محمد يروي الاحداث :
كاعد بالمكتب ودخل علية سيف بسرعة
سيف : محمد كوم بسرعة خيال
محمد : شبيها
سيف : وكعت من الدرج
محمد : شنو تحجي صدك لو هم لعبة من لعباتكم
سيف : هاي شبيك يمعود والله وكعت
طلعت امشي بسرعة اني وسيف
محمد : سيف كلي شبيها شلون وكعت فهمني ومن اي درج
سيف : ما اعرف شلون بس من درج هذا الممر شايفيها باقية تتكلب عليه
ركضت عليها واني خايف لان اعرف هذا الدرج خطر واحتمال عدها كسور وصلت لكيت دكتور سمير مختص وهواية ناس من المستشفى بحيث مشفتها لحد مقتربت شفتها فاقدة الوعي
محمد : سمير احجي شبيها
سمير : لازم نسويلها اشعة ونشوف ومن رخصة الدكاترة لازم تطلعون
سيف : راح اتصل على اهلها
اتقربت منها لكيتها تفتح بعينها عالبطيء
محمد : خيال حبيبتي انتي زينة شدتحسين ؟
خيال : ضهري الم موتني انكسر متأكدة
شفتها تعيط وتكتم بصوتها تستحي وتبجي بس مباوعتلي ابد
خيال : سيف اتصل على اهلي فدوة بعد ما اتحمل هذا الوجع اريد اهلي
سيف : اتصلت والله بالطريق
محمد : لتخافين اني موجود كافي بجي
سمير : خيال ابد لتتحركين لحد منسوي الاشعة اتحملي اعرف بيج متأذية
خيال : دكتور طلعهم ما اريد احد
عقدت حاجبي مستغرب ليش هيج دتتصرف
محمد : خيال شلون اعوفج
باوعتلي وتبجي واني ذرة صبر مابية بس اريد اعرف شصار بيها وبجيت بدون وعي
سيف : دكتور محمد لتسوي هيج كدامها تخاف اكثر
خيال : دكتور انطيني اي مسكن منوم بعد ماكدر
سمير : دزيت الممرضى لتخافين هسة انطيج مهدىء
لزمت ايدها وسحبتها مني المشكلة وضعها ميسمح اسألها ليش هيج تتصرف
انطاها مسكن وبدت تفقد الوعي والدموع على وجها واجو اهلها
ام قيس : وين بنتي شبيها
سيف : خالة ديسوولها اشعة وكعت من الدرج
قيس : شلونها هسة محمد احجي شيكول الدكتور
محمد : ما اعرف بعدة وياها يسوي اشعة
سرى : محمد اختي بيها شي ليش عيونك حمر
مرتضى : متحمل لان شافها بهالوضعية
ام قيس : فهموني يا وضعية
سيف : طبيعي تبجي وتخاف لان الوكعة مو سهلة وهسة نعرف شبيها
فرح : دكتور محمد هي جانت يمك ؟
محمد : لا
مرتضى : لعد شعجب بقسم الادارة
محمد : هسة وكت هاي الاسئلة صايرين محققين
كرار : ليش متعصب من حقنا نسأل
محمد : ما كلت لتسالون بس عالاقل ننتظر نتيجة الاشعة والفحص
سرى : اي صح مو وكتها هسة
شفت اهلي اجو ابوية وامي وخواتي وحيدر
ابو محمد : ها بشرو شلونها
قيس : منعرف بعدهم جوة
ام محمد : شوكعها سودة علية وينها ووين الوكعة
ام قيس : الله يستر بنتي واعرفها عدها نوع من الهشاشة من جانت صغيرة
ابو محمد : ام قيس كولي يا الله ان شاء الله مابيها شي
شمس : خالة لتبجين فدوة هسة يطلع كلشي مبيها
حيدر : شلون وكعت
محمد : اهوو
حيدر : ها شكو
كرار : اخوك ميقبل نسأل شلون وكعت
مرتضى : شسالفة محمد شبيك صاير اعصاب
محمد : هو شنو شبيك صاير اعصاب انتوا تعرفون شنو يعني ضهر وعمود فقري بس انتظروا تطلع النتيجة
قيس : اهدى اطلع شم هوا شوف وضعك ميصير هيج
ابو محمد : محمد ادري بيك متعصب بس اهلها ولازم يسالون
محمد : واني حالي حالكم كاعد بالمكتب واجاني سيف كلي خيال وكعت
طلع دكتور سمير ركضت علية بنفس الوقت شفت وجها ميطمن
محمد : ها سمير شبيها
سمير : شوفوا الوكعة جانت قوية واقوى منها بمراحل
محمد : اي احجي ؟؟؟
سمير : عدها كسر ب 3 فقرات وانزلاق بالغضروف
قيس : تحتاج عملية ؟
سمير : هو الكسر مو كلش بسيط يعني كسر انظغاطي بالفقرات القطنية احنا نكدر نسوي تدخل جراحي لان اسرع بالعلاج او عن طريق الدعامة وادوية والراحة طبعاً بدون اي حركة
قيس : انت شتكول دكتور منو افضل
سمير : اني افضل بدون عملية احسن لبنية بعمر خيال
كرار : زين دكتور شكد تبقى بدون متتحرك
سمير : من 8 الى 10 اسابيع
ابو محمد : دكتور سمير هي وكعت بطريقة تقلب لو طفرت من الدرج للارضية
سمير : ما اعرف اريد احد جان موجود بساعتها
عمر : ها شصار بشروا
سيف : عمر انت جنت واكف مو
عمر : اني جنت دامشي وسمعت ممرضة صاحت التفتت شفت خيال
سمير : يعني شفتها قبل لتتحرك
عمر : لا ،، اول ملتفتت شفتها استقر ضهرها على اخر درجة
سمير : يعني من وكعت استقر ضهرها اخر شي عالدرج مو عالكاع ؟
عمر : اي بالظبط
محمد : وانتوا كلكم واكفين معقولة ملحكتوا عليها
عمر : محمد الوكعة جانت سريعة ومحد جان قريب عليها صدكني كلنا ركضنا من شفناها بس مع الاسف ملحكنا
سمير : هسة تاكدت انو هي موكعت بالكاع لان الكسر مبين انه انضربت بشي قوي ومثل متعرفون الفقرات القطنية مكانها اسفل الضهر بالاضافة للانزلاق الغضروفي الي صار بس ممعقولة دلكت وتصير وكعتها هيج قوية
محمد : يعني مثلا احد دفعها
سمير : وكعتها مثل الشمرة عالعموم هسة بدون عملية؟
قيس : خلص دكتور بدون عملية
سمير : تمام بس محمد تعال شوية
طول ميحجي سمير اني احس گلبي يتكطع عليها لان اعرف الايام الجاية صعبة وخاصة بنيتها ضعيفة ومتتحمل ومن صاحني سمير خفت اكثر حسيت اكو شي وميكدر يحجي كدامهم
محمد : ها سمير احجي اكو شي بعد
سمير : محمد شوف عظم خيال بي هشاشة واكو شغلة اريد اسويلها تصوير لمنطقة راسها
محمد : قصدك دماغها يتاثر
سمير : ما اتوقع هالشي بس اني اريد اطمأن
محمد : اي صح كلشي يصير بعد اكو شي
سمير : الوكعة جانت اسفل الضهر ف سويت فحوصات لمنطقة الرحم
محمد : اي!؟
سمير : شوف ببساطة الرحم يتعلق باربطة متثبتة بأسفل الضهر والاعصاب الي تغديه هي من النخاع الشوكي ف صاير بي تضخم بسيط
محمد : يعني ؟
سمير : الي صار بضهرها احتمال يأثر عالعلاقة الزوجية وبالمستقبل يأثر عالحمل
محمد : سمير كل هذا ميهمني اهم شي صحة خيال والباقي الله كريم
سمير : اكيد بس لازم اكلك لان ما اكدر احجي كدامهم
محمد : اذا سألتك خيال لتكللها
سمير : من حقها تعرف محمد
محمد : يعني نروح نكللها احتمال ضعيف يصير عندج اطفال شبيك سمير
سمير : ترا خيال صيدلانية واختصاصها سريري يعني مينضحك عليها وراح تعرف بالاخير
محمد : بس خلي تكوم بالسلامة وبعدين نحجي
سمير : تمام
_____________
