لجييين ..واا لجين .. أ فينك ا دك البنت، غير تسمعي حس العراسات تغبري ..! جاوبااتها من لفوق لجين: هنا ا ماما .. طلعت نجمع البيت و صاف . الأم: و اجي ا بنتي حبيبتي حدايا نهدر معك، و خلي عليك الجميع تال وقت اخر .. لجين (كتهدر فنفسها) سبحاان من خلقك .. نتي الواليدة، تقولي خلي الشغل تال من بعد ؟! هبطات لتحت .. و گلسات حدا ماماها، و هي عارفة بلي غتسمع نفس الكاسيطة، لي كتسمعها قبل ماتمشي تحضر أي عرس .. و دكشي نيت لي كان .. الأم: شوفي ا بنتي حبيبتي .. را گاع بنات صحاباتي جابليهم الله راجل على مزيناتو .. غا من العراسات لي كايحضرو، و نتي .. فينما كان شي عرس تخباي فالدار، علاش ..؟! اشنو ناقصك ؟! الزين .. زينة بلا ماكياج، التكاشط .. المخيرة نجيبها ليك .. ( رمقتها بنظرات كتمزق القلب ) وا نوضي ا حبيبتي .. راني باغة نفرح بيك .. و نشوفك عروسة، (أطرقت بنظراتها للأرض همست بشرود ) قبل مايدي مول الأمانة أمانتو .. لجين: (شهقت بفزع من فكرة الفراق ) ناااري .. متبقايش تقولي هاد الهدرة، و الله يطول ليا فعمرك الواليدة .. راكي باقة تدكي و تدردگي الأم: ( نور وجهها بابتسامة فرح ) ندك و نردك فعرسك إن شاء الله .. وا نوضي نعلي الشيطان، و وجدي راسك قطع حديثهم صوت المفاتيح فباب الدار .. توجهت نظراتهم ليه دقة وحدة، دخل الأب، لقى السلام .. و حط التكاشط لي جاب من المصبنة فوق السداري .. الأب: هنا جبت لكم ماتلبسو وا نوضو وجدو راسكم .. را غيمشي الحال .. و باقة تابعانا الطريق لجين: الوليد مقلتيش ليا عرس من هدا لي معروضين ليه ..؟! الأب: العروسة بنت ولد عمي .. انا و ياه قد قد تزوج وولد .. و ها بنتو كتعرس و قبل ميزيد يرسل لها فكلامه معاني مبطنة .. هربات من أمامه .. هازة تشيطتها .. و توجهت لغرفتها بحجة التوجاد ..
يتبع...
