《3》
مشت جود خطواتها للمربوعه بكل ارتباك .. لما وصلت وقفت قدام الباب تشبح في المربوعه تدور فيه .. القتها فاضيه .. جود مستغربه و قارنه حواجبها ..
جود : وين اختفى هدا ؟؟
مراد من وراها بصوت رجولي حاد : اناا اسف كنت ..
قاطعت كلماته شهقت جود و هي مخلوعه تلفتتله و
قالت: خلعتني يخلع ف....
سكتت جود تتأمل في مراد و عيونها قلوب قلووب ..
مراد قعد يشبحلها و قايم حاجبه فوق قريب بيلصق في شعره .. ملامحه كانت رجوليه .. وقفته ..ساعته ..لبسته اللي ع الاسود .. طوله و جسمه الرياضي ..لحيته ..حتى من رموشه كل هالتفاصيل خلو جود تحبه من النظره الاولى ...
مراد : انتي جود ..
جود في داخلها : آه من جود و حياة جود و قلب جود اللي بيطلع من مكانه ياحليييييلي محلاه .. ومحلا اسمي بصوته .. و نبرة صوته .. ووووه مني ... وووه..
مراد يشاور بيده قدام عيونها : جود انتي ..
جود بعيون سرحانه و صوت خافت : جود .. هكي اسمي حلو هوا ..
مراد قرن حاجبه : نعم ؟..
جود مزال تشبحلا و سرحانه فيه تقول اول مره تشوف راجل ...
بينما مراد في داخله : ان شاء الله غير ماهي هادي .. شكلها مريضه ولا شنو عندها عله في عقلها .. و بعدين خيرها هكي بيبي فيس .. وجهها تقول بنت 16 .. لالا اكيد اختها الصغيره .. بس تقريبا ماعندها اخت ..
مراد بصوت عالي : وين اختك جود يا ماما ..
جود هني الجنون كلهم نقزو فوق راسها زي اي بنت في عمرها ماتحبش منو يعاملها على انها طفله ..
جود فتحت عيونها على وسعهم : اني جود .. و مانيش ماما ..
مراد في داخله : زممرر .. طلعت هي ..
جود مدت يدها : تفضل ..
خش مراد و هوا متلخبط و حاط في باله انه بيرفض هكي من غير اي سبب .. ما استهضمهاش ..
قعمز مراد و قعمزت جود مقابلته .. وحطت عليها مخدة الصالون و حطت يدها على خدها و قعدت تشبحله و عيونها فاضحاتها ...
مراد بلا مبالاه : كيف حالك ..
جود و هي هايمه : كويسه ..
مراد : طبعا اني مراد .. امي شافاتك في عرس و عجبتيها و ..
جود ضحكت : شافتني نرقص هههههه
مراد وجهه قعد احمر و سكت ...
جود : كمل خيرك درت فرينوو ..
مراد تنرفز من اسلوبها : استغفر الله .. المهم بنحكو شوي و نشوفك و تشوفيني و بعدها نفكرو و نردو على بعضنا ...
كمل مراد في داخله : مابنوافق و مابناخد هالهبله..
جود ابتسمت و قعدت تحرك في كراعها يمين و يسار بحركه طفوليه ...
مراد تنرفز و بعصبيه قال : ممكن تبطلي تحريك رجليك .. مانحبهاش الحركه اهيا تنرفز فيا ..
جود ببتسامه : حاضر .. ماما هكي قاتلي مفروض المرا تسمع كلام راجلها ..
مراد : غير خلي يولد باش نسموه ..
جود : شنو ..
مراد : احني مزال ما انخطبنا باش نكون راجلك .. مزال ع البر ..
جود تضايقت من كلامه حست انها ماعجباتاش ..
مراد : تباني اصغر من عمرك .. و حتى عقلك اصغر من عمرك ..
جود ضحكت : ايه ديما يقولولي عقلك اصغر من عمرك😁
مراد في داخله :لاا و مزال تعاود فيها ..
