Aku isih lungguh sandhuwure buk
ing saben-saben esuk
ing wayah godhong trembesi kuning alum kumleyang
Ing kene aku isih nunggu
Kowe lan aku bakal papasan
direka tanpa sengaja dening Pangeran
Aku isih tetep lungguh sandhuwure buk
ngitung liwate montor-montor sesalipan
Nadyan gandane kebul knalpot nunjem irung
nyatane aku isih bisa mbedakake
endi aruming slagamu
kang sedhela maneh bakal teka ing kene
mangsuli pitakonku wingi kang durung rampung
Oh, adhi
Ing pinggir sadawane dalan paping iki
aku isih ngenteni
Sandhuwure buk
nganti mbesuk
nganti raga iki ambruk
Lidah Wetan, 12 November 2019
