" إني جاعل في الأرض خليفة "
إذا كان ربنا سبحانه وتعالى هيخلق سيدنا آدم عليه السلام عشان يكون خليفة على الأرض طيب ربنا سبحانه وتعالى خلق أدم في الجنة ليه من الأول ؟؟؟؟
علشان سيدنا آدم عليه السلام مكنش جاهز لسه انه يبقى خليفة
يعني كان لسه فيه شوية حاجات لازم يعملها ويتعلمها قبل ما يكون جاهز انه ينزل الأرض ويبقى خليفة لله في الأرض
كان ايه اللي ناقصه؟
كان ناقصة حاجة مهمة جدا ( ودي سبب خلقه أصلا )
" سيدنا آدم عليه السلام كان ناقصة انه " يعصي ربنا
؟؟؟!!!!
بالظبط كده
أيوه سيدنا آدم عليه السلام كان ناقصه " دورة عبادة " مهمة جدا
هي انه ربنا سبحانه وتعالى يكلفه بحاجة يقوم سيدنا آدم ميعملهاش ويعصي أوامر ربنا ،
وبعدين ربنا يعاقبه ويزيل النعمة منه ( الستر )
يقوم سيدنا آدم يحس بالذنب ،
وربنا سبحانه وتعالى يعلمه ازاي يستغفر ويقول ايه علشان يتوب
فالنتيجة ربنا يغفرله ذنبه.....
دي كانت آخر حاجة سيدنا آدم عليه السلام لازم يعملها علشان يبقى جاهز انه يبقى خليفة الأرض
لأن الملائكة معصومين من الخطأ أساسا
" لا يعصون الله ما أمرهم ويفعلون ما يؤمرون "
وابليس ربنا معلموش الاستغفار
🍀🍀🍀🍁🍁🍁🌼🌼🌼
هو ربنا سبحانه وتعالى بيعلمنا ايه ،
بيعلمنا نشعر و نحس بنعمة " الابتلاء "
ربنا عايزنا نغلط علشان " يبتلينا " ويعاقبنا ونحس بزوال النعمة
نقوم نندم ونتوب ونستغفر ، و نقرب من ربنا أكتر ونركز في عبادتنا ليه ونخلص فيها ،
علشان ترجع النعمة لنا تاني .....
ربنا خلقنا علشان نخطئ ولو مش هنخطئ هيعمل ايه سبحانه وتعالى ....
زي ما الحديث الشريف بيقول ... " لو لم تذنبوا لذهب الله بكم وجاء بقوم يذنبون فيستغفرون الله فيغفر لهم"
شوف كده لما تصلي الظهر مثلا في يوم عادي انت مش "مضطر" فيه ومش تحت ابتلاء ولا في كرب وضيق ، بتصلي ازاي؟
وقارن كده لما فعلا تكون في ابتلاء ومزنوق وفي كرب وضيق بتصلي نفس الصلاة ازاي
وبتقرب من ربنا ازاي
وبتدعي قد ايه وأنت بتسجد ،
وبتبكي قد ايه وأنت بتدعي ربنا انه يتوب عليك،
هو ده بالظبط اللي ربنا سبحانه وتعالى عايزه مننا ،
بكده خلاص سيدنا آدم بقى جاهز انه ينزل الأرض ويعمرها،
لان ربنا سبحانه وتعالى اللي علمه الاستغفار زي ما علمه الاسماء كلها ،
وحتفضل كل ذرية ادم يخطئوا ويتوبوا
"كل بني آدم خطاء وخير الخطائين التوابون"
يعني حتى واحنا بنخطئ لسه فينا خير لو تبنا
وكل ما حتبعد عن ربنا بالذنوب
ربنا حيردك ليه تاني بالابتلاء ،
علشان تستغفر
علشان يتوب عليك
يعني متزعلش لو عملت ذنب ، ازعل فعلا لو بعد ما عملته مستغفرتش
في دعاء استغفار جميل جدا أنا بحب أقوله لما أعصي ربنا،
"اللهم ما عصيتك حين عصيتك استخفافا بحقك ولا استهانه بعذابك لكن لسابقة سبق بها علمك فالتوبة إليك والمغفرة لديك ، لا إله إلا أنت سبحانك إني كنت من الظالمين"
استغفروا الله لعلها ساعة استجابة ......
ولعلها ليلة القدر
طبعا أنا جبت القصة من الآخر ....
عشان الخطأ الشائع ينتهي ... ان لولا سيدنا آدم وحوا مأكلوش من الشجرة كان زمانا عايشين في الجنة
سواء كلوا او مأكلوش من الشجرة مكنش مقدر لذرية آدم يعيشوا في الجنة إلا بعد حين ( ولكم في الأرض متاع إلى حين ) ....
يعني مقدر لينا اختبارنا يبقى في الأرض عشان اللي يطيع ربنا بس هو اللي يرجع الجنة تاني ...
🍀🍀🍀🍁🍁🍁🌼🌼🌼
دعاء آدم وحواء معا لله عزوجل كان :
" قالا ربنا ظلمنا أنفسنا وإن لم تغفر لنا وترحمنا لنكونن من الخاسرين "
فاللهم اغفر لنا وارحمنا كما غفرت لآدم وحواء عليهم السلام 🙏
أنت تقرأ
قصص المصحف
Short Storyبنقرا القران ومش عارفين تفسير الكلام ايه هنا قصص ذكرت في القران. هتفهم كل كلمه تقراها بعد كدا
