#ظلال_الموت 32 و 33
مجاهد يوسف
بركات مرق من المركز والمكاشفي وعمر أكانوا منتظرنوا برة جاهم محتار ومحبط
عمر قال ليو اها الحصل شنو؟
قال ليو ما حصل اي شي والله الضابط مرق تعبنا كلام فاضي ساكت وقال لي دي استنتاجات لا بتودي ولا بتجيب
المكاشفي قال والله يا جماعة واحد من اتنين يا الضابط دا طيرة ساي وما عارف كوعو من بوعو يا اما زول ما ساهل وعارف أي حاجة
عمر قال رجعاكم الحلة
في كافتريا جمب المركز حق الشرطة بركات قال ليهم تعالوا ناكل لينا حاجة ياخ من الصباح ما اكلنا شي
مشوا الكافتريا وهم بياكلوا عمر قال ليهم المع العسكري داك موش عادل ؟
اتلفتوا عليهو وقالوا ياهو زاتو عادل
والمكاشفي قال ليهم الضابط دا فقري جدا اكان كدا انا ما قلت ليكم بكون عارف حاجات كتيرة
بركات قال ليهم لكن عادل دا مالو كمان ؟ أكان كدا النور أخوي برضو بستدعوهو لانو هو وعادل اكانوا مع سعيد يوم الجريمة ، هوي قوموا ورحكاكم الحلة انا داير النور
الضابط قال لعادل النور وسعيد اكانوا بسكروا معاك يوم الجريمة ؟
_آي اكانوا معاي الاتنين
_احكي لي بالتفصيل جوك متين وبالدقيقة
_أنا كنت في البيت العصر وسمعت صوت الترتر حق سعيد برة مرقت لقيتو فات ولقيت النور قريب من بيتنا وكان بعاين لسعيد وخلاهو لمن قطع الترعة ورجع علي بيتهم قمت انا كوركت ليهو قال لي ماشي البيت وجاييك قال داير ابوهو ضروري وانا مشيت معاهو بيتهم
_اكان داير شنو من ابوهو ؟
_ما عارفو والله لكن لمن مشينا بيتهم لقيتو ما كان داير ابوهو ولا شي لانو ابوهو كورك ليو أبى يمشي ليهو واتكلم هو حسن اخوهو شوية ما عرفتهم قالوا شنو ورجعنا بيتنا انتظرنا سعيد
_وسعيد جاكم الساعة كم ؟
_بعد صلاة العشاء بمسااافة كدا ما متأكد بالظبط
_يعني ما جاكم سريع ؟
_لا لا ما جانا سريع اتأخر حتى النور قال ليهو مالك اتأخرت كدا قال ليهو لقيت لي واحد حرتا ليهو حواشتو
_أها وتاني
_بس دا الحصل كلو
_طيب لمن جاكم اكان مقلق وللا خايف من شي؟
_النور الكان مقلق ويشيل ويتلفت ومضايق وانا سألتو كم مرة قال لي مافي شي بس سعيد اتأخر ياخ
_لا لا النور خليهو انا سألتك من سعيد كان كيف لمن جاكم ؟ ما لاحظت عليهو حاجة غريبة ؟
عادل قعد يتذكر مسافة ويفكر وقال والله ما متأكد لكن أكان ناشف مع النور
_ناشف كيف ؟
_يعني محمر ليهو وزي الزعلان منو كدا ولمن النور يسألوا وللا بتكلم اكان بنهر فيهو انا قايلو سكر لانهم اصحاب شديد
_النور طوالي بمشي بيت سعيد ؟
_بمشي كتير آي
_عشان سعيد وللا عشان مرتو ؟
_مممم مرتو مرتو هويدا ؟
_عندو مرة غيرها يعني ؟ قول كل البتعرفوا اوعك تدس مني شي لاني عارف أي حاجة ولو كضبت او دسيت مني حاجة وانا عرفت فيما بعد انك عارفها وأبيت توريني ليها ما بفوتها ليك لانو نحن قدام جريمة وفي واحد في الحلة دي سفاح لازم نقبضو
عادل قال ليهو ما بدس منك حاجة والبعرفوا كلو بقولو ليك ، النور اكانت عندو علاقة مع المجني عليها
_علاقة شنو
_علاقة ما تمام بس وبتخون معاهو سعيد
_غير النور عندها علاقة مع منو تاني ؟
_انا عارف النور بس وهو الكلمني بيها براهو حتى انا قلت ليهو دي زوجة صاحبك
_انت زاتك ما زوجة صاحبك
_أنا ؟ انا ما..
_قبل شوية اتفقنا علي شنو ؟ ما قلنا ما دايرين كضب ؟
_بس انا ما كضبت عليك يا سيادتك
_داير تكضب
_لا لا ما داير أكضب ولا شي
_عادل انت زول كويس ومحترم وود ناس ياريت تبطل سكر وما تلملم العطالة يللا امشي وما تطلع من الحلة الا بإذني
_امشي خلاس كدا ؟
_آي أمشي
عادل مرق عرقااان وما مصدق
بركات والمكاشفي وعمر وصلوا الحلة ولقوا حسن وابوهو مقلقين الاتنين وقال ليهم ما شفتوا النور ؟ ما لاقاكم ؟ ما عارفنو فات وين ؟
بركات قال ليهم نحن أكنا في النقطة مع الضابط مشى وين هو ؟
ابوهو قال ليهو لو عارفنو مشى وين بنسألكم ؟
حسن قال غايتو انا قبيل قال لي ماشي الخرطوم ولمن مرق شال من أمي قروش وقال ليها ماشي اقعد مع سعيد ود الرضية في الفراش كم يوم وبجي لكن ابوي جاء هسي قال ما جاء هناك
بركات قال لابوهو امكن اتعقبتو انا بمشي هناك اشوفو
حاج القسم قال ليهو لا ما تمشي انت ما ناقصين مشاكل نحن، نسيت ملامضتك لعباس وشكلتكم معاهو ؟
بركات قال ليهو لا لا اتصوحبنا نحن ما رجعنا تاني واتصالحنا وعزمنا جبنة في بيتو
قال ليهم أكان كدا امشوا شوفوهو لكن امك قالت شال ليهو غيار في شنطة وما ظنيتكم تلقوهو بس امشوا عسى ولعل
