_
_
عشـَق فـي بِـلاد حُـروُبِـها لا تنتهــي 3
{ #جبــــار }
.
.
في الحلقة السابقة
وسكر منها ورجع شبح لمحمود لقرب منه وهوا يتمتم بغيظ وباين عليه انه متعصب:كان ماوريته من محمود الكلب هدا يحساب روحه كان هوا لكبير معناها هوا الكل في الكل وهوا عقاب واحد يستقوا علي الضعاف ومجرم
مؤيد ضيق عيونه :تي خيرك شن صاير
محمود:هدا ولد عمك لكبير لمداير روحه جبـار علي الكل وهوا عقاب كلب كان ماوريته علي معاملته الكلبه معاي سكتت هلبا يعيط عليا قدام الشباب نسكت يطيح في كلمتي نسكت لكن يحسسني اني اقل منه واني ليا اللي ليه لا
مؤيد:نقص صوتك انت ماتوبش ولا شن عارف كويس جبـار مايقدره حد ماطحتش راسك في راسه وهوا ادرا بالي يدير فيه
محمود ضحك :هههه اي مه كلكم تحبو تكونو كلاب تحته تحبو سطوته زي ماعمامي وبوي كانو يحبو سطوت جدي عليهم لين قعدو صغار ماعندهم كلمه حتي علي لكلاب
ومشي وخلا مؤيد ينفخ:هدا بجيب اخرته بـ يديه
قراءة ممتعة 💛
البـــ{الــخامس}ــــارت
.
.
فتحـت نور عيونها وهيا تشبح حولينها لدار ، خدت نفس وهيا تمسح بيداها علي وجها و وقفت بشويه وهيا تقرب علي قزاز البلكونه وتسمع في صوت أذان المغرب ، غمضت عيونها مع دموعها لنزلو ، وتمتمت بهمس:حسبي الله ونعم الوكيل حسبي الله فيهم كلهم
وفتحت عيونها وهيا تشبح فيه واقف علي الشباب لقدام الباب ، زادت رفعت روحها علي روس صوابعها وهيا تشبحله كيف يتكلم مع الشباب والسلاح في يده واول ماحست انه شبحها وخرت وهيا تتلفت تشبح لدار وقربت من الباب وهيا تجرب كان مفتوح ولا لا بس كان مسكر ضرباته برجلها وتلفتت لدولاب فتحاته وهيا ادور بين حوايجه وتمنكت :اوووف اووف علي شن ندور اني علي شن
وسكرت الباب بالقوه و بعصبيه وهيا تفك في وشاحها الملفوف علي رقبتها وهوا خانقها وتنهدت :ياربي طلعني من هني
وقربت من السرير وقعمزت عليه وهيا تشم في ريحته عليه تلفتت للكمادينو لفتحت اول قجر ونخلعت بالسلاح لي فيه ورجعت سكرت لقجر طول وهيا تخبط عليه :مجرم
وطبست فتحت القجر التاني لكان فاضي ومافيشي غير صوره مقلوبه ، خدتها وهيا تقرا في لكلام المكتوب عليها (ستاحشتك هلبا يا أمي )
ضيقت عيونها وقلبت الصوره لكانت صورة مرأة حلوه والطيبه امبينه ببتسامتها وعيونها ، قعدت نور تشبحلها لين حست بصوت لمفاتيح علي الباب ردتها في مكانها وسكرت لقجر وتلفتت لجبـار لفتح ضي وشبحلها كيف مقعمزه وتشبحله بهدوء وشعرها مفتوح عليها ، سكر الباب وقعد واقف يشبحلها كيف نزلت عيونها ووقفت وهيا ترجع في شعرها القسطلي ورا ظهرها لقعد مركز عليه وعلي حركاتها وعلي عيونها الحمر وعلي شفايفها اول ماوقفت قدامه بمسافه وقالت :خليني نطلع
حول جبار من علي الباب وخلاها تقرب منه وقبل ماتطلع شد يدها لين نور تلفتتله وهيا اضيق في عيونها وقال :البسي علي راسك
فكت نور يدها منه بعنف وولت خدت وشاحها من علي الكرسي ولبساته ورجع صوته وقفها قبل ماتطلع وهوا يقول قبل مايخش للحمام :ها و ال12 نلقاك هنا
طلعت نور وسكرت الباب بالقوه ونزلت .
.
.
.
ضحكت هنيده من عيونها وهيا شاده القطوسه بين يداها وتلعب فيها :يالوحي يالوحي محلا عويناتك وخشيماتك واه عليا تنزرطي زرط بـ برغوتاتك
فتحت اكرام الروشن وقالت :ايه كان تشدك فوزيه تو تزرطك انتي ب وسخك تي نوضي طلعاها وخلاها تمشي والله كان تشوفك نهارك لدوري فيه
الاء قربت قعمزت جنبها وهيا تمسح عليها وتشبح لأية لمقمزه فوق رخامة المظبخ خايفه منها :طلعوها طالعوها تو تنشر الجرتيم ناقصنا حني
هنيده تلفتتلها :انبحي انتي الجرتومه انتلفي من هني كانك خايفه منها اني مش ح نفرط فيها ياسر قتلتولي نوسه انتم ومرت جدكم المجرمه
نفخت أية وهيا تتلفت واول ماشافت نور نازله من فوق نزلت من فوق الرخامه وقالت :نور
تلفتو كلهم وطلعو لحقوها لدار ماعادا هنيده لوقفت حطت القطوسه في سنطوق لصنعتهولها وصبتلها حليب ودخلتها تحت الطاوله ، و وقفت وهيا بتسكر الروشن بس وقفها صوت خوها محمود لكان يدوي في التليفون :عمر يده الايمين ونفسه بزبط بترتاح من جبـار ح يطلعلك عمر فـ الاحسن تتفكا منهم هما الزوز وتكمل عليهم صحبتهم وتبعتهم لربي مع بعضهم
حطت هنيده يدها علي فمها ، وزادت ردت الروشن اول ماحست انه تلفت نزلت لوطه بخوف وهيا ترعش مع بعضها.
عمر :شن اديري
تلفتت هنيده لباب المظبخ ورفعت عيونها فيه طول وهيا حاسه قلبها قريب وقف لما سمعت صوته ووقفت من غير ماتركز علي فردت الروشن لفوقها وينضرب راسها فيه بالقوه مع عيطتها وهيا تشد في راسها .
قرب عمر منها بسرعه وشد يداها لي علي راسها :مافيكش عقل انتي قريب كسرتي راسك
قعدت هنيده مغمظه عيونها بالقوه وتنقنق بوجع :في دم وله في دم اااه راسي راسي
جو لبنات يجرو وهما يشوفو في عمر لشاد راس هنيده لتبكي وتنقنق في نفس الوقت .
قربت اكرام بستغرام :شن فيه
عمر :جيبي كلينكس
هنيده :دم دم وله دم اااااه لالالا ماتضغطش ماتضغطش حار حار ااااه راسي راسي
عمر :سكري فمك
سكتت هنيده وهيا تكتم في بكاها وتتحمل في ضغط عمر ليضغطلها علي مكان الضربه وياخد في لكلينكس من اكرام .
نور :ديرولها اسبيريتو
أية :تو نمشي نجيب
اكرام قربت من عمر لقعد شاد راس هنيده ويديرلها في لكلينكس لتعبه دم من راسها وقالت :هات تو نديرهولها اني
عمر :لالا خلي
بتسمت نور لشبحت لأية لجابت السبيريتو والقطن ومدتهم لعمر ورجعت وقفت جنب نور لوشوشتها :شن فيه بينهم
تلفتتلها أية :من هما
رجعت نور شبحت لعمر ليدير في الفاشه لهنيده ومعاه اكرام ورفعت بحواجبها بمعني شوفي ، تلفتت أية وشبحتلهم وهيا اضيق في عيونها وتركز في معاملت خوها لهنيده
.
.
.
سكر مؤيد باب الدار ورد علي تليفونه ببتسامه :ايوه ياعمري
بتسمت نسرين :ستاااحشتك هههه
ضحك مؤيد :واني اكتر والله
نسرين :ياريت نقدر نشوفك زي قبل ماكناش نستاحشو في بعض هكي
مؤيد:الجو تعكر بعد
وسكت شوي وكمل :بعد ماعمك قتل عمي
نسرين :وبعد ماجبار قتل بشير ولد عمي زاد الطين بله نسمع في عمي يتوعدله وانه بيقتله
مؤيد :كل واحد يقول بيقتل التاني وحني بنقعدو في التارات والدم وحاله ملخبطه
نسرين تنهدت :مؤيد
مؤيد :نعم ياقلبي
نسرين :لا عيلتي ولا عيلتك ح يقبلو ناخدو بعض
سكت مؤيد وماعرفش شن يرد عليها ونسرين كملت بعبره وضحت في صوتها :اني مستحيل ناخد غيرك اني نبيك انت وبس
مؤيد :يحلها ربي بعدين ، يحلها ربي
نزلت نسرين التليفون لوطه طول اول مانفتح عليها الباب وخشت اختها :نسرين ماما قتلك تعالي تعشي
نسرين :باه بري تو نجي
مشت اختها وهيا ردت علي مؤيد :حبيبي ماما تنادي لازم نسكر
مؤيد :تمام ياعمري
.
.
لـا أذكـر مــا الذي أصــابني حينـها ، كـل مـاأذكره بأن تخللني احساس لعين انعش قلبي الميت 🥀
.
.
أنت تقرأ
عشق في بلاد حروبها لا تنتهي 3 (جبار)
Actionلا تُحــدتَّني عن العشــق ، فَـ أنا في بِــلاد فـي إِحدا بُنُــود دستُــرِها حرمته🤚🏻💔 . روايــة عشـق في بـلاد حُروُبـها لا تنتــهي تعود بـ جزئها الثـ( 3 )ـالت ، وبـ محتوه قـوي ، و بـ قـصـة عشق حقيقيه من واقعـنا المألم 💛 #كتابة_الياقوت
