عشق في بلاد حروبها لا تنتهي 3 (جبار)

البـــ{الــسابع عشـر}ـــارت

_
_
عشـَق فـي بِـلاد حُـروُبِـها لا تنتهــي 3
{ #جبــــار }
.
.
في الحلقة السابقة
بتسم القاسي وشبح لـ عمر وقال :مش قتلك يعجبني
عمر ضحك :غر اسكت ، باه والشاحنات والبضعه كلها بتريح علينا
جبـار رفع حاجبه وشبح للقاسي:لالا مايريح شي ها قاسينا عنده يدين في كل مكان
القاسي:هههه مش اكتر من يديك
عمر :تي ستنو شوي بس ره حتي عمار يديه ممدودات في كل مكان بتورطوه اليوم غدوه تلقوه قدامكم
جبـار:ويطلع ها اصلي نبيه يطلع لكن سوقه بـ يطيح من مزال بيتعامل مع مهرب سلاح
بتسم عمر وشبح للقاسي لصفر:هدا التفكير المجرم ههههه نوضو حيبولنا حويجه نشربوها من جيتي ماقلتو حتي نشربو قاسينا جغيمة اميه نوض انت وياه نوض....

قراءة ممتعة 💛
البـــ{الــسابع عشـر}ـــارت
.
.
الجهل مش في العلم بس الجهل في العدات والتقليد وحتي التفكير ، الجهل في عقول ناس عندهم الانثي عباره عن عار ، الانثي  عاها عليه وحمل كبير ، الجهل هدا ومع الاسف قعد عايش بينا في عقول بعض البشر الساذجه بشر مجرمه وسفاحه تقتل وتشرد في الناس وخايفه في يوم ينرد فيها جرمها في بناتهم او في نساوينهم ، ويحاولو يكتمو صوت بناتهم واحلامهم وطموحاتهم ، يكتموهم عن الحياة والبشر وحتي عن ابسط حقوقهم في هدي الحياة خوفاً من انهم يجيبولهم العار .
.
.
حطت آيه طاسة لميه قدام نور وشبحت لأكرام وقالت بـ زعل:غدوا كان عندي امتحان نحو
نور تنهدت :قصدي نموت ونعرف شن لصار شن هيا الحاجه لكبيره لدرجه يمنعوكم حتي من القرايا
اكرام :غلطه بسيطه اول شي ننحرمو منه لقرايا
آيه تنهدت :احسن شي صار في هـ المصايب لجت انه ماصارش من جيت الخطاب
نور ضيقت عيونها:خطاب شني
آيه:اليوم قبل كانو جايين خطاب لـ الانسه اكرام
نور رفعت حاجبها بـ بتسامه:بالحقا وتعرفيه
ضحكت الاء بهزوه :حني مش في طرابلس
نور رجعت ضيقت عيونها:مافهمت شن دخل طرابلس
آيه شحت الكرسي وقعمزت:حني ماعندناش لا مقابله شرعيه لا فرعيه ههههه عندنا تعالا اخطب ، امه تعجبها البنت اوك تم ، فيه عرس ، فيه قطوس في شكاره
ضحكت نور :تبصرو وله ههههه
آيه:وحقربي
فتحت نور فمها وهيا تشبح لـ اكرام لستندت بمرافق يداها علي الطاوله وحاوطت وجها بـ كفوف يداها بصمت ، ورجعت نور عيونها لـ آيه وقالت :قصدي حني في 2015 ره في الـ 2015 مش في 1915
آيه رفعت كتافها:حني هكي عندنا عيلتنا مدبيها تزوج بناتها بكري ياخفو من العار
نور نفعلت وقالت بـ صوت عالي:عار شن اه اما عار
الاء نفخت وقالت :نقصي صوتك خير مايجي جبـار ويقصلك هـ السان لتلعلعي بيه
اكرام تلفتت لـ الاء بـ تفتيصه وقالت :سكري فمك
ورجعت شبحت لـ نور وكملت:يخافو من كل شي مرات عيلة الظاهر يخطفو وحده منا ، او وحده منا تتجراء وتطلع ويصيرلها حاجه او اكتر من شي عندهم هاجس منا انه البنت تجيب العار
هزت نور راسها :مستحيل انتم بجد مستحيل شن هـ العيله اللي ربي خلقني منهم وفيهم
وتنهدت وهيا تتلفت تشبح لـ الاء لقربت من الباب وهيا تشبح في جبـار لخش وركب بـ سرعه :ابصر شن فيه جبـار خاش يجري
وقفت آيه :حي ياحي ناقصنا حني مشاكل
الاء:حي بالك صاير لهنيده حاجه
اكرام :زعما
نور بعدت الكرسي وقفت :نمشي نشوف
وطلعت ركبت بسرعه وخلت الاء اضيق في عيونها :مدايره روحها عندها دوه مع جبـار وهوا حتي مش معبرها
اكرام وقفت وقربت من الاء وشدتها من مرفقها :تعرفي انتي كان ماتشدي السانك وتعرفي كيف تتكلمي قدام نور والله نقول عليك لـ امك وحسابك عندها
فكت الاء يدها من اكرام وطلعت وخلت آيه لنفخت:خليها تو تصحه علي روحها بـ كف يجيب اخرتها واخرتنا معاها
.
.
.
فتحت نور الباب بالقوه ، لـ اول مافتحاته نخلعت وهيا توخر بشهقه لما شافت جبـار شاد كلاشن ويسحب فيه .
رفع جبـار راسه فيها وهوا يتكي في لكلاشن علي حاشية السرير ، ونزل راسه وهوا يتلفت يقرب من الدولا لـ فتحه وسحب حوايجه علي جنب وهوا يفتح في الخزنة لبين حوايجه وطلع فلوس وسكرها .
خشت نور اللي ضامه يداها لصدرها وتشبح للكلاشن وبعدها تلفتت شبحت لجبـار وقالت :شني صاير
تلفت جبار وهوا يحط في لفلوس في جيبه ويلبس في جيبوطيه:ها شن صاير
نور تلفتت للكلاشن ورجعت شبحت لجبـار لقرب ووقف قبالها :سلاح وعياط ومشاكل
ورفعت حاجبها وكملت :وفلوس
جبـار رفع كتافه وتخطاها رفع لكلاشن بـيده :مافي شي هدي حياتنا المعتاده
نور تلفتتله وقلت بسرعه:باه وين ماشي
جبـار ضيق عيونه وقرب منها :خيرك ها خيرك
نور رفعت كتافها :شي نسأل شن مش من حقي نسأل ماك راجلي
رفع جبـار حواجبه :من امتي ها مش علي اساس الزيجه باطله
رفعت نور حواجبها وهيا تمد في شفايفها بزلقت السان توها كيف نتبهتلها وقالت بهزت راس عفويه :اها باطله اكيد والف باطلعه بس في نظر الناس هكي يعني فـ بنتصنع شوية فضول وخوف مزيف عليك كدا مره
بتسم جبـار :ها
هزت نور راسها :ايه
زادت بتسامت جبـار لطبس راسه وهوا  يمسح علي لحيته ورجع شبحلها وقرب منها بسرعه وقبل مانور ترجع خطوه لف جبـار يده اللي مش شاد بيها لكلاشن علي خصرها باش ماتبعدش ونزل باسها علي خدها بخفه وخلا شفايفه علي خدها وهمس :لما تخافي عليا بجد الجد ها وقتها نقولك وين ماشي يامرتي
وزاد باسها بـ خفه وبعد وشبح لعيونها بـ بتسامه مرسومه علي شفايفه وبعد عليها وهوا يتلفت يطلع من الدار وخلاها متجمده في مكانها لبعد لحظات حركت راسها وهيا ترفع في يدها وتتحسس علي خدها لباسها عليه بشبه ابتسامه رتسمت علي مبسمها لطردتها طول بـ تضيقت عيون مزيفه الغضب .
.
.
.
خش جلال للحوش وهوا يشبح لـ امنه لمدايره كرسي ومقعمزه قدام دار هُنيده ودموعها ماجفوش بكل .
ضيق جلال عيونه وقال بـ أعصاب :شن اديري يا مراة شن اديري
امنه وقفت وقالت من بين دموعها الجافات بين رموشها :وراس وبيك وراس الغالي ياجلال افتحلي نشوفها بس نشوفها وسكر
جلال تنهد وهمس:اعوذ بالله من الشطان الرجيم
وطلع المفاتيح من جيبه من بين فرحت امنه لبتسمت بـ دموع سالو علي خدودها وهيا تقرب مع جلال لفتح الباب وشد المانيليا وتلفت لأمنه وقال بـ رفعت صبع:اطلوع من الدار لا تطلع من عتبت الدار طلقتك تسمعاها ، ماكلتها شرابها هني حتي الحمام الصبح بس فليل لا مفهوم
هزت امنه راسها :حاضر حاضر اللي تبيه غر خليني نشوفها بس
سحب جلال يده من المنيليا ومشي خش لداره وخلا امنه لفتحت الدار وخشت وهيا تحط في يداها علي فمها بـ شهقت فزع وألم قلب الام اول ماشافت هنيده طايحه علي الارض ومن ضرب لكلاته حتي من حوايجها مشركات من أثر ضربة لعصيه المتكسره وشعرها الهايج من جبد جلال ليه .
قربت أمنه منها وقعمزت وهيا تقيم في راس هنيده لتأوهت بـ أنين مألم من أثر قيمان امها لراسها لحطاته علي رجلاها وهيا تبعد في شعرها من علي وجها لخلا دموعها يزيدو وتتحسس بـ يدها الدم المتجلط لنازل من خشمها وجرح خدها بسبب ضرب بوها العشوائي ولجرح فمها وهيا تهمس :اخخخ عليك يابنتي اخخخخ
نزلو دموع هنيده لرفعت يدها بـ ألم وشدت يد امها لـ علي وجها وقالت بـ صوت موجوع مالياته العبره :مـ ـاما مـ ـاما
.
.
.
قـام عمار تليفونه لشرين وأول ماشاف أسم المتصل رد طول بـ بتسامة خبث:الو
جاه صوت القاسي:ايواً ايواً حبيبنا
عمار :ايواً ياقاسي شنو وليت قاسينا ولا قعد قاسيهم
ضحك القاسي:لا قاسيهم قلبي مايطاوعني نقسيك ونتعبك
ضحك عمار :اما انت السانك مايغلبه حد
القاسي:شوي ويوصلو الشاحنات اتصل بـ الشرطه وتعالا مع جمعتك لـ .... كان تبي جبـار
عمار رفع حاجبه ووقف :كيف
القاسي:اني عارفك تبي راس جبـار تعالا لـ... كان تبيه وزيد علي لفلوس وخليهم مليونين نقولو حق جبـار نص مليون ساد هههههه ارخصه علي عيونك
عمار ضحك :تي اللي تبيه اللي تبيه ياقاسي لكن مانبي فيه شي نبيه بين يديا صاحي
قاسي:حاضر ياعموره حاضر هي تشاو تو
وأول ماسكر القاسي من عمار جاه بوكس علي وجهه خلاه يطبس لوطه من الالم وهوا يشد في خشمه لـ حسه تنطر من مكانه من الضربه لتلقاها عليه ، وأول ماقام راسه شاف جبـار لرافع حواجبه وقال :ترخصني انا ها ترخصني
قعد القاسي شاد خشمه بـ يد وبـ اليد التانيه دف جبـار وصيح :يا..... يخرب بيتك خشمي تنطر
ضحك عمر لمدله لكلينكس :خود خود
خدي القاسي لكلينكس من يد عمر بـ الفكان ومسح خشمه لنزف دم وقال :اهو يتعوج خشمي ورب الكون عملية تجميل في اكرانيا نبيها علي حسابك ياظالم
ولع جبـار السبسي لـ في فمه وجبد منه وهوا يشد فيه بين صوابعه وقال بـ بتسامة هزوه:ها صار نص مليون ها انا تبيعني برخيص
القاسي ضيق عيونه وهوا يضرب في عمر ليضحك بـ صوت علي بطنه بـ خفه وقال :وخساره فيك ياريت خليتك بلوشي
تلفتله جبـار بـ رفعت حاجب خلت القاسي يعيط:وااااه عليا واااه زودولي يااهل .......
ضحك عمر لتلفت لشباب لكلهم شبحولهم وهما يقربو ورفع يديه وقال من بين ضحكته :هههههه مافي شي مافي شي
ورجع تلفت لجبار ليضحك بـ خفه وهوا يشبح للقاسي لقعمز لوطه وتكه علي السياره ويمسح في دم خشمه ويسب .
.
.
.
بعد انتظـار ساعه شرين تليفون القاسي لقامه وهوا يتلفت يشبح لجبـار لمقعمز في السياره وفاتح الباب و شاده بـ رجله ويدخن سبسي ورا سبسي وعيونه علي القاسي لـ رد علي التليفون بـ بتسامه وقال :ايواً عموره
عمار نزل من السياره :شني وينك
رفع القاسي يده لـ جبـار لبتسم وهوا يتلفت للكرسي لـ جنبه ياخد في تليفونه ويولع في شاشته لكانت واتيه علي رقم لتصل بيه طول وحطه علي ودنه يراجي في رد المتصل وعيونه في القاسي لبتسم وسكر التليفون .
.
.
.
سكر عمار من القاسي ورد علي حسين لخش عليه انتظار:الو
حسين :وين ياعمي اهو جاي اني وعمي فوزي
عمـار تلفت وراه علي صوت واحد من الشباب :معلم
واول ماتلفت شاف شاحنات جايات اشر لشباب لحاوطو المكان بـ اسلحتهم ورد علي حسين:في ..... ومش لازم تجو القاسي جي وتم شكله
حسين :لالا اهو وصلنا فيك ياعمي نبي نشوفه بـ عيوني نبي نستغل كل لحظه ونذله فيها
عمار :تمام تمام
حسين :هي تمام ياعمي
واول ماسكر عمار وقرب علي صاحب الشاحنه لقال وهوا ينزل :عمار
عمار هز راسه :ايه وين القاسي
بتسم صاحب الشاحنه :القاسي بعتلك هديه معاي
ضحك عمار من عيونه وفي خاطره ، اكيد الكلب جبـار .
ومشي لشاحنه من الورا واول مافتح باب الحامله شبح السلاح لمش مرخص ورجع نظره لـ صاحب الشاحنه وهوا يسمع في صوت سيارات الشرطه لحاوطو المكان......
.
.
.
حول جبـار عيونه من القاسي لمتكي علي لعشب وهوا يدخن وسارح في السماء وشبح لعمر لمقعمز في الكرسي لجنبه وقال :يضحك هـ القاسي
بتسم جبـار :وراجل
هز عمر راسه :راجل كان حد زيه وبدات واحد يحب لفلوس ويعبدهم عباده زي القاسي ره طلب لـ يبيه وباعنا
جبـار:ها حصل من ورانا مليونين حتي هوا مش هين
ضحك عمر وهز راسه :دكي الكلب
رجع جبـار تلفت شبح للقاسي وبعدها ولا وشبح لـ عمر وقال :ها ماتبيش تقول شني لصاير بينك وبين جلال ومحمود
تغيرت ملامح عمر لضيق عيونه وتلفت شبح لـ جبـار :محمود شافني اني وهنيده في دار لخزين وفهم غلط
ضيق جبار عيونه:ها فهم غلط ولا تبي تفهمني فهم غلط
عمر تنهد ورجع تكي راسيه علي الكرسي:مع بعضه وعمي جي وشبحه وهوا يتعنتر وشد البنت اللي مايعلم بـ حالها غير ربي وكله من تحت راس الكلب المستارضي
جبـار :من الكلب فيكم لشد ولد عمه مع اخته ولا ها
شبح عمر لـ جبـار وقال بغضب ونار طالع من عيونه :الكلب والوهمي اللي باع ولد عمه علي خاطر فلوس وسلطه
ضيق جبـار عيونه :والقصد ها
خدي عمر نفس ومسح علي لحيته بـ يده وقال وهوا يشبح قدامه :محمود هوا لضربني بـ السلاح يومها
رفع جبـار يده وشد في الدومان وزاد تلفت لـ عمر لشبحله وكمل :الكلب باعني وباعك ومش بعيد حتي هوا ورا السم
قعد جبـار يدكر يومها لما شاف محمود (....:الكلب هرب
ضيق جبـار عيونه وقال :ها شن كنت ادير غادي
زمط محمود ريقه بـ توتر وهوا يتلفت للورا ورجع تلفت لجبـار وقال :كنت جاي من باب الخلفي مشي سمعت صوت السلاح وشباب يتجارو جيت مشي لحقتهم طول
قعد جبـار يشبحله بصمت لتواني خلت محمود يعرق وهوا يرجع يقول :هيا غر نمشو نشوفو عمر)
خبط جبـار يده في الدومان ورجله علي ارضيه السياره وعيط :الـ..... ورب العزه ورب الجلاله كان ماربيته
عمر رفع راسه لـ القاسي لتلفت طول يشبح لـ جبـار لنزل من السياره وهوا يخبط فيها بـ رجله وشاد راسه بين يديه ويتمتم .
قرب منه القاسي المستغرب وقال :تي شن صاير
نزل عمر جري وقال :شي شي
وقبل مايزيد القاسي يتكلم ويسأل وصلو سيارات لخلو الشباب يوقفو وهما يحاوطوفي المكان .
عمر طبطب علي كتف جبـار وقال :في الحوش نتفاهمو في الحوش غر خلينا نكملو لـ بديناه
فك جبـار يد عمر من علي كتفه ومشي ورا القاسي لقرب من الشرطي لـ لابس البدله العسكريه وهوا يأشر لشباب لـ درسو الشاحنات السلاح وقرب يسلم علي القاسي وجبـار بـ بتسامة .....
.
.
.
وقفت اكرام :حي الساعه 3 الفجر نوضي انتي وياها هيا
الاء:لا برو اني بنبات هني
آيه :لالا اني بروح خلاص عيوني بـ يتسكرو هي تصبحو
نور :تصبحو علي خير
آيه:باش غدوه تجي تشوفي الخطابه مانوصيك
دفتها اكرام : اطلعي اطلعي
ضحكت نور :من عيوني ياآيه
ضحكت آيه وطلعت هيا واكرام وخلو نور لرجعت تلفتت لـ الاء وقالت :هي تصبحي حتي اني بنرقد خلاص
وكيف بتوقف نور شدتها الاء من يدها ، رجعت نور تلفتتلها بـ بتسامه :نعم
الاء رفعت حاجبها :شن تحسابي روحك انتي
تلاشت الابتسامه من مبسم نور لضيقت عيونها :مافهمتش شن تقصدي
الاء زادت ضغظت علي يد نور وقالت بـ غل وحقد باينات في عيونها :علي فكره اني وجبـار كنا نحبو بعض وبنتزوجو لكن انتي خربتي كل شي بينا وكسرتيلي قلبي
رفعت نور حاجبها وفكت يدها من الاء وقالت :لا كسرتلك قلبك لاعقلك لو الود ودي ره لا خديته ولا جيت هني بكل
ووقفت وكملت كلامها وهيا مرتكزه بـ نظرها علي الاء:وبرو تزوجو الله اليوم المبارك اللي بتفكيه من عليا هوا وجرمه ومشاكله و وجهه المقرف
وطلعت قربعت الباب وخلت الاء اللي حدفت لمخده علي الباب بـ غل وكره .
اما نور فـ ركبت لدار وهيا تسب وتلعن في الكل من دون استتناء حتي روحها ، حست بـ شي داخلها تحرك من كلام الاء علي جبـار شي يضايق انه لـ لحظه حست انها هيا الوحيده اللي قريبه منه هيا الوحيده القادره تتكلم معاه نوعا ما بـ رياحيه ، هيا الوحيده اللي خشت داره وسكنت بين ممتلكاته ودكرياته ، وغمظت عيونها وهيا تسكر في الباب وتسند في روحها عليه وفي خاطرها ، نحساب روحي اول وحده يقرب منها وترقد في حضنه اول وحده يبوسها ههههه تريته لاعب مع الكل واهي اول العرض الاء .
وفتحت عيونها وتلفتت قربت من شنطتها وطلعت توتتها بـ غيظ وغضب مش فاهماته من شن من الاء اللي حاسدتها علي شي هيا اصلا ماتبيشي ، او من نفسها ومن احساسها اللي يأنب في ضميرها بـ قوه .
خدت نور نفسها وطلعاته وقالت :خلاص نور خلاص تفكير
بدلت حوايجها وخشت لـ سرير وهيا تتغطي بـ اليرغان وتشم في ريحته وتسمع في همساته لجو علي مسمعها (....: انا مش هكي انا مش مغتصب زيهم انا مش زيهم  ،  ....: انا اسف سامحيني اسف ، ....:وراسك ها وراسك نعودو نتزوجو من اول وجديد وشن فيها ، ...:انتي مرتي ها ، ...:اششش اقعدي ها ومش مدايرلك شي مغير اقعدي هكي بس ، ...::لما تخافي عليا بجد الجد ها وقتها نقولك وين ماشي يامرتي)
زادت نور حضنت اليرغان وهمست :مجرم
خداها النوم بـ ضيق ،  النوم اللي ياخد الواحد بس من الواقع ويرقده في الافكار في الاحذات لصارتله ، النوم اللي يبنج جسمك بس يخليلك عقلك اللي يقعد يخدم بـ تفكير وتحليل لدرجه تحس روحك تاااعب تحس روحك تخدم مش راقد .
وهيا بين نوم و وعي حست بـ الباب الدار لنفتح ، بـ خطوات بـ حوسه في الدار ، حاولت تفتح عيونها بس ماقدرتش بسبب التعب لحاسه بيه تعب ونعس سيطر عليها خلاها تحس بسكون للحظات قبل ماتحس بـ حضن لـ لحظه في احلامها اللي مليانه افكار وعراك مع نفسها وضميرها وعقلها وقلبها تمناته ، حست بـ ريحته بـ يديه للتفت حولينها وقربتها ليه هلباااا بـ تنفسه علي رقبتها لبعد شعرها من عليها وهوا يهمس :راقده
حاولت نور تفتح عيونها وطلع صوتها لبعد جهد طلع بنعس :حول
جبـار :نحول
نور تململت بين يديه :هممم اي
جبـار زاد قرب وحط خده علي خدها وردد : ها نحول
ماعاش قدرت نور تتكلم وعطت ردت فعل صادقه بهزه بـ راسها بـ معني لا وهيا تزيد تقرب في روحها منه لين خلت جبـار يبتسم وهوا يغمظ في عيونه بـ تفكير في اللي صار معاه ، عكس نور اللي كل افكارها كل ثورت قلبها وعقلها وضميرها هدت والراحه لتسللت لكل خليه فيها بـ حضنه لخلاها ترقد وهيا حاسه بـ الأمان لاول مره بعد تلاته شهور طواااال في هدا المكان .
.
.
.
#(للبــ 18ــارت)ـــع
#اليـَاقُــوت
________________________________
بداء كتابة الرواية في تاريخ 20 / فبــــ2ٰــــراير / 2020
تم انهاء كتابة الرواية في تاريخ 31 / مــــ5ـــايو / 2020