تزوجتها مراهقه

الفصل الثامن

《8》

طلعت سوسن من شقتها و هي متأنقه و واثقه انها بتلقى سالم يراجي فيها .. نزلت لوطه القت سالم واقف قدام باب العماره يستنى فيها .. سوسن تجاهلاته و لا كأنه موجود و لأن التجاهل يحرق قلب الراجل .. حس روحه سالم انه زي الحشره لانه حاول يكح ولا يدير اي صوت باش تنتبهله بس ولا كأنه موجود ..

ركبت سوسن في سيارتها و مشت في طريقها بينما سالم ركب في سيارته و لحقها .. يتصل بيها يلقى فيها مشغول .. سرع سيارته لين وصل جنبها القاها ماسكه تليفونها و تتكلم و تضحك و جوها حلوو ..

زادو اعصابه انحرقوو حس انها عايشه حياتها و مش مهتمه بيه ولا بالشي اللي كان بينهم ..
قعد وراها لين وصلت لعملها .. اول مادرست في البركيدجو نزل لعندها بسرعه و وقف قدامها ..

سالم : علاش هكي يا سوسن .. علاش تتجاهلي فيا و كأني حيط ..
سوسن ابتسمت ببرود : صباح الخير سالم .. كيف حالك ..
سالم: اي صباح الخير و انتي فايتتني ..
سوسن ببروود : علاش بنفوتك وعلاش بنتجاهلك .. مافيش شي يخليني ندير هكي ..
سالم : اني عارف انك زعلتي مني لاني ترددت لما فتحتيلي موضوع الزواج ..
سوسن ضحكت : هههههه .. تبصر ولا ؟؟..

سالم سكت يشبحلها مستغرب من ردة فعلها ..
سوسن ببرود :سالم راهو انت قطرة في بحر .. تمشي انت يجو غيرك عشره .. ياما منهم اللي يتمنو كلمه مني .. يعني توا من جدك بنبدا نتجاهل و نفوت فيك و مش عارفه شنو ههههههه
سالم : كيف ..
سوسن : يا سااالم يا جاري العزيز .. اني سوسن .. اللي تعامل في الناس زي شعر رموشها و الشعره اللي اتطيح من رمشي ولاااا تأثر فياا ولا نهتملها .. لانه حتجي وحده تملا مكانها و عندي غيرها يأذو غرضها و زياده .. يعني انت امس كنت مهم عندي و اليوم انت سالم جارنا و بس ..

سالم زادت ولعت فيه النار خاصة لما شاف البرود اللي في عيونها و في نبرة صوتها ..و زي أي راجل يكره انه يكون حاجه زايده في حياة اي بنت عنده ولو اهتمام بسيط بيها .. حس بانه زاد تعلق فيها و حس بدت وكأنها اكسجين ...
سالم : هكي .. بهالسرعه نسيتيني و اني اللي حبيتك ..

سوسن : الله غالب مافيش نصيب .. انت تبيني عشيقه و اني نبيك زوج .. ولا اني نرضى نكون عشيقه ولا انت تبي تكون زوجي .. معناها خلاص كل حد يشوف حياته ..
سالم : هكي بالسهوله هادي .. و لا كأني كنت ..
سوسن ببرود : للاسف ...
سالم: بس اني تعودت بيك تعودت بدلعك و ضحكتك و صوتك .. اني حاس نفسي مخنوق من غيرك اقسم بالله اللي قاعد يصير معايا اول مره نحس بيه .. سوسن انتي خذيتي عقلي .. سوسن انتي ..
قاطعاته سوسن : كلام كلام كلام .. اسفه بس اني نبي نرتبط بي راجل يفعل قبل مايتكلم .. اما هالكلام هذا احتفظ بيه لنفسك .. اني مايلفتنيش الا الراجل صاحب الكلمه المفعوله اللي رايه في يده اما اللي زيك سوووري يعني .. بطرف عيني مانشبحله ...