دره

9

قصة (درة) ح٩
الحلقة التاسعة

سوزان بتقدم حذيفة لقرايبها مع ابتسامة فيها فخر واعتزاز..
والد سوزان ووالدتها ماشيين ناحيتهم بعد ما ركن العربية، وكأنهم بالحب والإخلاص أغنى ناس في الموجودين كلهم..
(اتنين واقفين على جنب، بيبصوا ناحية حذيفة بمنتهى الغيظ)
_ أختك دي اتجننت رسمي .. جايبة لنا شحط غريب يحضر حفلاتنا، ويختلط بكل بنات العيلة، ينفع كده؟؟..
_ يعني ده اللي مضايقك، ومش مضايقك أنه عايش لوحده في الملايين اللي ورثتها سوزان عن جوزها، وكل المصانع اللي كتبها باسمها قبل ما يموت..
_ حاجة تغيظ فعلا ... لو كانت اتقصفت رقبتها وماتت بعد جوزها، كان كل ده بقى لينا..
ـــــ تأليف سيد داود المطعني .. تأليف سيد داود المطعني ـــــ
ـــــــــــــــــــــــــــــــــــــــــــــــــــــــــــــــــــــــــــــــ
(أبو درة وأمها وصلوا عند سوزان وحذيفة والدكتور نبيل..
والاتنين اخواتها راحوا ناحيتهم)
(سوزان بتعرفهم على حذيفة، وتعرف حذيفة عليهم)
_ حذيفة بيه .. جوزي
_ أهلا وسهلا ..
(واحد في اخواتها المتغاظين، بيحاول يحرج حذيفة بسؤال رخم)
_ والأستاذ حذيفة بيشتغل ايه؟
(حذيفة بيبص له بكل ثقة، وبيبتسم لسوزان)
_ أنا مدير عام مجموعة مصانع سوزانا..
(الجملة استفزت أخو سوزان، راح سأله سؤال أرخم)
_ وبتديرها ازاي مجموعة مصانع سوزانا؟
(حذيفة بيبص لأخو سوزان من فوق لتحت، بمنتهى التكبر وبيرد عليه)
_ لو حضرتك رجل أعمال أو مستثمر، وعايز تستفسر عن أي حاجة بخصوص إدارة شغلك، أنا تحت أمر حضرتك، وكله علشان خاطر عيون سوزي.
(سوزان حست بالانتصار، لما أخوها اتكسف من رد حذيفة، لأنه لا رجل أعمال ولا مستثمر، وحذيفة خرج من الموضوع بذكاء)
ـــــ تأليف سيد داود المطعني .. تأليف سيد داود المطعني ـــــ
ــــــــــــــــــــــــــــــــــــــــــــــــــــــــــــــــــــــــــــــــــ
في بيت درة..
قاعدة وحدها، بتحاول ترن على حذيفة ومفيش فايدة، تليفونها مقفول..
درة اتخضت عليه، وبدأت تدور على رقم ريناد أخته، واتصلت بيها، بس كان الوقت متأخر، وريناد عاملة الفون سايلانت ونايمة..
_ أوووووووف .. ايه كل ده؟ يا ترى حصل ايه؟
(درة بدت متوترة، وكانت قلقانة خالص، ومش عارفة تعمل ايه، رايحة جاية في الأوضة، وبطنها بدأت توجعها)
راحت بعتت له ريكورد (رسالة صوتية) ع الواتس، وكانت نبرة صوتها كلها خوف وقلق.
_ يا حذيفة طمني عليك، أنا هتجنن، أرجوك لما تفتح ترن عليا ضروري، أنا هموت م القلق عليك..
(نبرة صوتها بدأت تقل شوية، وبدأ يظهر فيها عياط، بكاء .. نحيب، وهي بتكمل كلامها)
_ يا حذيفة رد عليا .. كلمني أرجوك .. ومتقفلش الفون بتاعك تاني علشان خاطري..
(درة بتنهي الريكورد، وبتكتب رسالة sms على رقم الفون بتاعه)
_ يا حذيفة افتح الفون أرجوك .. أرد عليا .. أنا قلقانة .. هموت بجد .. هموت م الرعب عليك .. أرجوك لازم تطمني.
ـــــ تأليف سيد داود المطعني .. تأليف سيد داود المطعني ـــــ
ـــــــــــــــــــــــــــــــــــــــــــــــــــــــــــــــــــــــــــــــ
سوزان بتشاور لحذيفة في الحفلة، إنهم يمشوا قبل بوفيه العشا
(حذيفة بيهز دماغه بالموافقة..
أبو درة وأمها، منسجمين مع قرايبهم، هزار وضحك، وإعادة ذكريات..
أخوات سوزان الاتنين واخدين جنب بعيد، وبيدخنوا سجاير كتيررر، وبيبصوا لأختهم ولحذيفة نظرات غضب..
(حذيفة بيغمز لسوزان، وكأنه هو اللي صاحب القرار بالانصراف)
_ نستأذن احنا يا دكتور نبيل.
_ ما اهو بدري يا حذيفة بيه..
_ لا كفاية كده معانا شغل بدري .. أكيد حضرتك عارف الضغوط
_ اه ربنا يعينكم يارب..
(سوزان بتتقدم تصافح أخوها نبيل .. وتسلم على أبو درة وأمها، وتشاور للباقي)
الدكتور نبيل بيمشي وراهم في طريق العربية، وحذيفة بيخليه ميكملش، ويرجع لضيوفه..
(حذيفة وسوزان بيركبوا العربية، وبتنطلق بيهم خارج الفيلا)
ـــــ تأليف سيد داود المطعني .. تأليف سيد داود المطعني ـــــ
ـــــــــــــــــــــــــــــــــــــــــــــــــــــــــــــــــــــــــــــــ