Bengi iki aku pengin diajak
ngopi
wong loro wae
budhale aku sing mboncengke
Aku mung pengin mbaleni ngentèkaké lingsir wengi
Kaya nalika jaman semana panjenengan ngapusi
nylimur mata ngenteni gara-gara
Bengi iki aku pengin ngajak
ngopi
maneh mbaleni kaya wektu kuwi
Mung bedane bengi iki
Aku nyuwun aja dibayari
Aku nyuwun dikancani
Ngentèkaké lakon nganti tancep kayon
Bapak
Bengi iki lan nganti bengi-bengi kang bakal dakliwati
Aku tetep dadi bayi lanangmu
Sing seneng kokpanggul ing pundhakmu
Bengi kuwi lan nganti bengi iki jebule Bapak isih pinter ngapusi
Pinter ndhelikake lara kaya ora ana apa-apa
Dene aku anakmu kang wis tanggap ing sasmita
Isih isin ngrangkul merga rumangsa gengsi wis diwasa
Isih isin blaka kandha sayang uga tresna
1 Februari 2022
