《9》
جيداء بنظرة استغراب : سوسن جارتنا .. اهو الحمدلله بتتزوج و بنفتكو منها .. عازمتني على حفلة خطوبتها و اني قلتلها لا .. نعرفك مابتخليني نمشي ولا اني نرضى ننزل لمستواها ..
سالم بدون وعي و كأنه يكلم في روحه: لااا .. مستحيل .. انخطبت رسمي ..
جيداء تشبح فيه باستغراب ..
سالم فاق على روحه لما شاف نظرة جيداء ليه ..
سالم : قصدي .. ماتوقعت وحده زيها تنخطب ..
جيداء بتركيز : كيف ..
سالم : قصدي استغفر الله مانبو نتكلمو عن الولايا .. بس هكي حسيتها خفيفه ..
جيداء : ما علينا المهم جاها نصيبها و نفتكو منها ..
سالم وقف : يلا اني بنخش انقيل ..
وقفت جيداء ..
سالم تلفتلها : مش شرط تلحقيني .. نبي نرقد بروحي مانبي دوشه ..
قعدت جيداء تشبحله و في قلبها حسره من تصرفات سالم الاخيره معاها ...
بينما سالم خش للدار و قعمز ع السرير و هوا منهار حط يده على وجهه ..حس الدنيا كلها ضايقه بيه .. جاب تليفونه ضرب عليها القاها مقفل .. لوح التليفون و قعد يفكر كيف بيتصرف مش مستوعب فكرة انه سوسن فاتاته بالساهل و انخطبت لغيره .. و لأنه الراجل بطبعه مايرضاش بالخساره ، و لأنه الراجل بطبعه ينسى اللي يفوتها بس ماينساش اللي فاتاته .. تسللت فكرة الزواج منها لراسه و بلا اراده منه قعد يخطط و يفكر كيف بيقدم ع هالخطوه الكبيررره اللي ما كان حاسبلها حسااب ...
برغم انه قدام زوجته ذمها و ما خلا ماقال عنها و بينلها انه قارف منها و من اخلاقها و هيئتها .. و زوجته زي بعض الزوجات تصدق في كلام زوجها و ما تدور خلف كلمات زوجها ... !
ما كانتش تتوقع جيداء انه هالتناقض بيكون في سالم .. بس للاسف قدر سالم يبني حاجز امان ليه بيش زوجته ما تشك و نجح في الأمر ..
.................................
كانت جود تبي ترقد بس خطر على بالها انها تبعت مسج شكر لي مراد .. كتبت المسج و بعتاته ليه ..
مراد كان متكي يفكر في امه و عادل و قصته مع رواسي و يفكر في جود و كيف بيتصرف معاها .. كان مهموووم زي أي راجل مسؤول عن عيله قبل لا يرقد ضروري يقعد يحسب و يخطط ..لحظات و وصله المسج ع الواتس ..
جود : مرحبا مراد 🤚
جود: نبي نشكرك ع الاكل و الشوكلاته😍
جود : اول مره نحس انه الحوت ليه طعم تاني 🥰
جود : و الشوكلاته طعمتها غيرررر بس لانها منك ❤
قراهم مراد و ابتسم بدون ارادته .. فكر شوي و بعدها رد ..
مراد: عفوا
جود قرت الرد و قعدت تراجي فيه يبعتلها كلام تاني بعد كل الكلام الحلو اللي قالاته ليه .. بس تفاجأت لما القاته سكر الواتس .. عرفت انه معادش بيبعتلها شي ..
حطت فونها ع السرير و حست بالقهره ..
جود : بعتتلا هلبا كلام .. يرد عليا بكليمه وحده بسسس .. اااخخخخ كان نلقى نرجع الزمن لدقايق بس والله مانبعتلا حاجه .. حححيي حسيت روحي خفيييفه ..اني علاش بعتتلا بسس .. والله كان من سمعه كلام نغسله بيه غسل على تجاهله ليا ... واااك مبرده ..
