حبيب نفساني

الفصل الرابع

في أحد المطاعم ، لمس يديها ونظر لها بحب

بحبك وحشتيني -

سحبت يدها بإنزعاج وارتسم على ملامحها الملل

وبعدين ... بعد بحبك ووحشتيني

قال لها متضايقاً

تاني يا شاهنده يعني غلطان إني بصالحك -

تاني وتالت يا هادي ، الحب أفعال مش أقوال ، وأنا صبري خلص خلاص -

انتي لا عاد نافع معاكي أقوال ولا أفعال يا شاهنده ، انتي اتغيرتي -

ردت بحِده : جاي تقولي اتغيرتي بعد 5 سنين حُب وسنه خطوبة

كويس إنك فاكره إن اللي بينا مش قُليل ...بس البنت اللي حبيتها من 6 سنين ...اللي وعدتني نكافح سوا ...وإن إحنا طالما مع بعض مش مهم أي حاجه تانيه ...مش هي البنت اللي أعده أُدامي -

أنا متغيرتش يا هادي الدنيا هي اللي إتغيرت ، وقيمة الشخص بقت بقيمة الفلوس اللي معاه -

انزعج هادي وسألها بعصبيه : عايزه إيه يا شاهنده مش فاهم ؟

عايزاك تشوف الصورة كامله زي ما أنا شايفاها ، إحنا بقالنا سنه مخطوبين وإنت لسه مجمعتش مقدم شقه ، لسه مجمعتش تمن التشطيب والعفش والفرح-

قاطعاها بعصبيه : إنتي عارفه ظروفي أنا مخدعتكيش ، أنا بشتغل صبح وليل 15 ساعه في اليوم بكل طاقتي ولو ينفع أشتغل أكتر من كده كنت اشتغلت ...والفلوس اللي جمعتها تجيب مقدم شقه .. لكن انتي مش عايزه اي شقه وخلاص لأ ...انتي عايزه شقه كبيره في مكان راقي جدا يا إما بلاش...مش عايزه تاخدي شقه وسط ونبدأ من الصفر سوا ونكبر مع بعض ، ومع ذلك وافقت وبلف في ساقيه بقالي سنه عشان أقدر اجيبلك الشقه اللي انتي عايزاها

ردت شا هنده على عصبيته ببرود : لأن يا هادي اللي بيبدأ من الصفر بيفضل على طول في الصفر ، إلتزامات الحياه بعد الجواز بتزيد واللي معرفناش نعمله قبل الجواز مش هنعمله بعده ، بعدين ما تطلب من أهلك يساعدوك

بابا بياخد معاش يدوب مكفيه وكتر خيره إنه عرف يساعدني في فلوس الشبكه ... وعمي أحمد قال إنه هيساعدني بمبلغ في التشطيب ... عمي محمود متوفي الله يرحمه وورثه وفلوسه مع عاصم وملك في البنك أروح أقول لملك إديني ورث باباكي مثلا !!.. أما عاصم مع إنه مش أكبر مني بكتير ولسه متجوزش أصلاً ، بس قالي الصالون والسفره بفرشهم وديكورهم هديه منه ليا بمناسبة الجواز ، كله مستنيني أجيب الشقه

أصبح صوت هادي أكثر حناناً وهو يقول : شاهنده أنا بحبك ومتخيلش حياتي بدونك ، إصبري شويه كمان وهي هتُفرج إن شاء الله وهنتجوز وهنفرح -