تزوجتها مراهقه

الفصل الثاني عشر

#تزوجتها_مراهقه

《12》

قروب روايات العنود Beba Pinkعلى الفيسبوك

عادل : اني وين بالضبط ؟؟
عمر : بنغازي ..
عادل مستغرب : بنغازي ؟؟؟
عمر: اهاا .. معقوله مش عارف وين انت ..
عادل: اني من طرابلس .. ولعت سيارتي و مانندري وين وصلت بيا ..
عمر : بالجوده بيك وصلت بيك عند هلك و ناسك .. شنو اسمك ..
نزل عادل من السياره و سلم على عمر ..
عادل : تسلم بيك اكتر .. اسمي عادل ..
عمر : و انا خوك عمر ..
عادل : تشرفنا خوي ..
عمر : هيا توا نا بنعدي قدامك و انت تبعني بسيارتك .. اهو حوشي قريب تاكل و ترتاح..
عادل : لا ياراجل والله ماصارت .. اهو تو نمشي لأي فندق نحجز فيه و ...
قاطعه عمر و حط يده على دراع عادل بقوته ..
عمر : فندق شنو يا را اللي بتحجز فيه و نا حوشي قريب من هناا ..
عادل : غير لا ياراجل والله مانبي نضايق حد تواا..

قاطعه عمر مره تانيه بصوت عالي : تضايقنا ..لا ما حبيتهش منك هذي .. الحوش حوشك و نحن ضيوفك ..
عادل منحرج : بس ..
عمر : عليا الطلاق انك جاي لحوشي ..
عادل: لا حول الله ياراجل ..
عمر : خلاص ولا كلمه .. نا قدامك .. هي ..

ركب عادل سيارته و تبع عمر في مسافه قصيره .. لين وصلو للحوش ..
كان حوش عمر بسيط و متواضع .. رحب ب عادل ترحيب حلو و دخله للمربوعه .. خشو صغار عمر اكبر واحد ثالثه اعدادي اسمه محمد .. سلم عليه و قعمز معاه .. بينما عمر طلع للمحل اللي قريب منهم ..

عمر سلم على صاحب المحل : خير يا احميده ..
صاحب المحل : خير يا عمر ..
عمر : بالله عليك بناخد منك بالدين جايني ضيف و نبي ننستر معاه ..
صاحب المحل : باهي بس حسابك زاد بكل را قريب بنسكره ..
عمر : تي كنك يا راجل جاينا ضيف استرني معاه و تو نحاسبك ..
صاحب المحل: باهي .. اتفضل ..

خدا عمر كيس و عباه جبنه و حليب .. الخ ..
طلع عمر من المحل و مشى لمكان ثاني خدا منه لحم و خضره بالدين ..و رجع للحوش و خش من باب المطبخ مايبيش عادل يشبحه ..

عمر حط الكياس ع الطاوله .. جاته ساميه زوجته ..
ساميه : من وين هذا كله ..
عمر : فيه ضيف معانا في المربوعه عديت للمحل جبتهن و جيت ..
ساميه : بالدين ..
عمر : اهاا.. اسمعي ديريلنا فطور سمح و غدا يستر .. هذا ظيف و عابر سبيل مانبش ينقصه شي .. و سكتي العويل بيش يرتاح ..
ساميه : حاضر .. باذن الله نكرموه و نضيفوه ..

طلع عمر و قعمز مع عادل و ولده محمد اللي قعد يهدرز مع عادل و انسجمو مع بعضهم ..
عادل : ما شاء الله من بكري يهدرز معايا لين انخلعت لما قالي عمره 15 نحسابه كبير..
عمر : خلاص 15 كبير .. 15 هذا عندنا راجل ..
عادل : ربي يحفظه ..
طلع محمد من جنبهم ..
عمر بصوت موجوع : قول ربي يشفيه ..
عادل : علاش؟
عمر : عنده القلب من صغره ..
عادل : لا حول ولا قوة الا بالله ..
...........................................
جود ناضت من غفوتها القليله اللي غفتها و دموعها ع خدها .. ماقدرتش ترقد او تبطل عياط ..
جود : امس كنت فرحانه انه روح بيا للحوش ماسكرتش ساعات الا و تعاركنا .. و شكلنا بنفسخوو ..
رفعت فونها و تصلت ب مراد و كالعاده ماردش عليها ..
رجعت حطت راسها ع المخده و قعدت تبكي ...