انفينيتي❤

الجزء الخامس والعشرون❤

   

    "من أسوأ الحروب التي قد تخوضها مع نفسك عقل يرفض وقلب❤ يريد ،العقل لا يعرف المشاعر والقلب لا يعرف المنطق"

                ...........................

       صوت بعيد بيتكلم معاها ،ما قادرة تسمعه او تفهم كلامو ،حاولت تحرك يدينها لاكن من دون جدوى.....

   حست بي حركة خفيفة في يدها وفجئة الأجهزة بدت تطلع صوت عالي وحاد ،قامت بسرعة ونادت الممرضة بي صراخ وخوف ،الممرضة جات بي سرعة ومعاها الدكتور المشرف على الحالة ،قعدت بي توتر وهي تستغفر وبتدعي انو بتها تقوم بالسلامة.....

  رؤى ضامة جود عليها وبتطمن فيها وتصبرها ،وفارس بعاين ليهم بي حزن ،يوسف مشا المسجد عشان يصلي ركعتين ويدعي ،منذر ومازن طلعو مع أهلهم وناس عمهم بعد ما انتهى وقت الزيارة...

  
Flash back.....

   جود دخلت غرفتها بي تعب من الصباح هي شغالة مع امها في المطبخ لانو جواد ومرتو رزان جوهم في البيت ،بعد شوية جات داخلة جوري الغرفة بعد ما دقت الباب وقالت ليها....
جوري:جود انا طالعة مع رئبال أمي قالت ليك تعالي كبي العصير لانو ماريا طلعت البقالة
جود:عليك الله كبيه معاك قبل ماتطلعي
جوري جات باستها في وجنتها وقالت:معليش حبيبتي رئبال واقف لي تحت
جود بي ضجر:يا ليل رئبال دا ،طيب مع السلامة
سمعت ضحكات جوري قبل ما تنزل ،مشت كبت العصير سريع وطلعت غرفتها....

    جود قامت من سريرها بي فزع بعد ما سمعت الصوت العالي الجاي من الشارع ،جرت سريع وسمعت صوت فرامل بعدها اصطدام قوي ،وصلت الباب لقت اهلها كلهم متلمين في الباب ،جرو علي الشارع لقو في كم نفر واقف والصدمة كانت لمن شافو جوري واقعة هناك وغرقانة في دمها ،جود ما ركزت بقت تشوف كل شي طشاش طشاش وبعيد عنها رفعت رأسها بس لمحت زول واقف بعيد وبعاين ليهم لمن ركزت شافت رئبال كان بعاين لي جوري بدون حركة زحت عيونها منو لمن سمعت امها بتكورك......

مها:جوري لاااااااا بتي مالا يا محمد بتي مالا يا جماعة شوفو بتي عليكم الله ساعدونا
محمد:يا مها عليك الله ما تكوركي جواد اضرب لي الإسعاف بسرعة
جواد:اي كويس يا ابوي
مها بعد وصول الاسعاف:خلوني انا أركب معاها
محمد:لا لا انا بركب معاها ،جواد سوق أمك وجود ومرتك والحقونا بالعربية في المستشفى.....

   وصلت عربية الاسعاف ،بي سرعة نزلوها من العربية وودوها غرفة العمليات لسؤ حالتها ،قعدو منتظرينها بي فارغ الصبر على أمل انو العملية تنجح.....

    جود اتذكرت رئبال ،وبدت الشكوك تراودها انو هو لي كان واقف هناك والجابو شنو ولي ما جا عليهم لمن شاف الحادث وكان بس واقف في مكانو، قاطع تفكيرها رزان وهي بتقعد جنبها وبتديها تلفون وبتقول
رزان:دا شكلو تلفون جوري لقيتو واقع جنبها وشلتو
جود:طيب شكرا

   جود والفضول بياكلها قررت تفتح التلفون ، كانت شاشتو مهشمة لكن بيتفتح غايتو ،فتحت الرسائل دخلت آخر محادثة والدخلتها في شكوك كبيرة
،والهي:
رئبال:جوري انا داير اقول ليك موضوع مهم
جوري:طيب لاكن في التلفون؟
رئبال:لا لا انا بعدين بجيك جنب بيتكم انتي اجهزي وانتظريني
جوري:تمام اتفقنا الساعة كم
رئبال:الساعة 5:00 (الساعة خمسة ياحبيب ما تنسى انا انا❤❤)
جوري:👍

  بعد شوية جا الدكتور طالع من الغرفة ،جرو كلهم عليه وسألوه عنها الدكتور:الحمد لله يا جماعة نحنا وبي فضل الله تعالى اتجاوزنا مرحلة الخطر......ونزل رأسو بي اسف وقال:لكن للأسف المريضة دخلت في غيبوبة وما معروف تصحى منها متين

   جود سرحت بعيد بعد كلام الدكتور وبدت تستغفر ربها وتحمدو انو اختها كويسة........

End flash back......

  مر شهر من ما جوري دخلت في الغيبوبة ،جوري بعد ما جات من السفر طوالي كانت مواضيع عرس اخوها والجوطة واللخمة والتجهيزات لغاية ما العرس انتهى علي خير الحمد لله ،بعداك جات امتحانات الشهادة بتاعت ناس جود ،المهم هم انضغطو وانعصرو في القراية والامتحانات وكانت ملخومين شديد لحد ما الامتحانات انتهت على خير الحمد لله ،جود ما كان عندها الوقت تفكر بي علاقتها هي و منذر كانت ملخومة شديد وما قادرة تعمل اي شئ.....

            ...............................

Pov منذر

    رجعنا من المستشفى ودخلنا البيت ،دخلت غرفتي وبدلت ملابسي ورقدت في السرير مسكت التلفون وفتحتو جاتني صورتها الخاتيها خلفية سرحت فيها لي مسافة وبقيت بفكر لمن كانت بتبكي امبارح كيف انا قلبي كان بيتقطع مع كل دمعة بتنزلها ،ولما كانت بتتكلم مع جاسم الحيوان كيف كان نفسي اشيل التلفون منها واكسرو، كنت بحسدو لي مجرد انو بيسمع صوتها كل يوم ،يمكن هي ما قادرة تفهم انو انا طبيعتي كدا انا دايما بكون عصبي وما بتفاهم في الحاجات البتخصها ،كانت دائما من وإحنا صغار بتعني لي كل شي كنت بقول لي نفسي اني حاتزوجها وحتكون ملكي ،ما قادرة تفهم انو انا بغير عليها شديد من كل الحولينها يمكن عشان كدا ما حبتني عشان تصرفاتي ما قادرة تتقبلني، ندمت علي اني ما اعترفت ليها من بدري زي ما قال لي بسام ندمت لمن جاسم سبقني ،لكن اتعهدت مع نفسي اني مستحيل أتخلى عنها في يوم وحا احميها طول ما انا حي (فديتك❤)

   كان نفسي💔💔 دايما اقول ليها:"وتشابهت انت وقهوتي☕ باللذة😍 والمرارة😝 والادمان💋 "

                 ..........................

#لنا لقاء آخر.
           (لا تلهيكم عن الصلاة❤)
#اللهم صل وسلم على نبينا محمد وعلى آله وصحبه وسلم.
#خليكم بالبيت.

    يا جماعة انا بكتب الرواية وبتمنى ألقى تعليقاتكم عنها وآرآكم وانتقاداتكم وحاجاتكم الحبيتوها فيها وافكاركم ،عشان أحاول بي قدر الإمكان اني أصلح غلطاتي فيها ،وبشكر الناس البكتبو تعليقات حلوة زيهم كدا مهما كانت بسيطة وبحفزوني اني اواصل (Big love ليكم❤❤❤😍😘😙😚👄💋)