#ظلال_الموت 15و16
مجاهد يوسف
النور نايم ولا هاميهو شي وحسن صحاهو بعد الساعة عشرة كان مارق بدري علي شغلو وما مشى مع ابوهو ولمن لقى النور قاعد وابوهو مافي قال ليهو المقعدك هنا شنو ومالك ما مشيت مع ابوي ؟
قال ليهو امش اعمل شنو يعني طليع ما بطلع واصلا هو لو ما ليهو يد في الجريمة دي ما قبضوهو وسجنوهو
حسن قال ليهو يا دمك ياخ والله انت زول كعب
_كعب كعب سمح إنت، واخوك بركات دا الوحيد المتهم وبالدليل كمان والعود لو ما فيو شق ما بقول طق
_والله يا النور انت من باريت السكر والقمار والصعلق البتساهر معاهم ديل بقيت ماك نافع ولا فيك خير
_أرجل منك والسكر حق الرجال
_يمين لو ما الوضع النحن فيهو دا ولو ما بعاين لأمي وابوي ديل أخت فيك دقة لمن تعرف منو الراجل فينا. كمان جابت ليها تحدي ورجالة ؟
حسن غاظو النور وبرود النور وقلة أدبو لمن دمو فار بس زي ما قال عاين للظروف وامو وابوهو قام طوالي طلع مشى على المركز يشوف ابوهو داير يعمل شنو
بهناك حاج القسم وعمر والمكاشفي مشوا ليهم لمحامي ووروهوا القصة من طق طق لحدي السلام عليكم وعملوا ليهو التوكيل وقال ليهم خلاس بعد كدا انا بتابع معاهو وبمشي ليهو اليوم ازورو واعرف الحاصل منو هو واحضر التحقيق معاهو
حسن جاء المركز ما لقاهم ولا خلوهو يقابل بركات أخوهو مرق برة قعد منتظر جيت ابوهو ومحل ابوهو فات ما كان عارف عشان يمشي يلحقو
أيمن ود الجزار جاء البيت لقى طيبة تبكي وما كان عارف البينها وبين بركات مع انو بركات صاحبو لكن اصلو ما وراهو خاف يقول مصاحبو عشان اختو وللا يخسر صداقتو معاهو بس كان حاسس انو في شي لكن ما عارفهم بحبو بعض
قال ليها مالك بتبكي ها ؟ والشاغلك منو تاني
_مافي زول شاغلني ولو في زول ما بكلمك بيهو كفاية حمد المات دا
_هوي اوعك تفتكري اني كتلتو عشان انتي قلتي لي قاعد يشاغلك
_نان الكتلو منو والله انا يوم كلمتك كنت دايراك توقفو عند حدو بس
_هو انا لحقت ؟ انتي موش كلمتيني بالليل وانا قلت ليك بكرة بأدبو اها في نفس الليلة ديك هو انكتل وانا من سريري ما قمت كنت نايم ، اوعك تقولي كلامك دا بجيب لي مصيبة
_يعني انت ما سألتو ؟
_يا بت انتي مجنونة في راسك دا انا ما لاقيتو اصلا اسأل لي زول مكتول كيف ؟
_والله انا عارفاك ما بتكتلو بس خايفة يتهموك ويسجنوك زي بركات ود القسم
_انتي بس اقفلي خشمك دا لانو كلامك دا بضيعني وانا من البيت دا ما مرقت اليوم داك مع اني كنت محروق عليهو ولو مرقت الزمن داك كنت بكتلو صحي صحي لانو يستاهل الكتل
حسن انتظر قدام المركز لقريب العصر وابوهو ما جاء ولا المكاشفي وعمر قام رجع البيت لقى ابوهو قاعد في البيت والنور مافيش
بركات في السجن منتظر التحقيق معاهو وزهجان وقرفان من الحبس ومتضايق ضيق شديد وكان السجن ملان حرامية ومجرمين فيهم النايم ديمة وفيهم المقبل علي الحيط ومقلق وفيهم الراضي بمصيرو وفيهم المتعود ويتضاحك ويتونس
وهو مرات ينضم ومرات يرقد ويقبل على الحيط يفكر ويتذكر في ساعتو اللقوها في محل الحادث دي جات كيف والعندو مصلحة منو وبقدر يدخل بيتهم ويشيلها ويكتل حمد ويرميها عشان تبقى دليل ويورطو ، فكر في أي زول بتربطو علاقة بيهو قريبة وللا بعيدة بس ما قدر يحدد زول
المكاشفي وعمر نفس الطريقة قاعدين براهم يفكروا وعمر قال في واحد مستفيد من الجريمة دي لانو ضرب عصفورين بحجر واحد وشال من دربو حمد وبركات مع بعض بس هو منو والفايدة شنو من شيلتهم من دربو وشنو الرابط الكان بربط بركات وحمد مع بعض
المكاشفي قال لعمر معقول تكون طيبة
_طيبة ؟
_اي طيبة بت الجزار بركات ما قال بحبها ؟
_أيوة كلمنا لكن الدخلها هنا شنو ؟
_ياخ تتذكر لمن بركات قال لينا لقاها واقفة برة الدكان في الشارع ومشى جاب ليها هو الحاجات من الدكان ؟
_لا لا انا اول مرة اسمع الكلام دا
_ياخ اول ما جاء حمد الحلة بركات ما قال لقاها واقفة برة وفي واحد غريب في الدكان
_انا ما حاضر الكلام دا كدي احكيو لي من الاول
_انا بحكيهو ليك لكن متأكد انك حاضر يوم كلمنا بيو
المهم الزول دا قال يوم جاء من الخرطوم مشيتو الاخيرة دي وقال مشى الدكان ولقى طيبة واقفة منتظرة زول يجي يجيب ليها الحاجات الدايراها وجاء هو قالت ليو في واحد غريب وبشاغل
_ايوة ايوة صاح اتذكرتو
_عارفك انا ومتأكد كنت معانا
_يللا كدا الموضوع شبه اتضح بس معقول حمد يكون داير طيبة والزول الكتلو دا عارف انو دايرها وكمان عارف بركات دايرها عشان كدا كتلو عشان يبعدو منها ورمى بركات في الجريمة وبرضو عشان يبعدو منها عشان الجو يخلى ليهو ؟ لا لا ياخ ما اعتقد
_ما تعتقد شنو ؟ براك قلت في الجرايم ما تستبعد شي، تتذكر؟
_اي والله ما تستبعد اي حاجة وربنا يضكب الشينة بس
عادل سافر الخرطوم وابوهو عندو مربوع طقاو باعو وشال القروش قال داير يشوف ليهو عقد عمل في الخليج وللا يسافر مصر ومنها يتخارج اوربا بأي طريقة
