضت
ياريت الي يقرا القصة يتابعني ويتفاعل ويشاركها لان ماكو تفاعل حتى واهس معندي اكتب 😥
فاذا تكدرون تتفاعلون اكون ممنونة وشكرا 💙
