قصص المصحف

سيدنا موسي

كتير كنت بقف عند الآية اللي بتقول: يَا أَيُّهَا الَّذِينَ آمَنُوا لا تَكُونُوا كَالَّذِينَ آذَوْا مُوسَى فَبَرَّأَهُ اللَّهُ مِمَّا قَالُوا وَكَانَ عِنْدَ اللَّهِ وَجِيهًا.
وكنت بسأل نفسي.. هما الناس اللي ضايقوا سيدنا موسي كانوا بيقولوا إيه؟.
لحد ما عرفت إن سيدنا موسي كان راجل شديد الكسوف والخجل.. عنده حياء غير عادي.. فمكانش يحب حد يشوف جسمه.. ولا بيكشف عورته قدام مخلوق أبدًا، وحتي لو حب يستحمي في النهر كان بيروح لوحده، وطبعًا الناس اللي نفوسها مريضة بدأوا يقولوا كلام غريب، زي إنه عنده امراض في جلده وديدان، ومنهم اللي قال إنه عنده عيوب في رجولته وخايف من نظراتنا ليه، وبدأ الكلام ينتشر، وسيدنا موسي كان عارف نفسه فمكانش بيهتم بكلام حد ولا بيفرق معاه تعليقاتهم السخيفة، ولكنه في يوم راح علشان يعوم في النهر ويغسل جسمه.. فقلع هدومه وحطها فوق حجر، وبعد ما خلص وخارج.. حصل اللي ميخطرش علي باله ولا بال اي حد.. الحجر بأمر من ربنا إتحرك بالهدوم اللي عليه!.. حد يقولي إزاي حجر يتحرك ده جماد!.. اقولك ربنا جعل عصاية سيدنا موسي تتحول لتعبان صخم، وخلاها تشق البحر، وخلاها كمان تخبط الصخور تنفجر من تحتها المية!.. أكيد قادر إنه يحرك حجر ويخليه يبقي اسرع من سيدنا موسي نفسه.. لدرجة إن سيدنا موسي إتخض وفضل يجري ورا الحجر وينادي عليه ويقوله: ثوبي ياحجر!.. والحجر بأمر من ربنا بيتحرك لحد ما وقف في مكان فيه عدد من الناس.. فطبعًا شافوا سيدنا موسي كأنه زي ما ولدته أمه.. لكن إندهشوا لما لقوا إن مفيش حد فيهم أقوي منه في عضلاته ولا أجمل في هيئته وجسمه القمحي، وكأن الكمال والجمال إتجمعوا كلهم فيه، وإتكسفوا كلهم من نفسهم وإتخرسوا، وطبعًا اللي حصل ده كان دفاع من ربنا عن عبده موسي.. لان ربنا بيقول: إن الله يدافع عن الذين آمنوا، وطبعا سيدنا موسي سحب هدومه بسرعه ولبسها وجاب عصايته ومن غيظه فضل يضرب في الحجر لحد ما كسره!.
علشان كده فهمنا معني الآية إن يا مؤمنين بالله متضايقوش النبي محمد بالكلام او بالافعال زي ما إتعمل مع موسي قبل كده، وربنا هو اللي دافع عنه وصغرهم كلهم قدامه.
الكلام ده كلام النبي صلي الله عليه وسلم وهو اللي شرح الآية بنفسه في حديث البخاري.. لكن الشاهد من الكلام إنك مترهقش نفسك علشان تطلع روحك بريء وتفضل تبرر وتتعب اعصابك، ومادام إنت مؤمن بالله يبقي خليك واثق هيدافع عنك ومهما تعبك الكلام وتِقل الحِمل عليك.. هيخففه وهينجيك.

#آمنت_بيك_يارب.☝🏻