قصة (درة) ح10
الحلقة العاشرة
تأليف/ سيد داود المطعني
ــــــــــــــــــــــــــــــــــــــحذيفة واقف ع الباب، بيرفع راسه، بيشوف والد درة، اللي واقف يبص عليه مستغرب
_ هو انت اللي جاي تخطب درة بنتي؟
(حذيفة متفاجيء)
_ حضرتك والد الدكتورة درة؟
_ تعالى .. تعالى تعالى ..
(حذيفة متلخبط، عقله مش قادر يستوعب)
_ هو حضرتك قريب دكتورة سوزان؟
_ أنا قريب دكتورة سوزان، ووالد دكتورة درة، تعالى تعالى تعالى..
(أبو درة كان ساخر بحدة مع حذيفة، وبشاور لي بإيده، كأنه بيقول له ادخل ع السلخانة)
حذيفة بيدخل، خطوات بطيئة، خايف، متوتر .. بيشوف درة وبيكسر عينه، مش قادر يرفعها..
أم درة بتندهش لما تشوفه، و درة بتبتسم له، مش فاهمة حاجة .. وحذيفة واقف على بعد خطوات وظهره للباب.. وكان بيفرز عرق كتير من جسمه، ووشه بدأ يميل للون الأحمر، كأنه مدهون بالفراولة.
(الأب بيقفل الباب، وبيدخل قدامه، وبيشاور له بعنف)
_ اتفضل يا حذيفة يا بيه .. اتفضل.
(حذيفة بيتقدم وإيديه بتترعش، وبيبص ع الباب وراه .. نفسه الأرض تنشق وتبلعه)
بيحاول يقول مساء الخير لأم درة، وهو بيمد يده علشان يسلم .. بس الحروف مش بتساعده يتكلم
_ مس .. ميسا .. مساء الخير يا فندم
_ مساء الخير يا ابني .. اتفضل
_ اززيك يا درة؟
_ مالك يا حذيفة؟ انت بتترعش كده ليه؟ انت تعبان؟
( الأب بيبص عليه بعيون حادة)
_ لا يا دكتورة .. مش تعبان ولا حاجة .. بس هو اتفاجيء .. مكانش متوقع اننا أهلك.
_ أنا مش فاهمة حاجة يا بابا.
(الأب بيشاور لحذيفة يقعد)
_ دلوقتي تفهمي كل حاجة لما البيه يقعد..
_ حضرتك بتكلمه بالطريقة دي ليه يا بابا؟
_ اصبري يا دكتورة وانتي تعرفي كل حاجة، وأكيد أمك عارفة انا بعمل كده ليه؟
(درة بتبص لأمها .. الأم بتهرب بعينها منها، مش عايزة كل ده يحصل)
_ اتفضل اقعد يا حذيفة يا بيه..
(حذيفة بيقعد زي التلميذ الخايب)
_ انت نورتنا يا حذيفة يا بيه؟
_ تسلم حضرتك
_ هي الدكتورة سوزان مجاتش معاك ليه؟
(درة بتبص على أبوها، وبتتكلم بنرفذة)
_ بابا .. من فضلك .. أنا مش فاهمة حاجة.
_ ما اهو ده حذيفة بيه، جوز الدكتورة سوزان .. اللي كنا نحكي لك عنه امبارح.
(درة بتبص بنظرة غريبة، لسة مش قادرة تجمع)
_ مش فاهمة، يعني ايه هو حذيفة بيه جوز سوزان.
(الأم بتبص لها بأسى)
_ قلب أمك يا بنتي .. دايما حظك سيء
(درة بتصرخ)
_ فهمووووني .. أنا مش فاهمة.
(حذيفة بيبص عليها وبيستجمع قواه وبيحاول يكلمها)
_ درة .. أنا عايز أقولك حاجة
_ عايز تقول لها ايه يا حذيفة بيه .. هو انت عايز تضحك على بنتي قدامي؟ يا جبروتك ياخي .. ده انت وقح.
_ بعد اذن حضرتك يا عمي، لازم تعرف الحقيقة كاملة قبل ما تحكم.
(درة بتترعش، وشها بيتغير، وبتصرخ في وش حذيفة، وبتتكلم بصوت عالي وزعيق)
_ يعرف ايه؟ ها؟ يعرف ايه؟ حرام عليك .. حرام عليك .. انت مش ممكن تكون بني آدم .. مش ممكن تكون بني آدم
_ يا درة أنا ...
_ انت ايه؟ انت كداب .. مخادع .. ازاي تكون متجوز وتخدعني بالشكل ده، ازاي قدرت تمثل عليا المثالية دي كلها، وانت امبارح كنت احقر شخص في الوجود.. ها ... انت ازاي كده؟ ازاي؟
(انفجرت درة في البكاء، بنحيب مسموع، وأمها بتحاول تهديها)
_ يا درة افهميني.
_ امشي اطلع برة يا حذيفة .. اطلع برة ..
_ يا درة.. أنا مش زي ما انتي فاهمة..
(درة بتوقف صارخة في وشه)
_ انت حقير يا حذيفة .. حقيررر .. امشي اطلع برة.
(حذيفة وقف مرتبك، ومتأثر، وبيحاول يهديها)
_ يا درة انتي لازم تسمعيني.
(الأب بيوقف يشاور له ع الباب)
_ امشي اطلع برة يا ولد انت ... وانا ليا كلام مع مراتك..
_ مراتي؟؟
_ ايه نسيت مراتك؟ سوزان يا فاقد الذاكرة يا نصاب .. امشي اطلع برة
_ يا عمي أرجوك متدمرنيش .. أرجوك تسمعني، أنا مستحيل أتخلى عن درة.
_ متقولش عمي .. هو انا اعرفك علشان أكون عمك .. يلا امشي من هنا، وتطلع درة من دماغك خالص.
(أبو درة راح ناحية الباب، وفتحه، وبدأ يشاور بغضب على حذيفة)
_ هتطلع برة ولا أتصل بالشرطة؟
(درة منهارة، ومنفجرة في العياط، وبتجري على أوضتها)
_ يلا يا ولد انت، هتضيع لي البنت .. بررررررررررة.
(حذيفة هيبكي، وبيبص عليها وهي بتجري ناحية أوضتها)
بيهز دماغه ومتأثر جامد، وبيخرج .. والأب بيرزع الباب وراه
تأليف/ سيد داود المطعني تأليف/ سيد داود المطعني تأليف/ سيد داود المطعني
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

أنت تقرأ
دره
Romanceالقصة الجديدة اسمها (درة) هتكون اجتماعية رومانسية.. وعندي احساس أنها هتعجبكم .. لأنها رومانسية بشكل مختلف .. ومليانة تشويق .. هنبدأ ننشرها مع بعض من بكرة أن شاء الله .. و زي كل القصص اللي بننشرها ع السوشيال ميديا هتكون بالعامية المصرية .. انتظرو...