#ظلال_الموت 5 و 6
مجاهد يوسف
حاج القسم بعد قال لبركات دايرك توريني اي حاجة بتصلوا ليها وبركات فات علي أخوانو وهو قعد يفكر مسافة طويلة وقال انا اول حاجة مفروض أفكر فيها الزول الكان واقف يوم الجريمة جمب لفة دكان علي الزول دا منو وليه كان لابس أسود صر ووقفتو ومعاينتو جاي علي جههتنا سرها شنو هل في زول شافو وهو بكتل في بلة وهو عرف في زول شافو وبعاين عشان يتأكد أو في زول كان معاو وجاء علينا جاي ؟ معقول يكون النور ولدي كان معاو ؟ لكن النور لو كان معاو جاء داخل البيت بوين وكيف ما اعتقد كان معاو الا إذا تلب بالحيطة ومع مرقتي وفتحتي للباب اليوم داك تلب دخل لكن انا ما سمعت أي حركة ولا شفت أي شي .
خليتو النور باب ناس عبد الغني الجزار الانفتح الفتحو منو الساعة ديك عبد الغني صاح بقوم الدغش بدري يضبح لكن بعد صلاة الصبح والدنيا تكشف والعين تشوف لكن اليوم داك الغريبة ما ضبح نهائي . بكون بعد سمع بالحادثة دي ساب الضبح اليوم داك ؟
عبد الغني الجزار دا ما من الحلة أصلا وجاها قبل كم سنة عندو قرابة مع حاج التوم الله يرحمو وهو الجابو الحلة دي وعرس ليهو بتو مرضية واول ما جاء اشتغل سواق وكان سايق لوري علي سيد الدكان قبل يخسر ويبعو بجيب بيهو التراب والرملاء والطوب من الكماين لناس الحلة والجزارة دي اشتغل فيها بعد مرض حاج التوم وقبال يموت ورثها منو وكانت ياها شغلتو وشغلة أهلو كلهم .
حاج القسم ناغم لبركات وقال ليهو انت طبعا بتعرف بلة كويس الله يرحمو وصاحبك اها داير اسألك من حاجة واقفة لي في نفسي ، بركات قال اي بعرفو كويس شديد وما كان بدس مني شي الحاجة الواقفة ليك في نفسك دي شني؟
قال ليو عبد الغني الجزار جارنا دا البربطو شنو ببلة ود الجيلي
بركات فكر مسافة وابتسم قال ليهو مافي أي علاقة بيناتهم ، ابوهو قال ليهو لا لا في كدي اتذكر كويس
قال ليو والله يا ابوي ما شايف في اي علاقة دا في وادي وداك في وادي وهو زاتو بلة بعد مشيهو الجامعة ما كان بقعد كتير
قال ليهو دايرك تركز لي في النقطة دي وتسعل اصحابك عمر والمكاشفي وتبحتو وراء الكلام دا انا متأكد في علاقة
قال ليهو سمح نشوف مالو ، الزول في قضية زي دي مفروض ما يستبعد حاجة ومن الصباح انا بمشي للمكاشفي وعمر
قال ليهو اي وجيبهم معاك انا دايرهم عندي ليكم كلام
النور جاء بعد شاف قعدة بركات وكلامهم البراحة براحة دا كتر وما عارفهم بقولوا في شنو والموضوع دا ما مريحو جاء سلم علي ابوهو وقعد معاهم قال ليهم بتقولوا في شنو ؟ وللا كلام سر
ابوهو قال ليو اخوك دا قال داير يعرس رايك شنو ؟
النور ضحك وقال ليهو والله احسن ليهو من القعاد ساي والعطال وبمناسبة العرس دي انا داير اععرس يا ابوي
قال ليهو والله ياها زاتها العريان الاشترى الطاقية
قال ليهو كيف ؟
قال ليو انت عريان في جسمك بتشتري ليك طاقية تغطي بيها راسك؟
بركات قعد يضحك والنور قال ليهو انا دداير اعرس لي واحدة مليانة قروش وابوها عندو وعندو ارطب زاتو لا شغل لا مشغلة
حاج القسم كان زول حبوب ومخاوي اولادو وبهاظرهم قال ليهو اتعشت أمك. اها دي خابرها وللا ساي ؟
النور قال ليهو ما خابرها علا بلقاها
قال ليو شوف لينا معاك انا واخوانك ديل برضو الزي دي كلنا بندورها
وجاهم حسن برضو اخدوا ونستهم وحاج القسم قال ليهم امشوا بعد كدا داير انوم الليلة ساهرتو بي
فاتوا والنور قال لبركات اكنتو بتقولوا في شنو انت وابوي قبل اجيكم
بركات قال ليو ابوي ما وراك ؟
قال ليهو لا ما كنتو بتتكلمو عن العرس وقعداتكم براكم كترت في شنو
قال ليهو مافي شي وانا ما طوالي بقعد مع ابوي الجد شنو يعني ؟
قال ليهو في سر وانت داسيهو اوعى تكونوا بتتكلمو فيني
بركات قال ليهو نتكلم فيك نقول شنو يعني وانت مالك عشانك نتكلم فيك بالدس لو في حاجة بنقولها ليك عديل
النور قال ليو لا لا ما مالي حاجة وراوغ بعينو زي الخايف من شي
بركات قال ليهو النور انت خايف من شنو شايفك انا وبتتحاشى القعاد مع ابوي براكم والليلة لو ما لقيتني معاو وداير تعرف بنقول في شنو ما كان جيت
النور رقد قال ليهو نوم نوم مافي شي ؟
الصباح بركات مشى لعمر وساقو للمكاشفي وقال ليهم كلام ابوهو الامس عن عبد الغني الجزار عمر قال والله انا ما شايف في حاجة رابطاهم مع بعض لكن المكاشفي قال ليهم في
قالوا ليهو في شنو بيناتهم قال ليهم قبل اوريكم داير اعرف عمي القسم جاب الكلام دا من وين وشنو الخلاهو يقول كدا
عمر قال ليهو ورينا اول وبعدين نمشي نسألو قال ليهم ورحكم ليهو اول
وقاموا مشوا علي بيت حاج القسم
لقوهو قاعد عندهم شدرة ليمون شايل طوريتو يصلح في الحوض حقها سلموا عليهو وبركات شال منو الطورية قعد يصلح في الحوض مشى مع المكاشفي وعمر علي الديوان ولقوا حسن والنور قاعدين حاج القسم رسل النور الدكان وقال ليهو جيب ليك بن وخلي امك او بتول اختك تسوي لينا جبنة وما عندو بنات غير بتول اصغر واحدة في اولادو وهي الحتالة
وحسن قال ليهو بعد يجي النور اخوك سوقو وأمشو لعمتكم النعمة في بيتها زوروها وللا سوقو وامشو اي مكان تاني علي كيفكم وما تقول ليهو ابوي القال لي أسوقك اما عندي كلام مع الجنوي ديل ما دايركم تعرفوهو
حسن زول كان طيبان وما بتدخل في حاجة ما بتخصو ولا عندو شغلة بحاجة ما عندو فيها شغلة اول ما جاء النور قعدوا شوية وساقو وفات
