#ظلال_الموت 28و29
مجاهد يوسف
بركات لمن شاف الخاتم حق عمر شالو منو وقارنو بالخاتم حقو لقاهو ياهو زاتو مافي فرق بيناتهم جاهو احباط وبطنو طمت من أي شي وبقى شايل هم زي الفوق راسو جبل وعيونو زرزرن قرب ياخد ليهو بكية لانو دا كان أملو الوحيد في البراءة والكان شايفو الحل الوحيد البفك طلاسم القضايا دي كلها وسرح بعيد منهم يفكر في لمن يمشي للضابط ح يقول ليهو شنو واتذكر السجن والحبسة والتحقيق والجرجرة ووو قام من جمبهم متضايق وفي حالة من التوهان عجيبة والاحباط ظاهر في وشو ولا عارف داير يمشي وين بس المهم مارق ،
عمر والمكاشفي قاموا معاو ومرق من ديوان الفراش فات ساي زي المودر وعمر يكورك ليهو أقيف آ بركات دقيقة ياخ وهو زي اللطرش ماشي لمن أخدوا ليهم ديل حتة جرية وانكرابة حتين وصلوهو المكاشفي قال ليهو ماشي وين هسي ؟
قال ليهم خلوني ياخ داير اقعد براي شوية
عمر قال ليهو تقعد وين براك انت قايل روحك في الحلة ؟
بركات قال لعمر ليه ياخ تلعب بي كدا وانت من أمس عارفني بفتش للمكاشفي عشان شنو ؟
والله خفتك ما تصدقني وبعدين شايفك مأمل في الموضوع دا شديد قلت ما داير أحبطك وانتظر لمن المكاشفي يجي احتمال في زول تاني غيري ما داير أسبق الحوادث
قال ليهو تحبطني ؟ ياخ في احباط أكتر من كدا ؟ ارجعوا الديوان وخلوني ياخ انا ماشي بيتنا
المكاشفي قال ليهو في النهار الحار دا ؟ خلي الواطة تبرد كلنا ماشين البقعدنا شنو ؟
قال ليهو نهار شنو ياخ والله انا جواي بركان عديل مليان حمم وبغلي من جوة زي النار
وفي كلامهم دا قدام الديوان حق الفراش عربية البوليس جات والضابط قبل يدخل عاين فيهم مسافة وبركات قلبو قعد يدق واتضايق شديد وقال لاصحابو أها انتمت الناقصة ياخ كان تخلوني أمش ياخ .
الضابط دخل الديوان وما اشتغل بيهم وشال الفاتحة وقعد جمب سعيد وسعيد حزنان ومدنقر راسو ما برفعو الا لمن زول يجي يشيل معاو الفاتحة والنور زاتو كان قاعد جمبو ولمن شاف الضابط قعد يبلع في ريقو وداير ليهو أي طريقة ينزغم بيها من جمبهم
عباس مرق فات من الديوان ومعاهو واحد صاحبو وجاء بعند بركات وعمر والمكاشفي وصر وشو لبركات قوووي وعاين ليهو بعيون مليانة زعل ووعيد وتهديد ومشى
المكاشفي ما كان حاضر النقاش القبيل فكر ليهو وقال لبركات دا منو دا ومالو جرا في نور قوي كدا
بركات قال ليهو دا واحد حيوان ساي ما عندو أي موضوع وعباس سمعو وقف مسافة وكان داير يرجع ليهو لكن المعاو قال ليهو ورح ورح ما وقتو ما وقتو البوليس جوة ورح بس وعباس تاني كشح في بركات نور
عمر قال ليهو هسي في داعي ياخ آ بركات ؟
قال ليو في مية داعي داير يعمل شنو يعني ؟
المكاشفي قال ليهم ياخ ما تفهموني في شنو يا جماعة ما تخلوني كدا زي اللطرش في الزفة
عمر وراو الكلام القبيل كلو وقال لبركات والله مافي داعي ياخ والزول دا لو دايرين النصيحة كلامو صاح هسي اتنين منهم انكتلو في حلتنا حمد ود الشفيع وهويدا مرت سعيد والكتلهم ما اتعرف والله حارة يا جماعة
بركات نطط عيونو كبااااار وقال اقسم بالله انا حيوان وغبي عديييييييل لا حولاااااااااا وقعد يدق بيدو في راسو
المكاشفي قال ليهو مالك ها ؟
عمر قال ليو دا كلام زول كان ناسي حاجة واتذكرها
وبركات قعد يلولح في راسو وقال ليهم ياخ انا غبي والله موش حمد من الحلة دي ؟
قالوا ليهو يعني ما عارفو ؟
قال ليهم عارفو والله لكن كنت ناسي حاجة مهمة شديد يادوووب انتبهت ليها
المكاشفي قال ليو عليك الله ما تجننا معاك وتعلقنا كدا قول اتذكرت شنو والله بقينا ما بنستحمل أي شي
قال ليهم بعدين بعدين ما هسي وهسي انا داير الضابط دا ضروري
عمر قال ليهو علي اليمين ما تورينا اتذكرت شنو ما أخليك وهسسسسي دي
قال ليهم خلاص خلاص بوريكم لكن قبل اوريكم تعالوا معاي ورحكم اي دكان زي الدايرين لينا حاجة باردة ونسأل سيدو من حاجة ضروري
مشوا يفتشوا لدكان لقوهو ما بعيد من الديوان ولا قريب بينهم شارعين
طلبوا ليهم حاجة باردة فتحها ليهم عمك كبير كدا وأضانو تقيلة بسمع كشح إلا يكوركوا ليهو كوراك وكلامو زاتو بصوت عالي
بركات قال ليهم عمكم دا ما بسألو أنا بجيب لينا هواء اشربوا باردكم دا سريع وورحكم نشوف لينا واحد غيرو
عمر قال ليهو والله نحن زاتنا شحتفت لينا روحنا وطلعت زيتنا عديل ياخ ورينا داير تسأل من شنو ؟
قال ليهم الزول دا صوتو عالي زي الحيوان القبيل الاسمو عباس وهو زاتو بشبهو التقول أخوهو
عمك قال ليهو اي اخوهو وانتو منو ودايرين تسألوا من شنو وقعد يكورك لعباس
عباس جاء جاري جري هو والزول الكان قبيل معاهو
