تزوجتها مراهقه

الفصل الخامس

《5》

كملت جيداء من مكالمتها مع امها اللي عرفت فيها اخر تطورات خطوبة جود .. حطت التليفون ع الطاوله جنب تليفون سالم .. شوي و وصل اشعار على تليفونه ..رفعت التليفون تبي تشوف منو القت تليفون سالم قافله برقم سري .. استغربت جيداء لانه مش من طبع سالم يقفل تليفونه ... شوي و طلع سالم من الحمام و القى جيداء ماسكه تليفونه و سرحانه .. خاف سالم و جي يجري رفع تليفونه من يدها ..

سالم : علاش شاده تليفوني .. شنو فيه
جيداء : جاك اشعار نبي نشوفه القيتك قافله برمز مرور ..
سالم : ايه قافله .. و اخر مره تمسي تليفوني ..
جيداء وقفت تشبحله مستغربه من كلامه : بس .. اني زوجتك ..قصدي مافيش بيننا ارقام سريه و هكي..
سالم : لاا فيه .. من اليوم فيه .. و لوسمحتي خليك زوجه مطيعه زي ماعرفتك و ماتتجسسي على حاجات غيرك .. و تذكري انه ربي قال "ولا تجسسوا" ..

مشى سالم و خش للمربوعه و قفلها وراه و خلا جيداء محتاره من معاملته ليها ..
جيداء بصوت واطي: نتجسس؟؟؟ .. شنو قصده .. و علاش بنتجسس .. و علاش قافل تليفونه .. استغفر الله ياربي بعد عني وساوس الشيطان ...

بينما سالم اول ماسكر الباب شاف الاشعار لقاه مسج من سوسن كاتبتله فيه انها مستاحشته ..
اتصل سالم بيها ..

سوسن بصوت دلع : سلووووومتي .. وينك .. بنموووت اني..
سالم بصوت مخلوع : شنو فيه ..
سوسن : مستاحشتك هلباااات .. و نبي نشوفك و توااا ..
سالم : خوفتيني عليك نحساب شنو صايرلك ..
سوسن : الااا .. مش صايرلي الا اني بي نشوفك و توااا تواا ..
سالم : كيييف ؟؟..
سوسن : فوق السطح .. اسبقني و اني نلحقك ..
سالم : بلاش منها يا سوسو توا من يشوفنا ..
سوسن : مش حيشوفنا حد ليل و العماره مسكته اكيد نصهم رقدوو ..
سالم : و اني شنو بنقوللهم في الحوش ..مش معودهم ع الطلعه توا ..
سوسن : حبيبي انت الراجل امتى ماتبي تطلع تطلع .. معقوله خايف من النعجه اللي عندك ..
سالم : خلاص باهي .. اسبقيني .. توا نجيك ..
سوسن : سلمه حبي ني ..

سكر سالم التليفون و قعد يفكر شنو السبله اللي بيطلع بيها ..
طلع للصاله القى جيداء مقعمزه و جنبها نبيل تقراله في قصه ..
سالم بوجه عبوس : هيا نوض يا نبيل ارقد ..ليل ..
نبيل : بس يابابا بكرا مافي مدرسه ..
سالم بصوت عالي : تناقش فيا مزال ؟؟

جيداء كلمت ولدها بصوت هادي: خلاص نبيل خش لدراك ارقد واسمع كلام بابا ..
نبيل : باهي .. تصبحو على خير ..

خش نبيل و سالم قعد يشبح لجيداء و وجهه قارف ..
جيداء انتبهتله : ان شاء الله خير يا سالم ..حسيتك اليوم مش على بعضك ..
انتبه سالم لروحه : شوي مشاكل في الشغل ..