قصص المصحف

سيدنا نوح

قصة اليوم .. نبي الله نوح ❤

قصة نبي الله نوح اتذكرت في القرآن 40 مرة ! 🤔🧐

فأكيد قصة مهمة وفيها دروس كثيرة مفيدة للبشر من بعد نوح لقيام الساعة.

بس تعالوا نشوف قصة نبي الله نوح في خمس مشاهد 😀

إقروا القرآن كإنكم أول مرة بتقروه ....
وفكروا في المعاني وركبوا المشاهد جوه دماغكم صوت وصورة ومؤثرات مجسمة ، وحقائق إحنا نعرفها يمكن مكنتش متاحة للي قبلنا ،  

وأهم حاجة تشجعوا أولادكم وانتوا بتحكوا القصص دي يفكروا كده ويبحثوا ويتخيلوا ويتفكروا ، مش يصموا وخلاص

🍀🍀🍀🍁🍁🍁🌼🌼🌼

المشهد الأول :   🎬

بعد ما آدم - عليه السلام - اتوفي بألف سنة ،
كان فيه خمس أشخاص صالحين .....
اسمهم ( ود ، سواع ، يغوث ، يعوق ، نسرا )

الـ5 دول ماتوا

فالشيطان وسوس للناس من بعدهم
قالهم ياه بقى لو عملنا تماثيل ليهم تفكرنا بيهم ،
ده رؤيتهم هتشجع الناس إنهم يفتكروا ربنا .. 😀

اتعملت التماثيل وكان الناس فعلا بيفتكروا ربنا كل ما يشوفوهم وبقت التماثيل دي تشجع الناس على العبادة

عدى الزمان والجيل إتغير  ...
فالشيطان ظهر تاني و وسوس للجيل الجديد ....
قالهم التماثيل دي أكيد غالية عند ربنا ...
أكيد أجدادنا كانوا بياخدوهم واسطة بينهم وبين ربنا .. 😕

إبتدى الناس يتقربوا لله بالتماثيل دي ويعملوهم وسيط كأنهم هيشفعولهم عند ربنا 😕

بمرور السنين ابتدوا يتبركوا بيهم ،
فبدل ما يدعوا ربنا مباشرة ، يطلبوا من التماثيل تدعيلهم ربنا ...
زي ما في ناس قليلةً لسه بتعمل دلوقتي في مقام السيدة زينب والحسين عندنا في مصر وزي ما القليل من العراقيين بيعملوا في مقامات الأنبياء عندهم يتبركوا بالمساجد دي ....
لعن الله قوما اتخذوا قبور أوليائهم مساجدا...

المهم عظموهم وشوية شوية ابتدوا يعبدوهم !

فـ كان ( ود ) هو أول من عُبد من دون الله ..

هنا كان أول شرك وقع ف الأرض ....
رغم إن بدايته كانت نية خير ! ..

🍀🍀🍀🍁🍁🍁🌼🌼🌼

المشهد الثاني :  🎬

ربنا بعتلهم سيدنا نوح وابتدى يدعوهم للتوحيد بربنا ..... ويبطلوا الذنوب اللي بيعملوها

كالعادة اللي إتصدوا للدعوة دي كانوا الملأ من الناس ،
يعني أغنياء القوم وكبراتهم والناس المشهورة فيهم ....

( فَقَالَ الْمَلأُ الَّذِينَ كَفَرُوا مِنْ قَوْمِهِ مَا نَرَاكَ إِلا بَشَرًا مِثْلَنَا وَمَا نَرَاكَ اتَّبَعَكَ إِلا الَّذِينَ هُمْ أَرَاذِلُنَا بَادِيَ الرَّأْيِ وَمَا نَرَى لَكُمْ عَلَيْنَا مِنْ فَضْلٍ بَلْ نَظُنُّكُمْ كَاذِبِينَ )