_
_
عشـَق فـي بِـلاد حُـروُبِـها لا تنتهــي 3
{ #جبــــار }
.
.
في الحلقة السابقة
زادت نور قربت منه وحطت راسها علي صدره وهمست :صهيب
جبـار :ها
نور غمظت عيونها وهمست بـ نعس:نحبك
بتسم جبـار وغمظ عيونه مع احساس غريب حسه بـ كلمتها لقالتها وخلت قلبه ينمل وكأنه تلج يلذع فيه وفي نفس الوقت نار تحرق ، خلاه ياخد نفس كبير ويطلعه بـ راحه حسها وهيا في حضنه لزاد ضغظ بـ يديه ودخلها تحته .
قراءة ممتعة 💛
البـــ{الـــتالث والــعشرين}ـــارت
.
.
لمــس قلبـي ذاك الشعُـــور فـ أذمنـه 💛
.
.
تــاني يوم الصبح ...
حطت هنيده صفرة لفطور قدام بوها وقعمزت وهيا مبتسمه ، صبتله طاسة شاهي ومدتهاله وقالت :درتلك عجه لتحبها
صب جلال طاسه لـ روحه وخداها وسيب هنيده لقعده مادتله طاسة الشاهي وهيا اضيق في عيونها وتنزل في يدها وحطت الطاسه لوطه وتلفتت لـ امها لقعمزت ودارتلها حركه بـ يدها بـ معني تحملي .
تنهدت هنيده ورجعت شبحت لـ بوها لشبح لـ امها لقالت :تبي نديرلك نص بـ العجه
جلال :لا ماعاش نحبها
شدت هنيده نفسها مع عبرتها ، ووقفت بـ هدوء وقالت :صحه كملو ونادوني نرفع الصفره
وتلفتت مشت لدارها لسكرتها وهيا تتكي علي الباب وتخلي في دموعها ينزلو بـ ستسلام ، بـوجع قلب علي معاملة بوها ، علي معاملته اللي تحقر فيها ، وتخليها تلوم نفسها علي شي هيا مادارتاش بس حملها مسؤوليته لانه ماعنده خيار تاني .
رفعت هنيده راسها اول ماطق عليها الروشن ، مسحت دموعها بسرعه وقربت ركبت علي السرير وفتحت الروشن اللي اول ماشافت عمر شدت في حديد الحمايه وقالت :عمر
ضيق عمر عيونه ودخل يده بين لحديد ومسح دمعه سايله علي خدها :خيرك
هنيده قلبت شفايفها :اني عيت من معاملة بابا تقول مش بنته
تنهد عمر:خليه فتره ويولي زي ماكان
هنيده :ليه سبعه شهور وهوا هكي لا امتي بنستني اه لمتي
عمر تكه بـ جبهته علي لحديد الحمايه :لما يشوفك خلاص بتطلعي من دمته وبتبعدي عليه تو يحس بـ روحه صدقيني مستحيل يصبر علي ليدير فيه اكتر وبدات لما يستوعب فراقك
هنيده :عرسنا سبوع الجاي وقعد ماتحركتش ولا شعره ليه ولا حسسني انه متأثر
عمر :يكابر يكابر ياقلبي وقولي ماقالها عمر قبل يوم لخميس تلقيه خاش عليك وحاضنك
نفخت هنيده :ان شاءالله
ضيق عمر عيونه بـ بتسامه :غر امتي بجي هـ الخميس بس
غمظت هنيده عيونها وضحكت لين خلت عمر يتنهد :حبيبت قلبي انتي راك
فتحت هنيده عيونها :نحبك هلبا اني
.
.
.
كريمه :واللهي قلت بالك لعب فروخ ، جو وقالونا العرس نبوه خلال شهرين وبعدين ماعاش رينا وجهم سبعه شهور ولا اكتر يخي وتو جايين يبو تلبيسه والله اني مش خاشيين خاطري الناس ، حتي اكرام ياناري نحس فيها مضايقه منهم
سليمان :الناس كان عندهم حالة وفاة ، شن تبيهم يديرو عرسهم وحناه وجده متوفين عيب كان ماساعدنا بعضنا وعذرنا بعض ماعاش يمشي شي القدام
كريمه تنهدت :ربي يرحمهم ويصبرهم
سليمان :واكرام ماتعرفش مصلحتها وقعده صغيره المفروض انتي توعيها وتوريها
كريمه :ان شاءالله
سليمان:المهم قالي العيله بجو وبلبسو الدبله سبوع الجاي والعرس الشهر لبعده ونبوه عائلي وخفيف واني مدبيا من غير دوشه وناس وزحمه ايوه بنقولهالكم من تو
كريمه :التلبيسه وقلنا باهي والعرس شن بنطلع بنيتي هكي
سليمان :وعلاش ماتطلعش شن بينقصها يد ولا رجل ، المهم الدار الباهيه مش مهم الشهره الزايده
.
.
بـ جرحي لـك ، رُوحـي تتــألم وتتمنــي المــوُت 🥀
.
.
ضيقت عيونها لـ فتحتهم بشويه بـ نعس وهيا تحس بـ يده لـ تتجول علي ملامح وجها ، وبـ بوسته لـ طبعها علي خدها مع همسه :صباح الخير
بتسمت نور ورفعت راسها شبحتله وهيا تقرب وتردله في البوسه علي خده وبعدت وقالت :صباح النور
رفع جبـار قصتها من علي عيونها مع بتسامه مرسومه علي شفايفه خلت نور ترفع يدها وتمسله شفايفه :نحب بتسامتك تعرف علاش
جبـار:ها علاش
نور :علي خاطر تبان لما تكون معاي اني وبس
لف جبـار يديه علي خصرها وقربها منه وهوا يضيق في عيونه بـ رفعت حاجب وقال :وانا مانحبش بتسامتك تعرفي علاش ها
نور قلبت شفايفها :ماك مجرم تحبني نبكي
خبط جبـار راسه في راسها بخفه :لا عشان مبينه للكل
نور ضحكت :حاضر تو نبداء اول مانطلع من الدار ندير هكي
وقرنت حواجبها ومدت شفايفها بـ ملامح متعصبه وكملت :واللي يكلمني نقوله عفوا صهيب قالي ماتبتسمي لـ حد اوك
ضحك جبـار وقلبها تحته وهوا يضغضغ فيها من بين عياطاتها:ها تتسهوكي عليا صار ها ها
زادت ضحكت نور وهيا تحاول تبعد يديه وتصيح :لالا صهيــب ههههههههههه ياماما ههههههه لا لا مش باهي لـ البيبي مرات هههه حول حول ههههههه
واول ماجبـار سمعها جابت سيرت البيبي هفت وبعد يديه من علي بطنها لـ خلا نور تستغل بعده ودفه من عليها وهيا تهرب من تحت يديه بـ ضحكه وتشد في بطنها بـ تضيقت عيون طفوليه :واااااه ضايقت البيبي
نهض جبـار روحه وقعمز وهوا يمسح علي جبهته بـ قفا يده وماردتش عليها بـ ولا حرف ، وتلفت بـ يوقف بس قربت نور وشداته من يده :صهيب
تلفتلها جبـار :ها
ضيقت نورعيونها وسكتت لـ لحظات وهيا تحاول تفهم تعبير وجهه المبهمه ، وبعدها قالت :انت ماتبيش صغار مني
خدي جبـار نفس وهوا يمسح علي لحيته ورجع رفع راسه وشبحلها كيف كملت كلامها :يعني تصرفك هداكا اليوم فهمني انك مافرحتش بكل انت ماتبيش تولي اب ماتبيش نولي ام صغارك
جبـار :ها مش لازم علي اي موضوع نعطي عليه ردت فعل
نور :بس الموضوع هدا ضروري تعطي عليه ردت فعل
جبـار وقف :الاحسن ماتعرفيش ردت فعلي ها الاحسن هكي
وقفت نورعلي ركابها وقالت بـ نفعال :قولها ماتبيشي قولها مانبيش صغار منك صح ، ماتبيشي علي خاطر مني اني
تلفتلها جبـار وعلا صوته :ها مانبيش صغار مانبيش لا منك ولا من غيرك ها فهمتي توا
وتلفت طلع من الدار وقربع الباب بالقوه لين نخلعت نور من صوت تقربيع الباب مع دموعها لـ نزلو بـ قهر وهيا تقعمز وتشد في بطنها لحضنتها بداها .
.
.
.
بعـد مرور أيـام ...
مدت اكرام يدها بـ ضيق وبدموع محبوسات بين رموشها وهيا تشبح في الخاتم لـ التبس في صبعها ، ورفعت عيونها في لمراة لبتسمت بـ فرح وهيا تقرب وتسلم عليها :مبروك عليك ربي يتمم عليكم علي خير
وبعدت اكرام من عليها وسلم علي خواته وقربت من امها لـ حضنتها .
قربت آيه من هنيده لمربعه يداها وتشبح لـ اكرام ، وهمست :اكرام شوي وتبكي
هنيده تنهدت وتلفتت لـ آيه:شوي وكان مصيري زيها
آيه ضحكت بـ هزوه :سعدودك خديتي لتحبيه ، الله وعلم شن مصيري اني والاء
وتلفتت لـ اكرام وكملت :والواضح زينا زي اكرام قطوس في شكاره
ورجعت شبحت لـ هنيده لـ دموعها نزلو ، نخصتها بـ مرفقها وقالت بـ ضحكه :ههههه وانتي ماتصدقي تنزلي دموعك تي امسحي وبلا نكد وفكري بـ غدوه ياعروسه
مسحت هنيده دموعها وضحكت :وااااك حتي الدموع تحسدي فيا عليهم
آيه:هههههه شكلنا بنبدو جو الكنه والحمي
هنيده حطت يدها علي فمها :حي محلانا هههههه
.
.
حـين أصمـت ولا أعبــر عـن مابـداخلي ، لا يعني بأني عديم الاحسـاس ، كـل مـافـي الأمـر أني شخــص ليس لديـه خبـره فـي التعبيـر عـن نفســه ومــايشعر بـه 🥀
.
.
حطت نور مخده قدام قزاز البلكونه وتلفتت خدت صونيه الكيكه والعصير وولت قعمزت وهيا تشبح لـ القطوسه لـ اول ماشافتها بتسمت وقالت :وين كنتي مدكوكه
وحطت العصير علي الارض وقعدت تاكل في الكيكه بـ صمت ، واول ماسمعت صوت الباب لـ نفتح تلفتت وهيا تشبح لـ جبـار لـ خش .
ضيقت عيونها فيه ورجعت تلفتت قدامها وقعدت تاكل وكل حواسها معاه وفي حركته في الدار .
حول جبـار جيبوطيه وحطه علي السرير وقرب قعمز عكسها وتكه علي لقزاز وهوا يشبحلها كيف تاكل بـ قرنت حواجب مبين منهم قداش ماهيا متعصبه منه ، تنهد وقال :ها حتي اليوم راقيلك
نور :الاحسن ماتتكلمش معاي
جبـار:ولا امتي
حطت نور طاست العصير لوطه بـ القوه وشبحتله :لين تتقبلني اني واللي في بطني
مسح جبـار علي جبهته :ومن قال مش متقبلكم ها من قال
نور ضيقت عيونها :انت تلعب بـ اعصابي ولا شن من اللي قبل يومين قال مايبيش صغار
جبـار :ها قلت لكن لقلته مايغير شي
نور :شن قصدك كان بـ يدك تخليني انزل البيبي
جبـار :انا ماقلتش شي
نور ضحكت بـ هزوه :لكن هدا لتبي تقوله
وعلت صوتها مع دموعها لـ نزلو وصيحت :علاش مقرب مني كان ماتبيش صغار علاش اه كان ماتبينيش علاش تتصرف معاي هكي وبطريقه مميزه علي الكل علاش كان ماتبينيش
جبدها جبـار ليه وشد يداها ورا ضهرها بـ يده قبل ماتبعده بيهم وبـ يده التانيه شدها من دقنها من بين صياحها :حول ، بعد من عليا
جبـار:من غير قظاف زايد ها ، وانتي عارفه قداش انا نبيك
هدت نور شوي وقالت :باه كان تبيني كيف ماتبيش قطعه مني
رخي جبـار يداها ودقنها ونزل راسه وهوا يزمط في ريقه لين خلا نور اضيق عيونها ورجعت رددت:علاش قولي علاش ماتبيش تكون اب
رفع جبـار راسه فيها وساواها في حضنه وشد يدها بـ يده وقال بـ نبرت صوت ضعيفه :مافيش حد مايبيش يولي اب ، الا لزيني
ورفع عيونه فيها وكمل :انا عاق بوي ها شن بتتوقعي صغاري بيطلعو ، انا مجرم ها مجرم وظالم وهلبا حاجات ومانبيش نسخه تانيه مني
نزلو دموع نور لقعدت تشبح بـ صمت كيف كمل وهوا يدخل في صوابع يده بين صوابعها : لما يسألني شن تخدم شن برد ها
ضيقت نور عيونها :وعلاش ماتقدرش ترد ، وخيرها خدمت مواد البناء
ضحك جبـار بـ هزوه ورفع يدها لشادها بـ يده وباسها ونزلها وقال بتنهيده وهوا يشبحلها :ماعنداش حاجه يفتخر بيها ، يفتخر إني بوه ، حاجه يدوي بيها عليا بـ فخر لـ صحابه ، حاجه تخليه رافع راسه وهوا يمشي في الشارع ها مافيش
نور :لا فيه
هز جبـار راسه :ماتكدبيش علي روحك ها ماتكدبيش ، انا حرام نولي أب انا مصيري مجهول ويخوف ، مانبيش صغاري يولو زيني مانبيهمش يجو في عيله كلها كره وجرم وحقد ها مانبيش
رفعت نور يده لـ شاد بيها يدها وحضنتها لـ صدرها ورفعت يدها التانيه شدت بيها خده وقالت بـ دموع مليانات عيونها :اني مانكدبش انت بتكون احسن أب في العالم كله ، واكتر أب حـ يفتخرو بيه صغاره ، واكتر واحد حـ يغير مصير صغاره في هدي العيله واللي حـ يحميهم من جرمهم وحقدهم ولعنتهم
وقربت بساته بـ خفه علي جبهته وبعدت وخلت وجها قبال وجهه وكملت :بيبدا ولدنا يحكي لصحابه عليك بقولهم بابا حافظ القرأن كله وتوا يعلم فيا ، ولما ينجح بـ متياز ، بشد صحيفته فوق ويقول اني طلعت زي بابا شاطر ، بيفتخر بيك وبقولهم بابا مافيش منه بكل ولما يمشي في الشارع حـ يرفع راسه فوق لانه ولدك ومن لحمك ودمك
تكي جبـار جبهته علي جبهتها :ها وبحقق كل لـ ماقدرتش نحققه
بتسمت نور من بين دموعها :ايه وبيرفعلك راسك بين الناس
جبـار :وبحبني
حاوطت نور وجهه بين يداها وبعدت وشبحتله :وهلبااااااا بحبك هلبااا
بتسم جبـار :بتحبني
نور نزلت يداها وحطتهم علي كتافه وقالت بـ دلع :لا ولد مش بنت
جبـار لف يديه علي خصرها :نبيها بنيه
نور هزت راسها :لالا البنت ضايع حقها في عيلتنا
جبـار رفع حواجبه :لا بنتي حقها محفوظ ها واللي تبيه حاضر
ضحكت نور وميلت راسها :بنتي
هز جبـار راسها :ها بنتي وبنسماها فاطمة
رفعت نور حواجبها وكانت بتبعد بس جبـار حوطها بـ يديه ومخلاهاش تبعد :فاطمة ؟! وهدا ماناقص غر تسمي بنتي علي اسم حبيبتك لقديمه
ضحك جبـار وقربها منه غصب من بين يداها لتبعد فيه ، وهيا تحاول تكتم غيظها وقرب باسها من خدها :ها حبيبتي
ضرباته نور علي صدره بـ عصبيه وصيحت :حــول من عليا حول
جبـار زاد تشبت بيها :ها نحول
نور :حول وبرالها اني بنتي بنسماها اني حول
جبـار:اشششش واهفتي
رخت نور روحها وعيطت:صهيـــب
قرب جبـار وباسها بـالغصب علي خدها وبعد :ياقطعه منه ها
زمطت نور ريقها وهيا تاخد في نفسها ورفعت عيونها فيه كيف قرب وقال :بنسماها علي امي فاطمة الزهراء ها ونبيها زيها في كل شي
هدت نور وقعدت تشبحله بصمت كيف كمل كلامه وهوا يرجعلها في شعرها التالي :وشوية حاجات منك هههه زي هبالك
نور :شوية حاجات بس
جبـار هز راسه :ها شوية حاجات ، مانبيش تهبلوني ياسرني انتي
ضحكت نور وقربت لفت يداها علي رقبته وحضناته :صهيب اني نحبك هلبا
.
.
.
تــاني يوم ...
رفع يده في السماء بالكلاشن وضرب الرصاص لين فضا المخزن ونزل لكلاشن لوطه وهوا يشبح لـ ناصر اللي شاد راسه ومطبس لوطه ، قال بضحكه :اشحط روحك ياعيل
قام ناصر راسه وعيط:تي لا نشحط لا نرخي فكونا من السلاح دا احنا في عرس موش حرب ايوه
ضحك ايوب وخبطه علي ضهره وهوا يتلفت لـ مؤيد ومحمود ، وعمر لمش لاهي معهم وهوا عيونه في الشاب اللي يحوس بينهم بـ حركه غريبه ، ومافاقش الا بـ يد جبـار لحطها علي كتفه :ها عريس
تلفتله عمر ورجع شبح لـ الشاب :من هداكا جديد ولا شن
جبـار شبح لـ الشاب الواقف بروحه وشاد تليفونه وهوا يشبح حولينه بـ توثر واضح عليه ، ضيق جبـار عيونه ورفع يده بـ صيحه :أيـوب
تلفتله أيوب :نعم
أشرله جبـار بـ يده بـ معني تعالا .
قرب أيوب بسرعه :نعم
جبـار :من هداكا ها
تلفت ايوب شبح لـ الضي شاب لركز عليهم ورجع شبح لـ جبـار وقال :مش عارف بالك معرفة الشباب
عمر :خلي عيونك عليه
هز أيوب راسه :تمام
وتلفت شبحله كيف تلفت وهوا يرد علي التليفون :ايوه
جاه صوت عمـار :شني صار
تلفت مجدي وشبح لـ أيوب لـ قعد يشبحله ورجع تلفت قدامه وقال :لا توا ماقدرتش نوصل فيهم
عمـار :ماتروحش وماتطلعش من غادي لين اتم لقتلك عليه ، ياماعش توريلي وجهك
وسكر عليه الخط وخلا مجدي لمسح علي وجهه وهوا حاس بـ لخبطه ، حاس بـ الحفره اللي كل مايحاول يطلع منها ، تزيد في عمقها وعتمتها وتحاصر فيه فيها .
.
.
بـمُختصـر الكـلاَم ، أنـتَ لـ قلبـي العـشـق والعـاشَق والمعشُــوق 💛
.
.
ضحك عمر اول ماشافها جايه بخطوات سريعه وهيا مدرقه وجها بـ الردي البودريه واول ماتلفتت وشفاته حولاته وهيا تهدي من خطواتها بـ ضحكه وتلف علي روحها ووقفت قدامه :شوفني
عمر :ههه عزوزتي
حطت هنيده يداها علي فمها :شبانيا حليلي
زادت ضحكت عمر لـ قرب وباسها من جبتها وبعد نزل علي طولها :مبروك علينا
هنيده حولت يداها من علي فمها وحاوطت بيهم خدودها الحمر وقالت بـ خجل :الله يبارك فيك
عمر :و وليتي حلالي ومرتي
غمظت هنيده عيونها بـ خجل :ياربي متحشمه اني هههههه
قرب عمر وباسها بـ خفه علي خدها وبعد قعد يشبحلها كيف تبتسم بخجل وهيا مطبسه راسها .
رجع عمر قرب وباسها من خدها التاني بضحكة وقال :غر امتي بس غدوه بجي هههههه محلاك يافرخه
هنيده :لازم نمشي
وقبل ماتتلفت شدها عمر من يدها ولفها ولصقها فيه وهوا يطلع في تليفونه وفتح الكاميره وصور هوا وياها وباسها من خدها و وخر من عليها وقال:توا بري هههه
رمشت هنيده رموشها عدت مرات بـ غباء وتلفتت مشت جري وخلاته وهوا يضحك .
.
.
.
ضحكت نور :متأكد انك من العيله انت
ضيق ناصر عيونه وقلب شفايفه :والله شاك فيها المعلومه هدي ره مانقدرش نعطيك اجابه موثوق منها
ضكت اكرام :ههههههه مهبول نوض عمي يبيك برا
ناصر نفخ :تي جعان جعان جاي من طريق طويله ومع منكدي ماقالش ولا كلمه طول الطريق لين فمي يبس والرياقتي جفت من فمي
ضحكت نورعليه :هلبااا انت
خشت هنيده عليهم وهيا تنادي:آيه
واول ماشافت ناصر عيطت:حي جيت
تلفتلها ناصر واول ماشافها لابسه الردي البودري فتح فمه :حي علي لعزوزه تي شن ملبسينك غبر فيهم
قربت هنيده منه وحضناته :ستاااااحشتك ياقرد
حضنها ناصر وضحك :ههههه حتي اني ستاحشتك ياعزوزه
وبعد وهوا يشبحلها وكمل كلامه :وكبرتي ووليتي عروسه
اكرام :ريتها وله صار منها الفصعونه
ناصر شبح لـ اكرام :ماقعدنا غير حني في الرقبه تي نبو نتزوزو ازح هي تعالي بنت عمي نزوزو بعض وخلاص
ضحكت اكرام :علاش شايفني مهبوله ناخدك انت امالا
رفع ناصر حاجبه وشبح لـ نور لتضحك عليهم وقال :تعرفي يابنت العم تشوفي فيها هدي وله كانت ميته فيا ايام المدرسه بالله
اكرام عيطت:ياااكداب
ناصر:خلي الطبق مستور خليه خليه اخخخ ياقلبي وخلاص
هنيده ضرباته :بطل يابارد هههههه وشن جبتلي من طرابلس
ناصر :الفقر تعرفيه وله ، غر تعالي تو ياعروستنا وديري لوخيك حاجه ياكلها
نور :واني نبي معاه
هنيده صيحت :مصحكم اني عروسه
نور وقفت وهيا تشبح في جبـار لخش ركب لدار وقالت :ديرينا دحي مقلي باهي
ناصر:وفوقه جبنة شرايح وطماطم
زمطت نور ريقها :واااه عليا جعانه ، نمشي ونجي نلقاك موتيتيلي نصي
وطلعت وخلت هنيده لفاتحه فمها واكرام تضحك عليها .
أنت تقرأ
عشق في بلاد حروبها لا تنتهي 3 (جبار)
Actionلا تُحــدتَّني عن العشــق ، فَـ أنا في بِــلاد فـي إِحدا بُنُــود دستُــرِها حرمته🤚🏻💔 . روايــة عشـق في بـلاد حُروُبـها لا تنتــهي تعود بـ جزئها الثـ( 3 )ـالت ، وبـ محتوه قـوي ، و بـ قـصـة عشق حقيقيه من واقعـنا المألم 💛 #كتابة_الياقوت
