《6》
مراد : شنوو .. 17 .. اكيد تبصري ..
عزيزه : عادي يا ولدي .. بنت صغيره و تربيها على يدك زي ماتبي ..
مراد : انربي منو يا امي .. اني بنتزوج بنتزوووج مش فاتحها روضه ..
عزيزه : عادي يا ولدي اهو اني تزوجت بنفس عمرها و اهو شوفني كيف ربيتكم و كبرتكم ..
مراد : هداك جيل و هذا جيل يا امي .. انتي كيف تديرلي هكي .. كيف تدسي عني شي زي هدا كييف..
عزيزه : توا هالشي الكبير اللي دسيته .. بالعكس مفروض تفرح ..
مراد : بنفرح لشنو .. نفرح لاني بنتزوج مراااهقه عيله .. تي هادي كان جت ولد راهو حتى شناباته قاعدات متاعات الدار .. تقوليلي نفرح .. اني نبيها عمرها مناسب ليا رازنه عاقله نأسسو اني وياها أسره و عيله تكون سند ليا في هالحياة و نكون سند ليها ..نفهم تفكيرها و تفهم تفكيري .. مش عيله جايبتها ليا نقعد غير نربي و نسايس ... استغفر الله .. ربي يسامحك يا امي و خلاص .. المشكله ياريت عرفت قبل ماتوصل لخطبة التريس و يعطو كلمه قدام الناس ..كان هذا والله رفضت و فسخت .. ربي يسامحك و خلاص ..
ناض مراد و طلع برا الحوش ..بينما عزيزه تاكل في روحها على اللي دارته خايفه انه ولدها ما ينسجمش مع جود و يحط الحق عليها ..
...................................
جود متكيه على سريرها و تفكر في احداث يومها زي عادتها كل يوم قبل لا ترقد .. تقعد تلوم في روحها على عقليتها و اسلوبها مع الناس .. فكرت في اختها و الكلام اللي قالاته ليها و لأنها ماتحبش ترقد و حد من عيلتها زعلان .. بعتت مسج لاختها تأسفت منها على اللي صار .. وصل المسج لجيداء بس جيداء قراته و مسحاته و قفلت فونها و مابت اترد و تغطت و كملت نومتها ..
و جود لما القت اختها ماردت عرفت انها مزال زعلانه منها .. و لحظات و هف على بالها مراد ..قعدت تتذكر في يوم المقابله و تفاصيل وجهه اللي حفظتهم ..
جود.: هوفففف ..امتى بنتزوج و نقعد نصبح و نمسي على وجهه الحلوو .. نطلعو و نتدهورو و نديرو كل ما في خاطرنااا .. متحمسه لحياتي معاه .. يااارب نبي حياتي تكون عسل و سكر يارب ...
قعدت جود على هالحال لين رقدت و هي في بالها انه الحياه معاه بتكون ورديه و عسل و سكر و تشيز كيك ..
لكن للحياة رأي آخر .. و لا عمرها كانت الحياة عسل و لا عمرها بتكون طعمة العسل لذيذه لو عشنا حياتنا كلها و احني نشربو فيه .. ضروري من ملح الحياه اللي هما المشاكل لأنه لولا الملح ماعرفنا طعمة الحلاوه ..
................................
ناضت جيداء من الصبح و هي تجهز للعزومه اللي بتديرها لي جاراتها اللي في العماره ...
سالم : اليوم يوم العزومه ..
جيداء : ايه .. ع الساعه 5 بيقعدو يجو الجارات ..
سالم مرتبك و متلكك ..
جيداء : فيه شي ..
سالم : لالا .. بس بنسأل عزمتي كل الجارات ..
جيداء : ايه كلهم .. معادا الجديده اللي قلتلي ماتكلميهاش ..
سالم : آآ .. به .. اي صح ردي بالك تعزميها مرا مش كويسه .. تبي شي ؟؟
جيداء :لا سلامتك ..
سالم : تمام .. طالع اني ..
