خواطر انثي من زمن الحلم

حاجات حلوة

حاجات حلوة ...
_ فنجان قهوة على بحر اسكندرية الفجر .. أو بالليل متأخر .. على صوت فيروز ..
_ اسكندرية نفسها ...
_ غفوة بعد يوم طويل في حضن حد بتحبه ...
_ صاحب جدع بيعرف يسمعك من غير ميقاطعك و لا يتكلم عن نفسه و لا يقلك (مش قلتلك) ...
_ النوم تحت البطانية مدفي في الشتا أدام التلفزيون و في ايدك حاجة سخنة ...
_ أنك تبص على حد كنت فاكر أنه كل حاجة بالنسبالك و متحسش نحيته بأي حاجة ..لا كره .. و لا حب .. و لا أي حاجة ... و تبقى حر ❤
_ لحظة سكون عقلك يقف فيها و متفكرش في أي حاجة ... كأنك بتلمس روحك بايدك ...
_ تقابل حد بتحبه صدفة ...
_ أول مرتب ليك ... من تعبك ...
_ لما يوصلك خبر مش تمام على اللي أذاك و ظلمك ... ( أه .. أنت مش ملاك )
_ لما تحط ايدك في جيبك و تلاقي فلوس كنت ناسيها ...
_ دموع أهلك على نجاحك ... عظيمة❤
_ لما تعدي بالصدفة و تسمع حد بيشكر فيك ...
_ طريق السفر بالليل و هوة فاضي ...
_ حد بتعرف تعد معاه ساعات طويلة من غير متتكلم و لا تفتعل حديث و محدش فيكوا زهقان ....
_ أول لبسة لبنطلون جينز شكله حلو عليك ...
_ لما تعيط طول الليل و تصحى تلاقي نفسك رايق و مرتاح البال ... (العياط بيطهر الروح )
_ لما تقول لحد سبني لوحدي ... و تلاقيه متبت فيك و رافض يسيبك ...
_ لما تلاقي حد فطسان على روحه بسببك .... لما حد يقلك دمك خفيف ...
_ لما تتأكد أن وجودك فارق ... و أنك شخص مميز مش كمالة عدد ...
_ معرفة جديدة مختلفة باسطاك و بتوحشك ... ❤

حاجات كتير أوي ... ركز مع الحلو ... و اعمل نفسك مش شايف الوحش .... كله بيتعوض ... إلا الصحة ...