عشق في بلاد حروبها لا تنتهي 3 (جبار)

البـــ{الـاول}ـــارت

_
_
عشـَق فـي بِـلاد حُـروُبِـها لا تنتهــي 3
{ #جبــــار }
.
.
.
البـــ{الـاول}ـــارت
أسفـــيِ عـلي مـن صُنِعــة الحيــاة منـهُ مُجــرمـــاً .
.
.
.
فتح باب المصنع وخش وهوا يشبح في رجالته لشادين زوز شباب باين من ملامحهم الخوف والرعب .
قرب جبار ووقف قدامهم .
تكلم واحد من الشباب برعشة خوف ورعب واضحات علي صوته :بالهي عليك سامحنا ياجبار واللهي لا عبد مأمور حني بس سامحنا ، ظلمنا عمك لكن مش في يدنا
شبحله جبار لدقايق وبعدها سحب السلاح من خصره وطلق عليه رصاصه في راسه قتلاته في مكانه .
خفق قلب الشاب التاني برعب اول ماشاف صاحبه لطاح طريح الارض مقتول وقال والدموع في عيونه :باللهي عليك ماتقتلنيش باللهي عليك
واول ماتلفتله جبار طلق علي رجله رصاصه لنتج مع صوتها صيحته وهوا يطيح من طوله ويشد في رجله بألم وبكي ، قعمز جبار قدامه وحط السلاح تحت ذقنه وقال :لمــا تظلم ركز علي روحك انك ماتظلمش حتي روحك ، لأنه عمره الجلاد مايجلد روحه
وبعد وهوا يوقف وكمل كلامه :وصلهم الكلمتين هدم لـ مسمع الكلب لأمرك وقوله الدور جايك بعد عمي
وتلفت لرجاله :خلوه يمشي
وطلع وهوا يطلع في تليفونه لشرين من جيبه، واول مارد جاه صوت :واحد من الشباب لشديناهم ولد خو عمار رد بالك تقتله
جبار :ثار عمي براس ولد خوه اما ثاري براسه هوا
تنهد عمر لي علي الخط :قتلته
جبار رفع كتفه ومسح جبهته بيده لشاد بيها السلاح :ماني عارف ياقتلته ياعيبته
ضحك عمر :انت سفاااح هههه
جبار خف من مشيته وهوا يسمع في انين بكي نزل التليفون من ودنه وخلا عمر لنادي عليه وحط سلاحه في خصره ولاد علي الحوش واول ماقرب من الجنان الخلفي شبحها وهيا مقعمزه علي الارض ومتكمشه في بعضها وحاطه راسها علي ركابها وتبكي ، ضيق عيونه وقرب خطوتين بس اول ماشاف وحده تانيه جايه تجري وقربت منها وهيا تنادي مع دموعها:نوووور نووور بابا وينه بابااااا
رفعت نور راسها ليها طول وحضنتها وقالت من بين دموعها :رنيم ارفعيني من هني ارفعيني هدا المكان خدي امنا وتوا خدي بابا خوديني من هني
واول مافتحت عيونها شافاته وهوا واقف تحت الشِجَر برؤيه مغبشه بسبب دموعها ، بس جبار اول مالاحط انه شفاته وخر ومشي .
.
.
.

تــــاني يـوم وفي صبحه الكائيب علي عائلة المختار كانو مصطفين الاخوه وولادهم قدام جثت عبد المجيد وقدامهم الإمـام لعلا صوته وهوا يرفع في يديه لتكبير لصلاة الجنازة وقال :الله أكبر ، أعـوذ بالله من الشيطان الرجيم ، ""بــــسم الله الرحمــن الرحيــــم (1) الحـمد الله رب العـٰلميــن (2) الرحمــٰــن الرحيــم (3) مــٰـلك يوم الــدين (4) إيــاك نعبُــد و إيــاك نستعـــين (5) اٌهــدينا الصراط المُستقيـــم (6) صراط الذيــن أنعمـت عليهيـــم غيــر المغضــوب عليــهم ولا الضــاليـن (7)""
ورجع رفع يديه وكبر:الله اكبر اللهــم صلـي علي محــمد وعلـي آل محــمد كمـا صليـت علـي إبـراهيـم وعلـي آل إبـراهيـم ، وبــارك علـي محــمد وعلـي آل محــمد كمــا بــاركت علـي إبـراهيـم وعلـي آل إبـراهيـم إنــك حميــد مجيــد
ورجع رفع يديه مره تالته وكبر :الله اكبر ، اللهــم أغفـر لـه وأرحمــه ، اللهــم أكــرم نزلــه ، اللهــم مــد لـه فـي قبـره مـد بـصره ، اللهــم أبــدله داراً خيــراً مـن داره وأهــل خيـراً مـن أهــله ، اللهــم أعفــي عنــه ، اللهمــم أرحمــه
ورجــع رفع يديه للمرة الرابعه وكبر : الله أكبر ، اللهـم لا تحرمـنا أجره ولا تفثنـا بعـده و أغفـر اللهـم لنـا وله ، اللهمـم أجعـل الجنـه مكانانـا ومكانـه ، اللهـم أرحمنـا وأرحمـه وأغر لنـا وأغفر لـه أننـا عبـادك لا قـوة لنا ولا حـول فـ أرضـي عنا وأرضـي عنه ، فـ أنت الرحيـم الغفـور .
وسكت الإمام للحظات وهوا يدعي في سره ورجع وقال وهوا يطلق في السلام :السلام عليكم ورحمة الله ، السلام عليكم ورحمة الله
.
.
.
طلع جبـار من المقبره وهوا يشبح لشاب لمتكي علي االسياره وجنبه شباب تانين يسلمو علي عمامه ، تلفت جبار لعمر وقال :من هدين
عمر ميل راسه وشبح لشاب لواقف علي الجنب بروحه :هداكا لواقف بروحه راجل بنت عمي عبدالمجيد لكبيره ولواقفين علي عمي خوته
جبار فتح باب السياره وعينه في رعد لركز علي نظرات جبار لركب السياره هوا وعمر ومشو .
ضيق رعد عيونه وتلفت وهوا يحاول يتصل بـ رنيم لماتردش ، تنهد وهوا يسكر في التليفون وتلفت لسفاو:اسمع اني ماشي بعدين تلقوني في خيمة لعزي
السيفاو:علي خير
تلفت رعد ورفع يده من غير مايرد عليه وركب السياره وهوا يعاود يتصل بـ رنيم مره تنين وفي المكالمه الثالته كان الخط بـ يتسكر خلاص بس ردت في اخر لحظه وجاه صوتها لباين مالياته العبره :رعد
رعد :ياقلبه انتي
ماعاش قدرت رنيم تتكلم وقعدت تبكي وهيا اتمتم من بين دموعها :بابا مشي يارعد بابا خلانا
رعد ماعاش عرف شن يقول بـ قول هدي ساعته ولا هدا اجلاه وهوا مقتول ولا عرف يطبطب عليها وهيا بعيده عليه.....
.
.
.
فـي الليـــل
طقطق الباب علي رنيم لحاضنه نور لرقدت في حضنها بعد هلوسه مع دموعها لمابطلوش بكل ورجاء راقده جنبهم .
شبحت رنيم للباب لنفتح وخشو اربع بنات لوحده منهم قالت :عادي نخشو
مسحت رنيم دموعها وماقدرتش تنوض تساوي تقعميزتها علي خاطر نور ماتنوضش وقالت :اكيد تفضلو
خشو لبنات وقعمزو جنب رنيم ووحده منهم مشت جابت بطنيه وغطت رجاء .
وكيف جايه بتغطي نور رنيم وقفتها :لالا من امبكوي وهيا تقول نو خليها هكي
بتسمت البنت وقعمزت :ياناري مابطلتش وهيا تبكي الصدمه جت فيها هيا الاولا
رنيم ضيقت عيونها :ايه طول اليوم وهيا تهلوس بالدم وبسم بابا
وتنهدت ورجعت شبحت للبنات :انتم بنات عمومتي
بتسمت وحده من لبنات :ايه اني اكرام
وتلفتت لمقعمزات جنبها :وهدم اخواتي الاء وايه وهدي بنت عمي هنيده
رنيم رسمت علي شفايفها شبه ابتسامه :واني رنيم وهدي نور اختي
وشبحت لرجاء وكملت :وهدي اختي من بابا
وزمطت غصة الكلمه قبل ماتقولها وبعدها قالتها بدمعه نزلت من عينها :الله يوحمه
هنيده :الله يرحمه انشاءالله ويغفرله وينتقم من اللي كان السباب ولد لحرام ماد...
وزمطت باقي كلمتها اول ماقرصتها اكرام وهيا تفنص فيها بمعني اسكتي وتلفتت لرنيم وقالت :الله يرحمه ، شفت بيبي معاكم ولدك
رنيم هزت راسها :خوي حتي هوا من بابا
ايه :الله محلاه علي فكره يشبهلك هلباا عيونه زرق زيك وزي اختك الصغيرة نسيت اسمها
رنيم بتسمت :رجاء ، ايه كلهم يقولولي فيها يشبهلي
سكتو لبنات لدقايق وهما يشبحو لبعض وينخصو في بعض ومش عارفين شن يقولو لين رنيم رجعت وقالت :في وحده امبكوي ماخلتنيش نطلع لجنان الامامي علاش شن فيه غادي
نطت هنيده :اكيد مرت جدي عزوز الشنطاء
الاء :ماحد يقدر يمشي غادي علي خاطر ولد عمي جبار مايحبش يشوف ولا مراة غادي ورجالته ديما يتحاوسو غادي
ضيفت رنيم عيونها :من جبارهدا
اكرام :هدا ولد عمي المهدي واكبر صغار عمامي وهوا تقريبا يحكم ويطلق اكتر حتي من بابا وعمامي
رنيم :اها خو من فيكم هدا
الاء:ولا وحده فينا
وبتسمت :والحمدالله
ضحكو ايه وهنيده عليها واكرام قالت بضحكه :هدا ولد عمي لكبيرماعنداش لا خوات ولا خوت ، وحني عندنا خو واحد اكبر  منا عمر  وهنيده عندها تلاته خوت مؤيد ومحمود والصغير ناصر يقرا في طرابس وقعد غادي حاليا
رنيم :ان شاءالله وبي يحفظهملكم ، احكولي شوي عليكم
هنيده :شن بنحكولك لا بنحكولك
ايه ضحكت :بختصار انتي في مكان كله دراهين كبد وغثاتين علي قولت مرت جدي
رنيم :هههه قصدي احكولي هكي كلكم عايشن هني ومن متزوجه فيكم ومن لا وخوتكم كان متزوجين او لا وهكي
هنيده :لالا كلنا عوانس حتي شبابنا عوانس عيله عوانسيه حني
اكرام ضربتها علي كتفها :طول عمرك تقعدي ماتعرفيش تدوي ، ماتعدليش عليها هبله ديما هكي
رنيم :هههه عادي خلاها محلا دوتها
رمشت هنيده برموشها بفرحه وهيا توزع في بوساتها لين ايه ضربتها كف :اعقلي ياتافها ههههه
حطت هنيده يدها علي خدها ومدت شفايفها بزعل وهيا تتنهد بغل .
اكرام : ياحنه شفتي لحياش هدي كلها خاشه في بعض هههه يعني كل حوش يدخل في حوش صح كل عيله في حوش بس تفتحي باب تلقي روحك في الحوش التاني كأنه عايشين مع بعض ، وجدي حوشه في الوسط وهدا اكبر حوش وولد عمي جبار عايش معاه وجدي متزوج مره تانيه فوزيه
الاء:وطبعها زي السم شريره هلبااااا
رنيم :عادي نتوقعها في الغالب ديما  لمواة التانيه تكون شويوه وامهاتكم مادويتوش عليهم
اكرام:امي كريمه ومرت عمي امنه وعمامك اكيد تعرفيهم بابا سليمان وعمي جلالا والمهدي
هنيده:وخودي علي امهاتنا فكره حلوه من امبكري وهما يقولونا برو شوفو بنات عمكم
رنيم :هههه سلمهم باه ووين موت عمي لكبيو
كلهم سكتو لين رنيم ضيقت عيونها وقالت :خيوكم سكتو
هنيده كيف جايه بتتكلم بس اكرام قصت عليها وقالت :الله يرحمها ميته من زمان
هزت رنيم راسها :وبي يوحمها وخيوه عمي ماتزوجش غويبه
اكرام :الله وعلم
وشبحت لخواتها...
.
.
.
خش عمر لخيمة الرجاله لمعبيه خدي كرسي وجره لورا الخيمه وهوا يشبح في جبـار لمقعمز علي كرسي وحاط رجليه علي كرسي قدامه ويشبح لسماء والسبسي في فمه ، حط عمر الكرسي جنبه وقعمز :عمي المهدي يدور فيك
نفخ جبـار الدخان من فمه  وقال وهوا قعد يشبح لسماء:ها رفعتو الجثه
عمر تنهد وطلع دخانه وولع سبسي:غدوه بتقوم لقيامه
جبـار:ونار جهنم بتنفتح علي عمار وكلابه
عمر شبحله وقال :عمي المهدي مش عاجبه لصاير ، وعنده الحق بوي وعمي جلال يستغلو في جبروتك باش ياخدو اراضي عمارعارفين ماحد يقدره غيرك وهوا والكلب فوزي حاطينك في رروسهم
جبـار بتسم:وانا نستغل في خدماتهم ، وها يحطوني عشان حتي انا حاطهم في راسي
تنهد عمر وكيف اتكي علي الكرسي سمعو صوت عراك قدام الخيمه وقف عمر طول ومشي يجري واول ماوصل لقدام الخيمه  شاف ولد عمه محمود يتعارك مع شاب والشباب ملتمين عليهم لي في  يحاول يحز  واللي فيه يزيد ، خش عمر بينهم يجري وهوا يشد في محمود :محمود محمود ياسر تي يامحمووود
دفه محمود وهوا يهجم علي رعد اللي عيونه يطلعو في شرار وضرب محمود بوكس علي فمه لين محمود بعد وهوا يشد في خشمه لنزل دم وصيح :ياولد ال......
وكيف بيهجم جاه صوت جبار لصيح :محمود
وقف محمود في مكانه وعيونه معلقه في رعد لرفع يده وصيح :وربي هي وربي كان ماطلعولي مرتي تو وربي نقلبها فوق راس ...... واللي يصير يصير
محمود :اعلي مافي خيلك اركبه وللي عاطيهالك تحت التراب وحني مانريدو نسبك ولا نبوك يا ....
كيف جاي رعد بقرب بيضربه جي جبار ووقف بينه وبين محمود وقال :ماعاش لي يرفع يده علي صغار آل المختار
رعد قدم ووقف قدام جبار وقال بعصبيه :وماعاش اللي ياخد مرتي مني لو حتي كان عيلتها
جبـار تلفت لمحمود ورجع شبح لرعد :هااا ومن قال بناخدوها منك كان مانبو نعطوها لك ها عمي ماقبل بنسبك هنا حوش عيلتها وعندك مكانها
وكيف جاي محمود بتكلم صيح جبـار :ولا هااااا عندك كلام تاني يامحمود
سكت محمود بعصبيه وتلفت ومشي وخلا رعد لشبحله وبعدها شبح لجبار لمحولش عيونه منه وهوا يسمع في صوت عمامه وبوه لجو في اخر لحظه ومعاهم السيفاو لمستغرب من اللمه وهوا يقرب من رعد :رعد شن فيه
بتسم جبار لرعد :سوء تفاهم ياااا رعد وله
رعد :نتمناه يكون هكي
وخر جبار وسيبهم يتناقشو وهوا حاس بخطوات بوه لوراه
المهدي :صهيب
وقف جبار في مكانه وتلفت لبوه وقال وهوا شاد علي كلامه :جبـااار
المهدي غمظ عيونه وهوا يتغاظا علي صيغة كلامه :امتي بتبطل تعاملني هكي اني بوك مش عدوك
جبـار :هااا هااا هدي العله انك بوي كان غير هكي راك في الاكيد كنت عدوي
المهدي تنهد :اسمع ياصهيـ...
صيح جبار وهوا يقص عليه :جبـااااااار جبـااااار
زاد المهدي وعلا صوته :ايه انت جبااار جبار علي الناس لتقتل فيها من غير قلب من غير ضمير وليت زي جدك الله يلعنه خلاك نسخه منه وليت مجرم تقتل من غيرماتحسب لحد علاش خليت من روحك هكي علاش
ضيق جبار عيونه وقرب من بوه هلباااا وقال بعد صمت لحظات :مافيش انسان يجي مجرم بالفطره فيه انسان الظروف خلاته مجروم ، وانا انتم لخليتوني مجرم انت يالمهدي انت
وتلفت مشي وهوا يكمد في غصت قلبه ومشاهد من ذكريات الماضي لي ولو كوبيس ترجعله بألم وماتزيد فيه غير في حقد وقوه .
.
.
.
تــاني يــوم ...
ضيقت نور عيونها : علاش شن صاير
رفعت رنيم كتافها:مانعوفش اتصل وهوا يعاوك وبعدين قالي الصبح وتي ووحك بووح بيك ماقدوتش نقول لا باين عليه متعصب هلبااا
أسماء حطت مهند لرقد وغطاته:لا تقولي لا لا شي روحي مع راجلك
نور :بتخليني بروحي
رنيم :اكيد لا ايامات ونجي ناخدك
وتلفتت لمرت بوها :ولما عمتي اسما تروح للحوش بويلها اكيد مش ح يشدوها بعد ماتومي العده
اسماء ضحكت:ههههه تي مستحيل يخلونا اروحو سمعت فوزيه مرت جدهم ولا شن اسمها قالت البنت المتزوجه تروح لحوش راجلها لكن الباقي مكانهم هني خلاص
نطت نور وصيحت:مستحيل نقعد هني اني مستحيل نعيش مع مجرمين زي هدو
وشبحت لرنيم وقالت بترجي:باللهي ليك ارفعيني معاك يارنيم ماتخلينيش هني
وقبل ماتتكلم رنيم طق عليهم الباب وانفتح وخشت فوزيه ومعاها كريمه وامنه.
فوزيه :وين بتمشي يابنتي من بيتحملك الا حوش بوك وعيلة بوك
وقعمزت جنب اسماء لقعمزت زين وهيا تبتسملها ابتسامت غصب ، وشبحت لنور لزمطت غصتها وشبحت لرنيم لحولت شنطتها باش تخلي وسع لامنه وكريمه يقعمزو .
رنيم :قعمزو قعمزو
قعمزو كريمه وامنه لقالت :توتي في شنطك بتروحي
رنيم هزت راسها :ايه
فوزيه :مسرع بوك ماليه تلاته ايام ، ولا عندكم مايحزنوش حقا
نور شبحتلها :وراها راجل ومابتحسو بفراق بونا اكتر منا الحزن في القلب مش في القعده عندكم
قرصت اسماء نور طول باش تسكت ، وامنه وكريمه شبحو لبعض طول علي طولت السانها .
فوزيه :كنتنا شكلها السانها طويل ، وجبار مايحبش طولت السان
ضيقت نور عيونها بعدم فهم وهيا تشبح لرنيم لجت قعمزت جنبها :كنة شن
نور :ومن جبار هدا
فوزيه :خطيبك ، بما انك يتيمه ومافي حد من بيك عيب تقعدي هكي بينا وولاد عمك اولا بيك وكبيرهم وسيدهم موجود ومن زيك ناخدوك لجبار ولد جده
ضحكت نور من الصدمه من كلام هدي لمراة لقعده قدامها وتدوي بكل ثقه ، ضحكت من قلبها وبدموع ملو عيونها وهيا حاسه روحها في حلم لالا مش في حلم هدا كابوس وكابوس مرعب هلباااا وهيا تبي تنوض منه .
.
.
قالت نور ، في وقتها وفي لحظتها كلامها علي الزواج حسيت روحي اني في أتفه لحظات حياتي هيا قعده تقولي بنزوجوك لشخص لا تعرفيه لا يعرفك والمشكله لكبيره انه من العيله المجرمه هدي واني قعده نضحك وقسم بالله قعدت نضحك من كل قلبي مانعرفش شن جاني بس الموقف ضحكني لانه كنت عارفه و واثقه انه مش ح نقدر نمنع الزيجه هدي
.
.
.
#يتبــــ(للبـ2ـارت)ــع
#الياقوت
________________________________
بداء كتابة الرواية في تاريخ 20 / فبــــ2ٰــــراير / 2020
تم انهاء كتابة الرواية في تاريخ 31 / مــــ5ـــايو / 2020