#ظلال_الموت 12
مجاهد يوسف
النور قام بالليل مرق براحة براحة المرة دي حاج القسم ما صحى بيهو وعمل نفس الحركة حقت المرة الفاتت ختا ليهو مخدتين في سريرو وعملن زي الزول النايم وفات بيت سعيد سيد الترتر سعيد أكان منتظرو واول ما دخل النور لقاهو مصنقر في الحوش وخاتي عرقيهو قدامو ومعاو ايمن ود الجزار قعد معاهم وكبوا ليهو وشرب
عادل ما جاهم اليوم داك ولا لعبوا قمار شربوا واتونسوا شوية والنور قال ليهم ماشي البيت ، ايمن قال ليهو اها قبل تمشي ورينا اخبار الكشافة شنو ؟
قعد يضحك وقال ليهو شايفهم امس مجتمعين وكتلت حمد ود الشفيع دي محيراهم شديد وقالوا لازم يصلوا للكاتل ، قام سعيد قال ليهو اها المرة دي شاكين في منو ؟
قال ليو والله ما عارفهم لكن سامعهم بتكلموا عن حمد وقالوا بوليس سري
أيمن قال ليو والله الناس ديل شغالين بالفارغة وتاعبين روحهم ساي في الفاضي وعمر دا عامل فيها ولا ابو عرام وانا اصلي ما ردتو الزول دا
قال ليهم ما علينا منهم خليهم براحتهم بس زي ما قلت شغالين بالفارغة
سعيد قال ليهم والله انا بقول الناس ديل ما تستهونوا بيهم كدا وانا شايفهم كلهم فاهمين واحتمال كبير يصلوا للقاتل قبل البوليس
النور مشى البيت والمرة دي لقى ابوهو نايم ليهو في سريرو واول ما دخل ابوهو قام ليهو والمرة دي برضو ما اتكلم معاهو وقام فات بهناك علي سريرو
النور رقد في محلو ونام صحى قريب الساعة تسعة لمن جاتو الشمش وبعد استحمى مشى عديل علي ابوهو وقال ليو امبارح كان عندنا اجتماع يا ابوي
_ابوهو قال ليهو خير خير تب
_الاجتماع دا سري للغاية ياابوي عشان كدا انا ختيت المخدات في سريري
_ اللجتماع الامس خليو بس قبل كم يوم مرقت بالليل مشيت وين؟
_برضو كان عندنا اجتماع وفي بيت ناس عادل
_لكن انت ما مشيت ناس عادل . مشيت وين؟
النور نسى وكان متأكد انو مافي زول كان مراقبو قام قال ليهو لو ما مصدقني اسأل عادل
حاج القسم سكت وعاين في النور وقال ليهو يعني ما مشيت بيت سعيد
النور انخلع وقعد يتمتم واتكبكب ونكر حطب وقال ليهو مشيت ناس عادل البوديني بيت سعيد شنو
قال ليهو شفتك بعيني دي البياكلها الدود لمن دخلت بيت سعيد وهسي عشان تنكرك دا الا توريني الوداك بيت سعيد شنو ؟
النور لمن لقى ابوهو متأكد قال ليهو صاح يا ابوي لكن عندنا مهمة سرية ونحن محلفننا ما نتكلم بيها وسعيد زاتو مجند معانا
قال ليو سمح امش آ ولدي لكن تاني اوعك تكضب علي
النور فات مبسوط وشايف روحو اتحلا من ابوهو ولو مؤقتا لكن عارفو ما بخليو
عربية البوليس جات شاقة الحلة وهي طوالي بتجي لو ما كل يوم ما بتغيب اكتر من يومين لكن المرة دي جوا وما وقفوا الا في بيت حاج القسم وساقوا معاهم بركات الناس قايلنهم سايقنو عشان يحققوا معاو ويجي راجع لكن ما رجع ودخلوهو الحراسة متهم في كتلة حمد ود الشفيع والناس قعدوا يجقلبوا
المكاشفي وعمر وحاج القسم والنور وحسن وعادل كلهم جروا وراهم ومشوا ليهو في المركز وحاولوا مع الضابط عشان يفكوا وللا يوريهم سبب اتهامو
الضابط قال ليهم الزول دا متهم وحاليا بريء حتى تثبت ادانتو ونحن ما مسكناهو ساي لو مافي دليل ما مسكناهو حاج القسم قال ليهو الدليل شنو
الضابط قال ليهم لسة في تحقيقات وانا ما مخول اوريكم الدليل الا بعد انتهاء التحقيق معاهو لكن هو المتهم في قتل حمد ود الشفيع وقال ليهم ياريت ترجعوا الحلة ولو احتجنا ليكم بنستدعيكم
يتبع.....
