اروى من الخلعة ما عرفت تعمل شنو ومشت طوالي قبل ما تلحقها هدى ..
طلعت من الصالة وغطت وشها بيدينها وبقت بتستغفر ..
هدى : اهدي ..
اروى : كييف يعيني لجين نفسها وحا تعرس صالح دا كيف بس يعني ..
فجأة سمعو جوطة جوا ف الصالة .. دخلو لقو ميمي البت المعاهم في الجامعة بتصرخ فيهو وبتقول : انت يا قليل الادب كيف يا لجين تعرسي واحد زي دا
وبتول ولؤي بس بعاينو ليها ومخلوعين ..
لجين مسكت ميمي ومشو بعيد من الناس ..
لجين : ميمي دا شنو البتقولي فيهو دا
جاهم لؤي قبل ما يقول : يا بنات دا شنو الحاصل دا فهموني شيء
ميمي بدت تحكي ليهم عّن صالح والعملو مع اروى وكدا .. لؤي أتفاجئ شديد .. اما لجين كانت عارفة بس الخلعها انو نفس البت طلعت اروى وانو صالح كان بقري في جامعة ناس ميمي..
لؤي : كيف يعني مستحيل يكون في شيء زي دا
ميمي : للاسف دي الحقيقة ما توقع اختك في واحد زي دا ..
لجين : ميمي خلاص
سكتو كلهم مسافة قبل ما لجين تقول : على فكرة يا لؤي صالح حكا لي كل شيء قبل كدا ..
لؤي بخلعة : نعم !! كيف كيف يعني !! طيب وفوق دا وافقتي عليهو ليييي !!
لجين : لؤي لو سمحت خلي العرس يتم على خير وبعدين بفهمك اي شيء
سكت مسافة قبل ما يقول : طيب
رجعو للناس ..
بتول : لؤي يا ولدي في شنو !!
لؤي : لا ولا شيء يا عمتي كان في سوء تفاهم بسيط ..
بتول : طيب
رجعو الناس للحفلة والرقيص وبعدها بمسافة انتهت الحفلة .. واي زول رجع على بيتوو ..
~•~•~•~•~•~•~•~•~•~•~•~•~•~•~•~•~•
🌸 بيت بتول 🌸
دخلو لؤي وصالح ولجين غرفة صالح ..
كان فاضل ٣ ساعات ونص لطيارتهم ..
لؤي : اها فهموني في شنو
لجين بقت بتحكي لي لؤي وصالح منزل راسو وبعاين لبعيد ..
بعد خلصت قالت : لؤي دا كل الحصل وصدقني صالح اتغير شديد هسي وبقا زول تاني وانت عارف مستحيل اني اوافق عليهو بعد العرفتو دا لو ما واثقة انو تاب من البعملو دا ..
صالح : لؤي انا اسف والله
سكت مسافة قبل ما يرد عليهو ويقول : طيب حصل خير وبغض النظر عن الحصل لجين امانة في رقبتك💙
صالح بإبتساآمة وهو بعاين لي لجين : اكيد في عيوني💙
~•~•~•~•~•~•~•~•~•~•~•~•~•~•~•~•~•~
🌸 تاني يوم 🌸
الدفعة الجميلة مشت توتي .. وطبعاً وائل ما كلم هالة انهم جايين ..
العصرية كدا اتصل عليها ..
اول ما ردت قال ليها : حبيبتي اشتقت ليك ..
داليا بقت بتضحك ..
وائل : هالة !!
داليا : لا انا داليا اختها
وائل بخجل : اهاا طيب .. كيفك !!🐸
داليا : تماام وانت !!
وائل : تمام والله ..
وبقو بتونسو سوى ..
داليا : وائل ..
وائل : نعم
داليا : انت بتحب هالة بجد صح !!
وائل : صدقيني فوق ما تتصوري ،، ياخ دي روحي وكل شيء❤️
بعد شوية جات هالة وكانت بتنشف في شعرها بعد ما غسلتو وهي بتقول : دا منو !!
داليا : حبيبك
لمت شعرها وجات شالت التلفون قبل ما تقول : الو
وائل وهو بكورك : اسمعي هنا يا زفت الطين تاني كان ماشة السماء شيلي تلفونك دا معاك ..
هالة : يا ود مالك اسي
وائل : دخلتيني مع اختك في محلات ضيقة ياخ
هالة : كيف كيف كدي احكي لي
حكا ليها قبل ما تفك الضحكة بأعلى حسها ..
وائل : تضحكي فيني انا يا كلبة كويس اصبري لي .. المهم خلينا من دا تعالي المزرعة سريع مستنيك ..
هالة : بِسْم الله مزرعة شنو😳
وائل : شون ذَا شيب😒مزرعة شنو يعني حتكون ما م مزرعتكم انتو ..
هالة : جيتو متين
وائل : الليلة بس المهم منتظرك بطلي كلام كتير يلا
هالة : طيب ..
قفلت منو ومشت لبست عباية وطرحة وطلعت .. شافتو من بعيد وهو مديها ضهرو ومشت عليهو براحة علشان تخلعوو .. هو كان حاسي بيها وأول ما قربت شوية قبل بسرعة عليها وخلعها وهي في ثانيتين من الجري طارت هناااك😂وهو مااات ضحك فيها ..
مشا عليها وهو بضحك لمن ما قادر يتنفس
وائل : عشان تاني تفكري تخلعيني ..
ورجع يضحك تاني😂
حمرت ليهو قبل ما تقول : كلب حيوان😒
وائل : مقبولة منك بعد ما ضحكتيني كدا ..
سلم عليها ومشو قعدو في شجرة الغرام حقتهم ديك🐸(( ان شاء الله تنحرق )) وبقو بتونسو سوى ..
~•~•~•~•~•~•~•~•~•~•~•~•~•~•~•~•~•~
🌸 في جانب تاني 🌸
اروى : هدى ارح نطلع
هدى : وين !!
اروى : ااي مكان ان شاء الله نتمشى ساي
هدى . طيب يلا ..
طلعو مع بعض وأثناء ما بتمشو كدا .. هدى شافت وائل وهالة وهم سوى وبضحكو وبتونسو .. وقفت مسافة ..
اروى التفتت عليها وهي بتقول : مالك !!
لاحظت انو عيونها اتملت دموع .. وقبل ما ترد وائل شافهم وكورك ليهم : بنات تعالو ..
هدى التفتت ومسحت دموعها بسرعة ..
مشو عليهم وسلمو على هالة .. وقعدو يتونسو ..
بعد مسافة تلفون هدى ضرب .. عاينت ليهو لقيتو لؤي .. استأذنت منهم قبل ما تمشي وترد عليهوو ..
~•~•~•~•~•~•~•~•~•~•~•~•~•~•~•~•~
🌸 في مكان بعيد 🌸
لين كانت شايلة معاها اللابتوب حقها ومنزلة فيهو افلام .. قاعدة في البلكونة وبتحضر .. سمعت صوت باب الغرفة فتح .. قبل ما ينادي عليها : لين تعالي جبت الأكل ..
لين : طيب ثواني
قعدت مسافة وما مشت لانو الفلم سخن معاها شديد😂
زياد مشا ليها وقال : قومي حبيبي الاكل حيبردد ..
لين : طيب الله يخليك ثواني بس في جزء مهم ..
رفع حاجبو مسافة وهو بعاين ليها .. شال اللابتوب قفلو وختاهو قبل ما يشيلها هي زاتا😂
لين وهي بتكورك : زياد نزلني دا شنو دا
زياد : زي الشافعة كدا اعمل ليك شنو
وهي لسا بتفرفر وبتكورك ..
عاين ليها مسافة قبل ما يقول : بتقعدي ساي ولا اربيك بطريقتي..
لين بتوتر : لالا خلاص والله بقعد ساي
بقا بضحك فيها .. دخلو جوا وقعدها في الكنبة وقعد جمبها .. لما جات تاكل ضربها في يدها وهو بقول : اقعدي ساي ..
لين : اجي دا شنو دا دا
زياد شال من البيتزا وبقا بيأكلها .. بعد شوية عاين ليها مسافة وهو بقول : حبيبتي انا حا اشيلك جوا عيوني وعايز ادلعك وافرحك وأنسيك اي شيء💙
لين بإبتسامة وهي بتعاين ليهو : للدرجة دي بتحبني !!
زياد : فوق ما بتتصوري ،، الله ما يحرمني منك❤️
وتمو اكل و ونسة سوى ..
~•~•~•~•~•~•~•~•~•~•~•~•~•~•~•~•~•~
🌸 توتي 🌸
اول ما ردت قالت : الو
لؤي : هدى مالك
هدى : مالي !!
لؤي : صوتك لي كدا عيانة انتي !!
هدى : لا
لؤي : طيب زعلانة !!
سكتت بدون ما ترد ..
لؤي : وريني
هدى : كنّا قاعدين هسي مع وائل وحبيبتو
قاطعها وهو بقول : وانتي واجعاك الحاجة دي صح
هدى : ااي يعني بس لازم اصبر واكون عادية ومدام هو مبسوط دا المهم بعدين انت براك قلتا انو حيجي يوم واتجاوز الموضوع دا وأنسى ..
لؤي : ايوة عايزك كدا انا💜
هدى : امم ،، خير في حاجة حاصلة !!
لؤي : لا ولا شيء بس حبيت اتصل اتطمن عليك ،، انتي كويسة مش !!
هدى : ااي الحمدلله💙
لؤي : الحمدلله ،، طيب ما أأخرك بكونو منتظرنك..
هدى : طيب ،، يلا سلام
لؤي : سلام
قفلت منو قبل ما ترجع وتقعد معاهم .. بعد شوية هالة رجعت البيت اما وائل وهدى واروى رجعو المبنى ..
~•~•~•~•~•~•~•~•~•~•~•~•~•~•~•~•~•~
🌸 بي الجهة التانية 🌸
خلصو اكل ..
زياد : صليتي انتي
لين : لا
زياد : خلاص اتوضي والحقيني انا حفرش المصالي وانتظرك نصلي سوى❤️
لين : طيب
اتوضت ومشت لحقتو .. وقفت في المصلاية الوراهو وصلو سوى .. بعد خلصو وسلمو..
زياد بقا بدعي مسافة ..
بعد خلص ..
لين : بتدعي في شنو اصلك قدر دا🙂
زياد : دعيت انو ربنا يحفظك ويحميك لي ويقدرني أسعدك وأهنيك ويرزقنا بي بنوتة تشبهك وتكون حلوة زيك💚
ابتسمت بخجل ..
قامو ولين كانت ماشة تتم فيلما😂
زياد : ماشة وين !!
لين ببراءة مصتنعة : اتم الفيلم ..
زياد : احلفي
لين : والله
مسك يدها وجراها عليهو ..
(( ولغاية هنا نخليهم براهم🙉 ))
~•~•~•~•~•~•~•~•~•~•~•~•~•~•~•~•~•~
🌸 بليل _ عند كمال ورنا🌸
كانو بتكلمو بالتلفون وبتونسو ..
جا عامر وقعد جمب كمال ومعاهو وائل ..
قفل من رنا وقال ليهم : خير اللمة في الليل دا في شنو🙂
عامر : شوفو يا شباب انا قررت انو عرسنا انا واروى يكون اول ما نخلص السنة دي وقبل حفلة التخريج بالذات ..
كمال : ظوووط لمن بهناك يا زولي منها تكون الفرحة فرحتين زاتوو♥️
وائل : جددد برنامج ظريف
عامر : خلاص بكلم اروى وبشوفها بتقول شنو
اتصل وكلمها .. وقالت ليهو بس يرجعو الخرطوم بشوفو اهلهم حيقولو شنو ..
~•~•~•~•~•~•~•~•~•~•~•~•~•~•~•~•~•~
🌸 بعد ٤ ايام 🌸
رجعو الخرطوم .. وحددو العرس فعلاً .. ودا بإعتبار انو عامر حيمسك شغل ابوهو في الشركة بعد ما يخلص طوالي ..
~•~•~•~•~•~•~•~•~•~•~•~•~•~•~•~•~•~
🌸 بعد شهرين ونص _ اخر يوم في الامتحانات 🌸
اولاد الدفعة كلهم طلعو من القاعة وبقو بصرخو مع بعض😂
وائل : اخخخخ واخيراً خلصناااا😭😭💜
عامر : جد والله
طبعا الشلة أتفقو يتلاقو في بيت ناس كمال ومعاهم رنا وزياد ولين ..
المهم بالمساء كدا اتلمو ..
وائل : اوو العرسان ياخ ما شفتكم تاني😉
زياد : تقول شنو بس نستني الناس كلهم🐸💚
لين خجلت خجل وكلهم بقو بضحكو .. قضو اللمة ونسة وحركاات .. بعد ساعتين كدا اي زول رجع على بيتو ..
(( طبعا لين وزياد ساكنين في بيت اهل زياد ))
لين مشت غرفة رنا وبقو يقرو سوى كانت فايتاها حاجات كتيرة ورنا بتشرح ليها ..
~•~•~•~•~•~•~•~•~•~•~•~•~•~•~•~•~•~
🌸 عند وائل 🌸
اول ما رجع البيت ناداهو ابوهو .. مشا وقعد معاهو
علي : قلتا لي خلصت خلاص ،، حمدلله على السلامة
وائل : الله يسلمك يا ابوي
علي : طبعا زي ما عارف حا تنزل شغل معاي الاحد يعني عندك يومين جمعة وسبت كمل نومك فيهم عشان تشد لي حيلك🌚
وائل : لا خلاص ممكن أعيد الجامعة بالله🙂
علي بقا بضحك فيهو : لا ما تخاف ما حيكون كتير ان شاء الله بس اهم شيء تكون منتظم وتنتبه لانو بعد فترة حتمسك إدارة الفرع التاني ..
وائل : ان شاء الله يا ابوي
علي : يلا خلاص تصبح على خير قايم انوم بعد دا تعبان شديد
وائل : وانت بخيير ..
مشا على المطبخ كب عصير شربو قبل ما يطّلع على غرفتوو
يتبع.....
