《19》
رجعت ناديه لاختها و حكتلها شنو قال عادل .. انصدمت رواسي و انهارت و زادت نفسيتها تعبت .. حست انه الحياه مسكره ابوابها في وجهها .. و انها عمرها ما بترتاح .. حطت في بالها انه عادل رخى بيها .. و انه مش حيرضى ياخدها لانها مطلقه ..
قعدت طول ليلتها و هي تبكي .. زاد كرهها لبوها و امها .. وبدت تكره في عادل لانه خلاها بعد ماكانت فرحانه انها بتتزوجه و بتكون ليه ..
....................................
خليفه : جود .. هيا روحي مع مراد .. قعادك هني ما منه فايده ..
جود : لا يا بابا نبي نقعد ..
زينب : مايجيش يابنتي غلط قعادك اهني .. بري روحي و غدوه تعالي ..
جود : بس يا ماما ..
قاطعها مراد : يلا .. قوليلهم تصبحو على خير
جود ماقدرتش تناقش مراد قعدت تخاف منه .. ودعت امها و بوها و مشت مع مراد ...
طول الطريق و هي ساكته ماقالت ولا حرف لين وصلو لشقتهم ...
خشت جود للدار بسرعه من غير حتى ما تتلفت لمراد .. رفعت حوايجها و خشت للحمام تبدل .. مراد عرف من حركتها انها زعلانه ...
غير حوايجه و قعمز على السرير ...
اول ما طلعت كانت لابسه ماليه فوق الركبه من غير كمام ... وقفت ع المرايا تسرح في شعرها .. انتبه لأثر اظافره في دراعها لين الدم طالع .. وجعه قلبه عليها ..
وقف وراها و حضنها من ورا .. جود وقفت تسريحها لشعرها و الدموع محبوسات في عيونها ..
مراد دفن راسه في رقبتها و شعرها .. و بعدها قام راسه و قعد يشبحلها في المرايا .. شاف عيونها مدمعات .. لفها ليه و قعد وجهها مقابل صدره .. ماتبيش ترفع راسها ليه .. نزل راسه و حط جبهته على جبهتها ..
مراد بصوت هادي : جودتي .. زعلانه ..
جود سكتت ...
مراد خدا نفس و كأنه يبي يشم نفسها و يتنفس بيه ..
مراد : بنيتي ..
جود بصوت موجوع : تقولش بنيتي .. بابا عمره ما وجعني ..
حس مراد بشعور مختلط مابين غيره من مدحها لبوها و مابين وجعه عليها ...
مراد : جودي انتي تصرفك كان غلط .. و واجب عليا نوقضك .. مافيش مرا تقول لراجلها انت شنو تحساب روحك .. اني بس لاني نعرفك صغيره و مزال ماتفهمي .. بس لو وحده ناضجه و فاهمه قالتها ليا .. مش حنروح بيها معايا .. حتبات في حوش بوها ..
جود قامت عينها فيه ..
مراد قعد دقيقه يشبح لعيونها و هوا ساكت ..
بعدها مسكها من يدها و قعمز بيها ع السرير ..
مراد : اني عارف انك مستغربه من تصرفاتي معاك .. و هدا شي طبيعي فرق العمر بيننا كبير .. التفكير و العقليه تختلف .. اني موسع بالي معاك و مستعد نصبر .. لين تكوني زي مانبي اني ..
جود : انت تبي تغيرني .. لو كنت تحبني كنت تقبلتني زي ما اني ..
مراد : و اني متقبلك .. بس الاحترام خط احمر .. ضروري تعرفي كيف تتكلمي مع زوجك .. احني مش ديما بروحنا .. حنديرو صغار و حيشوفونا كيف نتعاملو مع بعضنا .. و على ضوء هالمعامله حيتربو هما .. اليوم قلتيلي الكلمه هادي غدوه تقولي اللي اكبر منها ..
جود : بس ..
مراد : عمرك سمعتي امك قالتها لبوك ؟
جود : لا ..
مراد : شوفتي كيف .. بالمقابل طلعتي انتي و جيداء بنات محترمات و اسلوبكم اسلوب بنات عيله محترمه..
