《17》
فاق مراد في الصبح على حركة يد جود و هي تلعبلا على شعر لحيته .. مراد شبح فيها و ابتسملها ..
مراد : شنو علمتك اني ..
جود بصوت مبحوح : يقولو صباح الورد و ...
مراد ابتسم : وشنو ..
قامت روحها ليه و باساته ..
مراد : شطووره جودتي ..
جود : ايه شوفت كيف 😌
مراد : اليوم بنفطرو برا ..
جود قعمزت بحماس : بجديااات ..
مراد : ايه ..
نزلت جود من السرير و بعدها انتبهت لملابسها و تذكرت انها امس رقدت في الصاله و كانت لابسه قفطان ..
جود : ححي .. مش كنت لابسه ..
مراد قعمز و قعد يضحك ..
جود : كيف قدرت تقيمني .. و كيف قدرت تغيرلي .. ححي ..
غطت جود وجهها ..
مراد : ههههههه اول شي انتي خفيفه و دريه .. تاني شي انتي فقتي و اني نغيرلك شكلك ماكنتي واعيه ..
جود : مش متذكره ..
مراد غمزلها : امتى ماتبي انغيرلك اني في الخدمه ..
جود شبحتلا و ضحكت و خشت للحمام عشان تجهز روحها للطلعه ..❤
....................................
فاقت جيداء من نومها القت باب دار النوم مفتوح و سالم طالع مش في الحوش .. حطت في بالها انه مشى للعمل ما تحسابش انه من الساعه 3 ليل طالع من الحوش و ماشي لسوسن بايت عندها .. 💔
................................
سوسن مقعمزه تجهز في روحها عشان بيطلعو يفطرو برا ..
سالم : علاش مكتره مكياج ..
سوسن شبحتلا ع الجنب : و شنو الفرق بين هني و مصر .. و بعدين انت من لما خديتني خديتني هكي شكلي و هكي بنقعد و هكي عاجبني ..
سكت سالم يشبحلها و سوسن وقفت و حطت يدها على صدره خبطت عليه بهدوء ..
سوسن قايمه حاجبها : اني مش جيداء يا حبيبي ... ركززز مليح ..
ومشت و خلاته منزل راسه و ساكت ...
لبست ملابسها و طلعو هما الزوز يدورو في مطعم يفطرو فيه ..
وكالعاده ركبو قدام سكان العماره اللي مزال يتكلمو و مش عارفين السر وراهم .. و كل حد يقول اشاعه من جيهه ...و كتر الكلام على سالم بعد ماكانت سمعته زي المسك ...
................................
وصلو مراد و جود للمطعم اللي بيفطرو فيه طلبو الاكل و قعمزو يراجو ..
جود مبتسمه وتتلفت : المطعم حلوو و هادي 😍
مراد قارن حواجبه و مركز منو يشبحلها : معادش تتلفتي .. و ساوي وشاحك كويس شعرك قريب يطلع ..علاش مادرتي خلال ..😡
جود حطت يدها على فمها تشد في روحها عن الضحك : خلال شنو ..🤭
مراد : اقسم بالله كان ماتبطلي نقلب الطاوله على راسك..
جود تنرفزت : مراد خيرك انت .. شنو درت اني .. علاش هكي تبي تخرب عليا الطلعه ..
مراد : كان ماتبيهاش تخرب قعمزي و انتي ساكته ..و ماتتلفتيش و ماتضحكيش ..
جود : نظام صنم يعني ..
مراد : ايواااه ..🤨
سكتت جود و ربعت ايديها زي عادتها لما تزعل .. لين جي القرسون و حط الفطور ع الطاوله .. بدو في الفطور و جود تاكل و هي متضايقه مش حاسه بالراحه .. مراد مقيدها في كل حركه تديرها ..
لما كملو فطور و خلصو و طلعو و هما بيركبو في السياره شافت جود سالم مركب معاه سوسن اللي طبعا ماتعرفهاش .. و يضحكو و جوهم حلوو .. و يدور في مكان يدرسو فيه ... سالم ماشاف جود و كمل طريقه ..
