دره

11 والاخير

قصة (درة) ح11
الحلقة الأخيرة
تأليف/ سيد داود المطعني

درة بتدخل أوضتها مندفعة، والأم واقفة محتارة مش عارفة تعمل ايه..
ريناد حست بالإهانة، ومنتظرة أي رد فعل من الأم، ممكن ترجع بيه درة.
(الأم بكل خجل وكسوف، شاورت لريناد تتفضل تقعد)
_ اتفضلي يا بنتي .. واقفة ليه؟
_ ممكن تناديها حضرتك..
_ معلش يا بنتي .. اعذريها .. لأنها بتمر بظروف صعبة
_ تمام حضرتك .. هاجي لها في وقت تاني
(ريناد خرجت من البيت ودموعها بتنزل على وشها)
ـــــــــ سيد داود المطعني ـــــــــــــ سيد داود المطعني ــــــ
حذيفة في مكتبه، بيكلم ريناد في الفون.. وكان متعصب خالص
_ ليه يا ريناد .. ليه .. كنتي قعدتي مع أمها وحكيتي لها اللي حصل.
_ مقدرتش يا حذيفة .. أنا كنت بعيط والله .. صعبت عليا نفسي.
_ أوووووووف .. أنا قربت اتشل يا ريناد .. قربت اتشل
_ حقك عليا .. والله ما قدرت اقعد يا حذيفة .. حسيت بالإهانة، بس متشغلش بالك .. أنا هروح لها المستشفى
_ لاااااا .. انتي دورك كده انتهى
_ معلش .. سيبني أروح لها المستشفى، ومش هتقدر تهرب مني هناك
_ ريناااااد.. اسمعي الكلام . أنا مش هعرضك للاحراج تاني .. حتى ان كنت بحب درة .. بس انتي عندي أكرم من إن حد يعاملك بالشكل ده.
_ حبيبي يا خويا .. بس انا مستعدة أعمل أي حاجة علشانك والله
_ كفاية اللي عملته يا ريناد .. خدي بالك من ماما انتي
ـــــــــ سيد داود المطعني ـــــــــــــ سيد داود المطعني ـــــ

المدير بيدخل مكتب حذيفة، يلاقيه مش قادر يركز ومش عارف يفتح عينه..
_ مالك يا حذيفة، نايم على روحك كده ليه؟
_ اسف يا فندم .. تعبان شوية..
_ خلصت شغل النهاردة؟
_ اه خلصته، ومنتظر أمر حضرتك علشان أعرضه على دكتورة سوزان.
_ انت براءة النهاردة .. أنا جاي مخصوص علشان اخد الحسابات منك، وأعرضها عليها بنفسي.
(حذيفة اتخض، ووقف له)
_ ليه يا فندم؟ تعرضها بنفسك ليه؟
_ علشان عايز أقدم لها اقتراحات بخصوص تطوير الشغل
_ مش هينفع يا فندم خالص .. لازم أروح لها بنفسي، والنهاردة بالذات
(المدير ميعرفش طبيعة العلاقة بين حذيفة وسوزان، وبيبص لحذيفة بحدة)
_ هو ايه اللي لازم ده يا حذيفة .. انت هتمشي رأيك عليا؟
_ معلش يا سيادة المدير، بس لازم أروح لها بنفسي.
_ هو ايه اللي تروح بنفسك ده؟ هي بتدفع لك (أوفر تايم) ولا ايه؟
_ لا يا فندم .. بس ده شغلي وأنا اللي هعرضه عليها.
(المدير بيزعق له)
_ اسمع الكلام بدل ما أحولك للشؤون القانونية يا حذيفة، وطلع لي حسابات النهاردة.
(حذيفة بيلتفت وراه، ويبص ع المكتب، وبيجمع الملفات، وبيخرج من الباب مندفع وهو بيكلم المدير)
_ أنا هروح لها، وانت اعمل اللي عايز تعمله.
(حذيفة بيمشي بسرعة، والمدير واقف ينادي عليه)
_ حذيفة .. وقف يا حذيفة .. ماشي يا حذيفة .. والله لاخرب بيتك
ـــــــــ سيد داود المطعني ـــــــــــــ سيد داود المطعني ــــــ
في بيت درة..
أبوها بيدخل ا لبيت، ومعاه أكياس في إيده كتيرة..
درة بتتقدم ناحيته علشان تشيل عنه..
الأب بيسيب لها الأكياس، وهو مش معبرها، ومش مهتم بيها (بعدم اكتراث)
_ بابا..
_ عايزة ايه؟
_ انا آسفة..
_ طيب
(الأب بيسيب الأكياس من ايده، وبيروح يقعد ولا كأنها اعتذرت له)
درة بتنفجر في البكاء، والكيس الكبير بيوقع منها ع الأرض، بتحاول ترفعه وهي ماسكة باقي الأكياس، بيوقع منها كيس تاني..
(الأب شايفها، وسايبها)
بتدخل المطبخ بالأكياس اللي في ايدها، وترجع تاخد اللي وقعوا وهي بتبكي..
(أمها في المطبخ بتسألها بتبكي ليه)
_ اعتذرت لبابا، ومعبرنيش..
_ معلش يا درة .. حاولي تراضيه، غلطتك كانت كبيرة أوي في حقه يا بنتي.
(درة بتخرج، وبتقعد جنبه)
_ سامحني بئى حرام عليك، أنا مش قادرة والله .. مش قادرة
_ أسامحك على ايه؟ على قلة الذوق؟ في بنت متربية تعمل في أبوها اللي انتي عملتيه ده؟
_ غصب عني والله يا بابا .. غصب عني .. أنا نفسيتي وحشة أوي اليومين دول والله .. خايفة تحصل لي حاجة.
_ كلنا بنمر بظروف نفسية زي الزفت .. لكن مش بنتجاوز في حق اللي حوالينا.
_ بابا انت ليه مش قادر تستوعب اني بموت حرفيا .. حوار الزفت دي دمرني .. حرام عليك بئى
_ علشان مش بتسمعي الكلام، عمرك ما اخترتي على أساس صحيح، واهو انتي للمرة التانية بتتعرضي للصدمة
_ مش مهم كل دول دلوقتي يا بابا .. المهم انت تسامحني، متوصلنيش للانتحار وحياتك.
_ تنتحري ليه؟ ايه في الدنيا دي يستاهل اننا نزعل عليه لحد ما نوصل للانتحار
_ انت يا بابا .. انت
(الأب بيفتح دراعه يضمها)
_ بعد الشر عليكي من الانتحار، ومن الزعل يا قدري
_ حبيبي يا بابا .. أخيررررررررررررا
ـــــــــ سيد داود المطعني ـــــــــــــ سيد داود المطعني ــــــ
في فيلا الدكتورة سوزان..
قاعدة وهي حاطة (رجل على رجل)، بتراجع الورق اللي جابهولها حذيفة، وبتحطه قدامها..
_ خلصتي يا دكتورة؟
_ اه خلصت .. خير عايز تقول ايه؟
_ أنا واقع في ورطة ولازم تنقذيني منها.
_ ورطة ايه؟ عايز كام؟
_ مش عايز فلوس ..
_ أومال عايز ايه؟
_ أنا بحب دكتورة، بحبها أوي..
وهي كمان بتحبني .. وكنا اتفقنا على الجواز، ورحت اتقدمت لها.
(سوزان بتنزل رجلها وهي في قمة الغضب)
_ انت بتروح تتقدم لواحدة بدون علمي.
_ بعد اذن حضرتك يا دكتورة تسيبيني أكمل كلامي
_ كلام ايه وزفت ايه؟ انت ازاي تعمل كده من غير ما ترجع لي، هو انا مش مراتك
_ مراتي ازاي يا دكتورة، واحنا التعامل بينا كله حضرتك ويا فندم، انتي مصدقة الدور اللي احنا عايشينه.
_ احنا متجوزين قدام ربنا وقدام الناس، وعقد الجواز موثق توثيق رسمي..
_ أنا لما وافقت يا دكتورة، كان كل همي أحميكي، وعمري ما طمعت فيكي، واكيد لاحظتي كده، عمري ما رفعت عيني في حضرتك، وعمري ما ناديت لك بإسمك بدون ألقاب إلا امبارح.
_ كل ده ميمنعش انك جوزي
_ دكتورة بعد اذنك .. اسمعي باقي حكايتي علشان في مصيبة حصلت ومصايب هتحصل
_ مصيبة ايه؟
_ انا رحت امبارح اتقدم للدكتورة دي، واتضح انها بنت عبدالعليم بيه ابن عم حضرتك، اللي قابلناه أول امبارح في الحفلة
(سوزان بتقوم مفزوعة)
_ بتقول ايه؟ بنت عبدالعليم؟ اياك يكونوا شافوك.
_ أيوة شافوني .. واعتقدوا اني كنت بخدع بنتهم طول فترة علاقتي بيها، واني نصاب، لأني كنت أمثل اني مغرور في الحفلة، وطردوني
_ تستاهل اللي حصل لك وأكتر
_ أستاهل ليه؟ هو ده جزائي؟ بدل ما تساعديني في ورطتي؟
_ أساعدك؟ أساعدك ازاي؟
_ تقولي لهم اني اتجوزتك علشان أحميكي من اخواتك، ومن الناس اللي بيطمعوا فيكي.
_ انت اتجننت يا حذيفة .. عايزني أقول لهم ان اخواتي طمعانين فيا، واني بحمي نفسي منهم؟ عايزني أخسر باقي اخواتي؟
_ يعني حضرتك خايفة تخسري ناس طمعانة فيكي، وعايزاني أنا أخسر الحب الوحيد اللي في حياتي؟ .. عايزاني أخسر حياتي؟ .. أنا بتدمر يا دكتورة .. بتدمر .. أبوس إيدك تكلميهم، تعترفي لهم .. حرام درة تتصدم تاني .. حرام تتحرم مني .. حرام أتحرم أنا منها يا دكتورة بعد ما لاقيت نفسي معاها.
_ وانت لو اتجوزت بنت عبدالعليم .. هتطلقني؟
_ ده الطبيعي يا دكتورة
_ مش خايف أطردك من المصنع.
_ لا مش خايف، أنا ضحيت بحاجات كتير علشان خاطرك، وكنت منتظر انك تردي لي الجميل
_ جميل ايه؟ هو انا علشان أرد لك الجميل .. أفضح نفسي وسط العيلة .. مستحيل يحصل الكلام ده
_ يعني ايه؟ هتتخلي عني يا دكتورة؟
_ يا بني آدم لو اتطلقنا .. هرجع لنقطة الصفر تاني، وهيطمعوا فيا، وهيحاولوا يموتوني.. علشان يورثوني، انت فاهمني؟
_ زي ما أعلنتي لهم قبل كده اننا متجوزين .. اعلني لهم انك كتبتي وصية، وكتبتي ثروتك بأسماء ناس في العيلة، والوصية مش هتظهر غير بعد وفاتك.
_ وصية ايه؟ ووفاتي ايه؟ هو انت ناوي على موتي انت كمان ولا ايه؟  ..  امشي يا حذيفة علشان رفعت لي الضغط ..
_ يا دكتورة مش قصدي ... العمر الطويل ليكي.
_ امشي يا حذيفة .. اطلع بررررة ..
(حذيفة بيحس بالإهانة .. وبيقوم من مكانه، ويسيبها ويمشي)
_ وانا مش هتخلى عن حلمي، حتى لو هضحي بكل شيء.
(حذيفة مشى من عندها وهو متضايق، وفي قمة الغضب)
ـــــــــ سيد داود المطعني ـــــــــــــ سيد داود المطعني ــــــ