《13》
كمل عادل غداه و قعمز هدرز شوي و ناض عشان بيروح ..
عمر : مش عارف كنك مستعجل ..
عادل : هداكه هو خلاص عندي ما اندير ..
عمر : باهي اقضي حاجتك و تعالى ارقد هناا..
عادل : لا عااد ياراجل خلاص بارك الله فيك ..
عمر : باهي هات رقمك انت غريب هنا مرات تبي شي حاجه ولا مرات تريح ..
عادل : هههههه وين بنريح هي كلها ليبيا نلقى من نسأل و نلقى من يساعدني .. بس مع هدا توا نسجل رقمك و اول ما نطلع من اهني ندور فرع ليبيانا و لا مدار نشري منهم شفره و نتصل بيك طوول ... قبل حتى خوي ..
عمر : باهي هي سجل عندك ..
سجل عادل رقم عمر و ودعه بعد ما خلاه يحلف انه يجي يتغدى عندهم غدوه ..
......................................
روح مراد للحوش القى شباب يركبو في اللامبات و الزينه على حوش رواسي .. تلفت القى بوها حاط يده في نصه و يشبحله .. مراد استفزاته النظره قدم بخطوات سريعه جيهة مسعود و عيونه ينبؤو بطريحه جاياته في الطريق .. بس مسعود اول ما شافه جاي جيهته و قرا عيونه خش لحوشه يجري ..
مراد وقف و هوا مكور يده لين الدم انحبس ..
مراد : جباان .. خززي اشكالات مقلبه ..
رجع مراد لحوشهم و تلفت للزينه مره تانيه : معاه الحق خوي يسافر .. اني لما شوفت الضي و الزينه قلبي انعصر فما بالك هوا ..
خش لحوشهم سمع صوت تليفونه يضرب برقم غريب ..
مراد: الوو .. منو معايا ..
عادل : عاادل ..
مراد : اووو عدلوو و اخيرا تصلت و تذكرت عندك عيله ..
عادل : والله كيف شريت شفره .. انت تاني واحد نتصل بيه ..
مراد : و منو الاول .. امي ..
عادل : لالا.. عمر واحد من هني من بنغازي تعرفت عليه من جديد ..
مراد : وصلت لبنغازي انت ..
عادل : اايه .. القيت روحي فيها ..
مراد : كويس تمام ..المهم مرتاح ..
عادل : الحمدلله مرتاح .. الراجل كويس و اكرمني و ضيفني في حوشه .. وتوا بندور فندق نحجز فيه .. مع انه أصر علياا نبات عنده بس رفضت ..
مراد : و علاش رفضت .. انت البلاد ماتعرفش فيها حد..
عادل : يا راجل احني ليبيين و نعرفو بعضنا و نعرفو وضعنا المادي و السيوله اللي مافيش .. هوا راجل صاحب صغار نمشي نزيد اني انتقل عليه ..
مراد : صدقت والله كلها تعاني ..
سكت عادل في قلبه سؤال يبي يسأله ..يبي يسأل عن رواسي او حتى عن فرحها بدا ولا مزال .. قعد متردد لين تكلم مراد اللي حس انه عادل يبي يسال عن رواسي .. ولأنه مايبيش يقوله انه فرحها بدو فيه .. تكلم مراد و دار روحه مشغول ..
مراد : يلا يا عادل .. نتكلمو في وقت تاني .. خليني انطمن امك توا .. سلام ..
عادل فهم خوه : سلام ..
سكر عادل و الدمعه في عيونه تخايل حوشها مليان بالناس و الزينه و الضي .. و الشارع كله ملتم و يعول معاهم .. حس بالحسره و ولع سيارته و قعد يلف و يدور في الشوارع من غير وجهه محدده ..
....................................
خش مراد لأمه و طمنها على عادل و سجللها رقمه باش تتصل بيه امتى ما تبي .. دقيقه و ضرب تليفونه مره تانيه و القاها جود ..طلع للجنان و رد و هوا مبتسم ..
