حبيب نفساني

الفصل التاسع

رن هاتف ساره صباحاً ، استيقظت بعيون ناعسه لترد

ألو -

سمعت حسام على الطرف الآخر يجيبها :

صباح الخير على أجمل البنات -

قالت ساره بصوت منزعج قليلاً ، فلقد أقلق الهاتف منامها:

صباح النور -

سألها حسام مستغرباً :

إيه ده انتي معندكيش شغل النهارده ولا إيه -

لأ معنديش -

طب معلش يا قمر روحي كملي نوم -

لأ ما أنا صحيت خلاص ......ثم أكملت وهي تتثاءب

....  متحاولش تصحيني من النوم تاني أحسن -

أحسن إيه؟ -

أحسن انهي الموضوع خالص ، أنا في النوم معنديش ياما ارحميني -

تلغي ايه هو مش بمزاجك إنتي اتدبستي خلاص ، أنا في اللزقه معنديش ياما ارحميني -

ضحكت ساره على تعبيره وشاركها حسام الضحك ...سألته

بتعمل إيه أُمال ؟ -

بكلم القمر -

والقمر قالك إيه؟ -

مقاليش حاجه لسه -

ما هو مش هيقولك -

اشمعنا ؟-

عشان القمر مبيطلعش الصبح يا حُسام -

يا بنتي كفايه دبش ، خلاص مش هقول حاجه -

إيه ده انت هتقفش من أولها ، خلاص خساره فيك اللي كنت هقوله -

لأ خلاص كنتي عايزه تقولي إيه ؟ -

بص يا حسام ، أنا ممكن أبان مش لطيفه ومبعرفش أقول كلام حلو ، بس عايزاك تكون مُتأكد إن المشاعر اللي جوه قلبك دي مش من طرف واحد ، وإن أنا كمان في قلبي ليك نفس المشاعر