#ظلال_الموت 8 و 9
مجاهد يوسف
النور جاء علي البيت زي الساعة تلاتة تلاتة ونص كدا وكان معاو أيمن ود الجزار وتلب براحة بالحيطة زي الكديس مافي زول سمع تليبتو وابوهو ولا صحى بيهو لكن النور جاهو احباط لمن لقى سريرو فاضي وما فيهو لحاف وخاف خوف شديد لانو متأكد انو طلعو واخد ليهو رقدة فوقو قبل يفوت ، في اللول قال يصحي حسن وللا بركات يسألهم من الدخل اللحاف في الديوان منو لكن تاني خاف ابوهو يصحى بيهو دخل الديوان يجيب اللحاف ما لقاو عرف انو دا ابوهو جاء لقاو مافي وشال اللحاف معاو ، وبقى لا قادر يمشي بهناك يجيبو ولا قادر يرقد في السرير برا لحاف وينوم مشى صحى بركات ورقد جمبو يفكر ليهو في كضبة يقولها لابوهو ينحل بيها بكرة ونام
حاج القسم الصباح بدري مرق فات السوق واتعمد يفوت بدري عشان ما يلاقي النور والنور بعد صحى مشى جاب لحافو من بهناك ولقى ابوهو مافي ارتاح نسبيا لكن شايل هم بعد جيتو يسألو أمو ما عارفة شي ولا عارفة الجاب اللحاف حق النور دا شنو بجاي سألتو أكل ليها الكلام ساي لا عرفت السبب ولا اهتمت تعرف
قريب الضهر كدا حاج القسم جاء والنور متوقعو يناغم ليهو ويسألو وبقى قاعد قلقان متوتر ويجهز كضبة ويغيرها وغالباهو القعدة في الديوان وما عارف يسوي شنو ، بركات يتكشم ساي والنور متغاظ قام بركات مرق وقال للنور كتلوك ولا جوك جوك وفقع ليهو ضحكة وفات مارق مشى علي دكان علي لحمد ودالشفيع يشوف قصتو شنو ما مرتاح ليو
حاج القسم نهائي ما اشتغل بالنور ولا سألو
والنور بقت عليهو القالها بركات زاتها كتلوك ولا جوك جوك ولمن اتوتر واتضايق تب وغلبو القعاد فات براو لابوهو لقاو يشرب في الجبنة مع امو وقعد معاهم وشرب الجبنة ومنتظر ابوهو يكلمو حاج القسم ما كلمو نهائي وبعد اخد قعدتو معاهم مرق فات الديوان ولسة ما ارتاح وشوية كدا وأبوهو جاء مارق في الحوش وكورك ليو قولت يا النور جاهو جاري جري شايل الكضبة في خشمو بس العقرب المالي ضنبها السم وحارقها وقبل ابوهو يسألو قال ليهو أمس أنا كنت مع...
حاج القسم قاطعو وقال ليهو هاك القروش دي امشي الدكان جيب ليك زيت لأمك ولا خلاهو يكمل ولا اهتم يعرف النور شال القروش وباغة الزيت وفات محتار
المكاشفي بقى صاحب عادل شديد وطوالي معاهو ومرافقو وملازمو تب والمكاشفي زول موهوب وظريف النوع البصاحب سريع وبقى يقرب عادل شوية شوية من عمر لمن التلاتة بقوا اصحاب وطوالي مع بعض بجاي بركات بقى يومي مع أيمن في بيتهم ومرات من الكورة بعد ينتهي التمرين بمشي معاهو بيتهم يجي مع صلاة العشاء وبالنهار بس الا ما يفطر طوالي بمشي لايمن في البيت عملها ظاهرة ومن كترت المشية والجية والساساق بقى يحب طيبة
حمد ود الشفيع صاحب الحلة كلها بلسانو السمح وكلامو الحلو وطوالي الدكان مفتوح ولا بقفلو وعندو حب استطلاع عجيب وغريب اي شي بتحشر فيهو بس بطريقة ما كرهت فيهو الناس. وبتاع نكتة وجنو ضحك ومع كل الناس تعاملو واحد وحلو الا مع طيبة بس البختلف وهي زاتها ما بتجي الدكان كتير لكن لو جات بعندو ساي معاينتو ليها غير معاينتو للناس
مرة جات الدكان مجبورة وكانوا معاهو كم زبون بايعها آخر واحدة وقال ليها دايرك في موضوع أنا وعندي كلام كتير داير اقولو ليك قالت ليهو كلام شنو وبتعرفني من وين انت ؟
قال ليها بعرفك كويس بس انتي وقبل يكمل كلامو اليوم داك جاء بركات الدكان واللتنين اتكبكبوا واتلخبطو وطيبة فاتت ولا شالت حاجاتها لمن بركات لحقها وناداها وقال ليها دايرة شنو والزول دا كان بقول ليك في شنو ؟ قالت ليهو مافي شي وورتو الدايراهو شالتو وفاتت وبركات قعد يحقق مع حمد وحمد بالكلام يراوغ ويتزاوغ ما اخد منو لا باطن ولا ظاهر لكن بركات ختاو في راسو تب خاصة بعد كبكيبتو لمن جاء داخل وقطعتو لكلامو مع طيبة
حاج القسم جمع المكاشفي وبركات وعمر وقعدوا في الديوان وقال ليهم اها وروني العملتوهو شنو المكاشفي قال ليهم عادل دا انا اكتر واحد قربت منو شديد وما نضيع زمنا معاهو ساي لانو ما كتل بلة ولا عندو علم بالكتلو ، وعمر زاتو وافقو في الراي وقال ليهم الزول دا كلمة ساذج زاتها كتيرة عليهو وخواف وطيبان وما اعتقد يكتل
حاج القسم قال ليهم دليلكم شنو انو ما هو الكتل بلة احتمال عارف الليلتنا وعارفكم صوحبتوهو لشنو وعارف انكم متهمنو وزول بارع وقدر يقنعكم بإنو طيرة ساي ؟
المكاشفي اتلفت علي عمر وقال ليهو معقولة ؟
عمر مط خشمو ورفع اكاتفيهو وقال جايز
بركات معاهم ولا معاهم لمن المكاشفي لكزو قال ليهو ها وين انت ؟
بركات ولا كضب وقدام ابوهو قال ليهم معليش يا ابوي انت من زمان معودني علي الصراحة وهسي انت صاحبي زي عمر والمكاشفي ديل واحترامك ومقامك ومكانك محفوظ وفوق راسي لكن عندي كلام ما بقدر ادسو منكم وقدر ما حاولت ما قدرت ابوهو قال ليهو قول ساي آ ولدي كتر خيرك
قال ليهم والله وبصراااحة كدا انا بحب طيبة
التلاتة فقعوها ضحكة وخاصة ابوهو وقال ليهو مالو الحب مو عيب .
قال ليهو ما عيب والله ولا باليد وانا كلمتكم ما عارف ليه لكن احتمال يكون دا وهم ساي عشان انا بمشي ليهم وبشوفها كتير
المكاشفي قال احتمال برضو لكن خلينا من طيبة هسي اها ايمن رايك فيهو شنو ؟
بركات قال ايمن دا لغز والله ورغم مباراتي ليهو اليومي دي غلبني افهمو كلو كلو
والغريبة فيهو والاكتشفتها قريب بسكر وبلعب قمار بس متين ومع منو ووين ما عارف
قام ابوهو قال ليهو طيب عرفتو كيف بسكر وبلعب قمار ؟
قال يوم مشيت ليهو الصباح لقيت ريحتو عرقي وبايتة معاهو وهو براو كلمني لكن ابى يوريني مع منو ووين
حاج القسم سرح مسافة وهوزز راسو
