عشق في بلاد حروبها لا تنتهي 3 (جبار)

البـــ{الــثامن}ـــارت

_
_
عشـَق فـي بِـلاد حُـروُبِـها لا تنتهــي 3
{ #جبــــار }
.
.
في الحلقة السابقة
اكرام:اني بروح سيبت سواري بوي وعمر ماحدتهمش
هزت نور راسها ووقفت مع اكرام لروحت ، ونور ركبت لدار وهيا تلود بملل فيها ، قعمزت علي الكرسي وقعدت تفتش في التليفون لكان فاضي ومافيشي إلا ارقام ومش مسجلات ، حطاته علي الكرسي وناضت قربت من الدولاب لفتحاته وقعمزت قدامه وطلعت الصندوق وهيا اطلع في الصور وتتفرج ببتسامه :محلاه لما كان صغير
وضيقت عيونها برفعت حاجب:مش زي توا شرير يبان
طاحت من بين يداها صوره علي الارض ونقلبت علي قفاها ، ضيقت نور عيونها وهيا تقيم في الصورة وتقرا في الاسم لمكتوب من ورا :صهيب
رفعت حاجبها وهيا تردد في الاسم :صهيب
ضيقت عيونها وهيا تحط في الصور علي الارض وطلعت الزرف لوراقي وهيا اطلع في وحده من صحايفه وتقرا في اسمه لي اول مره :صهيب المهدي المختار

قراءة ممتعة 💛
البـــ{الــثامن}ـــارت
.
.
مســحتُ بـ أطراف الــوجع مدامِعـي ، علي فُــراق حـبيب القلـب الرَاحِـيلـي 🍂💔
.
.
خش جبـار لدار وعيونه ادور عليها ، سكر الباب الدار وتلفت شبح لدار كلها مستغرب من الهدوء لا عند شبح لسرير ، قرب وهوا يشبح فيها راقده براحه وشعرها فارداته علي لمخده وراها وضامه  روحها بـ يداها وكـ انها صقعانه ، لف لعندها وشد حاشية اليرغان وكان بـ غطيها بس ضيق عيونه ورد اليرغان لمكانه وتلفت من غير مايغطيها ، خدي حوايجه وخش للحمام وقربع الباب بالقصد لخلا نور تنخلع وتفتح عيونها .
ناضت قعمزت وهيا تحك في عيونها :دوق دوق هارب طالع زوده عنده
ونفخت وناضت وقفت وهيا حاسه روحها صقعانه قربت من شنطتها لرجعت فيها كل حوايجها بعد تهديده وفتحت طلعت شالها لطاح منه صوره ، لفت نور روحها بالشال وقامت الصوره لخدتها ووقفت ومشت قعمزت قدام قزاز البلكونه .
نزلو دموعها وهيا تشبح لصوره وتمشي عليها بصبعها :ستاحشتك ، ستاحشتك هلبا
وغمطت عيونها وهيا تدكر """ نفخت بالقوه وهيا تشبح لرنيم لجنبها وترجع تنفخ وتعاود بغيظ واول مارفعت عيونها لزحمه ولي الناس المحتفله بـ 17 فبراير جو عيونها في عيونه لماعاش حولهم منها ، ضيقت عيونها بشر وعصبيه لين خلاته يبتسم ، وهيا تقطع في اتصال عيونهم وتتلفت لرنيم ونخصتها : خيرك جبتينا هني
تلفتتلها رنيم وقالت:شوفي غادي فيه ولد لابس اسود وشاد طاقيه في يده
تلفتت نور وشبحت لرعد اللي اول ماشافاته زمطت ريقها وترجع تشبح لرائد لقعد يشبحلها وقالت : بسم الله الرحمن الرحيم الولد قرينه واقف وراه ومن امبكري يشبحلي ويبتسملي اعود بالله من الشطان اعود بالله من الشطان
رنيم:تي قوين شن ، شن تخوطي انتي
وتلفتت رنيم شبحت لرعد واول ماركزت في رائد لواقف وراه فتحت عيونها بصدمه ووخرت شدت في يد نور لقعده تشبح لرائد لخبط رعد بمرفق يده علي بطنه وشبحلها ببتسامه وغمزلها لين نور شهقت وهيا تشبح فيه يضحك ويتلفت يمشي وخلاها تتلفت لرنيم وتصيح بـ صوت عالي :غمزلي غمزلي القرين غمزلي """ خشت لدار وهيا تصيح : تي تعالي حناي تسأل عليك
وردت الباب وخشت وهيا تشبح في رنيم لتتكلم في التليفون وقالت :شوي بس
ضيقت نور عيونها وهيا تشبح لرنيم لوقفت قربت منها:هوا نفسه وله متع التليفون تفوه وماقلتيليش ياكلبه
رنيم:غر اسكتي تو اسمعي نقولك حاجه لكن اني مش واضيه عليها بكل
نور:شن هيا ان شاءالله بتهربي معاه امالا والله نتوقعها منك اديري مكبر
رنيم:مصح وجهك ياتافها ، لا خوه يبي يكلمك
فتحت نور عيونها:خو من
رنيم:تي لمبكوي شبحتيه وقعدتي تقولي قوينه هههه قصدي من غيو ضحك تبيش انتي وله
نور:اكيد لا
رنيم:ايوه هكي نبيك اني فكك من سويب لولاد
سكتت نور شوي وشبحت لرنيم لبتسمت براحه وهيا كيف بتتلفت بس وقفتها نور وقالت بخبت:اي اي حلال عليك وحرام عليا ياقرده يامسخه فكيني من سريب لولاد لكن انتي مافكيكش تعالي جاي نبي نكلمه هي زيني زيك
رنيم:حماوة ماتعوفيشي كيف بتكلميه
نور:علي اساس انتي تعرفي كويس سبع البرمبه مه وبعدين اني مش زيك بنكلمه كلمتين وقص مش انتي طول اليوم كركر معاه
شدت رنيم علي قبضة يدها علي نور لقلبت عيونها واشرتلها بيدها بـ معني هيا هيا ، تلفتت رنيم ورفعت التليفون وحولت الكتم وهيا ترد علي رعد :ايوه
رعد:ساعتين انم تقول جاي بيتزوجها
نفخت رنيم:متزيدهاش حتي انت وعطيه التليفون وقوله ووبي ووبي هي كان يحتومش نفسه ويتكلم زين مع اختي لما نطوبقله وقبته بين عشوين
بتسم رعد علي كلامها:حاضو حاضو ههههه
قلبت رنيم عيونها ببتسامه فيسع ماحولتها اول ماشبحت لـ نور لتشبحلها وهيا رافعه حواجبها ، نفخت رنيم ومدتلها التليفون ، خدت نور التليفون وقعمزت علي المندار وتربعت وهيا تشبح لرنيم لجت قعمزت جنبها وقالت :حطي في الودن هدي باش نسمع
نور:بري روحي مافيش
فنصت رنيم:والله ناخده
نور:والله نفضحك
ضربتها رنيم علي راسها ووقفت بغل وخلت نور تحط في التليفون علي ودنها وتسمع في صوت رائد:الو
نور حست روحها فجأة تحشمت وتلبكت:ايوه
بتسم رائد طول:اهلين بنور العين
نور:تحشم
ضحك رائد:بسم الله قعدين في البداية هههه اسف ياودي شن الجو ها
نور بتسمت مع ضحكته وقالت وهيا تتحمحم ودير في روحها رزينه:الحمدالله ها شن تبيني قالولي ، تفضل شن تبي
رائد توتر وقعد يقول:ااااا هوا شن ااااا يعني
وبعدها تنهد:وترتيني ازح ههههه شن شن نبي ، نبي نكلمك نبيك حبيبتي عادي
رفعت نور حواجبها:شني
رائد:واللهي انتي خشيتي تسطربي خليتيها بشويه بشويه خيرلك
نور:انت ماتتحشمش وماعندكش لا اسلوب ولا منطق شن نولي حبيبتك هدي وانت ماليكش خمس ساعات تعرفني
رائد:خيرك بشوية ماقلت شي اني ره قصدي انك عجبتيني هلبا ونبي نبداء معاك علاقة
نور:كانك تحسابني من النوع الخفيف واللي تمشي علي العمياني راك غالط وخيي وجو علاقة ورتباط مش جوي
رائد:حشاك والله ماكان قصدي هكي ورب العزه كل لقلتيه ماخطر في بالي يابنت الناس خيرك انتي تفهمي بالمقلوب ، اني نبي نتعرف عليك بس
نور:واني مانبيش ومنبيش نجرب لا علاقة لا سو
رائد:ومن قالك اني نبي نجرب اني نبي بجديات ومن الاول نبيها علاقة دايما
نور:ايااه علينا دوة متكررة لكم بنت قلتها قبلي
رائد:لحنان وفتحيه وسلمي وسلوي واحلام ورنده وريحان
ومقصش عليه الا لما نور شهقت لين خلاته يضحك ويتكلم بسرعة:ههههه وربي نبصر عليك ههههه
نور:بجديات هدو كلهم كلمتهم
رائد:تحسابيني ماعندي شغلا لا عملة امالا هههه
نور بتسمت:عادي يطلع منكم اكبر من هكي ياودي
رائد:ههه حرام عليك شن اسم الكريم
نور بتسمت وقالت:نور """ ضيقت عيونها وقالت :ستني شوي بس
وطت التليفون لوطه ومن توترها نست ومادرتش كتم وقالت لرنيم لمقعمزه جنبها وهيا تهز في رجلها بغيط وقالتلها بتوشويش:رنيم قالي اعطيني رقمك
شبحتلها رنيم وفنصت فيها:لا وقمك لا
ضيقتلها نور عيونها:وشن معنى انتي عطيتي لخوه رقمك
رنيم خدت نفس وهيا ماتبيش تصيح:انتي تعوفي كويس كيف خدي وقمي
نور رفعت كتافها:زي بعضه بنعطيه
قربت رنيم منها وكانت بتفك منها التليفون بس نور بعدت يدها لشاده بيها التليفون وقالت:والله نفضحك قدام خالتي وحناي اليوم ومن غير فضيحتك في الحوش ح تكون بكلاكل
شدت رنيم علي قبضات يديها وعيطت وخبطت رجليها علي الارض وطلعت وقربعت الباب وراها لين نور نخلعت ، رفعت كتافها بعدم اهتمام وردت علي رائد ليضحك وقالت :خيرك تضحك
رائد:ههههه لا شي المهم شن صار في الرقم
نور:تو نبعتهولك في رسالة
رائد:توا لانه رعد بدي يولع ،  شوي ويهجم عليا هههه
نور بتسمت:هههه شكله غريب زي اسمه
رائد:بضبط """ شدت التليفون وهيا متوتره وفي خاطرها تتصل ، ونفخت ورجعت خصلتها ورا ودنها ورصت علي اتصال ومن تاني تشرينه رد وهيا تسمع في صوته الممزوج بضحكته لتهبل : وحق الله كيف كنت نفكر فيك
بتسمت نور بفرح ممزوج بخجل وقالت وهيا تتحمحم:شكرا
رائد:ههههه شن شكرا هههه تهبلي لما تتحشمي ماعاش تعرفي شن تقولي
نور:اوووف رائد اسكت باهي ياربي شن برد عليك باهي
رائد:هههه ، اممم متلا قولي واللهي حتي اني كنت نفكر فيك
نور سكتت وماعاش عرفت شن ترد بكل لين خلت رائد يضحك:هههه تمام تعالي خلاص نبصر مانبيها منك ياسر اني نفكر فيك
نور:اممم اي ياسر وخلاص ماعاش تحشمني
رائد:هههه باهي اخر مرة معقوله ماتفكريش فيا بكل
نور مسحت علي خدها وبتسمت:لا
رائد:بكل بكل
نور:لا مش بكل بكل
رائد بتسم :شوي بكل
نور:لا شوية هلباا
رائد:ههههههه قوية انتي وتهبلي وتنزرطي زرط تعرفي وله
نور:اي نعرف هههه
وسكتت نور شوي وقالت وهيا تتحمحم:وحتي انت
رائد رفع حاجبه وركز معاها:وحتي اني شن
نور:قصدي هكي زي ماقتلي
رائد:وشن قتلك
نور:انه نهبل وننزرط زرط حتي انت هكي
رائد:اي شن حتي اني
نور نفخت:وااااك قصدي حت انت تهبل هلبا وتنزرط زرط
رائد:هههه خشييييي
نور:اوووف يابارد انت بالعاني ادير هكي وله
رائد ضحك:ههههه ياحليلي اني وخلاااص علي المتحشمات تي اني من الاخير بديت نحبك يافرخه ره
رفعت نور حواجبها وقعدت تضحك معاه وهيا متحشمه هلبااااا منه """ فتحت الخط ورت :الو
رائد:شن وصلتو
نور بتسمت:اي
رائد:اسمعي نبي نهدرز معاك وجه لوجه ره
نور:هدا ماناقص تبي خالتي تقرضني
رائد:لالا ماديرلك شي اني نكلمها
نور:عينك من بعيد ره من توا قتلك
رائد:باهي باهي غر هيا
نور:باهي غر نشوف رنيم ونتصل بيك
رائد:تمام
سكرت نور من رائد و شبحت لرنيم لطلع في تليفونها لشرين من شنطتها وتقرب منها.
رنيم:خالتي بتمشي ادير تحليل في المستوصف قتلي نلقاكم في محل ###
نور:باهي تعالي نمشو بسرعة باش نمشو المحل
هزت رنيم راسها وهيا ترد علي تليفونها وخلت نور لواقفه جنبها وهيا مبتسمه ومتحمسه لشوف رائد بس نخلعت من صوت صياح رنيم لصيحت بعصبيه : ونبي مش بكيفك تعالي جنب اوبع شواوع وخليك انت وخوك في طويق هديكا وحني هني وتم موضوع
رعد:اخرطي هي تعالي اراجي فيك
رنيم:لااا
رعد:قسما عظما ماتجي لما نجي نقلبها فوق راسك قدام خالتك ونحشمك ياقرجه
عيطت رنيم وسكرت عليه التليفون وهيا تتلفت لنور لسئلت وهيا مستغربه:خيركم
رنيم:قدامي من غيو ولا حوف
مشت نور قدامها وهيا تنفخ وتشبح لسماء لتمطر وجو لمصقع لخلاها تسرع خطواتها وتخش تحت مطلات المحلات وهيا تشبح لنور لشاده تليفونها وقالت وهيا تمسح علي وجها من قطرات لمطر : اسمعي اني بنشري اميه باهي
هزت رنيم راسها وهيا لاهيا في تليفونها .
قصت نور الطريق وهيا تجري بسبب لمطر لتقوت ومشت لمحل الغدائيه ، خشت خدت اميه وخلصت وطلعت وقفت قدام الباب وهيا تفتح في شنطتها ودور علي تليفونها لشرين وشاده جاكتها في يدها وشكارة لمية في يد لشاده بيها الشنطه وكانت حايسه وتمتم بعصبيه وهيا غاطسه ادور في التليفون واول مانزلت خطوه لدرجة المحل جي واحد خش فيها بكل قوته لين شنطتها و شكارة لمية طاحو وهيا قريب طاحت التالي بس حست بيد لتفت علي خصرها بالقوة ، رفعت نور يداها وشدت في تشرته وهيا ترفع في عيونها لجو في عيونه .
ضحك رائد طول وهوا يرفع في يده التانية وشد بيها يدها لشاده بيها تيشرته وبعد وهوا يحول في يده التانيه من علي خصرها وقال:احلي موعد في العالم كله
ضحكت نور بخجل ولخبطه :اني اســفه هوا ماشـ ـفتكش
رائد غمزلها:واني مش اسف شن رايك نعاودوها الخبطه
زادت ضحكت نور لحطت يدها علي وجها لين خلت رائد يزمط ريقه من حلاوتها ونزل وهوا قعد شاد يدها بيده وقام بيده التانية شنطتها وشكارة لميه ورجع وقف وعطاهولها:ماعاش توقفي فم البيبان مرة تانية
خدت نور منه الشنطه والشكارة وهيا تبي تفك يدها منه بس زاد رائد ضغط عليها ومنعها تاخدها لين نور ضيقت عيونها وهيا حاسه بخجل وتوترة:حول عيب الناس
رائد بتسم وطلق يدها وهوا يمسح علي شعره ورجع شبحلها كيف طلعت تليفونها وردت علي رنيم:ايوا
رنيم:تي وينك
نور زمطت ريقها ولكلام هرب من كتر توترها من نظرات رائد لنتبه علي توترها وقال:هههه خلاص ادوي علي راحتك تو نتلفت للجيها التانية
ضحكت نور:اي تلفت
تلفت رائد بضحكه ونور ردت علي رنيم لتصيح:تي باهي اهو جايه للمحل
رنيم:توااا توااا
سكرت نور وهيا تتحمحم:رنيم تستني فيا باي توا
شبحلها رائد ورفع حواجبه:مزال خليك
نور:مانقدرش خالتي تو تركز علي غيابي
هز رائد راسه وبتسم:فرحت هلبااا بشوفتك
بتسمت نور وطبست راسها وهيا تتلفت تمشي وبكل خطوة تبعد فيها عليه كانت تتلفتله وتشبحله كيف مركز فيها وماحولش عيونه منها بكل لين ختفت علي انظارة """بتسمت نور :ستني شوي نخش ادار
رائد :هيا مش قادر نصبر خلاص خلاص
ضحكت نور لطلعت من المظبخ ومشت لدار لاول مافتحت بابها شافت رنيم طايحه علي الارض وتبكي قربت منها طول بفزع وخوف وهيا تنزل في تليفونها وتخلي في رائد علي الخط...
نور:رنيم خيرك شن فيك
تلفتت رنيم لنور وحضنتها طول وهيا تبكي بـ عبرتها لين خلت نور تخاف وهيا تبعد فيها شوي وتمسحلها في دموعها :ستني نرد علي رائد ونفهم شن....
قصت رنيم علي كلام نور وهيا تفك منها في التليفون طول وترد علي رائد:سيبونا في حالنا انت وخوك وماعاش تتصلو بينا فاهم ماعاش تكلم اختي ياحقيو زيك زي خوك الكلب
وسكرت التليفون في وجهه وهيا تشبح لنور لضيقت عيونها وقالت بعصبيه:تي خيرك درتي هكي اه خيرك مش كان متعاركه مع رعد معناها اني ماعاش نكلم رائد
رنيم:غبيه انتي غبيه
وخدتها العبرة مع دموعها لمابطلوش نزول مع وجع قلبها وكملت:غبيه زي اختك هادم تجاو مخدوات
فتحت نور عيونها وقالت:كيف """ غمت راسها باليرغان وهيا تبكي بعبرتها وتسمع في رنيم لجنبها تدوي في التليفون بـ عصبيه وبـ عبره تحاول تكتمها وباين انها تدوي مع رعد تلفتت نور لجيها التانيه وحطتت يداها علي ودانها وهيا تحاول ماعاش تسمع صوت تليفونها لشرين باش ماتضعفش وترد عليه ، قعدت تبكي بقهر بخيبث امل لين حست رنيم طلعت وصوت تليفونها قعد يشرين ، حولت اليرغان وقعمزت وهيا تاخد في التليفون ، وقعدت تشبحله لدقايق من بين دموعها وصوت بكاها لكتماته وهيا تاخد نفس وتمسح في دموعها وتفتح في الخط وهيا تحط في التليفون علي ودنها وتسمع في صوته :نور
.
.
.
#يتبــ(للبـــ9ــارت)ـــع
#اليـَاقُــوت

________________________________
بداء كتابة الرواية في تاريخ 20 / فبــــ2ٰــــراير / 2020
تم انهاء كتابة الرواية في تاريخ 31 / مــــ5ـــايو / 2020