#ظلال_الموت 7
مجاهد يوسف
عادل المتهم الأول في نظر حاج القسم وعمر لكن بركات والمكاشفي ما معاهم في الكلام دا عشان قالوا ما في حاجة بتخلي عادل يكتل بلة ود عمتو خاصة العلاقة بيناتهم كانت زي العسل وعادل ايام البكاء في ديوان الفراش اكان حزنان شديد واتحلف ساي انو لازم ينتقم من المجرم وانو دم ود عمتو ما بروح ساي فاستبعدوا الفكرة لكن بعد اجتمعوا تاني وبرضو في بيت حاج القسم عمر اقنعهم بإنو أي متهم بريء اكان ما ثبتت عليه الإدانة وبالدليل
بقت الخطة كدا مراقبة عادل مراقبة لصيقة شديد ولازم واحد منهم او اتنين يصاحبوهو صحبة قوية ويبحتوا ليهو في الماضي بطريقة ما تخليهو يشك انو مستهدف او مشكوك فيهو وما دايرين زول من الحلة يعرف انهم جاريين وراء القضية لا بقريب ولا بعيد
البوليس قفل القضية بعد حققوا مع الناس كلهم ومع أي زول كانت بتربطو علاقة بالمرحوم. لكن ما لقوا أي طريق او طرف يمسكوهو قاموا دونوها ضد مجهول وتم قفلها نهائي والجيلي وزينب حمدوا الله على الجاهم وكل يوم يدعوا فيهو انو الله ينتقم ليهم من كاتل ولدهم بلة واتحسبنوا واحتسبوا
المجرم التاني في نظر حاج القسم والشباب المعاهو عبد الغني الجزار أو أيمن ولدو واحد منهم لكن الاتنين مستهدفين من جانبهم
بعد ما حددوا التلاتة ديل قام حاج القسم قال لبركات انت عشان أيمن صاحبك شديد عليك انك تتقرب منو اكتر وأكتر وتصاحبو شديد جدا وتحاول انو يثق فيك شديد وتدردقو في الكلام لانو لو كان ليهو يد او هو الكاتل مصييرو يغلط او يسهى ويعتر في الكلام لانو كاتل الروح كلو كلو ما بروح قال ليهم تمام دي خلوها علي تب تب ولو هو بإذن الله أجيب ليكم قرارو
عمر والمكاشفي عليهم بعادل حاج القسم قال ليهم وانا معاكم وكل مرة نجتمع هنا ونشوف وصلنا لشنو ونتفاكر
حاج القسم ما كلم بركات واصحابو بالنور ولدو يوم الحادث وخوفو البدل علي انو وراو سر وقال في نفسو النور دا علي انا براي
مرت الأيام وبركات مشى قعد ليهو كم يوم في الخرطوم ورجع الحلة ويوم الصباح مرق من البيت ماشى دكان علي مرسلاهو امو يجيب ليها حاجات للبيت لاقتو طيبة في الطريق واقفة جمب الدكان وقفة غريبة زي المنتظرة ليها زول ولمن شافت بركات فرحت وقالت ليهو ود حلال يا بركات دايراك تجيب لي معاك كذا وكذا من الدكان وهاك دي القروش قال ليها مالك ما جبتيها براك قالت ليهو في واحد غريب في الدكان وبشاغل وأيمن نومو تقيل أبى يقوم يجي الدكان قال ليها عم علي وين ودا منو الغريب دا وكمان قليل أدب ورح معاي انشوفو بشاغل كيف عشان اطبز ليهو عينو قالت ليهو ما بعرفو جاء من وين ومافي داعي امشي معاك بستناك هنا بس انت جيبهن لي قال ليها سمح
دخل الدكان لقى ليهو شاب طويل وعريض ووجيه وبشوش يتضاحك ساي اول ما دخل بركات الدكان الشاب الغريب ابتسم ابتسامة عريضة وقال ليهو اهلا اهلا مرحب حبابك حبابك وعاين في بركات مسافة وقال ليهو النور ود حاج القسم ببقى ليك شنو ؟
بركات صاري وشو ما طرحو نهائي وقال ليهو انت بتعرف النور ود حاج القسم ؟
قال ليهو كيف ما بعرفو جاني هنا مرتين
قال ليهو انت منو زاتك والجابك هنا شنو وعم علي وين ؟
قال ليهو علي خالي قاعد وانا ود اختو باللفة كدا من حلة تانية أمي وخالي علي في الحساب اخوان امها بت النجيض ود..
بركات قال ليهو خلاس خلاس داير تحكي لي قصة حياتكم وللا شنو لا نجيض لا ني ادينا كدا وكدا وكدا خلينا النمشي ما فاضي ليك
الغريب سكت مسافة وبإبتسامة قال لبركات العفو ياخي ما قصدي والله بس انت سألتني وحبيت اوضح ليك بس وأنا اسمي حمد ود الشفيع انت منو قال ليهو ببرود بركات
_ود حاج القسم ؟
_اي ولد حاج القسم
_شفت انا من الشبه ساي عرفتك
_ شفت اي شاطر شاطر يللا مشينا
وشال حاجات طيبة وحاجاتو ومرق ومشى معاها في الطريق يتونسوا لمن وصل بيتو اداها حاجاتها وباقيها ودخل
طيبة عجبت بركات شديد بت سمحة بالجد ومؤدبة وهفت ليهو يسألها من بلة لكن قال لا بس عجبتو بعد ادى امو الحاجات مشى قعد في الديوان وشغل المسجل وقعد يفكر فيها ساااي وبعد مسافة خلاها ومسك في تفكير تاني في حمد ود الشفيع دا اللقاهو في دكان علي ، وجاء التور الديوان قفل المسجل وقال ليهو جنك اغاني حقيبة يا بركات وطلع الشريط ركب شريط عثمان حسين وقعدوا يتونسوا
حاج القسم من اليوم داك القعدوا فيهو آخر مرة قبل بركات يمشي الخرطوم وهو يراقب في النور من غير ما النور يحس بيهو ونهائي ما سألو من يوم الكتلة كان وين لمن النور اطمن وقايلو نسى
ويوم بالليل زي الساعة حداشر كدا حداشر ونص حاج القسم بنوم بدري بعد العشاء طوالي واليوم داك نايم في الحوش وهو ما نايم بالحيل لكن عامل نايم جاء النور زي الداير ليهو موية من الزير وعاين في ابوهو مسافة ومرق فات في ليلو داك وما فتح الباب تلب بالحيطة ومشى هناك لمن وصل دكان علي كتل ملف مع اللفة وابوهو القسم في قفاهو قاطرو من بعيد والنور فات هناااك ودخل بالزقاق الجمب بيت عبد المعطي الأذان ، حاج القسم خلاهو ورجع قال بعد يجي بقررو وبعرفو فات وين
بعد شوية وبعد اطناشر حاج القسم يسمع سيييك باب الجزار وبعد سييك معاهو طق
قال الباب دا انفتح لبد قبلو ورخى اضانو ويسمع صوت زول ماشي جاي بعند بيتو مرق لقاهو دا ايمن ودعبد الغني الجزار جا ماشي بعندهم وبرضو كتل الملف داك ومرق وراو وشافو لمن دخل بالزقاق رجع سريرو وصنقر يسبح منتظر جية النور ، لكن النوم غلبو رقد نام
يتبع....
