#ظلال_الموت (١٩)
مجاهد يوسف
بركات الحاجة النهائي ما اتوقعها انو تاني يكون متهم وتاني يكون في دليل ضدو وسرحانو وتسهيهو لمن الضابط بسأل فيهو كان في الخاتم دا كان وين وراح منو متين ودا منو الداير كل مرة يورطو في جريمة دا وليه ما يكتل الا اصحابو
الضابط بعد خبت ليهو الطربيزة ونهرو قال ليهو اعترف بركات قال للضابط بكل هدوء وصراحة انا داير اقول ليك كلام كتير
_قول بس اهم حاجة تعترف عشان ما اتبع معاك اسلوب تاني
_قبل الاسلوب التاني وانا عارفو وهو الضرب وقليم الضفور او قليعهن والتعذيب ومابتقيفوا من التعذيب الا اعترف ليكم موش؟
_اصلا المجرمين والقتلة الزيك ديل الظاهر الحسنة ما بتنفع معاهم
_يعني اعترف ليك بحاجة انا ما عملتها ؟
_قول الحقيقة
_الحقيقة في حلتنا في زول كتل بلة وحمد وأيمن التلاتة ديل والزول دا ما كتلهم ساي في رابط بينهم شنو انا ما عارفو وانا التلاتة اصحابي والتلاتة انا اعتقد كتلهم زول واحد والزول دا عارف علاقتي مع حمد قال يورطني في كتلتو وكمان عارف علاقتي بطيبة وأيمن وخلافي معاهو قال برضو يورطني في كتلتو لكن انا ما كتلتو بس بجزم انو الزول دا يا واحد من الشباب البسكر معاهم او واحد عندو مصلحة كبيرة من كتلهم اما انا مافي شي بخليني اكتل اصحابي مهما كان
الضابط قال لبركات شيل خاتمك دا وامشي اهلك يا بركات والحصل بيني وبينك دا ابوك ما يعرفو
بركات ما صدق وقال ليهو امشي اهلي ؟
قال ليهو امشي اهلك اي وبالمناسبة انت ما مفروض تمشي لانو الخاتم دا دليل ضدك والمفروض تنحبس ونحقق معاك كتير لكن انا متأكد انك بريء احساسي بقول كدا لكن القضايا دي بالادلة ما بالاحساس وانا عايزك تخارج نفسك من التهمة دي براحة
_كيف آ جنابو قول لي اعمل شنو وانا تحت أمرك
_ما تعمل اي شي بس الخاتم دا ما تلمو وألبسو في يدك اليمين واي زول شاكي فيهو سلم عليهو وامسك يدو مساااافة والبعاين في الخاتم دا مستغرب او يعمل أي حركة غريبة مهما كان هو منو وعلاقتك بيهو شنو وحتى لو ابوك حاج القسم تجي توريني ليهو
بركات فهم كلام الضابط كويس وقال ليهو فهمتك فهمتك واتفقنا
_ما تقول انت مرقت من التهمة دي وتعال شوف المحضر دا مثبت فيهو الخاتم انو دليل ضدك يعني في اي وقت ممكن ادخلك السجن فياريت تكون عند حسن ظني فيك
_لا لا ما تخاف والله اعمل القلتو لي بحذافيرو
وبركات مرق فرحان انو ما اتبهدل وانسجن زي المرة الفاتت ولا في زول غير الضابط والكاتب عارفين قصة الخاتم
الجزار لسة يتحلف ويتوعد ومرات يبكي من القهر وحاج القسم ملازمو من الديوان ما بفوت مع انو ما صاحبو شديد لكن متأثر بكتلة أيمن دي وما أيمن بس حتى شايل هم الحلة البقت دم في دم دي والاسباب لا معروفة ولا اظنها لو انعرفت بتكون مقنعة اول حاجة بلة ود الجيلي دا انكتل مالو وفي شنو وعشان شنو وبعدو حمد البوليس السري الغريب من الحلة دي برضو سبب كتلتو شنو ؟ وتاني أيمن دا كمان ولا عندو شدايد في حالو الا سكرو وسهرو وصياعتو وقعد يفكر حاج القسم ساي ومسهي بعيد وفجأة انتبه وقام علي حيلو زي القرصتو حاجة وللا طعنتو ابرة في قعدتو وطوالي لبس مركوبو ومرق من الديوان فات بيتو كايس النور اتذكرو فجأة لمن قال ايمن في سهرو وسكرو
وصل البيت ولقى بركات يادوب جاء داخل البيت وعارفو ساقوهو للتحقيق سألو قال ليهو تحقيق عادي عشان انا صاحب أيمن قال ليهو الحمد لله اها والنور اخوك وينو ؟
_والله يا ابوي انا جيت هسي دخلت قدامك وما لقيتو بكون مرق ساي وللا في ديوان الفراش
_في الديوان مافي هسي انا جاي منو وشوفتي ليهو اول امبارح في المقابر امرق ناديهو لي
بركات مشى بيت ناس عادل طوالي ما لقاهو معاهو ولا عادل شافو لكن قال ليهو امكن يكون مع سعيد
وفعلا بركات ماش بيت ناس سعيد لقاهو جاي بالترتر مع سعيد من الحواشات ونزل منو قدام البيت وقبل يدخل بركات كورك ليهو ووقف سعيد في الطريق سلم عليهو وعصر يدو قوي باليد الفيها الخاتم سعيد شاف الخاتم لكن زي الما شافو عادي كان وعصر يد بركات وقعد يضحك وقال ليهو انت ود متين يا بركة عشان تعصر لي يدي كدا
بركات عرف سعيد ما ليهو أي علاقة بالخاتم مشى لحق النور كان واقف ليهو قدام الباب وبرضو سلم عليهو ومساااافة ماسك يدو والنور قال ليهو شنو الخواتم دي خطبتا وللا شنو وعرفو ما عندو علاقة بيهو ارتاح نسبيا وقال الحمد لله والاتنين ديل كان اكتر واحد شاكي فيهم والاتنين مرقوا منها
قال للنور ابوي يفتش ليك من قبيل
النور سنتت وقال ليهو مالو ابوي دا ياخ ؟
قال ليهو خش شوفو وانا مشيت ليك في ديوان عادل رسلني هو قال لي افتش ليك
النور تاني قعد يسنتت ويطنطن وقال لبركات والله حقو الزول يرجع ما يخش زاتو هسي يشبكني السهر والسكر وووو
في وقفتهم ديك حسن قفل الدكان وجاء يشيل الغداء عشان يمشي بيهو الديوان
النور دخل معاهم وابوهو كان في الاوضة القدامية الجمب الديوان قام كورك للنور قال ليهو تعال دايرك قبل تخش الديوان
النور فات ليهو قرفان ومدنقر
بركات مشى ديوان الفراش عشان يسلم بالخاتم علي الناس ويشوف البستغرب منو قبل يدخل الديوان كورك ليهو المكاشفي جاء بعمودو على الديوان
بركات رغم انو ما شاكي في المكاشفي وواثق انو مستحيل يكون هو الكاتل بقى متردد هل يسلم عليهو وينبهو للخاتم بطريقة غير مباشرة وللا لا بينو وبين نفسو قال لا ومستحيل افكر حتى مجرد تفكير في اني اشك في المكاشفي وللا عمر لكن اتذكر كلام الضابط القال ليهو انا بديك فرصة تفك فيها روحك واتذكر كمان لمن قال ليهو ما تستثنى اي زول حتى لو ابوك زاتو
المكاشفي وصلو وبركات طوالي سلم عليهو والمكاشفي انتبه للخاتم مستغرب وقال ليهو دا شنو دا
يتبع....
